ИВАН ДА МАРЬЯМича нылӧн вӧлі Марья, Удал зонмӧн вӧлі Вань. Ловзьылісны, быттьӧ гаръяс, Тулысыс кор лоліс шань. Вежӧн лӧсталісны видзьяс, Лӧзӧн ыльӧбаліс ю. Вӧлі гӧгӧр ставыс мича, Вӧлі шуда чужан му. Рытнас гудӧкасис ывла, Луннас уджӧн петіс пӧсь. Коркӧ енэж муркакыліс, Коркӧ сэні вӧлі вӧзь. Кӧсйис пувйыс лоны розъя, Кӧть и кын на вӧлі дзик. «Лӧсьыд жӧ и лоас гозъя!» — Бура тӧдіс коми сикт. Дас кӧкъямыс нывлы тырис, Бурлак зонлы тырис кызь. Но войнаӧн вӧрӧг пырис, Гурйис гӧгӧр тусь и пызь. Прокӧ шуис: «Кузя кыссяс. Немечтӧ он тӧдӧй мӧй?» Мортыс вирӧн водзті мыссис — Тӧдліс первой мирӧвӧй. Ваньӧ воддза нырас сюрис — Абу бать на, сӧмын пи. Понйыс лёк да, ёна пурас. Пескыс эм да, сотас би. «Тэ ӧд локтан?» — тшӧктіс Марья. «Локта, локта!» — кӧсйис Вань. Но кын эрдын сӧмын арйис Кӧнкӧ рытыввылыслань. Сӧмын куим письмӧ вӧлі, Гортысь юасис да мый. Тані на пӧ коляс тӧлыс, Оз на вӧрӧг морӧн лый. «Пиныд вошис», — юӧр воліс Ярӧ Васьлы Пӧкрӧлдор. Муса нывлӧн сувтіс лолыс, Ӧдва ловзис висигсор. «Кыдз нӧ вӧралысьыс вошас?» — Эз, эз эскы сьӧлӧмшӧр. Шыӧдчыліс уна вожӧ Война дыр и война бӧр. Но век ӧтитор и кыліс: «Вошис. Вӧлі ыджыд кось». Кӧсйис ветлыны, да ылын, Кодкӧ-й шуис, мый оз позь. Вӧлі, вӧлі сэк «оз позьыс», Бурджык овны вӧлі чӧв. Мыжаӧсь век кодкӧ водзын Абу ӧтчыд, уна пӧв. Сідзи ӧтнасӧн и оліс, Верӧс сайӧ эз и пет. Кӧть и уна зонмыс воліс, Кисӧ некодлы эз сет. Сӧмын Ваньӧ, муса Ваньӧ, Сэсся некоді эз ков. Сыысь бурыс, сыысь шаньыс Некод му вылын эз ов. Вежкавидзӧмнад да, мый да Ӧтчыд сотіс грека би. Енлы копырасис мыйта, Да эз ло тай ныв ни пи. «Он жӧ асьтӧ тадзи сісьты», — Воліс могӧн ӧти-мӧд. Но и посводзӧдз эз письты, Марья дурӧмтӧ эз тӧд. Абу дӧва, абу гӧтыр, И оз мамӧн некод шу. Абу би весьтын кӧ мӧтыр, Он тай нинӧмсӧ и пу. Ыджыд шогӧн олӧ Марья Уна-уна-уна во. Сійӧ этшаысь нин аръяс, Шуда некор нин оз ло. Гашкӧ, тайӧ вӧльнӧй светас Мортыс бӧрдны чужӧ куш? Жальӧй синва сорӧн петӧ. Висьтӧс помавны ог куж. Векжӧ помсӧ вӧчны колӧ, Сійӧ менам лоас шань: Мед жӧ ыджыд муслун олӧ, Кӧні Марьяыскӧд Вань.
