ЫДЖЫД БАТЬБур ыджыд батьӧй — Виссарион — Оз вӧлӧм весьтӧ ов. Кӧть видзӧднысӧ абу ён, Но йӧралӧн кодь лов. Эм сійӧ нима паськыд видз — Ю катыдын дзонь кӧдж. Сэн шыльыд вывтасыслӧн идз И ластаыслӧн тшӧтш. Эм сійӧ нима ыджыд му — Сикт кывтыдын дзонь пласт. Сэн водзті вӧлі зӧр и сю, Кӧть ӧні локтӧ рас. Эм сійӧ нима жӧ тар койт — Яг сьӧлӧмын кыр йыв. Но ягыс бырис, куліс мойд, Сэн бордъяыс оз кыв. И керка ыджыд батьлӧн эм, Кӧн вӧлі нянь да сов. Вевт улад олас и мӧд нэм, Да некод сэн оз ов. Кристослӧн нэмӧн ыджыд бать Тась эновтӧма вӧт. Кӧн гуыс, тыртіс коз ли бадь, Оз мамӧ весиг тӧд.
