ПОЛӦМ БЫРИ

Югыднад ставыс зэв збойӧсь. Веня збой жӧ. Рӧмдыны заводитас — быдӧн раммӧны. Сідзи жӧ и Веня. А пемдас — унаӧн полӧны пемыдсьыс. Веня полӧ жӧ.

Тӧдӧ нин: гӧбӧчын некод абу, луннас на сэтчӧ пыраліс варенньӧла. А рытын пыравны оз лысьт, кӧть дас банка варенньӧ пукты. Полӧ пырнысӧ: сёясны. А коді сёяс — ачыс оз тӧд.

Пемыд посводзысь пыригӧн чирк моз чеччыштас жырйӧ да тэрмасьӧмӧн сэтшӧма швачкас ӧдзӧснас — муртса коклябӧръясыс оз сиптыссьыны. Быттьӧ кодкӧ вӧтчӧ сы бӧрся да вот-вот кватитас.

Нӧшта на ёна полӧ Веня Сьӧд шорысь. Дай абу и дивӧ. Туй ӧтар-мӧдарас шуштӧм, лӧнь козъя вӧр да кустъяс.

А шорыс — улын-улын, кӧнкӧ бужӧд пыдӧсас, сэні весиг шондіа лунӧ рӧмыд. Ыджыд из тыдалӧ. Сы вылын войяснас, дерт жӧ, кодкӧ пукалӧ-кыйӧдчӧ. Тані весиг лэбачьяс оз сьывны. Рӧмыднас пемыд нин, а пемыднас — ой-ой-ёй! Пос вылас китӧ нюжӧдан — еджыд ки пыдӧсыд оз тыдав. А кутшӧмджык, сідзкӧ, уліас, шор дорас?! Сэсянь, колӧ чайтны, весиг енэжсьыс кодзувъяс оз тыдавны.

Веня век котӧрӧн вуджӧ Сьӧд шор вомӧн рытгорувъясын. Быть ӧд: ӧтарсянь и мӧдарсянь, дерт жӧ, кустъяс сайсянь кыйӧдчӧны, дай бӧрсяньыс вӧтчӧны код тӧдас кымынӧн! И ӧд некод оз шыась ни оз тыдав, та вӧсна нӧшта на шуштӧмджык.

Илля дедыс сералӧ: тэ пӧ, Веня, миян герой!

Ачыс, гашкӧ, полӧ жӧ-а. Веня юаліс:

— А тэ, дедӧ, Сьӧд шор дорӧ войын лысьтан лэччывны?

— Мый нӧ ме сэні войнас вӧча? — шензьӧ дед.

— Полан, сідзкӧ! — радлӧ Веня. — Заклад вартам: он лысьт войын мунны! Вай каллянтӧ, ме пукта ыджыд из вылас. Ваян кӧ вой шӧр войын, сідзкӧ, он пов.

— Ак тэ, полысь кӧч! Ачыд полан дай мукӧдсӧ сэтшӧмӧн жӧ думайтан.

Дед думыштчис, сэсся мыччис каллянсӧ.

— На, ну! Да тэрмась, рӧмдӧ нин со.

Веня нуис дедыслысь каллянсӧ Сьӧд шорӧ. Лэччӧдіс уліас. Крут. Но мӧс кок туйяс эмӧсь: юны, буракӧ, волывлӧны.

Пуктіс каллянсӧ ыджыд из вылӧ. Сюся да полігтырйи дзоргис. Чӧв-лӧнь. Сӧмын шорыс сяльгӧ-визувтӧ. Кустъяс сулалӧны лӧня жӧ. Некод абу. Абу, но мыйла нӧ войнас шуштӧм?

Ворсігмоз дедлысь каллянсӧ вевттяліс из торъясӧн. Мыссис шор ванас. Юыштіс. Весиг пукыштіс из вылас. А мый, войнас кӧ волыны татчӧ? Сёяс ӧмӧй нӧ кодкӧ?

Мӧвпалӧмӧн муніс гортас. Рытбыд бергаліс дедыс дорын, мед сійӧ гусьӧн оз ветлы каллянысла ёна пемдытӧдз. Пемдӧм бӧрын шыасис дед дорас.

— Дедӧ, ветлы нин калляныдла, зэв нин пемыд!

— Гашкӧ, кыкӧн ветлам, герой!

— Ӧтнад полан? — рад лои Веня.

— Ме, гашкӧ, эськӧ ог и пов, да тэ, гашкӧ, онджык кут повны. Абу ӧд ошкана делӧ: нинӧм абусьыс полан.

— Ветлам инӧ, полан тай ӧтнад да, — веськодьпырысь шуис Веня.

Сьӧд шор абу ылын: сиктсянь верст джын сайын кымын.

Лэччисны шорӧ. Сап пемыд. Кималасӧн-сорӧн матыстчисны ыджыд из дорӧ.

— Со калляныд, — мыччис Веня.

— Пуксьы, шойччышт, — шуис дед, пуксис из вылӧ да пестіс каллянсӧ. — Кывзысьышт, пиук.

Веня чошнитіс пельяссӧ. Сяльгис-варовитіс шор.

— Шорыс сӧмын сёрнитӧ, дедӧ, — шыасис Веня.

— Сэсся нинӧм оз кыв?

— Оз.

— А мый аддзан?

— Мый нӧ аддзан, сап пемыд да?

— А всё-таки?

Веня дзоргис пемыдас, сэсся вывлань видзӧдліс. Сьӧд енэжсянь дзирдалісны уна лыда кодзувъяс — лӧз, еджыд. Муртса-муртса тыдыштіс послӧн мыгӧрыс.

— Кодзувъяс со да поскыс мыграсьыштӧ...

— Мыйысь нӧ эськӧ полан?

— Ме ог тӧд, — ышловзис Веня, — пола тай-а...

— Аддзан, некод жӧ абу, — шпуткис дед. — Зверь-пӧтка узьӧны жӧ. Шыръяс, гашкӧ, кӧнкӧ котралӧны да лягушаяс чеччалӧны.

Венялӧн серамыс петіс.

— Вот сійӧ и эм, серамыд петӧ со аслад. Тӧдан: нинӧмысь повнысӧ. Гашкӧ, пукыштан тані, а ме мӧдӧдча.

— Пукышта, — лов шысӧ кутӧмӧн шуис Веня. Дед пошкигтырйи кайис пос вылӧ, сулыштіс сэні.

— Но мый? — юаліс сэсянь. — Пукалан?

— Пукала, — збодера шыасис Веня. — Да тэ мун, ме ог пов.

— Но, ме муна, сідзкӧ.

— Мун, ме суӧда.

Дед кызӧдыштіс да муніс. Веня пукаліс. Чӧв-лӧнь. Пемыд. Шыч ни рач. Сӧмын збоя сёльгӧ-сёрнитӧ шор да енэжсянь гажаа читкырасьӧны уна рӧма кодзувъяс.

«А мыйысь и полі?» — ыджыда ышловзис да шензьыштіс ас кежсьыс Веня. Гортланьыс мӧдӧдчис надзӧник, вомгорулас сьылігтырйи. «Дед, кӧнкӧ, ылын нин», — мӧвпаліс зонка, но аддзис неылысь ӧзйысь каллянлысь гӧрд чут да кыліс дедыслысь кызӧктӧмсӧ.

— Дедӧ!

— Но лок, лок, герой! — збодера шыасис дед. — Виччысьышті, мися, полан, гашкӧ, гажтӧм лоӧ локнытӧ да.

— Мый тэ, дедӧ! Сьӧд шор дорын пукалӧм бӧрын ме некутшӧм пемыдысь ог пов! Серамӧ петӧ: гӧбӧчӧ пола вӧлі лэччывны битӧг.

— Ӧні эськӧ ӧтнад ветлан он Сьӧд шор дорӧ, пуктӧма кӧ ыджыд из вылас, шуам, этайӧ уклада пуртсӧ?

— Ветла, мун пукты!

— А буди, оз и ков нин нунысӧ-а? Тэ ӧд бурджыктор нин вайин сэтысь.

— Мый вайи? — эз гӧгӧрво Веня.

— Ме думысь, Веня, Сьӧд шор дорысь тэ вайин пемыдысь повтӧмлун. Тайӧ, пиук, абу этша.