ВОЧАКЫВ ИЛЛЯ ВАСЬ ЛЫТКИНЛЫ

Ми тэкӧд зэв нин уна гижлім, позьӧ али оз газет лэдзны комиӧн. Тэсянь ӧні воис меным «ӧтвет», тэ бара шуан: «Позьӧ пӧ кокньыдика лэдзны коми газет». Кызмырдӧн, дерт, позьӧ: позьтӧмтор ӧд нинӧм абу му вылын, — шуласны тай: «Сӧмын пӧ «небесаӧ» оз позь кайны».

Позьӧ и газет лэдзны комиӧн, толькӧ со кутшӧм условйӧясӧн: ӧти-кӧ, став коми наборщикъяссӧ сувтӧдны дзик газет вылӧ; мӧд-кӧ, став составсӧ ӧнія редакцияысь вежны (ӧні редакцияын некод оз куж комиӧн гижны) да пуктыны сэтчӧ дзик коми гижысьясӧс; сэсся мед вӧлі коми редактор, коми корректор, коми выпускающий, коми метранпаж, коми хроникёр, коми пишущая машина, коми машинистка, — шуны кӧ, мед газет дорын уджалысьясыс вӧліны ставныс коми (контора да экспедиция кындзи).

Ысты вай Обкомӧ либӧ Обисполкомӧ ассьыд «соображенньӧтӧ» та йылысь, мед вӧчасны найӧ та ногӧн да мед аскисянь жӧ тшӧктасны коми газет лэдзны. А сідзтӧ ӧд ми кӧть век тэкӧд вензям, некор жӧ огӧ артмылӧ, — весьшӧрӧ кыв песӧм да бумага видзӧм и лоӧ пыр (со тэ гижӧмыд меным ӧтветтӧ ӧні дас нёль лист бокӧ!).