СЕНЯ, БЫДТЫ КЫЧАНЪЯСӦС!
— Сеня, тэ? Лок, лок! Мый посводзас сулалан, пыр. Шыть, лешакъяс! Сёрни ті вӧсна оз кыв. Прӧйдит, пуксьы, Сеня.
Но мый, кутшӧма нин олан? Кывлі, кык баля пӧ ньӧбӧмыд? Он ӧмӧй тэ, ме моз жӧ, коммунальнӧй квартираын ов? Кӧні нӧ найӧс видзан, крӧвать улад али мый? Пес сарай дорад гид вӧчин? Мыйта удж! Йӧйталӧм тайӧ, Сеня. Лӧсьӧдін эськӧ, ме моз жӧ, прамӧйджык пон — и нинӧм вӧсна оз ков шогсьыны.
Да и мыйӧн вердан ыжъястӧ? Турун заптыны ковмас. Ывлаыс жар, ном-геб, а тэ упкы-ытшкы, сэсся нӧбйӧн кыскав... А понтӧ дивъя видзнытӧ. Нянь ньӧбан кӧрыш-мӧд — и верд польдтӧдзыс. Но мукӧддырйи, дерт, шыд чугунсьыд лы шыбитлывлан...
Ыжтӧ быдтан — гожӧмбыд гӧнсӧ шырны ковмас. Бара лунтыр ноксьыны, да нӧшта, гашкӧ, и кыкӧн на. Тэ кутан юрӧдыс, а гӧтырыд шырӧ. А понтӧ оз ков шырны. Дерт, шырны, шуам, позьӧ, но мый вӧчан пон гӧннас? Да сэсся шырӧм понйыд абу мича дай тӧвнад кынмыны кутас.
Сэсся ыж — сійӧ ыж и эм: век кытчӧкӧ вошӧма. Корсь сійӧс лунтыр. А кытысь корсян? Гашкӧ, важӧн нин понъяс сёйисны. А понйыд, другӧ, некор оз вош, век бӧрсяньыд вӧтлысьӧ.
Кор ме татчӧ овмӧдчи — видзӧда: суседлӧн эм кукань судта кӧбель. Меным завидь лои. Лӧсьӧді жӧ понтӧ, ӧти бур морт, пасибӧ сылы, дон босьттӧг сетіс. Во сайын пиянасис, куим кычан козьналіс, и куимнанныс — энь. Водзті мамыс керкаын узьліс — кынмӧ вӧлі. А сэсся нывъясыс лоины, посводзӧ овмӧдчисны. Сэні жӧ и суседлӧн кӧбельыс. Зэв шоныда узьлӧны!
Мукӧддырйи, кор понъяс кӧлысясьӧны, зэв гажа овлывлӧ. Во, концерт вӧчасны! Вой шӧр войын миян уличавывса керкаясысь став олысьясыс палялӧны.
Неважӧн менам нёльнан понйыс кычанасисны. Ог тӧд, кымын кычан, эг на вевъяв лыддьынысӧ, но дас вит кымын, чайта, эм, абу кӧ унджык. Сета, колӧкӧ, кымынкӧ кычан. Мыйла оз ков? Тэ вот, Сеня, баляяс вылад, гашкӧ, дас шайт шыбитін. А ме тэн сета дас кычан и дзик прӧстӧысь!
Тырим понъясӧн? Сӧрӧм! Миян улича вылын, ме чайта, сё кымын пон на сӧмын и шӧйтӧ. Но тэ век жӧ босьт кӧть вит кымын кычан. Зэв бур да ён понъяс быдмасны...
Кыдзи «мый вӧчан?». Ыжъястӧ тэ быдтан, сёян и — абу. А быдтан кӧ вит-ӧ-квайт пон — тӧдан, кутшӧм вын тэнад лоӧ! Вӧчан кокньыдик додь, доддялан понъястӧ да удж вылад тӧвзян. Сэсся пестӧ да ватӧ ваявны позьӧ. Либӧ велӧдан понъястӧ тшак вотны. Ӧти гожӧмӧн озырмыны верман!
Сеня, кытчӧ нӧ тэ? Ну кӧть куимӧс кымын! Суседъясыдлы вӧзъян, аслыд быдтан ӧтикӧс, ыжъястӧ дӧзьӧритны кутас.
Босьт кӧть ӧти кычан... Кытчӧ нӧ тэ, Сеня? Нӧрӧвитлы, Сеня!..
