МОРТ КОЛИ ПОЕЗДЫСЬ

— Кисьт, бур ныв, нӧшта ӧти кружка...

Ме сулалі вокзалса буфет дорын да чӧскыдпырысь юи еджыд быгъя кӧдзыд сур. Поездыс, шуисны, дыр на сулалас. Мед сулалӧ. Меным тэрмасьнысӧ некытчӧ: шойччан кадӧй сӧмын на заводитчис. Позьӧ и гуляйтыштны, и сур юыштны. А сурыс чӧскыд, свежӧй, кывтӧ чепрӧдлыштӧ — оз ков да юан.

— Мый нӧ, бур ныв, гашкӧ, юам нӧшта коймӧд кружкасӧ?

— Меным абу жаль — ю кӧть дасӧс.

— Дасыс, гашкӧ, унджык лоӧ — оз тӧр, а коймӧдсӧ позьӧ на.

Тэрмасьтӧг ме чӧсмаси сурӧн. Ӧшинь сайын, кылӧ, ёна тутсісны паровозъяс, мунісны да локтісны. А ме дзик нинӧм понда эг шогсьы: гӧтыр-котыр абу, ёна тэрмасьнысӧ некытчӧ. Ветла Москваӧ, гуляйтышта, сэсся бӧр — Ухтаӧ.

— Кисьт, бур ныв, мӧд кружка.

— Мӧ-ӧд? Витӧдӧс нин юан да.

— Кисьт, эн жалит: бара пуасны...

— На ю, а сэсся эн кор: ог сет.

— Кыдзи он сет? А ме, гашкӧ, дасӧс кӧсъя юны?

— Ог сет, синмыд гудыртчыны нин кутіс, дай поездсьыд колян.

— Ме коля? Менӧ оз кольны...

Радио пыр залсянь кыліс диспетчерлӧн гӧлӧс. Ме тэрмасьтӧг кисьті ас пытшкӧ кружка джын сур, сэсся кимышнам чышки вомдорысь еджыд быгсӧ да вӧлисти гӧгӧрвои: диспетчер казьтіс менам поездлысь номерсӧ. Ме акниті да сур кружкаӧн и быдсӧн лэбовті ывлаӧ. Поезд мунӧма нин метр ветымын кымын да буретш прамӧя ӧддзӧдчӧ.

— Сувтлӧй! — ӧвтышті ме кинам перрон вывті котӧртігмоз. — Нӧрӧвитлӧй: ме жӧ эг на пуксьы!

Перрон вылын ызӧбтіс серам. Ме скӧра да шензьӧмӧн видзӧдлі йӧз вылӧ: мый вылӧ сералӧны? Морт коли поездысь, зептас абу кӧпейка сьӧм, весиг мунан билетыс да бумажникыс пинжак зептын, а пинжакыс купеын. А купеыс кӧні сійӧ? Бӧрдны колӧ, а найӧ сералӧны! Тьпу! Ме эг тӧд, мый вӧчны. Шӧйӧвошӧмӧн видзӧдлі гӧгӧр, казялі киысь сур кружка, ёрччышті да юи. Мыйкӧ ӧд лоӧ!

— Сурыс, шуӧны, буфетас этша нин кольӧма. Тэрмась! — килькъялӧмӧн шуис кодкӧ. Тыртӧм кружка бовйӧдлігтырйи тэрмасьӧмӧн косі вокзалӧ.

— Менӧ пӧръялісны! — висьталі ме вокзалса дежурнӧйлы. — Некодлы оз позь эскыны.

— Коді пӧръяліс?

— Шуисны: поезд сулалас пӧ час джын. Эг удит юны сур кружка — поездыс мунӧма нин. А меным тожӧ колӧ мунны: дзик нинӧм вӧчнысӧ тіян пеж станцияаныд. Оз-ӧ позь кыдзкӧ суӧдны поездсӧ? Менам сэні чемодан, пинжак, деньга, документъяс, весиг билетӧй. Мый вӧчны?

Дежурнӧй гижаліс поездлысь да вагонлысь номеръяс, сэсся шуис:

— Ставыс бур. Пуксьӧй да шойччӧй.

— «Пуксьы да шойччы», — пузи ме. — А сэк кості менсьым сьӧмӧс и пинжакӧс ставнас шутёвтӧдасны, да? Али, чайтанныд, чемодансӧ колясны?

— Эн пов — нинӧм оз вош, — эскӧдіс дежурнӧй.

— «Оз вош!» Тӧдам.

Ӧвтышті киӧн да пукси диван вылӧ челядя нывбабакӧд орччӧн. Шог шымыртіс сьӧлӧмӧс. Эг эскы, мый коркӧ бӧр пасьтала сьӧд пинжакӧс, сюя киӧс зептам, а сэні став сьӧмӧй. Ме некодлы ог эскы. Йӧзыс лёкӧсь, зэв лёкӧсь да сюсьӧсь, — мӧвпалі ме. Недыр мысти чӧскыд сёян дук восьса ӧдзӧса буфетысь вартіс меным нырӧ, ме ньылышті дулльӧс: кынӧм прамӧя нин сюмалӧма.

Дыр мӧвпавтӧг довги буфетлань, кори шыд бекар, куим-нёль котлет, кисель да пукси пызан сайӧ. Чӧскыдпырысь паньышті шыд, кор пырис буфетӧ орччӧн пукалысь залын ныв.

— Кыдзи тэнад нимыд?

— Нюра, — шыасис нывка.

— Лок пуксьы Нюра, кынӧмыд, кӧнкӧ, сюмалӧ? — зіли нюмъёвтны ме. Нывка ньылыштіс дульсӧ, но эз вӧрзьы.

— Тэ папӧс аддзылін? Сійӧ локтас?

— Локтас, локтас, — эскӧді ме. — Но, мый нӧ тэ? Пуксьы! Радейтан кисель?

Нюра довкнитіс юрнас.

— Вот аддзан, — радпырысь шуи ме, сувті да кокньыдика лэптышті нывкаӧс улӧс вылӧ. — Вот тэныд пань, сёй, сёй. А ме воктӧ кора. Мый сылӧн нимыс?

— Коля...

— Ага, Коля...

Ме петі залӧ.

— Ті энӧ полӧй, — шуи ме нывбабалы... — Коля, лок. — Босьті детинкаӧс киӧдыс да пыртӧді буфетӧ.

— Бур ныв, вай меным мӧд пань... Сёйӧй, челядь! Бура сёйӧй. Ме ёна скӧрма, колянныд кӧ ті шыд либӧ котлет...

Чоя-вокаӧс ёна корны эз ковмы. Ме петі буфетысь да пукси гажтӧм синъяса нывбабакӧд орччӧн. Дыркодь олім чӧв. Сэсся ме юалі:

— Ылӧдз мунанныд?

— Ми воим нин, — вочавидзис нывбаба сынӧдсӧ ньылалігмоз.

— Ті виччысянныд верӧстӧ?

— Да, — ышловзис нывбаба.

— Тіянӧс кыдзи шуӧны?

— Лейла...

— Ті эськӧ, Лейла, мед звӧнитлінныд верӧсыдлӧн уджалан местаӧ, гашкӧ, висьмис мортыс...

— Ысті нин телеграмма...

— Но и мый жӧ?

— Вежон сайын кымын нин петӧма удж вывсьыс да кытчӧкӧ мунӧма. Кытчӧ — оз тӧдны...

Вочасӧн нывбаба висьталіс меным ставсӧ. Верӧсыс Комиысь, ачыс Грузияысь.

Во сайын верӧсыс мунӧма Грузияысь, ветла пӧ войвылӧ, нажӧвитчышта.

Таво воӧма письмӧ: вузав пӧ, Лейла, керкатӧ да ысты сьӧм. Ме пӧ татысь керка ньӧби, но сьӧмыс пӧ озджык тырмы. Лейла первойсӧ абу вузалӧма. Но верӧсыс бара гижӧма: кутам пӧ овны Сыктывкарын. Ме пӧ верма волыны тэныд воча Княжпогостӧдз. Лейла эскӧма. Вузалӧма керка, ыстӧма сьӧм, и со ачыс тані.

— Вот и виччыся, — помаліс висьталӧмсӧ Лейла. — Ог тӧд, мый вӧчны. Сьӧм бырис. Весиг гортӧ мунны нинӧм вылӧ, дай муна кӧ, кытчӧ пыра? Коді виччысьӧ?

Нывбаба ньылаліс синвасӧ.

— Позьӧ-ӧ, Лейла, татшӧм кокниа эскыны мортлы? — довкйӧдлышті ме юрӧн.

— Но сійӧ жӧ менам верӧс!

«Ме эськӧ тэ местаын эг эскы, — думышті ме. — Эг. Йӧзыс ӧд меным оз жӧ эскыны».

Ме ӧдйӧ сувті да пыри буфетӧ: окота лои прӧверитны, эскӧны оз меным.

— Вот мый, бур ныв: ме коли поездысь, сьӧмӧй купеын, кынӧм сюмалӧ. Кольӧм полтинник вылӧ, ачыд аддзылін, верді ӧти нывбабалысь челядьсӧ. Нывбабаыслӧн тожӧ абу кӧпейка сьӧм.

— Тэ кӧсъян ӧбедайтны сьӧмтӧг?

— Тэ зэв бура гӧгӧрвоин менӧ, — нюмъёвті ме. — Колӧ борщ, котлет, компот — ставсӧ кык порцияӧн. Сьӧмсӧ верма ыстыны переводӧн.

Ме нюмъёвті: тӧді, мый ныв оз сет. Ныв нюмъявтӧг видзӧдіс ме вылӧ, кокньыдика ышловзис, мыччис чекъяс да юаліс:

— Сэсся нинӧм?

Менӧ шемӧс босьтіс:

— Тэ меным эскан, а ме кӧ ог ысты сьӧмсӧ? — ёна шензьӧмӧн юалі ме.

— Ме эска йӧзлы, — прӧстӧя шуис ныв. — А сьӧмсӧ тэ он и ысты: бӧр локтігад кежалан да мынтан...

— Хм... — шӧйӧвоши. Но тӧда збыльысь, бӧр локтігӧн кежала, кӧть та вӧсна ковмас кольччыны поездысь.

— Сідзкӧ, сур кружка нӧшта кисьт, — юа тэнад здоровье вӧсна.

Нывбабакӧд сёйигчӧж думайті, мый вот эмӧсь жӧ мортъяс, кодъяс эскӧны йӧзлы.

— Пасибӧ, бур ныв, — буфетысь петігмоз став сьӧлӧмсянь шуи ме.

— Пассажир Тюнтиков! — кыліс диспетчерлӧн гӧлӧс. — Пыралӧй вокзалса начальник дорӧ. — Ме тэрмасьӧмӧн пыри. Юрын югнитіс мӧвп, ӧні шуас: «Зэв жаль, но деньгаыд да чемоданыд вошӧма».

— Вот мый, Тюнтиков ёрт... Дас минут мысти татчӧ воас лунвылӧ мунысь поезд. Ме тэнӧ пуксьӧда сэтчӧ, тэ мунан Микуньӧдз, сэтчӧ сувтан, босьтан вокзалса дежурнӧй ордысь деньгатӧ, документъястӧ, чемодантӧ да пинжактӧ.

Менам дрӧгмуні сьӧлӧм.

— Ыджыд аттьӧ тіян, дона ёрт.

Ме петі, лэдзчыси стен бердӧ да ыджыда лолышті. Вот тэныд и на! Весиг билетӧс компостируйтӧмаӧсь! А ме эг эскы. Юрын жуисны быдсяма пӧлӧс мӧвпъяс. Аслам радлунӧн юксьышті нывбабакӧд. Сійӧ синва пырыс видзӧдліс ме вылӧ да шуис:

— Бур йӧзыс ӧд, Вася, свет вылас уна...

«Пыр на эскӧ йӧзлы...» — думышті ме.

— Тюнтиков, пуксьы поездӧ! — кыліс дежурнӧйлӧн гӧлӧс. Ме ӧвтышті нывбабалы кинам да котӧрӧн петі вокзалысь.

И со ме Микуньын. Киам чемодан, зептам сьӧм и билет. Позьӧ мунны. Но мыйлакӧ абу лӧсьыд сьӧлӧм вылын. Мыйла? Тайӧ Лейла нима нывбабаыс вӧсна? Да, пӧжалуй. Ме жӧдзи перрон вывті и эг тӧд, муна водзӧ, али ог. Дыр шатласи ӧтарӧ-мӧдарӧ, кыдзи вески чашкаяс. Поезд тутӧстіс нин, а ме эг на тӧд, пукся вагонӧ али ог пуксьы.

— Бара коли! — кыліс бӧрвывсянь бӧрдан гӧлӧс. — Коймӧд поезд нин муніс. Некыдз билет ог вермы судзӧдны! Тьпу! И кытчӧ эсы мында йӧзсӧ лешакыс нуӧ.

— Тэ, дядя, кытчӧ?

— Лунвылӧ... Но со тай!

— На! — сюйышті ме билетӧс. — Пуксьы ӧкмысӧд вагонӧ. Ме кӧсъя косны бӧр.

— Кыз дядьӧ эскытӧг паськӧдіс вомсӧ:

— Кыдз нӧ сідз?

— Тэрмась! — йӧткыштӧ ме сійӧс. — Колян!

— Ок, пасибӧ, бур морт! — дядьӧ окыштіс менӧ нырӧ, пуктіс юр вылас ассьыс мича шляпасӧ, сюйыштіс зептас сьӧм да котӧртіс поездлань, коді буретш вӧрзис. Ме кокньыдика ышловзи. Котӧрӧн-сорӧн пыри вокзалӧ, видзӧдлі расписание вылӧ да муртса эг ёрччышт: Княжпогостлань пассажирскӧй поезд мунӧ сӧмын вит час мысти. «Тайӧ каднас Лейла шогыс вӧсна кулӧ!» — гажтӧма думышті ме. Довги буфетлань, кори сур кружка да пукси пызан сайӧ. Орчча пызан сайын кык гажа мужик гора варовитісны ас костаныс:

— Ю, другӧ, сьӧм ӧні эм!

— Кытысь сы мындаыс?

— Гӧтыр керкасӧ вузаліс да став сьӧмсӧ меным ыстіс, — вӧсньыдик уска том мужик гора серӧктіс.

— Мый сідз?

— Хе-е... Кужны колӧ... Гӧтыр менам Грузияысь...

— Но? Кыдзи нӧ сэтчӧ веськалін?

— Тэ юав, кӧні ме эг вӧв. Ме, другӧ, быдлаын вӧлі. И быдлаын менам эм гӧтыр...

— Вот, майбырыд!

— Да! Гӧтраси ме Грузияад, но, ачыд гӧгӧрвоан: дыр пукавны ӧти местаын гажтӧм. Вай, думайта, рӧднӧй войвылӧ исковтла. Вои. Гӧри став Комисӧ: Воркута, Ухта, Сыкты...квар! Ачым ме Комиысь и Сыкты...кварын эм гӧтыр, но чӧрт сыкӧд! Пӧрысь дай нӧбасьӧ быд во... Тані, ачыд тӧдан, шайтъястӧ зептад уджавтӧгыд оз жӧ сюявны. Катласи, довъялі, сэсся быри сьӧм. Мый вӧчны? Гижи гӧтырлы письмӧ: ме, мися, ньӧби Сыкты...кварын зэв мича керка. Деньга, мися, эм, но озджык тырмы. Вузав, мися, керкатӧ да ысты сьӧм. Воис письмӧ: лок пӧ ачыд. Бара гижи письмӧ: ме, мися, ньӧби нин керкасӧ, юрвывті лои уджйӧза. Мися, ысты деньга, а сэсся, гашкӧ, ме вола тэла... Хе-хе... Либӧ тэ ачыд локтан... Ха-ха-ха... Княжпогостӧдз, мися верма воча волыны. Ыстіс ӧд сьӧмтӧ! А сэсся друг телеграмма: «Петі пӧ туйӧ. Паныдав пӧ Княжпогостын». Тьпу! Вот йӧйыд! Быттьӧ тані сытӧг гӧтыръясыс оз тырмыны! Кутшӧм керкаӧ ме сійӧс пыртӧда, кор джын деньгаыс юсис нин? Ковмис зэв ӧдйӧ усйысьны Сыкты...кварысь. Ме эськӧ талун ылын нин вӧлі, но субӧтаӧ прамӧякодь гажмыссьӧма да шумитсьӧма... Пуксьӧдісны куим сутки кежлӧ. Талун асыв вӧлись петі.

— А гӧтырыд?

— Хе-е... Сійӧ, ме чайта, пукалӧ ӧні Княжпогостын, виччысьӧ менӧ, либӧ, гашкӧ, муніс Сыктывкарӧ, а вермис и бӧр косны шондіа Грузияӧ. Ха-ха-ха!

— Нинӧм, — зэлыдакодь серӧктіс ёртыс, — ӧтнас некытчӧ оз вош...

— Кык челядя, — нюмъёвтіс уска дядьӧ.

Ёртыслӧн чужӧм вылысь воши нюмыс. Став вирӧй менам шыбитчис чужӧмӧ. Тэрыба локті орчча пызан дорӧ:

— Гӧтырыдлӧн нимыс Лейла?

— Но и мый?

— Тэнӧ сійӧ виччысьӧ нёльӧд сутки, — тіралан гӧлӧсӧн шуи ме.

Кылі, кыдзи ёна скӧрмӧмла зэлаліс юр куӧй, а мыш кузя котӧртіс йирмӧг.

— Но и мый? Тэныд мый колӧ? — уна сур юӧм вӧсна горзьӧдіс дядьӧӧс. — Кынӧмыд висьӧ?

Ме куті пӧдны:

— Тэнӧ виччысьӧ гӧтырыд! Зептас абу кӧпейка сьӧм! Челядьыс тшыгӧсь!

— Но и мый? Тэн кутшӧм делӧ?

— Тэ морт или абу?

— Ныр увтӧ чышкы: аддзан, кӧч кодь мыччысьӧма, — зумыша шуис дядьӧ, сэсся нюжӧдчис сур кружкала.

— Кӧні тэнад сӧвестьыд?

Дядьӧ сувтіс, бергӧдіс менӧ пельпомӧд да зутшнитіс юрбӧрӧ:

— Весась, а то сета юрад сур кружканас!

Тайӧс ме эг вермы терпитны да мый вынсьым сетышті дядьӧлы кык син костас. Дядьӧ сур кружканас и быдсӧн грымгысис джоджӧ, но пыр жӧ звирк чеччис да уськӧдчис ме вылӧ, но ме вевъялі чужйыны сылы кынӧмас. Дядьӧ ымзігтырйи кусыньтчис мегырӧ. Ме дась вӧлі лӧдсыштны, но эг вевъяв: пырис гӧрд фуражкаа дядьӧ да босьтіс менӧ сой пӧлӧд.

Недыр мысти уска дядьӧкӧд пукалім нин милиция отделениеын. Гижисны протокол. Ме висьтавлі ставсӧ, мый лои поездысь кольӧм кадсянь.

— Гӧгӧрвоанныд, менам пузис вирӧй! — пӧся сёрниті ме. — Гӧтырыс бӧрдӧ, нёльӧд сутки виччысьӧ. Челядь тшыгӧсь, а сійӧ пукалӧ, килькъялӧ да сур юӧ! Гад!

— Абу менам некутшӧм гӧтыр, — горӧдіс дядьӧ. — Менам паспортӧй пачкайттӧм на.

— Тайӧс ми видзӧдлам, — стрӧга шуис лейтенант. — Тэ ӧні гажа. Ӧні тэ шойччыштан, а сэсся сёрнитыштам. Талун на петін тюрмаысь, а бара нин тані...

Лейтенант тшӧктіс петкӧдны дядьӧӧс.

— Ме, дерт, мыжа, — ышловзи ме да сувті. — Но лэдзлӧй менӧ ветлыны нывбаба дорас. Кувтӧдз кута ачымӧс ёрны, ог кӧ отсышт сылы. Лэдзлӧй, пӧжалуйста... Час мысти мунӧ поезд, ме ветла Княжпогостӧ, сета сылы сьӧм и пырысь-пыр бӧр локта. Локта, эскӧй меным! Сэки пуксьӧдӧй кӧть тӧлысь кежлӧ...

— Мыйла нӧ ӧбязательнӧ пуксьӧдны, — нюмъёвтіс лейтенант.

— Ті эсканныд меным?

— Ми эскам йӧзлы, — прӧстӧя шуис лейтенант. — Ветлӧй.

Ме радпырысь сувті:

— Сідзкӧ ті эсканныд меным? Ме локта, талун жӧ локта!

— Верман не локны. Сӧмын звӧнитлы миян Княжпогостсянь. Ме тані сёрнита кодкӧд колӧ, — гашкӧ вермам отсыштны нывбабалы мунан билетнас... Мун, Тюнтиков ёрт, ме эска тэныд.

Лейтенант топӧдліс киӧс, и ме радпырысь петі ывлаӧ.

Недыр мысти пукалі нин поездын.

«Ме, дурак, эг эскы йӧзлы! А йӧзыс эскӧны меным. Дзик тӧдтӧм мортлы эскӧны! — шензи ме вагонын пукалігмоз. — Сё збыль, зэв бур, мый ме коли поездысь!» Дум вылӧ уси Лейла — Княжпогост станцияын пукалысь шудтӧм нывбаба. Думсьым пӧся шыаси сы дінӧ: «Лейла! Шондіа Грузияысь нывбаба! Тэ эскин лёк мортлы и чорыда пӧръяссин. Тэныд вывті-вывті сьӧкыд... Но со нин ме локта тэ дорӧ, колльӧда тэнӧ радейтана Грузияӧдзыд. Отсаласны и мукӧдъяс. Бур йӧзыс миян уна. Эн шогсьы, Лейла!»