СЕМӦ ВАСЬ

Семӧ Васьлӧн ыджыд керка —
Кызь кык ӧшинь да вит пач.
Ни оз сісьмы, ни оз жеркав,
Вӧчлӧма тай, кӧчамач!

Семӧ Васьлӧн ыджыд котыр —
Сизим пи да куим ныв.
Енлы — чатӧр, мулы — копыр,
Мортлы — сьӧлӧм шонтан кыв.

Семӧ Васьлӧн ыджыд карта —
Сизим мӧс да куим вӧв.
Гажа кынӧмӧн оз артав,
Мыйта сёйӧ яй да йӧв.

Семӧ Васьлӧн ыджыд кӧдза —
Потшӧс сайын помтӧм йӧр.
Водзӧ паськӧдчӧ да вӧчӧ,
Ӧти пӧлӧ оз нин тӧр.

Семӧ Васьлӧн ыджыд кытшов —
Сьӧла-дозмӧрлы сюрс лэч.
Йӧра вӧтлігӧн оз лыжав,
Ошкысь-кӧинысь оз педз.

Семӧ Васьыс ачыс ыджыд —
Мусянь лоӧ метра кык.
Сійӧ — миян олан мыджӧд,
Пыр и пӧрам, оз кӧ пык.