ЭН КЫСКАВ МЕНӦ!

Миянлы гижны пыр газетын колӧ,
Кыдз эськӧ бурджыка лӧсьӧдны олӧм;
Мукӧдыс гижӧдсьыс зэв ёна полӧ,
Гижан кӧ сы йылысь — «ӧтвет» пыр волӧ,
Сідзи и сюйсьӧны вомавны тэнӧ:
«Эн пӧ тэ прӧстасьыд кыскав, зон, менӧ!»

Комкозлӧн, шуам кӧть, кытікӧ вӧрӧ
(Моски ли киссьӧма, важ керка пӧрӧ),
Сы йылысь гижа ме газета шӧрӧ;
Комкозыд ӧдва сэк ку пиас тӧрӧ,
Тэрмасьӧ «ӧтветӧн» янӧдны тэнӧ:
«Эн пӧ, зон, газетад кыскав сідз менӧ!»

Либӧ нӧ, Обтранслӧн телега-с дзуртӧ:
Туй посъяс киссьӧма, перевоз юртӧм, — 
Он бара вудж небось ютӧ ни нюртӧ!..
Гижыштан газетӧ став йывсьыс «гуртӧн»;
Тӧдан нин, мый сэки кыйӧдӧ тэнӧ — 
«Мыйла пӧ прӧстасӧ кыскалан менӧ?..»

Нёль во ме газетӧ гижӧмӧн олі,
Некор на некодсянь гижӧд эз волы:
«Збыль пӧ со пасйӧма, сідз пӧ и колі» — 
Пыр на ми быттьӧкӧ шыльыда олім...
Ӧтарӧ пыксьӧны быдласянь венӧн:
«Энӧ пӧ прӧстатӧ кыскалӧй менӧ!»

Шуласны: «Битӧг пӧ тшыныд оз овлы». — 
Ме чайта, лӧж юӧр газет оз новлы
(Сэтысь ӧд повны на лоӧ Поповлы!),
Мыйкӧ кӧ гижӧма — дерт жӧ нин, овлӧ.
Сідзи нин, йӧз водзын, шуӧны сэні:
«Энӧ пӧ прӧстатӧ кыскалӧй менӧ!»