ПАЛЬӦДІСНЫ

— Но и жар, но и поводдя! Уф-ф... Весиг очсавнысӧ дыш, — пӧлясигтырйи ӧвтчис кепканас Парпонь дядь. — Кутшӧм нӧ чӧвтӧм татшӧм поводдя дырйи! Ӧні бур йӧзыс пукалӧны кӧнкӧ гож сайын да кӧдзыд сур юӧны. Эк!

Парпонь дядь тшукӧдіс виласӧ муӧ да, сьӧкыда ышловзьӧмӧн, нюжӧдчис турун юр вылӧ.

— Мый нӧ, Парпонь дядь? — шыӧдчис лукавӧй чужӧма Сергей, ышмыны да вильшасьыштны радейтысь зон.

— Кынӧмӧс тай бара кутіс орлавны, — юрсӧ лэптывтӧг ружӧктіс Парпонь дядь.

— Вай шойччышт, шойччышт... Сюв петтӧдзыд ӧд он вермы уджавны, колӧ и лолыштны коркӧ, — ёртъясыслы мигайтігмоз ышлолаліс Сергей. — Вугыртлан кӧ ӧбедӧдзыс — нинӧм оз ло лёкыс...

Пӧсялӧм том йӧз зіля чӧвтісны, рутшка-ратшкакылісны да дзуртісны вилаяс, а Парпонь дядь читкыраліс унзіль син пӧвсӧ да долыдпырысь мӧвпаліс: «А лӧсьыд жӧ нин артеляд уджавнытӧ! Куйлыштан и узьыштан, видзӧдан да, трудоденьтӧ йӧзыс мында жӧ пасъясны».

Парпоньлысь сыв пасьта мышсӧ пӧжис шонді. Окота вӧлі куньны мӧд син пӧвсӧ да кань моз меліа кургыны... Но эз и казяв — унмовсис.

Том йӧз дыркодь чӧвтӧм бӧрын кытшалісны Сергейӧс.

— Мый нӧ? — юаліс Сергей.

— Ош кодь дядьӧ, ӧтпырйӧн турун юр вермӧ кыпӧдны, а лун джынсӧ куйлӧ да вугралӧ! Велӧдыштны колӧ.

Сергей матыстчис Парпонь дінӧ да ньӧжйӧник шыасис:

— Парпонь?

Парпонь эз и вӧрзьыв.

Сергей гильӧдыштіс турун сіӧн Парпоньлысь ныр увсӧ, но сылӧн вӧрзьыштліс сӧмын ус пӧлыс.

— Узьӧ, — мигнитіс Сергей. — Вайӧй зібъястӧ!

Шытӧм серамысь пыркалігтырйи том йӧз сюйисны турун юр улӧ кык зіб. Сэсся Сергей да Педьӧ, кодъяс, ковмис кӧ, вермисны турун зорӧдсӧ ружӧктывтӧг нуны мӧд местаӧ, кокньыдика лэптісны турун юрнас Парпонь дядьӧс да ньӧти нюмъявтӧг мӧдӧдчисны тылань.

Парпонь чӧскыда узис и эз куж весиг вӧтасьны, мый кӧсйӧны сыкӧд вӧчны.

Сергей да Педьӧ йӧткыштісны турун юрсӧ ваӧ.

— Прӧщайтлы, Парпонь дядь.

— Лёкӧн эн казьтыв!

— Письмӧястӧ гиж!

— Ха-ха-ха!

А коньӧр Парпонь дядь пыр узис. Турун пуктысьяс локтісны ӧбедайтны. Воис и Парпоньлӧн гӧтырыс да чуймӧмӧн швачнитіс бокъясас:

— Бабаяс, видзӧдлӧй, видзӧдлӧй: турун юр вылас морт! Да коді нӧ, коді?

Сергей виччысис, виччысис, кор Парпонь дядь садьмас, сэсся эз вермы терпитнысӧ да мый вынсьыс горӧдіс:

— Ӧбедайтны, Парпонь дядь, эй!

Парпонь лэптіс юрсӧ, гораа очсыштіс да, синъяссӧ прамӧя восьтывтӧг, заводитіс лэччыны турун юр вылысь.

— Усян! — чирӧстіс Парпонь гӧтыр.

Берегын ызӧбтіс гажа серам.

Шудтӧм Парпонь нинӧм гӧгӧрвотӧг видзӧдліс ӧтарӧ-мӧдарӧ да, вомсӧ паськӧдӧмӧн, бузгысис ваас.

— Караул! — чеччыштіс вывлань Парпонь гӧтыр. — Спаситӧй!

— Оз вӧй: ваыс гӧгйӧдзыс оз ло, — нюмъёвтіс Сергей.

Парпонь дядьлы ва улас дзик нинӧм вӧлі вӧчнысӧ, и сійӧ пыр жӧ мыччис рыжӧй юрсӧ: «Уп!.. Уп, уп!»

Синъясыс Парпоньлӧн вӧліны кольчаысь на гӧгрӧсджыкӧсь.

— Ӧбедайтны лок, Парпонь дядь, — ӧвтчис кинас Сергей. — Мый корсян сэні...

Недыр мысти Парпонь, ва шыр кодь, петіс берегӧ да раминика пуксис гӧтыр дінӧ.

— Кыдзи нӧ тэ сідз, Парпонь дядь? Купайтчыны мунӧмыд, а миянӧс эн и горӧд? — довкйӧдліс юрнас Сергей.

Парпонь эз сёрнит, ӧбедайтігчӧж пукаліс шы ни тӧв. Гӧтырыс жалитӧмӧн видзӧдліс раммӧм верӧсыс вылӧ.

— Водыштлы, Парпонюшка, шойччышт...

Ӧбедайтӧм бӧрын сійӧ быд лун узьыштлывліс, но талун гӧтырсӧ гӧгӧрвоис дзик мӧдарӧ: «Тожӧ вилькъялӧ пиньтӧм вомнас. Тьпу! Ӧні, небось, он сэсся нюжӧдчыв шойччыштнытӧ!»

Парпонь дядь скӧра мурӧстіс да муніс чӧвтны.