МЕ БАРА НЮМЪЯЛА

Ме пыр нюмъяла. Сэтшӧм нин ме морт. Дед менам пыр шулывліс: «Микол миян чужӧм бӧрас регыд и заводитіс нюмъявны. Ӧдвакӧ лоӧ олысьӧн таладор югыдын». Ме ог тӧд, мыйла сійӧ тадзи думайтӧма. Он ӧд аддзыв, коді кулігас нюмъялӧ. Ог тӧд, мыйла век нюмъявсьӧ. Шуны кӧ, зӧръя рок некор эг сёйлывлы. Менӧ нюмъялысь Миколӧн и шуӧны. И дыр, чайта нюмъялі эськӧ, эг кӧ нинӧм думайттӧг гӧтрась. Нинӧм ог шу: гӧтыркӧд овнытӧ бур, лӧсьыд, шоныд, но вот нюмъявнытӧ куті гежӧдджыка дай зэлыдджыка. Помкаыс эм, дерт.

Со ӧтчыд гын сапӧг заводиті пыдӧсавны, а гӧтыр вала муніс: самӧвар пӧ колӧ пуктыны. Правильнӧ, шуа, колӧ пуктыны, чай юны.

Пукала, нюмъялігтырйи шуркъя-вура. Гын сапӧг пӧлыд эштыны нин кутіс, а гӧтыр пыр на абу. Ме казявлі нин: мунас кӧ сійӧ кытчӧкӧ могӧн — век колӧ понйӧн корсьны. Но талун мыйкӧ вывті дыр эз лок. Эз-ӧ нин менам Дарьюк ваысла орчча сиктӧ мун? Гашкӧ, инӧ, юкмӧс дорас ӧчередь? Но бара жӧ оз эскыссьы: миян сиктын дас керка, а юкмӧсыс куим. Сулалӧ, буракӧ, ерӧмаканьыд, юкмӧс дорын да ас коддьӧмыскӧд кывсӧ кеслӧ. Скӧрмыны нин куті. Гын сапӧглӧн мӧд пӧлыс нин пыдӧсавсис, а гӧтыр пыр на абу! Нюмъявнытӧ, дерт, дугді. И час джын мында кӧ нӧшта эз лок, дзикӧдз эськӧ, колӧ чайтны, петі ку пытшкысь.

А ӧд пӧшти быд лун тадзи! Мунас кӧ магазинӧ — регыд эн виччысь. Со ӧд кутшӧм менам гӧтырӧй. Ті со кывзанныд да нюмъяланныд, а менам ньӧти оз нюмъявсьы.

Ме нин ӧти ног и мӧд ног босьтчылі: мися, Дарьюш, зарниӧй менам, байдӧг кокӧй, магазинад мунан да бӧр талун лок!..

Но гӧтыр менсьым мелі сёрниястӧ пыдди оз пукты. Ӧні отпускалӧ, мӧсъястӧ лысьтыны скӧтнӧй дворад оз тэрмась, вот менӧ и ворсӧдӧ.

Но, думайта, тэнӧ кывйӧн, буракӧ, он велӧд, колӧ кыдзкӧ мӧд ног видлыны. Войбыд думайті и асывводзнас чеччи нюмъялігтырйи.

Гӧтыр ноксис пач дорын, пусис-пӧжасис.

— Микулай, ветлы совла да ӧдйӧджык. Шыд солавны нинӧмӧн.

Ме пасьтаси да петі, но магазинӧдз эг во: кежи сусед дорӧ. Пукалам, сёрнитам. Час мында кадыс коли. Сэсся сусед шуӧ: пывсян ваймӧма, гашкӧ пӧ лэччылам?

Пывсим-мыссим, зыралім ёрта-ёртнымлысь мышнымӧс, сьӧлӧм бурмытӧдз швачӧдчим корӧсьӧн. Час-мӧд, ме думайта, чӧсмасим жар пывсянад. А сэсся — самӧвар, сідз да тадз. Видзӧда да, магазиныд пӧдласьӧма нин.

Но ладнӧ, думайта, пӧдлассис кӧ — рытнас бара воссяс. Тэрмасьнысӧ дзик некытчӧ.

Рытнас магазиныд, збыльысь, воссис. Ме ньӧби совтӧ, но гортӧ эг тэрмась. Чукӧрті став терпенньӧӧс да рытывбыд сулалі магазинас.

Кутшӧм синъясӧн да кывъясӧн паныдаліс менӧ гӧтыр, ог кут висьтавлыны: абу лӧсьыд. Дузъяліс сутки чӧж, эз сёрнит весиг.

— Тэ тай нӧ, — шуа, — быд лун тадзи вӧчан, да ме пыр нюмъяла. Тэ нӧ мыйла он нюмъяв?

Вот тадзи и лечиті гӧтырӧс. Ӧні со бара нюмъяла. И гӧтыр нюмъялӧ. Сідз нюмъялігтырйи и олам.