КУЛӦМ ЛОВ ЛОВЗЬӦДӦМ

«Ловъя Вичко» чукӧр ловзис,
Шуӧ: «Кыдзкӧ вайӧ
Лев Толстӧйлысь ёрӧм ловсӧ
Кыпӧдамӧ райӧ!

Дыр нин лолыс куйліс адын,
Сир би пытшкын пусис — 
Мед нин сэсся святӧй радӧ
Ӧні, коньӧр, пуксяс!..

Толстӧй пыдди — мӧдӧс ёрам, — 
Эм ӧд уна тӧдса:
Колчаклысь кӧть ловсӧ дорам,
Кӧть важ сарлысь рӧдсӧ;

Позьӧ ёрны Распутинӧс,
Адӧ сюйны дзикӧн,
Керенскӧйӧс, Деникинӧс,
Эм на ӧд и Тикӧн...

Коді сувтӧ власьтлы паныд — 
Ставсӧ позьӧ ёрны!
Татшӧм миян ӧні тані
Колӧ лоны сёрни»...

Ок тэ, «Вичко» ӧдва «Ловъя»,
Зэв жӧ нин тэ тешкодь!
Прӧста вӧрӧшитан ловъяс — 
Лев Толстӧйлы веськодь!

Ластитчыны думсьыд петан
Сӧветскӧй власьт водзын:
Гӧтов сылы «многа лета»
Сьывны вӧлтар водзын.

Важӧн-ӧ на «анапема»
Тайӧ власьтлы курксін?..
Кучикыд кӧть вежсьӧ тэнад — 
Сьӧлӧмыд оз бурсьы-й.