«НЬӦБАСЬЫСЬ»Лёка жӧ олӧмыд деньгатӧг мунӧ — Сытӧг дзик некытысь нинӧм оз сюр! Базарӧ лэччылі субӧта лунӧ, Сідз толькӧ, весьшӧрӧ, бергӧдчис юр. Довъялі площадьӧд лавкаяс пӧлӧн, Ассьым ме мудзті дзик прӧста сэн кок. Ки пӧлын кӧрзина новлӧдла вӧлі: Мед, мися, чайтісны — прӧста эг лок... Ӧти морт вый вылӧ сизимсё корис, Донъяси сыкӧд ме сэні вель дыр: Дядьӧлы шуа ме: «чирӧма кӧрыс!..» — Эз-ӧ пӧ аслад, зон, ляс нырыд чир? — Ньӧб нӧ пӧ, ен тэкӧд, сета квайтсёнас, — Шуис мем дядьӧыд медбӧръя кыв. — Квайтсёыд та вылӧ вывті на дона — Эстӧн со витсёысь вӧзйыліс ныв... — Мун нӧ пӧ, босьт сылысь, донтӧм кӧ вӧлі, — Ме пӧ тай мырдӧн тэд выйӧс ог сет! (Эг ӧмӧй босьт эськӧ, деньга кӧ вӧлі! Менсьым ӧд дядьӧыд эз тӧд куш зеп.) Мӧдлаын нывбаба вузалӧ чери — Шердынын посньыдик кельчи да гыч; Веж петіс быдӧн, да мый нӧ нин керан? Кыдзи пӧ сьӧмтӧгыд ньӧбан тэ, кыдз?.. Тув вылӧ куимсё ветымын корӧ (Кодсюрӧ босьтӧ тай вочасӧн пыр); Нёкчимӧд исышті (тӧда быдтор ӧд!): — Ок, мися, чери-д тай куйлӧма дыр! — Мый нӧ пӧ лоин тэ? Тавой на кыйим. Он кӧ пӧ тӧд нинӧм, эн, зонмӧ, сӧр! — Збыль, мися, тьӧтушка, дуксьыштӧм выйим, Юкваад кылас тась чӧскыдтӧм кӧр. Картупель «ньӧбны» ме сэтісянь муні; Быдлаын корӧны «лимонӧн» пуд. Кывнад ӧд кокньыд, дерт, «лимонтӧ» шуны, Сӧмын тай ми воклӧн сійӧ оз луд... Видлала мешӧк пыр «ньӧбантор» зэв дыр: — Ёна тай небзьӧма... абу-ӧ сісь?.. — Разьлы да видлы кӧть — картупель зэв бур, Абу на ныра-а, непӧштӧ сісь. — Гашкӧ нӧ, кывзыв тэ, мыйӧнкӧ вежан?.. (Мый эськӧ вежантор менам и эм?) Артмам кӧ, ме ордӧ вӧвнад и кежав — Сьӧкыд ӧд лоӧ, зон, катӧдны мем! — Вежам нӧ сов вылад, — вузалысь шуӧ, — Пуд вылӧ, колӧкӧ, вай пуд джын сов; Ставсӧ кӧ босьтан тэ — вӧлӧн и нуа. — Сідзнад мем... дона да... оз мися, ков! Зэв на дыр базарӧд деньгатӧг шӧйті, Унатор кӧсйи да нинӧм эг ньӧб; Прӧста дзик кокъясӧс рытӧдз ме нӧйті — Ӧтитор «тшыксьӧма», «дона» зэв мӧд. Кайигӧн тӧдсаяс шуӧны меным: — Мый нин пӧ базарсьыс аддзылін бур? — Нинӧм нин абу мем кольӧма сэні — Нинӧм нин ньӧбантор оз, мися, сюр! «Ньӧбасьӧ» оз бара кодкӧ ме ногӧн, Али нӧ, ме кындзи, некод оз «куж»?.. Уна тай базарӧд ветлӧны «шогӧн» — Тыдалӧ, уналӧн зепъясыс куш... Ок эськӧ, сёйтӧг кӧ кынӧмыд пӧтлӧ, Босьт да кӧть норматӧ тӧварӧн веж! Ӧні быд тӧргӧвӧй ас дінсьыс вӧтлӧ: — Эн пӧ, «друг», мешайтчы, бокӧджык кеж!
