СУББОТНИК

Евсей Пахомовичлы, промкомбинатса директорлы, воис индӧд: субӧтаӧ пӧ вӧскресник, ставӧн видзьяс вылӧ, совхозлы отсасьны.

Директор чукӧртіс уджалысь йӧзӧс да висьталіс:

— Ставным ми, ёртъяс, куимысь лун пуксьылам пызан сайӧ сёйны, нӧшта ӧтчыд шуа, куимысь лун, а ӧткымынъяс — нёльысь-витысь, а мукӧддырйи и унджыкысь на...

Залын серӧктісны. Слесарь Вася Нюмов видзӧдліс директорлӧн ыджыд кынӧм вылӧ да гораа серӧктіс.

— Нинӧм сераланаыс тані абу, — кӧдзыда видзӧдліс сы вылӧ Евсей Пахомович. — Ставным ми радейтам жаритӧм яй, нӧк, вый да кольк. А ставсӧ тайӧс сетӧ сикт, нӧшта ӧтчыд шуа, сикт — колхозъяс да совхозъяс. Сідзкӧ, колӧ заптыны кӧрым — турун, силос, сенаж. Тіян кык шойччан лун, нӧшта ӧтчыд шуа, кык — субӧта да вӧскресенньӧ. Субӧтаӧ ставным петам видзьяс вылӧ — вӧскресник!

Паныд некод нинӧм эз шу: жар да васӧд сынӧда цехъясын уджалӧм бӧрын быдӧнлы вӧлі окота ветлыны веж видзьяс вылӧ.

Уджалан лун помасигӧн Евсей Пахомович корис аслас кабинетӧ Вася Нюмовӧс да кык уджалысьӧс.

— Тіянлы, ёртъяс, ме сета торъя удж, нӧшта ӧтчыд шуа, торъяӧс, бурӧс.

— Кутшӧмӧс нӧ? — юаліс Вася.

Директор стрӧга видзӧдліс сы вылӧ:

— Аски локтанныд ме ордӧ, гортӧ, кӧкъямыс час кежлӧ, сэки и висьтала.

Субӧтаӧ уджалысьяс воисны индӧм кадӧ. Куимнанныс кыдзкӧ тӧрӧдчӧмаӧсь Васялӧн ичӧтик мотоцикл вылӧ.

— Тіянлы, ёртъяс, дзик ӧткодь, кӧні уджыштны — тані, ӧшинь улын, либӧ видзьяс вылын, — меліа сёрнитіс Евсей Пахомович. — Аддзанныд, менам пескӧй век на пилиттӧм да поткӧдлытӧм. Век некор: уджыс юр выв тыр. Тіянлы, куим ён мортлы, нинӧм оз сулав пилитыштны да поткӧдлыштны песторсӧ, нӧшта ӧтчыд шуа, нинӧм оз сулав — ворсігмоз и вӧчыштанныд.

Уджалысьяс видзӧдлісны ёрта-ёрт выланыс. Евсей Пахомович вайис бензопила.

— Пилаыс ыръянитӧ неуна, но да нинӧм: Нюмов жӧ — слесарь, ӧти здукӧ лӧсьӧдыштас. Сідз ӧд, Вася? Да тэ эн чукрась! Директорыдлы кӧ тӧкӧтьӧ отсыштан, гӧгйыд оз на, гашкӧ, вӧрзьы!

Директор нюммуніс:

— Вай видзӧдлы, Вася, пиласӧ да заводитӧй, а ме сурла кодӧскӧ ыстыла.

— Мый сы вылӧ видзӧднысӧ, — зумыша шыасис Вася, восьтіс бензин баклысь крансӧ, малыштіс карбюратор да сідз нетшыштіс стартёр ручкаӧд, мый муртса эз орӧд троссӧ. Пила повзьӧмпырысь уркнитіс.

— Со ӧд! — радпырысь шемӧсмис Евсей Пахомович. — Тӧдӧ пилаыс, код киын. Ме тӧрыт рытывбыд нокси да эг вермы заведитны-а... Но вот и бур, уджыштӧй, сідзкӧ, неуна...

Евсей Пахомович муніс.

— Сур ваяс, — надеяӧн шуис ӧти.

— Но да, паськӧд вомтӧ, — шуис Вася. — Тӧдмаласны ёртъясным, кутшӧм субӧтник вылын ми вӧлім — олӧм оз ло! Йӧзыс чӧвтӧны, а ми... Тьпу!

Вася зэв мичаа да кужӧмӧн ёрччыштіс, сэсся заводитіс бензопиласӧ. Пилитіс нёль чурка, сувтӧдаліс найӧс, ӧти вылӧ пуксис ачыс да индіс ёртъясыслы:

— Шойччыштӧй!

Пуксисны. Чӧв олыштісны.

— А нёльӧд чуркасӧ мыйла пилитін?

— Сійӧ пызан пыдди лоӧ, — нюмъёвтіс Вася. — Кытчӧкӧ ӧд ковмас пуктыны сур тыра бидонсӧ да кружкаяссӧ! Ме ветла чой дорӧ, кежала: шайт-мӧдтӧ да бидонтӧ сетас на, гашкӧ...

Евсей Пахомович тайӧ кадас куйліс ыркыдінын да чӧсмасис кӧдзыд сурӧн, кодӧс рытнас на гӧтырыс пуктыліс кӧзӧд вылӧ. Субӧтник вылӧ аслас здоровӧй коллективкӧд сійӧ эз мун: кыдзкӧ абу мича прамӧй йӧзкӧд. Главнӧйсӧ сійӧ вӧчис — котыртіс массаяссӧ, мед найӧ и уджалӧны.

Директор кывзысьыштіс. Пес сарай дорын вӧлі лӧнь. Евсей Пахомович петіс видзӧдлыны.

Уджалысьяс пукалісны да лабутнӧя сёрнитісны олӧм-вылӧм йылысь. Ӧти шуӧ: медся бур закускаыс пӧ сола ӧгурцы, а Вася вензьӧ, сола тшакысь нӧ бурджык нинӧм абу. Куимнанныслӧн кианыс вӧлі быгъя сур тыра кружка.

— Но тадзи оз жӧ позь, ёртъяс! — пузис директор. — Нӧшта ӧтчыд шуа: оз позь тадзи, абу мича!

— Бензопилаыс ыръянитӧ, Евсей Пахомович, ті жӧ асьныд тӧданныд, — ышловзис Вася.

— Дак лӧсьӧд, тэ жӧ слесарь!

— Искраыс воши... Лоӧ разьлыны двигательсӧ ставнас. Съёмник колӧ...

— Вот и ветлы да вай! Нӧшта ӧтчыд шуа: ветлы, вай да лӧсьӧд!

— Лоӧ ветлыны...

Здук-мӧд мысти Вася тӧвзис мотоцикл вылын навӧлӧкӧ. Ӧдйӧ корсис бригадирӧс да пӧся шӧпкӧдіс сылы:

— Ыстыв, другӧ, кодӧскӧ Евсей Пахомович дорӧ да тшӧкты висьтавны: воліс пӧ ачыс, видзӧдліс, ставыс-ӧ видзьяс вылын, но эз пӧ аддзы тіянӧс, Евсей Пахомович, да дыр скӧрысь видчис. Ыстыв, он кут каитчыны: нёль чӧвтысь содтӧд локтасны!

Бригадир дзик пыр жӧ мӧдӧдіс верзьӧма детинкаӧс.

Вася, дерт жӧ, вевъяліс бӧр локны ёна водзджык и ӧні зіля лукйысис бензопилаын.

— Евсей дядь! — горӧдіс потшӧс сайсянь верзьӧма зонка. — Бригадир тшӧктіс висьтавны: воліс пӧ ачыс, абу аддзӧма тэнӧ да зэв ёна видчӧма, мед пӧ ӧні жӧ локтӧ видзьяс вылӧ...

Евсей Пахомовичлӧн кӧдзаліс мышкыс: «Иван Иваныч, сідзкӧ, воліс! Мый оз и пукавсьы гортас. Но и но!»

— Мунамӧй, ёртъяс! — пыр жӧ мӧдӧдчис Евсей Пахомович. — Сійӧ шмонитны оз радейт, нӧшта ӧтчыд висьтала, оз радейт: сюран кӧ — шонтас сідз, мый кулӧм бӧрад на вежон-мӧд казьтывны кутан!

И со Евсей Пахомович чӧвтӧ, кисьтӧ сола пӧсь. Турун пызь киссьӧ юр вылас, морӧс вылас, пырӧ, дерт, и гач пытшкӧ, сибдӧ пӧсялӧм яй бердас. Гӧгӧрбок лудны кутіс. Сэтчӧ жӧ, ном-геб сёйӧ.

Евсей Пахомович ружтіс, но терпитіс: гашкӧ пӧ, удайтчас усйысьны. Но вот бригадир шуӧ:

— Туруныс кос, чегъясьӧ, позьӧ талялӧмӧн чӧвтны. Гашкӧ, ті, Евсей Пахомович, кавшасьланныд зорӧд вылас? Тіян сьӧктаныд ничеводжык.

Директор рад лои: «А ӧд збыльысь! Зорӧд вылад и тӧвру пӧлялыштӧ, и турунсӧ оз ков лэптавны, сӧмын таляв!» Но недыр радліс Евсей Пахомович. Вит чӧвтысь уджалісны дышӧдчытӧг. Гажаа дзуртісны лэбынъяс, и турун помасьлытӧг лыбис гырысь пластъясӧн. Пахомович муртса на удитас кавшасьны ӧти пласт вылӧ, оз вевъяв лолыштны, а юр вывтіыс тырӧма нин турунӧн. Пӧсь киссис шорӧн...

Рыт. Пиньяссӧ топӧдӧмӧн век на мырсьӧ директор. Нёльӧд зорӧд нин помалӧны, а уджлӧн помыс оз на тыдав. Чӧвтысьяс, Вася кындзи, со мунісны панны сылы зорӧд.

Слесарь лэпталіс коляс турунсӧ, а Евсей Пахомович, кыдзи кужис, сигӧртіс зорӧдсӧ.

Но вот и эштіс. Вася вайӧдіс турун юръяс кыскалысь вӧв, босьтіс гез да ӧвтыштчис:

— Кут, Евсей Пахомыч!

Гез лэбзис-нюжаліс зорӧд вылӧ, но том вӧв повзис ӧвтыштчӧмысь, шыбитчис бокӧ да скачӧн тӧвзис код тӧдас кытчӧ.

— Тпру-у! — Вася уськӧдчис вӧв бӧрся, и кыкнанныс саялісны кустъяс пиӧ.

Шӧйӧвошӧм Евсей Пахомович колис ӧтнас. Джуджыдысь-джуджыд зорӧд, кӧть и прамӧякодь пыклӧма вӧлі, век жӧ быд вӧрзьыштігӧн шатовмунліс. Пахомыч видзӧдліс увлань и сылӧн кӧдзаліс кынӧм пытшкӧсыс, а пидзӧсъясыс лигышмунісны. Директор пидзӧсчанясис да тіралысь кияснас шашаритчис зорӧд пинь помӧ.

Кад муніс, шонді лэччыны нин кутіс, а директор век на сулаліс пидзӧсъяс вылас. Шогӧ усис мортыд: гашкӧ пӧ, йӧзыс важӧн нин мунісны гортаныс да ӧні сералӧны сы вылын. Нюмов — чиган кодь зон, сылӧн быдторйыс артмас. Мый вӧчны? Мый вӧчны-а? Чеччыштны? Директор малыштіс кынӧмсӧ да йӧжгыльтчис: «Та ыджда кынӧмнад та вылнасянь кӧ чеччыштан — пом! Но ӧд он жӧ, рака моз, узьмӧдчы татчӧ, зорӧд вылас! Гашкӧ, разьны зорӧдсӧ джынйӧдзыс кымын? А мый шуасны совхозса уджалысьяс, руководство? Вот, шуасны, тайӧ да — прамӧя отсыштіс Пахомычыд совхозыдлы турунтӧ заптыны! Сэсся, мӧдарсянь кӧ видзӧдлыны, — разян да ковмас став семьяӧн вежон чӧж бергавны зорӧд гӧгӧрыс...»

Евсей Пахомович гажтӧма видзӧдліс енэжӧ, кысянь ӧдвакӧ позис виччысьны отсӧг, да кынмис: енэжыс рытыввывсянь ставнас сьӧдасьӧма, дай югъяліс нин чардби, кадысь кадӧ мурӧстліс ылысса гым. Шуштӧм лои Пахомычлы. Сійӧ заводитіс зіля шыблавны кок увсьыс турунсӧ: пыра пӧ сабри пытшкас да, гашкӧ, ловйӧн на коля.

Тайӧ здукас кыліс гӧнитысь вӧвлӧн кок шы, и кустъяс сайсянь быйкнитіс верзьӧма Вася. Директор сэтшӧм рад лои, мый горӧбтіс да муртса эз усь зорӧд вывсьыс.

— Вот чӧртыд! — видчис Вася вӧв вылас. — Километр куим вӧтчи лешак бӧрся, да ӧд некыдз оз на сетчы кутнысӧ! Пасибӧ, конюк отсаліс.

Нюмов, вӧв вывсьыс лэччытӧг, шыбитіс Пахомычлы гез, и шуда директор лои чорыд му вылын. Любӧпырысь зымнитіс кокнас да долыдпырысь лолыштіс.

— А ничево талун чӧвтыштім, Евсей Пахомович! Купайтчам — и гортӧ!