СИЗИМӦД ПАЛАТАГымыс ветлӧ маті, Ӧшиньяс — тір-тар. Сизимӧд палата. Тулыс. Сыктывкар. Вель на эськӧ гӧрысь, Но тай висьми со. Локті парма шӧрысь, Лёкджык мед эз ло. Гортӧ бӧр нин кыскӧ, Кола сэн ли ог. Эз кӧ мырдӧн ыстӧй, Эг жӧ эськӧ лок. Волӧ ӧшинь дорӧ Гулю да оз пыр. Ӧтитор и кора, Мед эз видзны дыр. Врачӧй мича нюма, Видзӧднысӧ шань. Ичмоньысь мӧй уман, Сё ерӧмакань?! Енэжыслӧн йӧлыс Юкталӧ му эж. Кыддзыс гаръя вӧлі, Видзӧдлі да — веж. Гажтӧм, да он пышйы, Колігад быть ов. Кыдз пу садйын чышъян Ышӧдыштлӧ лов. Юрын кывбур олӧ, Гижнысӧ тай дыш. Меным эськӧ колӧ Ӧні ю да пыж. Гашкӧ на, и гудӧк, Мича сьыланкыв... Сідзи-й мырддьӧ шудӧс Мустӧм койка выв. Лэдзӧй, дона аньяс, Кыланныд ли он? Лэдзӧй, лэдзӧй, шаньяс, Ме нин ӧш кодь ён. Он кӧ лэдзӧй — пышъя, Сы мында и эм. Кыдз пу садйын чышъян Сё пӧв содтас нэм.
