НАЖӦВИТЧЫСЬ

Гриша восьтіс синъяссӧ, пуксис крӧвать вылӧ да ружӧктіс. Ружӧктіс сьӧкыда, гораа. Сэсся матыстчис рӧмпӧштан дорӧ да видзӧдліс аслас мича чужӧм вылӧ. Руд синъясыс гудырӧсь, ӧшлӧн кодь гырдӧсь. Чужӧмыс рушмӧм кушман кодь. Кынӧм пытшкӧсас гудрасьӧ, быттьӧ майтӧгӧн ужнайтсьӧма. Юрыс висьӧ.

Гриша топӧдіс рыжӧй юрсӧ кыкнан кинас да думыштіс: «Ок, син бугыльясӧй, буракӧ, петасны!» Сэсся нораа-нораа шыасис:

— Мам! Пӧкмелитчыны нинӧм абу?

Орчча комнатаысь петіс Костя, Гришалӧн ыджыдджык вокыс, рыжӧй юрсиа жӧ ён морт.

— Но мый, юрыд оз вись? — гажаа шыасис сійӧ да пуксис бритчыны.

— Эн нин шу...

— А тӧрыт зэв варов вӧлін, — нюмъёвтіс Костя. — Ме, шуан, велӧдчӧм морт, ог вермы овны карса сынӧдтӧг. Сиктад пӧ тані абу олӧм, дай нажӧткаыс этша. Он мӧй помнит тӧрытъясӧ?

Гришалӧн кельыдлӧз чужӧмыс лои юрсиыс кодь жӧ гӧрд.

— Карад, кӧнкӧ, сьӧмыд уджтӧг и сюрӧ. Рытнас юан, а асывводз чеччан, кватитчан да, бара нин зептад кодкӧ дас шайт сюйӧма. Сӧмын вашъяв!

— Да ладнӧ, заводитіс сэні, — ӧвтыштіс кинас Гриша да гораа чукӧстіс: — Мам!

— Пӧкмелитӧд, мам, дона питӧ, а то кулӧ, — скӧрпырысь шуис Костя. — Ньӧб сулея-мӧд.

Раминик руд синъяса олӧма нывбаба видзӧдліс чукрасьысь пи вылас да ышловзис, сэсся петаліс да вайис стӧкан джын вина:

— На, тӧрыт тай пызан вылад кольӧмыд...

Гриша кунис синъяссӧ да тэрыба ньылыштіс курыдторсӧ. Недыр мысти шоналіс, а сэсся лои сэтшӧм лӧсьыд — окота кань моз меліа кургыны.

Костя ышловзис:

— Тэ, мам, дона питӧ зэв ёна радейтан, сійӧн, буракӧ, и пӧвадитчис. Помаліс мортыс средньӧй школа, институтӧ эз сибав, и со во чӧж нин нинӧм оз вӧч, бӧвъялӧ сикт кузя да ракаяс лыддьӧ. Но ӧти воыд ӧд абу дас во! Дай, шуны кӧ веськыда, уджавнысӧ сылы некыдз оз позь: ки пыдӧсъясыс вермасны гаддьӧссьыны. Тэ сійӧс верд чӧскыдджыка да пасьтӧд бурджыка, а юнысӧ ӧд, коньӧр, ачыс нажӧвитӧ. Со тӧрыт на вузалӧма дас кык шайт дон фотокарточкаяс.

Гриша кывзіс вокыслысь кывъяссӧ да мӧвпаліс, воча эз сёрнит. Дерт, думайтіс сійӧ, колӧ эськӧ заводитны уджавны, но кӧні? Тані сӧмын совхозлӧн отделение. Он жӧ ӧд кут вокыс моз керъяс дорын мырсьыны! Карысь сюрӧ сӧстӧм удж. Сӧмын пукав пызан сайын да, журналъяс видлалігмоз, очсав. Дерт, корсюрӧ кытчӧкӧ инмӧдчыштлан перӧӧн, а сэсся, кватитчан да, — ӧбед. Сы бӧрын сёрнитыштан телефон пыр тӧдса нывкӧд, сералыштан, сідз да тадз, а сэсся шутьлялігтырйи мунан гортад. Рытнас мича нывкӧд йӧктыны ветлан, либӧ кино вылӧ, театрӧ, а то и ресторанын пукыштан.

Гриша кунис синъяссӧ да тяпкӧдыштіс вомнас.

Сёйыштӧм бӧрын мам муніс куканьяс дорӧ, Костя — пилорама дорӧ, а Гриша петіс сиктӧ. Шлонъяліс, шлонъяліс, пыраліс ӧтилаӧ-мӧдлаӧ, но содтыштны некытысь эз сюр: став верстьӧ йӧз удж вылынӧсь.

Гриша бӧр довгис гортас. Мама-пиа буретш ӧбедайтісны.

— Гажтӧм, — пызан сайӧ пуксигмоз ышловзис Гриша.

— Лок пилорама дорӧ, — азыма сёйигмоз шуис Костя. — Сосъястӧ пудж да уджав — оз ло гажтӧм.

— Хы-ы, пилорама дорӧ? А уна-ӧ тӧлысьнас босьтан?

— Уна-ӧ пилитан. Кор сё, а кор и сё ветымын.

— Абу ыджыд сьӧм, — очсыштіс Гриша.

— Абу, — сӧгласитчис Костя. — Но ми, кыдзи аддзан, олам ог омӧля, дай тэнӧ вердам, ог няргӧ. Оз кӧ тэныд лӧсяв пилорамаыс — позьӧ трактор вылӧ пуксьыны: тэнӧ жӧ школаад тӧдмӧдісны тракторнас, киад документ сетісны.

— Уджыс шума, юрыд висьмӧ...

Костя ышловзис:

— Дзикӧдз пӧвадитісны тэнӧ батьыд да мамыд. Кыдзи жӧ: медся ичӧт, медся мича, медся мелі! Босьтны эськӧ тасма да буриника шонтыны пукалантӧ.

Гриша нюмъёвтіс, нинӧм эз шу. Рытнас сійӧ кытыськӧ вайис сулея. Костя, кыв ни джын шутӧг, босьтіс кисьыс дозсӧ, петкӧдіс ывлаӧ да пасьвартіс изйӧ.

Асывнас дузъялысь Гриша кутіс мӧдӧдчыны карӧ. Мамыс эськӧ заводитліс жӧ кутны но Костя ӧлӧдіс: мед пӧ ветлӧ да видлӧ, кутшӧмджык кӧрыс ас киясӧн шедӧдӧм няньлӧн.

— Но сьӧкыд кӧ лоӧ — эн яндысь, кор отсӧг, — шуис Костя. — Ми кӧть тані ог босьтӧй ыджыд сьӧм, но, ковмас кӧ — вермам ыстыштны.

— Эн пов, эг на йӧрмӧй, — нурбыльтіс Гриша. — Тэнад мында нажӧткаыд быдлаысь сюрӧ.

— Сюрӧ кӧ и бур. Ветлы, нажӧвитчышт...

Муніс Гриша карӧ. Арӧдзыс эз волы некутшӧм юӧр.

Сэсся воис дженьыдик письмӧ: «Эг вермы судзӧдны валеги. Магазинъясын верст кузьта ӧчередьяс».

— Ыстыны колӧ нажӧвитчысьыдлы, — сераліс Костя. — Валегитӧгыд нажӧвитчынытӧ кӧдзыд!..

Тӧвнас воис мӧд гижӧд: «...Кепысьӧй киссис. Гӧгӧрті магазинъясті — эг аддзы...»

Мамыс ыстіс вурунысь кыӧм кепысь да носки. Та бӧрын тулысӧдз письмӧяс эз волыны.

— Виччысь, мам, — нюмъяліс Костя. — Та дыра чӧв олӧм бӧрын ыстас миян Гришаным мешӧк деньга.

Мешӧк деньга эз во, сы пыдди почтальон пыртіс письмӧ: «Сапӧг пӧтшва резьдіс. Магазинъясын меным лӧсялана размерыс абу».

— Ысты, мам, сапӧгсӧ да нямӧдсӧ эн вунӧд пуктыны. Карса магазинъяссьыд, ме чайта, нямӧдыд оз жӧ сюр.

Ыстісны сапӧг гоз да шоныд нямӧд. Та бӧрын письмӧ эз волы гожӧмбыд.

Коркӧ август помын нин воис телеграмма. Костя лыддис да гораа серӧктіс.

— Мый нӧ гижӧма? — майшасис мам сьӧлӧм.

— Сьӧмсӧ вывті уна нажӧвитӧма да вайнысӧ оз вермы, отсӧг вылӧ корӧ.

Мам тіралысь кинас босьтіс телеграммасӧ да лыддис: «Локта уджавны гортӧ. Ыстӧй туй вылӧ деньга. Гриша».