ТУРИПУВ ВЫЛӦ КОВЁР
— Дас ӧти во ӧтлаын олам, — шуӧ гӧтыр, — ставыс миян эм: радейтана удж, бур патера, челядь, цветнӧй телевизор...
— Картупель, пес, — содті ме нюмъёвтігмоз.
— Эн серав, Ваня. Ме збыльысь сёрнита. Весиг сьӧмтор чӧжыштім.
— Уна?
— Ковёр вылӧ тырмӧ нин.
— Мыйла ковёр? Абу-ӧ бурджык коляскаа мотоцикл? Тшакла ветлыны, корӧсьла...
— Ме ог кӧсйы, медым тэ путкыльтін миянӧс канаваӧ. Ковёр ньӧбам. Но висьтав, кытысь тэ аддзылін бур патера, кӧні эськӧ ковёр эз вӧв?
— Аддзылі. Ассьыным, шуам. Но тэ ньӧб, Светлана, кӧть кык ковёр, сьӧмыд кӧ тырмӧ.
— Важӧн нин ньӧби эськӧ, Ваня, да некытысь: оз вузавны. Сӧмын турипув вылӧ и сетӧны: кыксё килограмм — и ковёр тэнад!
— Кык центнер? Сёрни доныс оз сулав, келавны кӧ, дерт, нюрті став сиктӧн лун-мӧд-коймӧд.
— Ӧтнад вотан вежонӧн: отпускӧ петін.
Ті ставныд зэв бура тӧданныд: гӧтыркӧд весьшӧрӧ вензьыны. Та вӧсна ме босьті кӧрзина, мешӧк да мӧд луннас жӧ соби медся матысса нюрӧ.
Лунтыр уялі пидзӧсчанясьӧмӧн ньӧти дышӧдчытӧг, грекӧн сорӧн ӧкті пӧшти кӧрзина джын турипув. Гортын, ёнтысь коскӧс зыралігмоз, артышті: татшӧм ӧдъясӧн вотчигад ковмас собавны нюръясті нӧшта сизимдасысь кымын.
Турипув весалігмоз, Светлана нюмъёвтіс:
— Но, вот аддзан, куим килограмм турипув эм нин. А колӧ кыксё килограмм. Ӧтпускыд тэнад вӧлись на заводитчис. Сідзкӧ...
— Сідзкӧ, сэсся ньӧтчыдысь ог мун, кӧть тэ ӧшӧд стенас менӧ ковёр пыдди!
— Он кӧ, Ванюша, мыйкӧ мӧдтор думышт, но ковёр миянлы быть колӧ!
Ме думыштчи. Ӧтарсянь кӧ видзӧдлыны, гӧтыр, дерт, ышмыштӧма. А мӧдарсянь кӧ, зэв любӧ, кор кок улад пушъялӧ небыд да шоныд ковёр. Но коймӧд боксянь кӧ — кытысь босьтны кык центнер турипув?!
Дыр мӧвпалӧм бӧрын аддзи петан туй. Видзӧда ӧтчыд: кутшӧмкӧ пӧчӧ сдайтӧ айкинаса столӧвӧйӧ куим ведра турипув. Вот ӧктӧма!
Недыр мысти вотӧссӧ петкӧдісны магазинӧ. Вузавны, сідзкӧ. Ньӧбны кӧ нин-а? Ньӧби став кызь вит килограммсӧ да бӧр нуи столӧвӧйӧ. Босьтісны, сетісны зэв колана квитанция, сьӧм дай пасибӧ на висьталісны. Зэв бур!
Час мысти менсьым турипувйӧс нуисны магазинӧ. Ме, кыдзи ті, дерт, гӧгӧрвоинныд нин, бара ньӧби да бӧр сдайті столӧвӧйӧ. Гижисны мӧд квитанция, мыччисны сьӧм. Дерт, сетісны этшаджык, мыйта мынті магазинын, зато центнер джын турипув сдайтӧма нин лои!
Зэв кыпыда пыри магазинӧ коймӧдысь. Вузасьысь шензьӧ:
— Бара тэ? Мый вылӧ тэныд та мында турипувйыс?
— Меным та мындаыс, дерт, оз ков, но Япония корӧ.
— Япония?!
— Да. Менам рӧдня сэні олӧ. Русско-японскӧй война дырйи менам дедӧ усьӧма караб вывсьыс бушкола пемыд войын. Сэсся уйӧма Цусимскӧй пролив вомӧн да ӧшыбкаӧн веськалӧма Японияӧ. Сэні дедӧс сувтӧдас якӧр вылӧ мича японка, и со ӧні налӧн пиыс и корӧ турипув. Сійӧ уджалӧ ресторанын официантӧн, а кӧзяиныс тӧдмалӧма, мый рӧбӧтникыслӧн рӧдняыс олӧ Айкинаын, зэв матын Аквадса да Тыдорса нюръяс дорын, и мырдӧн корӧ турипув.
— Босьт, инӧ, мен нӧ мый, — эскытӧг нюмъёвтіс вузасьысь. — весиг бурджык: оз ков унаысь веситчыны.
Татшӧм ногӧн ме «воті» да сдайті кык центнер турипув. Ставыслы вӧлі зэв долыд, торйӧн нин радліс гӧтыр: мича ковёр лои. Заготконтора дӧвӧлен жӧ коли: ӧти лунӧ тыри турипув заптан планыс.
Вотӧссӧ, кодӧс сдайті да ньӧби медбӧръяысьсӧ, лэччӧді гортӧ. Тӧлыс кузь, буретш лоӧ кисельтӧ да морстӧ пуны.
Гӧтыр ӧні сёрнитӧ мӧд ковёр йылысь. А мый, ме абу паныд. Регыд со бара воас турипувйыд...
