* * *

Картупеля шаньгаӧй да,
Йӧла-нӧкъя чӧланӧй.
Йӧла-нӧкъя чӧланӧй да,
Мичаника банйӧмӧй.

Мичаника банйӧмӧй да,
Небыд пачысь петӧмӧй.
Небыд пачысь петӧмӧй да,
Выя бордйӧн мавтӧмӧй.

Выя бордйӧн мавтӧмӧй да,
Здукӧн вомын сылысьӧй.
Здукӧн вомын сылысьӧй да,
Сьӧлӧмӧс бурмӧдысьӧй.

Сьӧлӧмӧс бурмӧдысьӧй да,
Олӧмӧс гажӧдысьӧй.
Олӧмӧс гажӧдысьӧй да,
Вылӧмӧс нюжӧдысьӧй.

Вылӧмӧс нюжӧдысьӧй да
Мамӧ тай пӧжалӧма.
Мамӧ тай пӧжалӧма да,
Гӧсьтинеч мӧдӧдӧма.

Гӧсьтинеч мӧдӧдӧма да,
Абу тай вунӧдӧма.
Абу тай вунӧдӧма да,
Кывйӧн на велӧдӧма.

Кывйӧн на велӧдӧма да,
Мед пӧ гортлань волывлӧ.
Мед пӧ гортлань волывлӧ да,
Этша нин пӧ ӧд ола.