СТАВЫС НА ВОДЗЫН

Тӧлысь сайын на Таня вӧлі муртса тӧдсаӧн, а талун со — медся матысса да муса — рӧднӧй гӧтыр! Кык вежон нин ӧтлаын олам.

Сё майбырӧй, кутшӧм жӧ нин лӧсьыд кургыны-овны том гӧтыркӧд! Радлун вӧсна юрыд бергӧдчӧ. Сідзи и окота вӧчны муса Танялы мыйкӧ бурӧс. Шуам, картупель весавны да пуны. А мыйла эськӧ и не пуны? Кор Таня ньӧбис сола чери, тадзи и вӧчи.

Гӧтыр зэв чӧскыдпырысь сёйис черисӧ пӧсь картупель сорӧн, сэсся шуыштіс:

— Картошкаыс чӧскыдджык, кор «мундира»... Кыш улас пӧ став витаминыс.

Мӧдысь пуи, дерт, «мундирӧн» нин.

— Тэныд — мый, дыш вӧлі весавнысӧ? — шензис Таня.

Ме шензьышті жӧ, но нинӧм эг шу.

Субӧтаӧ Таня муніс магазинъяс гӧгӧртны. «Дыркодь ветлӧдлас, — думышті ме. — Вевъяла джоджъяс чышкыны. Вот рад лоӧ! Молодеч, шуас, Васенька! И окыштас».

Зэв бура чышкалі джоджъяс, ни ӧти ёгтор эз коль, бус ни.

Локтіс кӧзяйка, видзӧдліс гӧгӧр да шуис:

— Позис и мыськалыштны, абу сьӧкыд удж.

Мӧдысь ме тадзи и вӧчи. Но окыштӧм пыдди гӧтыр ышловзис:

— Тырмымӧн вӧлі и чышкыштны. Ме жӧ тӧрыт на дзимлялі квартиранымӧс. Али, чайтан, ме лёка мыськалі джоджъяссӧ?

Тадзи и кутім овны. Кӧть мый вӧч — ставыс неладнӧ. Мӧвпалі-мӧвпалі да шуи: «Дзик нинӧм ог кут вӧчны!»

Субӧтаӧ лунтыр вӧлі диван вылын. Таня чӧв олӧ, ме — тожӧ. Вӧскресенньӧӧ бара воді. Матыстчис гӧтыр, чӧв олыштіс да ышловзис:

— Куйлан? Но, но, куйлы, шойччы. А вед тэ, Васенька, вежон чӧж вӧлін збыльысь бур верӧсӧн!

Ме шуи крепыда нуӧдны чорыд визь и водзӧ. Но выльлунӧ рытнас шӧйӧвоши: кухняын — раскладушка, эшкын да пӧдушка. Пызан вылын гижӧд: «Ужнайт да вод узьны». Видзӧдлі: миян узьлан жыр топыда пӧдлалӧма.

Торйӧдчӧм йылысь шыӧдчӧм эг сет: юмов тӧлысьыс эз на помассьы. А гашкӧ, ӧтувъя олӧмыс кыдзкӧ-мыйкӧ ладмас на? Гашкӧ, ставыс на водзын?