СИКТСА ВЕЛӦДЫСЬ

Повесть

МЕДВОДДЗА УРОКЪЯС

Ме помалі Емдінса педучилище и со тӧлысь нин уджала Изьва бокса Галпом сиктын. Ичӧтик школаын — нёль класс, дас вит нывка да зонка, дас вит чӧртпи.

Мӧд во лоӧ кызь саяс велӧдчысь. Сэки локтас ёрт, ныв ли зон, пӧрысь-ӧ том — ог тӧд, но век жӧ кыкнад кокниджык лоӧ. А ӧні ӧтнам. Сьӧкыд. Челядь збойӧсь, оз кывзыны. Урокъяс вылын шум да зык, серам. Журнал тырӧма двойкаясӧн.

Мыйла ме велӧдчи педучилищеас? Тӧлысь уджалӧм бӧрын аддза: прамӧй велӧдысь меысь оз артмы.

Со ӧти урок.

Ичӧтик жыннянӧн сеті звӧнок. Челядь пыралісны классӧ. Тэрмасьтӧг веськӧдчис ӧдзӧслань и Павел, коді, колӧ шуны, велӧдчӧ зэв «зіля»: быд классын пукалӧма кык во. Эз удит пырны, кыдзи мышсяньыс сы вылӧ пелька чеччыштіс Геня. Павел зілис мынтӧдчыны, и кыкнанныс грымгысисны джоджӧ.

— Тіянлы звӧнокыс эз вӧв? — скӧра юалі ме.

Геня здук кежлӧ бергӧдліс пӧсялӧм гӧгрӧс чужӧмсӧ, чеччыштіс, чышкыштіс соснас ныр увсӧ, тэрмасьӧмӧн тувкнитіс Павеллы бокас да котӧртіс классӧ. А Павел эз тэрмась. Сійӧ «эз кыв» менсьым гӧлӧсӧс. Дышпырысь чеччис, сувтіс ӧдзӧс шӧрӧ, грӧзитӧ Генялы:

— Ме тэныд петкӧдла на гаж!

— Павел!

Ме вылӧ видзӧдлытӧг зонка ньӧжйӧник катласис-муніс аслас парта дорӧ.

Ме пыри классӧ. Геня сулаліс парта саяс бӧрӧн да мыччаліс чернилаӧсь кулаксӧ Павеллы:

— Тэ петкӧдлан? Ме тэныд аслыд петкӧдла. Со!

— Геня! Урок!

— А мыйла сійӧ меным пырны оз сет? Водӧма сэтчӧ!

Лэпті киӧс:

— Лӧня! Заводитам урок. Нёльӧд класс, восьтӧй арифметика кузя тетрадьяс. Коймӧд класс, решитӧй дӧска вылӧ гижӧм примерсӧ. Мӧд класс, лыддьӧй...

Ас костаныс варовитігтырйи ӧтияс восьталісны тетрадьяс, мӧдъяс мыйкӧ корсьысисны партаысь, лукйысисны сумкаясын. Швачкакылісны парта вевтъяс. Кодлӧнкӧ гӧгыльтчис ручкаыс да уси. Сэсся киссис чернила, чилӧстіс Оля. Ме, пиньясӧс мурч курччӧмӧн, видзӧді, виччыси.

Дырӧн тетрадьяс лои восьталӧма, Павеллӧн да Генялӧн кындзи. Павел дувгӧдӧма ӧшиньӧ гудыр ва рӧма синъяссӧ, а Геня сюйӧма нырсӧ сумкаас да лукйысьӧ.

— Геня, тэнӧ дыр на ковмас виччысьны?

— Тетрадьӧй кытчӧкӧ вошӧма...

Гортса удж прӧверяйтігчӧж Геня дасысь кымын зэв збыльысь видлаліс тетрадьяссӧ.

— Эз сюр?

Зонкалӧн ыджыд руд синъясыс сюся югнитісны:

— Эз... Гортӧ, буракӧ, вунӧма. Котӧртла?

— А нолтӧ...

Видзӧдлі тетрадьяссӧ да пукті Геня водзӧ арифметика кузя тетрадь:

— А тайӧ мый?

Зонка чӧв олӧ, вом доръясыс тіралыштӧны, вот-вот паськаласны гажа нюмӧн.

Генякӧд сёрнитігкості класс кутіс ызгыны.

— Дугӧдны сёрнияс! Павел!

Павел оз нин видзӧд ӧшиньӧ. Нюжӧдӧма голясӧ орчча парта сайын пукалысь Оляланьӧ да вежньӧдлӧ кыз вом доръяссӧ:

— Мы-ый? Кодлӧн гортса уджыс абу? Уна эн сёрнит, а то...

Збоймӧм Оля мыччыліс кывсӧ:

— Ик! Нитш юрӧ...

— Тырмас сёрнитны — кыпӧді ме гӧлӧсӧс. Павел бара «эз кыв».

— Вот урокыс помасяс да ме тэныд петкӧдла!

— Павел! — ме тӧдчымӧн скӧрми.

— Мый ме кера? — торъя тэрмасьтӧг бергӧдчис зонка да сувтӧдіс ме вылӧ синкымъяс увсяньыс видзӧдысь гудыр синъяссӧ.

— Сувт!

Павел ньӧжйӧник кыпӧдчис, а челядь мыйкӧ вылӧ гораа серӧктісны. Шемӧсмӧмӧн бергӧдчи. Тайӧ Геня аддзӧма кытыськӧ сьӧд вурунтор, ӧшйӧдӧма сійӧс ныр улас да, класслань чужӧмсӧ бергӧдӧмӧн, зэв збыльысь вӧрӧдӧ вылыс вом дорнас. Ачыс оз весиг нюмъяв, а мӧдарӧ — чукыртчӧма да зэв шогпырысь довкйӧдлӧ юрнас.

— Геня, сувт!

Сувтіс. Би киньяс резысь синъяссӧ лэдзис увлань, а ачыс сідзи и пыркалӧ гуся серамысла. Бӧръя парта сайын шӧпкӧдчысь нывкаяс бара прысьмуніны-серӧктісны. Павел бергӧдчис наланьӧ:

— Но-о, зӧръя рокӧн, буракӧ, мамныс вердӧма...

Челядь окотапырысь гизьмунісны-вакӧдісны.

— Ті ланьтанныд он?! — горӧді ме.

— Сералӧны сэтӧні! Э-э, — нерыштіс Геня да кань моз нявӧстіс.

— Геня, пет классысь!

Геня дугдіс нюмъявны:

— Ме сэсся, Николай Степанович, бура кута пукавны.

— Тэ унаысь нин кӧсйысьлін. Пет!

Геня петіс.

— Мыйысь сійӧс вӧтлінныд? — юаліс Павел.

Ме инді синъясӧн ӧдзӧслань:

— Тэ тшӧтш! Ӧдйӧ!

Павел ньӧти тэрмасьтӧг мӧдӧдчис ӧдзӧслань. Ме муртса кутчыси, тӧкӧтьӧ эг сетышт сьылітшуптас.

Классын лои шы ни тӧв. Менам сотчис чужӧм, сьӧкыда лолалі. Эг вермы гижны мелӧн дӧска вылӧ: киӧй тіраліс. Висьталі мыйкӧ челядьлы да эг тӧд ассьым гӧлӧсӧс.

Эг вермы сэсся нуӧдны уроксӧ водзӧ да лэдзалі челядьӧс гортаныс. Бур, мый урокыс вӧлі медбӧръя. Классысь петігӧн аддзи Павелӧс да Геняӧс.

— Кыкнанныд кольччанныд! Сёрнитыштам! — чорыда шуи налы да пыри учительскӧйӧ. Тайӧ жӧ вӧлі и менам патера. Юи кӧдзыд ва, горша куриті папирос.

Неуна сайкалыштӧм бӧрын петі классӧ. Сэні пукаліс ӧтнас Геня.

— Кӧні Павел?

— Пышйис...

— Пышйис?!

«Ковмас гортас ветлыны», — думышті ме да кори Генялысь:

— Петкӧдлы гортса уджтӧ.

Гортса удж вӧлі, но вӧчӧма кыдзсюрӧ: черкайтӧма, пукталӧма кляксаяс.

— Гиж выльысь.

Геня вензьыны эз кут. Ышловзис да босьтчис гижны. Минут дас мысти видзӧдлі: гижӧма важ мозыс мисьтӧма, мукӧд лыдпасъяссӧ сьӧкыд тӧдны.

— Бур, — шуи ме. — А ӧні гиж нӧшта ӧтчыд.

— Коймӧдысь?! — шемӧсмис зонка да букыштчис: — Ог гиж!

— Бур. Эн гиж. Пукав. Меным тэрмасьнысӧ некытчӧ, тэныд сідз жӧ.

Ме пукси пызан сайӧ, восьті книга, куті лыддьысьны. Геня чӧв пукаліс минут вит кымын, сэсся ышловзис, босьтіс ручка. Ме сувті.

— Тэ гиж, а ме ветла Павел дорӧ. Пышъян кӧ — гортад вола да вайӧда.

Геня кольччис, а ме муні.

Павел пукаліс пызан сайын, сёйис. Мамыс эз вӧв.

— Кынӧмыд сюмаліс зэв зіля велӧдчӧм бӧрад?

Детинка видзӧдліс ме вылӧ синкым увтіыс, пуктіс паньсӧ, веськӧдіс видзӧдлассӧ ӧшиньӧ.

— Тэ тӧрыт вунӧдін вӧчны арифметика кузя гортса удж. Мунам школаӧ, сэні вӧчан.

— Ме ог мун! — букыштчис Павел.

— Да? — нюмъёвті ме. — А ме тэнӧ нуӧда. Босьта и нуӧда. Гӧгӧрвоин?

Зонка ӧти здук видзӧдіс меным синъясӧ, сэсся лэдзис синвидзӧдлассӧ: гӧгӧрвоис, буракӧ.

— Пасьтась!

Пасьтасис. Мӧдӧдчим. Ме — водзын, сійӧ — бӧрын. Пырим классӧ. Кык друг ёрта-ёртыслы гусьӧник нюмъёвтісны, но нинӧм эз шуны. Геня мыччис тетрадьсӧ:

— Гижи, Николай Степанович.

Видзӧдлі: бура гижӧма. Менӧ весиг шемӧс босьтіс:

— Ме тэнсьыд татшӧм мича гижӧдсӧ эг на аддзыв, Геня! Тэ, вӧлӧм, зэв бура кужан гижны. Кута надейтчыны: быд гортса удж водзӧ вылӧ тадзи и вӧчан. А он кӧ — быд пӧрйӧ выльысь гижны ковмас.

Геня чышкыштіс соснас ныр увсӧ, радпырысь нюммуніс:

— Позьӧ мунны?

— Позьӧ.

Геня — тӧлка детинка. Мый висьталан выльтор — гӧгӧрвоӧ пыр жӧ, сэсся оз вунӧд. Но вывті збой, варкйӧ-пуӧ. Гижӧдыс характерыс кодь жӧ. Букваяс да лыдпасъяс тетрадяс быттьӧ ышмӧмӧн йӧктӧны. Геня кӧть и ёна дӧзмӧдчӧ урокъяс вылын, но ме сійӧс радейта. Кӧть мый оз вӧч, а прамӧя скӧрмыны сы вылӧ ог вермы. Мӧд делӧ — Павел.

— Эз артмы, — веськодьпырысь шуыштас дай. Тайӧ збыль: задачаяс решайтны сійӧ оз куж. Да, колӧ чайтны, эз и заводитлы.

— Тэ, Павел, задачасӧ весиг абу лыддьӧмыд.

Павел шензьӧмӧн видзӧдліс ме вылӧ, нюмъёвтіскодь:

— Эг. А ті мыйӧн тӧданныд?

— Кымӧсад гижӧма.

Ме думыштчи. Тӧлысь чӧж уджалӧм бӧрад унатор тыдалӧ. Тӧдчӧ: сійӧ нывбаба-велӧдысьыс, коді вӧлі тайӧ школаас ме локтӧдз, абу сьӧлӧмсяньыс уджалӧма, ме дорысь на лёкджыка. Тайӧ тыдалӧ быдлаысь: челядьӧн гижӧм-лыддьысьӧмысь, рисуйтчӧмысь, пуртӧн гижлӧм партаясысь, джоджӧ шыблалӧм ёгысь. Ог кӧ ме пыркнитчы да заводит уджавны сосъяс пуджӧмӧн, то матысса лунъясӧ челядь дзикӧдз пуксясны юр вылӧ да кутасны ветлыны ме вылын верзьӧмӧн.

— Вот мый, Павел, — шуи ме. — Висьтав меным веськыда: тэныд дыш велӧдчынысӧ?

— Дыш! — веськыда крапкис детинка.

— Но мыйла?

— Юрӧй оз уджав...

— Коді тэныд тайӧс висьталіс?! — шемӧс босьтіс менӧ.

— Фрида Гавриловна висьталіс! — кыліс ӧдзӧс дорсянь. Ме бергӧдчи: тайӧ Геня сюйӧма юрсӧ ӧдзӧс костӧд да вильыша видзӧдӧ ми вылӧ.

— Тэ век на тані? Да нӧшта и кывзысян?!

— Ме ог кывзысь. Павелӧс виччыся.

— Нолтӧ, пырав да висьтав, мый нӧшта шуис Фрида Гавриловнаыс?

Геня пырис, пӧрччис шапкасӧ да пуксис парта саяс.

— Нитш юр пӧ тэ, вот мый нӧшта висьталіс. Юрыд пӧ барабан кодь жӧ тыртӧм. Тэ пӧ, мӧмӧт, некор он велав решайтны задачаяс. Быд классын пӧ кутан пукавны кык-куим во. А нёльӧд класс помалігӧн пӧ лоан гӧгйӧдзыд тошка. Тэ кодь ӧслӧпсӧ пӧ ме некытысь на эг аддзыв!

— Тэ, Геня, зэв варов...

— А менӧ Фрида Гавриловна быд урок дырйи пельӧд нетшкис, — ошйысьыштіс Геня да малалыштіс пельяссӧ.

— Окотапырысь эска, — нюмъёвті ме. — Вай мун сэсся гортад.

— А Павел нёльӧд классас кык во жӧ кутас пукавны? — ӧдзӧс дорсянь нин юаліс Геня.

— Оз! — чорыда шуи ме. — Сійӧ помалас тэкӧд тшӧтш. Геня эскытӧг нюмъёвтіс да петіс. Эскытӧг видзӧдліс ме вылӧ и Павел.

— Тэ быд классын пукалін кык во?

— Эг. Первойын — ӧтиӧс.

— Ме ог кӧсйы, Павел, мед тэ нёльӧд классын велӧдчин кыкысь. Тэ ӧні он на бура куж артавны задачаяс, но велалан. Выльлунсянь быд лун кутам артасьны урокъяс водзвылын да бӧрас. Сьӧкыд лоӧ тэныд и меным, но школасӧ тэ помалан. А талун мун гортад...

Ме думышті велӧдны Павелӧс артасьны. Ог ёна надейтчы, но видлам. Ковмас заводитны первой класса задачниксянь, мӧд ног нинӧм оз артмы.

Мыйкӧ ковмас думыштны да вӧчны и Генякӧд. Тайӧ кык детинкасӧ кӧ кужа да верма босьтны киӧ — ставыс лоӧ бур. Сьӧкыд лоӧ ноксьыны Павелкӧд: детинкаыслы топыда сюйӧмаӧсь мӧвп, мый сылӧн юр пытшкас нитш и велӧдчӧм сылӧн оз артмы.

Мӧд лунас жӧ Павелӧс кольӧді урокъяс бӧрын. Бура, тӧлкӧн сёрнитім задача йылысь. Тшӧкті артавны. Ачым петі учительскӧйӧ.

Дас минут мысти локті, видзӧда: Павел абу. Шензьыны эг и кут. Тӧді: задачаясысь зывӧкыс сылы нинӧм абу. Пасьтаси да муні гортас.

— Бара нин мыйкӧ вӧчис? — гажтӧма юаліс мудз синъяса Анастасия Ивановна, Павеллӧн мамыс, да ышловзис: — Ог нин и тӧд, мый сэсся вӧчны. Кыв оз гӧгӧрво, нӧйтны ог вермы. Батьыс вӧралӧ да дзонь вежонъясӧн гортӧ оз волывлы. А волас кӧ — тӧлкыс сыысь зэв жӧ этша. Шуыштас сӧмын: оз пӧ кӧ кывзысь — эн верд дай ставыс. А нӧйтӧмсьыд пӧ пӧльзаыс эз вӧв некор да оз и ло. Дзикӧдз вельмис стрӧжиттӧгыд: ва ведра оз вай, пес моздор оз пырт...

— Нинӧм сійӧ эз вӧч лёкторсӧ, Анастасия Ивановна, — нюмъёвті ме. — Велӧдчӧ ӧні зільджыка. Дерт, арифметика кузя слабджык, но ми талунсянь заводитім решайтчыны урокъяс бӧрын. И ме думайта — Павел суӧдас ёртъяссӧ, накӧд тшӧтш помалас нёльӧд класс. Кывзысьӧ ӧні менсьым.

Павел шензьӧмӧн видзӧдліс ме вылӧ. Сэсся лэдзис видзӧдлассӧ улӧ. Тӧдчис: зонка шӧйӧвошӧма. Виччысис, кӧнкӧ, чардби да гым, а ме ошка сійӧс!

— А локті ме сёрнитыштны. Регыд ноябрь сизимӧд лун, ыджыд праздник. Челядь дасьтӧны концерт. А вот струннӧй инструментъясӧн ворсӧм ог вермӧ котыртны. Корсям гитараӧн, балалайкаӧн ворсысьясӧс. Павеллӧн, висьталісны, эм балалайка?

Павел гӧрдӧдіс:

— Эм...

— Нолтӧ, вайлы.

Ме видлі, ворсышті, сэсся мыччи Павеллы:

— Петкӧдлы, мый кужан.

Дивӧ! Ме водзын лои дзик мӧд Павел! Кытчӧ воши зумышлуныс? Гудыр синъясыс, кажитчӧ, лоисны сӧдзджыкӧсь, вом доръяссӧ вӧрзьӧдыштіс нюм. Павел ворсіс, позьӧ шуны, бура. Мамыс кывзіс-кывзіс да сэсся ышловзис:

— Ворсны тай кужӧ... Локтас школаысь да мӧдар помӧн жель оз бергӧд, рытывбыд брунӧдчӧ...

Детинка пуктіс балалайкасӧ, букыштчис. И со ме водзын бара нин важ Павел: синкымъяс увсянь видзӧдысь, лёк, топӧдӧм вом доръяса.

— Но, вот мый, Павел! Вай босьт балалайкатӧ да ветлам школаӧ. Мунігмоз корам Геняӧс. Видлам репетируйтчыштны. Гашкӧ, мыйкӧ и артмас. А сы бӧрын, оз кӧ ло дыш, и задачатӧ решитам.

Павел эскытӧг видзӧдліс ме вылӧ. Ме тӧді сылысь думъяссӧ: «Ылӧдчӧ, некутшӧм ворсӧм оз ло. Сетас задачник да пуксьӧдас рытывбыд кежлӧ...»

— Но, мый нӧ? Он кӧсйы? Дыш? Жаль, ме надейтчи тэ вылӧ, — кокньыдика ышловзи да мӧдӧдчи ӧдзӧслань.

— Ме... Мыйла ог? Ме... ветла!

Павел кутіс тэрмасьӧмӧн пасьтасьны.

— Вот и бур! — рад лои ме. — Мӧдім, сідзкӧ.

Кутчысьлі нин ӧдзӧс вугйӧ, но друг, быттьӧ вӧлисти дум вылӧ уси, бергӧдчи Павеллань: — Да, Павел, ме дзикӧдз вунӧдчи, кӧсйысьлі колхозса пред дорӧ бӧрӧ-водзӧ пыравны, а тэныд колӧ вайны ва да пестор пыртыштны. Сідзкӧ, вот кыдз сёрнитчам: тэ ӧні отсыштан мамыдлы, а нёль час кежлӧ локтан школаӧ. Бур?

Шӧйӧвошӧм детинка довкнитіс юрнас.

— Балалайкатӧ эн вунӧд босьтны! — гажаа нин шуи ме да петі.

Тайӧ лунсяньыс ми Павелкӧд быд рыт пукалім ӧтлаын. Частӧ брунӧдчим балалайкаӧн, но нӧшта частӧджык артасим. Со венім нин первой класса задачник, сэсся вуджим мӧд классӧ. Быд пӧрйӧ ме сюйи детинкалы юрас мӧвп: юр вемыс некодысь абу лёкджык, а весиг кытсюрӧ бурджык на — балалайкаӧн со кужӧ ворсны.

И кутшӧм ме вӧлі рад, кор Павел, дыр думайтӧм бӧрын, чеччыштас парта сайсьыс да горӧдас:

— Гӧгӧрвои, Николай Степанович! Ӧні решита!

— Молодец, Павел! — ошкышта ме. — А шуан вӧлі: оз пӧ артмы...

Тӧлысь мысти школаӧ воліс Анастасия Ивановна.

— Ог тӧд, кыдзи нин тэнӧ аттьӧавны, Николай Степанович. Дзик мӧд лои пиукӧй. Локтас школаысь, сёяс да котӧртас вала. Ваялас ушат тыр. Сэсся пес пыртлас, джодж чышкас — ставсӧ вӧчас тшӧктытӧг. Сэсся бара на юалас: «Нӧшта мый колӧ вӧчны, мамӧ, висьтав ӧдйӧджык. Вӧча, да школаӧ колӧ мунны».

«Мыйла нӧ, мися, быд рыт сэтчӧ мунан? — юала. — Дӧзмӧдчан ӧд, кӧнкӧ, Николай Степановичыдлы? А сійӧ тшапа: «Ми занимайтчам! Первой класса задачаяс тӧлысь чӧжӧн ставсӧ решитім! Тэ видлы, кутшӧмджык! Ӧні мӧдӧд класса задачник нин помалам». Но, мися, он кӧ мешайтчы велӧдысьыдлы — ветлы, инӧ, школаад. А тӧрыт, Николай Степанович, кок йылысь усьтӧдз чуймӧдіс менӧ. Локтіс пиӧй школаысь дай шуӧ: «Вай пӧ, колӧкӧ, джоджтӧ мыська. Ми пӧ школаын быд субӧта асьным мыськалам джоджъяссӧ классысь и коридорысь». Дивӧ дай сӧмын!

Ме нюмъёвті: дум вылӧ уси, кыдзи Павел медводдзаысь мыськис классысь джоджсӧ. Воис ӧчередьыс, да нырсӧ кӧрис, ме пӧ ог мыськы. Челядь шумитӧны, но мый сыкӧд вӧчан? Ме ысті челядьӧс гортаныс.

— Но, Павел, колим кыкӧн, — шуи ме. — Кӧть мый, а джодж ковмас мыськыны! Кыдзи тэ думайтан: тэ мыськан али ме?

Чӧв олӧ.

— Мый нӧ, тэныд кӧ нин сэтшӧм сьӧкыд, ковмас, буракӧ, аслым мыськыны...

Тазйӧн пырті ва, пуджи сосъяс, босьті рузум. Павел нетшыштчис:

— Ме ачым!

Тэрыба пӧрччысис, пуджис дӧрӧм сосъяссӧ, гач кокъяс. Недыр мысти джодж вӧлі мыськӧма. Кӧть и эз вӧв вывті сӧстӧм, но ме век жӧ ошкышті:

— Бура мыськӧмыд, молодеч! А шуан: ог пӧ куж...

Уна ковмис ноксьыны Павелкӧд да Генякӧд. Арнас нин казялі: Геня воштӧ уна кад лыйсянторъяс вӧчӧм вылӧ. То лӧсьӧдас рогатка, то ньӧввуж, то пуысь вӧчас наган. Став тайӧ добрасӧ ме сылысь мырддялі. Но зонка эз шогсьы: мӧд лунас жӧ сы киын вӧлі нин выль ружье. Унаысь сёрнитлі Генякӧд, но ставыс весьшӧрӧ. Ковмис корны школаӧ мамсӧ.

— Полина Сергеевна! Ме ог тӧд, мый вӧчны Генякӧд. Сійӧ быд лун вайӧ школаӧ выльысь-выль ружье. Сы вылӧ видзӧдӧны ёртъясыс. И миян школа кутіс лоны военнӧй лагерь кодь.

— Ме ог жӧ тӧд, мый вӧчны, Николай Степанович, — шога шуис Полина Сергеевна. — Ме — ветфельдшер, лун-лун, а зэв частӧ — войяс чӧж — колхозъясын, фермаясын. Геня унджык кадсӧ гортын бабыскӧд. Мый сылы окота — сійӧс и вӧчӧ.

— Колӧ мыйкӧ думыштлыны, — йӧрми тшӧтш и ме.

— Бать сылы колӧ! — тэрыба видзӧдліс ме вылӧ гырысь сьӧд синъяснас Полина Сергеевна да мыйлакӧ гӧрдӧдіс. — Батьтӧгыс сылы гажтӧм. Детинкаыс сюсь да визув, вот и ноксьӧ сійӧн, мый сылы интереснӧ, окота вӧчны.

Ме сюсьджыка видзӧдлі Полина Сергеевна вылӧ. Сэтшӧм сійӧ шань, мелі синъяса, том да... мича. Гажа сьӧд синъяс, вӧсньыдик сьӧд синкымъяс, руд кудрияс вевттьӧмаӧсь пельяссӧ. Бан бокъясыс шоныда югъялыштӧны, алӧй рӧмаӧсь. Ме шензи: «Да тайӧ жӧ том ныв! Кытысь сылы дас ӧти арӧса пиыс?!»

Бӧрыннас тӧдмалі: батьыс Генялӧн вӧлӧма геолог, ӧти экспедиция дырйи пӧгибнитӧма. Мамыс кулӧ Геняӧс чужтігӧн. Быдтыны кагаӧс босьтчас Поля чойыс аслас мамыскӧд. Вот и быдтӧны грекӧн сорӧн.

— Ме гӧгӧрвоа, Полина Сергеевна. Тіян прӧст кад, позьӧ шуны, абу. Но пиыдкӧд сёрнитыштӧй стрӧгджыка. Сетӧй кутшӧмкӧ интереснӧй удж, лобзикӧн пилитчыны ли мый ли...

Полина Сергеевна кӧсйысис, кыдз вермас, топӧдыштны Геняӧс. И збыльысь, сійӧ ёна отсаліс меным. Унаысь казявлі: гортса уджсӧ детинка вӧчӧма кыкысь. Дерт жӧ, мамыс тшӧктіс, кӧнкӧ, гижны выльысь.

Геня тӧлысь-мӧд эз вайлы школаӧ некутшӧм ружье. Но ӧтчыд, тӧвнас, ӧшиньсянь аддзи: челядь босьтӧмаӧсь Геняӧс кытшӧ, корӧны:

— Петкӧдлы, петкӧдлы...

Геня кыйкнитліс школа ӧшиньясӧ да мыйкӧ петкӧдліс. Урокъяс помасьӧм бӧрын тшӧкті кольччыны сылы, сэсся кори:

— Петкӧдлы выль ружьетӧ, Геня.

Зонка шӧйӧвошис, гӧрдӧдіс. Тӧдчис: жаль выльторйыс. Но воштысьны некытчӧ. Ышловзис да мыччис кӧрт ствола наган. Ствол бокас вӧчӧма розь. Тыдалӧ, зарадитны колӧ порохӧн, сэсся истӧгӧн ӧзтыны сійӧс.

— Н-да-а, — довкйӧдлышті ме юрнам. — Бур штука. Ылӧдз лыйӧ?

Геня нинӧм эз шу.

— Гашкӧ, козьналан меным? А со тэнад эм, а менам абу. Тэ аслыд выльӧс вӧчан. Трубкаясыд эм на? Абу кӧ, верма сетны. Татшӧм трубкаясыс менам крӧватьын квайт кымын эм. Зэв уна наган позьӧ вӧчны, став школасӧ вооружитны.

Геня чӧв оліс. Дыркодь пукалім, думайтім. Сэсся шуи:

— Вот мый, Геня: тэ ӧні ветлы гортад, сёйышт, отсышт мамыдлы, бабыдлы. Сэсся волы татчӧ. Эм ӧти делӧ, зэв интереснӧй удж.

Ме видзӧдлі ӧдзӧслань да гусьӧник висьталі:

— Лӧсьӧдам ми тэкӧд электрическӧй звӧнокъяс. Сідз лӧсьӧдам: со этійӧ часіыс ачыс кутас звӧнитны, кор ковмас, классын да коридорын. Гӧгӧрвоан? Сӧмын та йылысь мед некод оз тӧд! Оз кӧ, быттьӧ, артмы — яналам кыкнанным.

Парсӧ курччӧмӧн зонка дзоргис ме вылӧ. Синъясыс ӧзйӧны.

— Часіыс кутас... звӧнитны?

— Да, — эскӧді ме. Сэсся петкӧдлі электрическӧй звӧнокъяс, батарейкаяс, проводъяс. Та бӧрын ысті Геняӧс гортас, кори локны вит час кежлӧ. Но нёль часын зонка вӧлі нин школаын.

— Водз локтін, Геня. Ме ӧні нинӧм на ог вевъяв вӧчны. Аддзан: урокъяс кежлӧ лӧсьӧдча.

— А ті ӧмӧй урокъяс кежлас гӧтӧвитчыланныд жӧ?! — ёна чуймис зонка.

— А кыдзи нӧ? Нёль класс, и быдӧнлы колӧ дасьтыны, кодлы мый вӧчны кутшӧм урок вылын. Рытывбыд лоӧ лӧсьӧдчыны. Тэ со гижан уджъястӧ вӧчин, а история кузяыд эн на и лыддьысь. Сідз?

Геня (кымынысь нин сійӧс видлі таысь!) чышкыштіс ныр увсӧ соснас, вештіс синвидзӧдлассӧ бокӧ.

— На, босьт учебниксӧ, пуксьы да лыддьысь, а ме сэк кості помала.

Урокъяс кежлӧ лӧсьӧдчӧм бӧрын ми кутчысим выль пӧлӧс уджӧ. Босьтім патефонлысь важ пластинка, розьӧдлім сійӧс кыті колӧ. Крепитім сэтчӧ истӧг тув кызта ыргӧн сутугаысь вӧчӧм спираль, паяйтім провод помъяссӧ да пуктім-крепитім пластинкасӧ маятника часілӧн циферблат пыдди. Минутнӧй стрелка помӧ паяйтім сутуга тор, кытчӧ сюйим алюминийысь вӧчӧм ичӧтик кӧлеса, коді стрелка вешйигӧн кутас гӧгыльтчыны ыргӧн сутуга вывті. Сэсся крепиталім звӧнокъяс классӧ, учительскӧйӧ, коридорӧ да весиг кильчӧ вылӧ. Нюжӧдлім проводъяс, йитім найӧс часікӧд, батарейкаяскӧд, выключатель-кнопкакӧд.

Карасина лампалӧн югӧр улын ноксим куим рыт. Отсасис тшӧтш и Павел. Но ми сійӧс сибӧдлім ас дораным сӧмын куим-нёль задача решитӧм бӧрын.

Коркӧ ставыс лои дась. Субӧта рытӧ матыстім часі стрелкасӧ «ӧкмыс» лыдпас дінӧ, пуксим да виччысям. Ме волнуйтча жӧ, а Геня гӧрдӧдӧма, сувтлас да пуксьылас. Часі вылысь синъяссӧ оз вештыв. Часілӧн маятник тічкӧ-точкӧ, стрелка ньӧжйӧник вешйӧ, сыкӧд тшӧтш гӧгыльтчӧ и алюминиевӧй кӧлеса. Со сійӧ инмӧдчис сійӧ местаас, кытысь вуштӧма сутугавывса изоляциясӧ, и тайӧ жӧ здукас проводъяс кузя мӧдӧдчис ток, гажаа триньӧбтісны звӧнокъяс.

Геня лэбаліс учительскӧйсянь классӧ, классянь коридорӧ да ывлаӧ, горзіс:

— Звӧнитӧны! Ставыс звӧнитӧны, Николай Степанович! Ура-а!

Кутшӧм рад вӧлі Геня! Ме видзӧді сы вылӧ да радлі жӧ.

Тайӧ лунсяньыс Геня век мыйкӧ вӧчис: то паяйтчис, то нюкляліс спиртовка би вылын стекляннӧй трубкаяс, то вӧчис ва кӧлеса, то стружитіс указка и, сё збыль, сылы дзик некор вӧлі вӧчавны наганъяссӧ.

ВЕЛӦДЫСЬЛЫ — ВЕЛӦДЧЫНЫ

Буретш тайӧ лунъясӧ воліс роноса заведующӧй Вениамин Михайлович Пальшин. Тӧдмасис школаса уджӧн, кывзіс урокъяс.

Урокъяс бӧрын пуксим классӧ. Ме — аслам пызан сайӧ, роноса зав — парта сайӧ.

— Но мый нӧ, сёрнитыштам, Николай Степанович, — шуис Вениамин Михайлович да мыйлакӧ ышловзис.

«Шонтас ӧні буриника! — думышті ме. — Шуас: некытчӧ туйтӧмӧсь урокъясыд».

— Урокъяссӧ нуӧдан сідзсӧ он лёка, методика серти. Челядь уджалӧны, думайтӧны. Тайӧ зэв бур, мый он нямлялӧмӧн сюяв налы юраныс выльторъяссӧ, челядь асьныс тшӧтш мӧвпалӧны. Но ме ог кӧсйы быд посниторйын гудйысьны, индавны став бурсӧ и лёксӧ. Тэ и ачыд аддзан, кӧні ӧшыбка лои, а кӧні мыйкӧ и воис сьӧлӧм вылад. Но висьтала, мый бокӧвӧй мортлы синмас шыбитчӧ. Вот тэ пырин классӧ, велӧдны кӧсъян челядьӧс, воспитайтны, а ачыд бритчытӧм талун, водз чуньясыд чернилаӧсь, пинжак соскыд мелйӧсь.

Ме шӧйӧвошӧмӧн видзӧдлі ас вылам да, кыла, пӧсявтӧдз гӧрдӧді. «Дӧрӧм воротникӧ няйт и», — югнитіс юрын.

Вениамин Михайлович нюмъёвтіс:

— А классад тэ вылӧ дзоргӧны дас вит пара син. Найӧ аддзӧны дзик ставсӧ, быд поснитор! Найӧ, чӧртпиян, ставсӧ тӧдӧны: водз али сёр чеччин, завтракайтін али эн, висян али он, ӧти тэнад костюмыд али кык.

Чӧв олыштӧм бӧрын Вениамин Михайлович сёрнитіс водзӧ:

— Велӧдчысьясыд оз на кужны весиг сулавнысӧ, Николай Степанович. Тэ со пырин классӧ, пызан сайын нин сулалан, а велӧдчысьясыд — ӧтияс сёрнитӧны, мӧд лукйысьӧ сумкаас, коймӧд ныр розьсӧ гудйӧ, ӧткымынъяс нямлясьӧны, быттьӧ вежон чӧж сёйлытӧмӧсь. Швачкакылӧны парта пӧвъяс. Чӧв-лӧньсӧ виччысигӧн тэ воштін кык минута.

«Унджык на мукӧддырйи», — яндзим вӧлі меным.

— Сэсся унаӧн кузь юрсиаӧсь. Дерт, парикмахерскӧй тані абу, но тэ требуйт, а оз кӧ нин кывзыны — ачыд шыр! Пырӧны классӧ, а кӧмкотъясыс унджыкыслӧн няйт. А ӧд шорыс орччӧн!

Ме кыйкнитлі аслам ботинки вылӧ: оз жӧ дзирдавны!

— Вот татшӧм тырмытӧмторъяссӧ бырӧдны колӧ, Николай Степанович. Аслыд жӧ кокниджык лоӧ уджавнытӧ. А учитель тэысь артмас, бур велӧдысьӧн лоан некымын во мысти...

«Некымын во мысти! — шензьышті ме. — Ӧні, сідзкӧ, абу на учитель?» Роноса юралысь быттьӧ лыддис менсьым думъясӧс:

— Опытыд, сійӧ оз ӧти тӧлысьӧн шед дай оз ӧти воӧн.

Триньӧбтіс звӧнок. Вениамин Михайлович матыстчис, ошкис:

— Тӧлка звӧнок вӧчӧмыд! Ачыд гӧгӧрвоин?

— «Физика в школе» журналысь лыдди.

— Физикаӧн интересуйтчан? Зэв бур! Мыйла пединститутӧ эн мун педучилище бӧрад?

— Некыдз вӧлі, Вениамин Михайлович. Стипендияыд, код тӧдас, шедӧ ли оз, а мам отсасьны оз вермы. Колхозын уджалӧ, кытысь сьӧмыс? Посни чой-вокъяс на со велӧдчӧны...

— Заочнӧ, сідзкӧ, колӧ велӧдчыны, пока том на да эн лӧсьӧд гӧтыр-котыр. Начальнӧй школаясад мужичӧй велӧдысьыд гежӧд. Паськыдджык туй колӧ восьтыны аслыд... Но, вай юктав чайӧн да мунны сэсся колӧ.

Петім учительскӧйӧ, менам патераӧ. Пузьӧді чай, восьті тушёнка банка, пукті вый, шӧралі рудзӧг нянь — лӧсьӧді ставсӧ, мый вӧлі.

Ӧбедайтігмоз роноса зав водзӧ нуӧдіс ассьыс сёрнисӧ:

— Математикъяс да физикъяс миян районын оз тырмыны, пикӧ воим. Физмат помалысьясӧс ставсӧ нуӧны Армияӧ, ракетнӧй войскаӧ. Тэнсьыд дипломтӧ видзӧдлігӧн синмӧ уси: физика-математика кузя быд во вӧлӧма пятеркаяс. Но педучилищеад физика-математиканад тӧдмӧдӧны сӧмын веркӧстіыс, оз пыдӧ гӧрны...

— Тригонометрия весиг эг прӧйдитлӧй...

— Сійӧ и эм. Вай тӧвнас гӧтӧвитчы да гожӧмнас сдайт приёмнӧй экзаменъяс. Кутшӧмсюрӧ учебникъяс да программаяс ме ыста. Мый оз тырмы — судзӧдан «Книга — почтой» пыр.

Вениамин Михайловичлӧн сёрниыс пыдӧ йиджис меным юр вемӧ. Да ме и ачым нин думыштлі та йылысь. Посни челядькӧд ноксьыны, збыльысь, кивывджык нывбаба-велӧдысьяслы.

Роноса заведующӧй, вӧлӧм, абу жӧ вунӧдӧма сёрнисӧ: вежон мысти воис вель сьӧкыд посылка — учебникъяс, программаяс.

Зіля босьтчи лӧсьӧдчыны приёмнӧй экзаменъяс кежлӧ.

ПОЛИНА

Лун бӧрся лун мунӧ школьнӧй олӧм. Вӧліны радлунъяс, но вӧліны и гажтӧм, шог лунъяс.

Ӧтчыд Геня эз лок школаӧ. Мӧд лунас локтіс, но гажтӧм, рам, быттьӧ абу и ачыс. Пыр гажа да вильыш руд синъясыс чусмӧмаӧсь весиг.

— Мыйла тӧрыт эн волы школаӧ? — юала сылысь.

Чӧв олӧ.

— Висин?

— Эг.

— Мыйла нӧ, сідзкӧ, эн велӧдчы?

Нинӧм оз висьтав. Урокъяс бӧрын тшӧкті сылы кольччыны. Кор челядь муналісны, пукси орччӧн да юалі:

— Но висьтав, Геня, мый лои...

Геня лэдзис юрсӧ. Синва войтъяс тёпкысисны парта вылӧ. Детинкалӧн кутісны сыркъявны пельпомъясыс.

— Но, нинӧм, Геня, нинӧм... Эн бӧрд. Ставыс лоӧ бур... — малышті зонкаӧс юрӧдыс, ышловзи да сідзи нинӧм тӧдмавтӧг и лэдзи гортас.

Рытнас ветлі сиктпомса керкаӧ. Геня эз вӧв гортас. Эз тыдав и мамыс...

— Но нинӧм, виччысьышта, — шуи пельтӧмкодь пӧчӧлы. — Геняныд тай мыйкӧ тӧрыт эз волы школаӧ дай талун вӧлі зэв гажтӧм...

— Геняыс? — ышловзис пӧчӧ. — Да ӧд, бур мортӧй, шогыс сылӧн ӧні мыйта... Бӧрдӧ, коньӧр, дугдывтӧг...

— Кутшӧм шог нӧ?

— Мамыс ӧд сылӧн, бур мортӧй, зэв сьӧкыда висьмис. Тӧрыт Геня больничаӧ вӧлӧн нуис.

Мен здукӧн жар лои. «Полина Сергеевна, дзоридз кодь ныв, сьӧкыда висьӧ!» — югнитіс юрын.

— Ме эг тӧд... Весиг думыштлынытӧ он куж, — шӧйӧвошӧмӧн шуалі да думайті: «А Геня? Кутшӧмджык ӧні Генялы? Мыйкӧ колӧ вӧчны. Но мый?»

Тэрмасьӧмӧн прӧщайтчи пӧчӧкӧд да петі ывлаӧ. Сьӧлӧм вылын вӧлі сьӧкыд. Восьлалі тӧвся туй кузя, горша лолалі кӧдзыд сынӧдсӧ да думайті. Кутшӧм частӧ ми, велӧдысьяс, видзӧдам сӧмын сы вылӧ, велӧдӧма-ӧ велӧдчысьыс уроксӧ. Мукӧдторйӧдзыс миян быттьӧкӧ абу некутшӧм делӧ. Унджыкысьсӧ ог тӧдӧ, мый велӧдчысьлӧн сьӧлӧм вылас, ог зільӧ тӧдмавны, кутшӧм сылӧн шог либӧ радлун.

Мӧд лунас Геня бара эз во школаӧ, и рытъявылыс ме муні сы ордӧ. Гырдмӧм синъяса зонка паныдаліс менӧ чӧв олӧмӧн.

— Вот мый, Геня, бур пи, — гажаа шыаси ме. — Аски вӧскресенньӧ. Вай корам колхозысь вӧв да ветлам мамтӧ видлыны.

Геня лэптіс юрсӧ, шензьӧмӧн видзӧдліс ме вылӧ. Сійӧ рад вӧлі.

Мӧд лунӧ асывводзнас ми рӧдтім нин дзуртысь туй кузя.

Больничаӧдз вӧлі дас вит километр. Эг на удитӧй рӧдтыны джын туйсӧ — поводдя кутіс вежсьыны. Лои шоныдджык. Но сы пыдди дзик немтор эз кут тыдавны. Кытыськӧ чӧртыс вайис турӧб, и сійӧ лышкыда кояліс ми вылӧ посни лым, емъясӧн моз бытшлаліс чужӧмӧ, эз сет видзӧдны водзӧ.

Но со и воим больничаӧ. Сетісны миянлы халатъяс. Пырим палатаӧ. Полина Сергеевна видзӧдліс ми вылӧ синва пырыс, гажтӧма нюмъёвтіс. Сьӧд синъясыс кажитчисны вывті гырысьӧн и сы мында наын тыдаліс дой, мый менам топавліс сьӧлӧмӧй.

Геня матыстчис мамыс дорӧ, дзебис кӧтасьӧм чужӧмсӧ сылы морӧсас. Куньса синъяса Полина Сергеевна малаліс писӧ юрӧдыс:

— Ставыс лоӧ бур, пиук, эн бӧрд...

Пырис томиник нывбаба, тыдалӧ, врач, шензьӧмӧн видзӧдліс ми вылӧ:

— Вевъялінныд нин локны? Ми жӧ дзик на ӧні звӧнитлім!

— Кытчӧ звӧнитлінныд? — эг гӧгӧрво ме.

— Колхозаныд. Корим ыстыны вӧв: висьысьсӧ колӧ ӧні жӧ нуӧдны районнӧй больничаӧ операция вылӧ. Ми тӧрыт корлім хирургӧс, но сійӧ эз вермы локны. Талун корим вертолёт, но поводдяыс, асьныд аддзанныд, дзикӧдз дзугсис.

Геня лэптіс юрсӧ. Сылӧн гӧгрӧсмӧм синъясас вӧлі сы мында повзьӧм, мый ме зіли збодермӧдыштны сійӧс:

— Эн пов, Геня. Со врачыс шуӧ, колӧ пӧ вӧчны неыджыд операция и ставыс лоӧ бур.

— Да-да, нинӧм ёна ӧпаснӧйыс абу. Вай мӧдӧдчӧй.

Сестра отсӧгӧн Полина Сергеевна пасьтасис. Петкӧдім доддьӧ, водтӧдім кӧшовкаӧ, гартім шоныд эшкынъясӧн.

Кык вежон мысти ми Генякӧд бара ветлім райцентрӧ. Тайӧ пӧрйӧ мунім долыдпырысь: вайӧдны Полина Сергеевнаӧс гортас. Кор пырим больничаӧ, нывбаба вӧлі пасьтасьӧма нин.

— Видза оланныд, Полина Сергеевна!

Геня уськӧдчис паныд:

— Мам!

— Петкӧдны тіянӧс доддьӧ? — нюмъёвті ме. Том нывбаба гӧрдӧдіс:

— Аттьӧ! Кыдзкӧ ачым нин. — Сэсся наяна содтіс: — Нӧшта уськӧданныд дай...

— Мунамӧй, сідзкӧ...

— Мунамӧй! — помтӧм рад вӧлі Геня.

Полина Сергеевна долыда нюммуніс алӧй паръяснас, и сылӧн нюмысь мыйлакӧ ёнтыштіс менам сьӧлӧмӧй...

Сёрнитігтырйи рӧдтім гортлань. Ми костын пукалысь шуда Геня бура шоналіс да унмовсис. Ме видзӧдлі Полина Сергеевна вылӧ, Геня вылӧ да бара эг эскы, мый найӧ эня-пиа: ньӧти абу ӧткодьӧсь.

— Полина Сергеевна, — ньӧжйӧник шӧпниті ме, — Геняыс абу жӧ тіян пи!

— Мыйла сідз думайтанныд?

— Вывті нин тэ том! Кызь арӧсысь абу унджык. Кытысь нӧ дас кык арӧса пиыс?!

Ныв серӧктіс, но эз кут вензьыны. Видзӧдліс чӧскыда узьысь зонка вылӧ да ышловзис:

— Генялы сӧмын на вӧлі кык арӧс. Батьыс муніс экспедицияӧ и бӧрсӧ эз во. Геня — менам чойлӧн пи. Кагасӧ чужтӧм бӧрын кувсис. Писӧ быдтіс менам мам. Меным сэки сӧмын на вӧлі дас арӧс...

Воим гортӧ. Пырим Полина Сергеевнаяс керкаӧ. Бабныс долыдысла оз тӧд, мый вӧчны. Пыр жӧ пуктіс самӧвар. Геня нуӧдіс конюшняӧ вӧв.

Полина Сергеевна лӧсьӧдіс сёйыштны. Ме видзӧді нывлӧн лӧсьыдик туша вылӧ, мича чужӧм вылас. Сьӧлӧм вылын кокни, лӧсьыд, долыд. Окота лои весиг сьывны, окота топӧдлыны нывлысь мелі кияссӧ, висьтавны мыйкӧ бурӧс, сьӧлӧмысь вӧзйысьысь кывъяс.

Локтіс Геня. Ми пуксим ӧбедайтны, чӧскыдпырысь панялім яя шыд, сэсся шӧна рок, сёйим сола чери, юим чай. Сё збыль, ме быттьӧкӧ вӧлі аслам семьяын, аслам рӧднӧй гортын...

ЮГЫД БИ

Коли тӧв, воис тулыс. Воис и сійӧ луныс, кор школаӧ медбӧръяысь волісны нёльӧд класс помалысьяс. Сеталі свидетельствояс, пӧся чолӧмалі начальнӧй школа помалӧмӧн. Юим чай. Сэсся сёрнитышті челядькӧд.

— Вот ті и помалінныд начальнӧй школа. Сэсся кутанныд велӧдчыны орчча сиктын, Мичашорскӧй семилетньӧй школаын. Но ассьыныд школатӧ эн вунӧдӧй, частӧджык пыравлӧй. Понданныд висьтавлыны, кыдзи-мый велӧдчанныд. Ме зэв рад, мый бура помалісны школасӧ и Геня, и Павел. Уна рыт ми пукалім Павелкӧд ӧтлаын, ӧні сійӧ некодысь оз лёкджыка артась. Ёна отсасис меным Геня, уна буртор вӧчис, пасибӧ сылы.

Друг ме шензьӧмӧн казялі: Геня лэдзис юрсӧ да кутіс частӧ кыскыштавны нырнас сынӧдсӧ. Павеллӧн, видзӧда да, доршасьӧ жӧ синваыс! Сэсся и мукӧдъяс тшӧтш вевттисны чужӧмъяснысӧ. Нывкаяс, найӧ бӧрдісны яндысьтӧг.

— Но, мый нӧ ті?! — зіли серӧктыны. Но кылі: аслам горш дінӧй гӧрддзассис, лои сьӧкыд лолавны.

Сё збыль, ме муртса эг бӧрддзы, ӧдва верми ньылыштны горш дінӧ сибдӧм курыд ёкмыльсӧ. Нокси, нокси челядькӧд во чӧж, унаысь дӧзмылі, унаысь скӧрмылі, унаысь бурасьлім. Но, со, ковмис торйӧдчыны, и синваыд петӧ. Жальӧсь, сьӧлӧм чепӧльтмӧн жальӧсь...

Ӧтчыд, ме отпускын нин вӧлі, кӧсъя ветлыны Эжва берегъяс дорӧ, гортӧ, звӧнитіс роноса заведующӧй:

— Вежон мысти Сыктывкарын воссьӧны математикъясӧс дасьтан тӧлысся курсъяс. Гашкӧ, ветлан, Николай Степанович? Сэки жӧ, гашкӧ, верман сдайтны и приёмнӧй экзаменъяс пединститутад. Гӧтӧвитчылін?

— Тӧвбыд лӧсьӧдчи, Вениамин Михайлович!

— Сідзкӧ, эн нюжмась, аски жӧ и лок райцентрӧ. Оформитам документъяс, и лэб столицаӧ.

Мӧд лунас жӧ ме вӧлі Ижмаын, а сэсся — Сыктывкарын.

Тӧлысь чӧж зіля пукалі занятиеяс вылын, а рыт-рыт — учебникъяс сайын. Сюрлі пӧттӧдз, весиг кельдӧдіс чужӧм да вӧйисны синъяс, но и радлуныс вӧлі помтӧм: ӧти гожӧмӧн верми кыйны вель ыджыд кык кӧчӧс — сдайтны приёмнӧй экзаменъяс физматӧ дай помавны математикъясӧс дасьтан тӧлысся курсъяс!

Любӧпырысь видлалі выль документъяс. Лӧз зачётнӧй книжка эскӧдіс: Лэбачов Николай Степанович — Коми педагогическӧй институтысь физико-математическӧй факультетса студент. Мӧд бумагаыс, кытчӧ ляскӧма просвещение кузя Министерстволысь вель ыджыд печать, восьтіс ӧдзӧс Коми республикаса семилетньӧй школаяслысь — велӧдны челядьӧс математика да физика кузя. Вот сідз!

— Молодеч, Лэбачов! Молодеч, Николай Степанович, бур пи! — ошкышті ачымӧс.

Ньӧти эз зырт да сьӧктӧд зептӧс и сьӧмтор, кодӧс сетісны меным. Да эз на и этша — тӧлысся шӧркодь удждон. Ньӧби донтӧминик костюм, кык дӧрӧм, сапӧг. Бергалышті шапкаяс вузалан отделын да дыркодь падъялӧм бӧрын ньӧби сьӧд шляпа. Сиктад шляпатӧ зэв гежӧд морт новлӧ, но мед, оз, гашкӧ, ёна серавны изьваса йӧзыс. Ӧд, кӧть мый эн шу, а учитель, да ӧні нӧшта и ыджыдджык школаын!

Кыпыд сьӧлӧмӧн лэби Ижмаӧ. Роноӧ пыри выль костюма, еджыд дӧрӧма, галстука, шляпаа — прамӧй учитель, абу кодкӧ-мыйкӧ-кутшӧмсюрӧ, а математик!

Кӧсйи пыр жӧ петкӧдчывны Вениамин Михайловичлы, кутшӧм ме молодеч лои, да юавны, кытчӧ ыстас уджавны, но секретарь-машинистка ӧлӧдіс: пукышт пӧ, виччысьышт, сы дорын йӧз.

Заведующӧй кабинетын гораа сёрнитісны. Кыліс Мичашорскӧй семилетньӧй школаса директор Лидия Ивановналӧн ёсь, чирӧм гӧлӧсыс. Сійӧ воліс тӧвнас миян школаӧ пырмунігмоз, видзӧдлыны, мыйсяма «ӧслӧпъяс» локтасны арнас сы школаӧ Галпомса начальнӧй школаысь.

— Уджалім карасина лампаясӧн да кыдзкӧ-мыйкӧ уджалам нин, кытчӧдз оз ло сиктын прамӧй электричество!

— Но мый ті, Лидия Ивановна? Ми кӧсъям сетны тіянлы выль электростанция, а ті кинад и кокнад пыксянныд!

— Коді сійӧн ноксяс, станциянас? Миян ставыс нывбаба. Ӧти мужичӧй и эм, Бугаев, да сійӧ — биолог, нидзувъяс да лягушаяс сӧмын и тӧдӧ, гашкӧ, нӧшта кутшӧмсюрӧ быдмӧгъяс. Электростанцияӧ ми ог лысьтӧ кутчысьны. Бензинӧн вӧдитчыны? Челядь куритчӧны гусьӧн... Школасӧ сотам нӧшта... Ог-ог-ог! Вот и ставыс!

Вениамин Михайлович бара на босьтчыліс эскӧдны:

— Лидия Ивановна, ті жӧ физик! Велӧданныд вӧдитчыны станцияӧн ыджыдджык арлыда челядьӧс. Найӧ окотапырысь босьтчасны, сӧмын петкӧдлы да висьтав, мый да кыті вӧчны...

Директор вакӧдіс:

— Кыдзи нӧ ме велӧда, Вениамин Михайлович, ачым кӧ ог куж?!

— Со, инструкция эм, ставсӧ лючки-ладнӧ гижӧма, кыдзи-мый вӧчны...

— Ті вайӧй меным математикӧс, а электростанцияыд оз ков! Оз-оз! Сетӧй мукӧдлы, кӧні директорыс мужичӧй.

— Оз куйлы! Вит станция сетісны район вылӧ, нёльсӧ нуисны нин дай тайӧс корӧны куим начальнӧй школаӧ, оз повны ті моз. Ме тай водзджык кӧсъя вӧлі югзьӧдны средньӧй да семилетньӧй школаяс-а...

Роноса заведующӧй, кылӧ, ышловзис:

— Математик? Тӧда, колӧ тіян. Талун-аски локтас Лэбачов Николай Степанович...

— Кутшӧм Николай Степанович? Этійӧ, галпомса учительыс? — кылӧ, усьӧм гӧлӧсӧн да кыдзкӧ менӧ нинӧмӧ пуктӧмӧн юаліс Лидия Ивановна. — Кутшӧм нӧ сійӧ математик?! Ті сераланныд кӧ ме вылын-а? Ме виччыся прамӧй мортӧс, образованиеаӧс!

— Высшӧй образованиеаӧс, гашкӧ? — крукыштіс роноса зав. — Высшӧй образованиеа математикъясыс миян шӧр школаясас на оз тырмыны! А Лэбачов велӧдчис курсъяс вылын, кутас заочнӧ велӧдчыны физматын. Ме чайта, оз ло омӧль велӧдысь. Помнитанныд, Фрида Гавриловна дзикӧдз кисьтыліс тӧлксӧ да ладсӧ Галпомса школаын? А Николай Степанович бӧр кужис топӧдны-лӧсьӧдны дисциплина, школаас лои пӧрадок. А кутшӧм лоӧ сыысь физик — ӧні нин тыдалӧ. Ті со век на зильганныд вичко жыннянӧн, а сылӧн — электрозвӧнокъяс, ачыс часіыс звӧнитӧ!

Лидия Ивановна чӧв усис, мӧвпаліс, буракӧ. Меным зэв эз ло лӧсьыд кывзысьны ас йылысь сёрни, да петі ывла вылӧ. Кутшӧм кыпыд настроение вӧлі, а ӧні сьӧлӧм гудыртчис. «Кутшӧм нӧ сійӧ математик!» — кыліс пельясын директорлӧн кывъясыс. Ӧбиднӧ, дерт: оз на тӧдны, а этадзи шуӧны! Ог мун на дорӧ, мед кытчӧкӧ мӧд школаӧ ыстӧны. А вот электростанциятӧ, сетасны кӧ, — окотапырысь босьта! А мый, вӧзйысьны кӧ бӧр Галпомса школаӧ? Кыдзи кутас югзьыны школаыс! Электрическӧй би — абу карасин лампаыд! Мед сэки завидьтӧны Мичашорса школаын велӧдысьяс да велӧдчысьяс. Ачыс директорыс дульсӧ ньылавны мӧдас!

Ӧбед бӧрын мӧдысь пыри роноӧ. Вениамин Михайлович любӧпырысь видзӧдліс ме вылӧ, тапкӧдыштіс пельпомӧ:

— Локтін? Молодеч, молодеч! Зэв бур! Но омӧльтчыштӧмыд неуна. Сёйны колӧ бурджыка! Сьӧмыд эм на?

Роноса зав бергӧдчис олӧма инспектор дорӧ:

— Вот, Анна Петровна, миян выль математик! Курсъяс помаліс дай заочнӧ пырис велӧдчыны. Морт лоӧ! Кытчӧ эськӧ ыстам тайӧ молодечсӧ?

— Асьныд тӧданныд: куим школаӧ колӧ математик-физик.

— Да, да, — мӧвпалӧмӧн довкйӧдліс юрнас Вениамин Михайлович да нем виччысьтӧг юаліс:

— Передвижнӧй электростанцияӧн курсъяс вылад эз тӧдмӧдны?

— Эз, — шензьышті ме. — А мый? Ронолӧн эм сэтшӧм станция? Позьӧ видзӧдлыны?

Роноса зав да инспектор видзӧдлісны ӧта-мӧд выланыс.

— Петалам, Николай Степанович!

Петісны.

— Со, — индіс Вениамин Михайлович вель ыджыд ящик вылӧ. Сійӧ восьса.

Передвижнӧй электростанция «Киев-1» меным зэв ёна воис сьӧлӧм вылӧ: ичӧтик, кокньыдик, мичаник, кияс вылад позьӧ кыпӧдны. Заправитім автол сора бензинӧн. Ме нетшышті двигатель заводитан рычаг. Двигатель пыр жӧ гажаа уркнитіс. Вениамин Михайлович включитіс переноснӧй лампа, сійӧ югыда ӧзйис. Меным зэв любӧ лои да юалі:

— Меным он сетӧй тайӧс, Вениамин Михайлович? Кутшӧм школаӧ ыстанныд — сэтчӧ и нуа окотапырысь!

Роноса заведующӧй гажаа серӧктіс:

— Но и но! Ӧти кинас и кокнас ӧткажитчис, а мӧд ачыс корӧ! Босьт да ну! Пасибӧ висьталан зэв унаысь. Тайӧ медбӧръя. Бур станция, нинӧм ог шу. Быд школаӧ эськӧ татшӧмыс! Миян районын жӧ югыд биыс сӧмын на Изьваса да Щельяюрса шӧр школаясын, сэсся быдлаын — карасин лампаяс...

— А кытчӧ нунысӧ, Вениамин Михайлович? Кӧні кута уджавны?

— Мичашорскӧй семилетньӧй школаӧ мунан?

— Лидия Ивановна дорӧ?

— Да, да. Выль математик-физик, выль электростанция. Ставыс артмӧ зэв бура! Проводъяс, патрон-выключательяс, изоляторъяс — ставыс, мый колӧ, эм. Электромонтёр ті дорӧ, дерт, оз лок, ковмас аслыныд став уджсӧ вӧчны. Сосъястӧ пудж да прамӧя уджав, том физик-математик! Ёна надейтча да эска: сентябрь медводдза лун кежлӧ мичашорскӧй школаын лоӧ югыд би! Кадыс тэнад зэв на уна: августовскӧй конференцияӧдз дас лун на.

Мичашор сиктӧдз райцентрсяньыд абу миян — сизимдас километр. Колхознӧй грузӧвӧй автомашинаӧн воим сёр рытын, сап пемыдын. Пӧпутчик-колхозникъяс отсалісны ректыны электростанциясӧ школа дорӧ да мунісны. Ме коли ӧтнам. Висьталісны: школаса директор семьянас олӧ орчча керкаын, школьнӧй интернатын. Ӧти ӧшинь вӧлі югыд: ӧзйис карасина лампа.

Сап пемыдас, видзчысьӧмӧн, мед кытчӧкӧ ог джӧмды, кайи кильчӧ вылӧ, раминика, ньӧжйӧник таркӧдчи.

— Коді сэні?

— Лэбачов. Велӧдысь. Роно ті дорӧ ыстіс уджавны.

Лэдзисны. Вердыштісны. Вольсалісны джоджӧ. Сизимдас километртӧ лёк туйӧд грузӧвикын локтӧм-пыркалӧм бӧрын узьсис зэв бура.

Мӧд лунас школаса директор корсис меным патера. Керкалӧн кӧзяеваыс — пӧрысь гозъя. Патераын видзӧмысь да сёйӧм-юӧмысь пуктісны дон — куимсё шайтӧн тӧлысь. Тайӧ удждонлӧн джынйыс пӧшти. Абу этша, дерт. Керкаын — дзик ӧти ыджыд жыр. Колӧ эськӧ вӧлі аслым ичӧтик торъя жыр, но кытысь корсян?

Медводдза лунас жӧ пӧся кутчыси уджӧ. Медшӧр мог — нюжӧдны школалӧн кыкнан судтаас, быд классӧ, электропроводка.

Мичашор сиктын, матігӧгӧрса посни грездъясын электрическӧй битӧ эз на, дерт, аддзывны. Лампочка ӧзйывліс, кор воліс кинопередвижка, кодӧс тӧлын кыскалісны вӧлӧн, а гожӧмын — Изьва кузя.

Электропроводкатӧ ме эг жӧ везйӧдлыв некор, но кыдзи-мый вӧчны — ылӧсас тӧді: Галпом школаын ичӧтик опыт вӧлі нин.

Водз асывсянь сёр рытӧдз, кытчӧдз эз пемдыв, нокси школаын. Мед некодӧс не дӧзмӧдны дай мед меным эз мешайтчыны, став уджсӧ вӧчи ӧтнам.

Кадысь кадӧ пыравліс Лидия Ивановна, юавліс, оз-ӧ ков кодӧскӧ ыстыны отсӧг вылӧ, мыччыны-кыпӧдны, нуны-вайны. Ме ӧткажитчи.

— Асьныд тӧданныд, — коса шуис директор. — Но, сё-таки, кор эштас? Ті кисьтінныд стенъяссьыс и пӧтӧлӧкъясысь став известкасӧ, гӧгӧрбок парсалінныд да гижталінныд, ковмас выльысь чиститны-белитны. Велӧдчан во заводитчытӧдз коли вежон, и колӧ тӧдны, кор помассяс тайӧ уджыс?

— Аски помала, Лидия Ивановна, — эскӧді ме.

И со воис долыд здук: электропроводка нюжӧдсис. Лои ӧшӧдӧма кызь кык лампочка, пуктӧма сы мында жӧ выключатель да розетка. Мӧвпалышті да шуи лючки-ладнӧ прӧверитны став системасӧ рытын, кор школаын некод нин эз вӧв. А кыткӧ неладнӧ кӧ вӧчсис да оз быд лампочка югзьы либӧ оз выключитсьы?! Яналан сэки — ой-ой-ой! Нинӧм пӧ оз куж, а босьтчӧма!

Рӧмдӧ нин вӧлі, кор заведиті электростанция. Включиті переноснӧй лампа — ӧзйис. Та бӧрын полігтырйи включиті став системасӧ да пыри школаӧ. Тэрмасьтӧг, но ёна волнуйтчӧмӧн муна классысь классӧ, включитала лампочкаяс. Ӧти ӧзйӧ, мӧд, коймӧд... Кайи вылыс судтаӧ. Бара жӧ быдлаысь ӧзталі. Сӧмын сэки кокнипырысь да ыджыда лолышті. Ставыс бур!

Пӧсь радлун ойдӧдіс морӧс пытшкӧсӧс. Петі ывла вылӧ. Мичаа, рӧвнӧя уджаліс-ургис электростанция. Рытъя рӧмыдас гажаа югзисны-дзирдалісны кык судтаа школалӧн став ӧшиньясыс.

Эг вермы кутчысьны да лэччи сиктӧ, мед боксянь видзӧдлыны школа вылӧ. Пыри аслам патераӧ, восьті ӧшинь да видзӧда-любуйтча.

Магазин дорын кылӧны сёрнияс.

— Видзӧдлӧй, видзӧдлӧй, мадаясӧй, школа выланым!

— Двореч кодь!

— Мый нӧ лоӧма? Кытысь татшӧм югыд биыс?

— Кыланныд, мотор со тургӧ? Выль учитель пӧ локтӧма да электричество вайӧма!

— Но-о? Ӧні, сідзкӧ, челядьным югыд биӧн нин пондасны велӧдчыны? Оз карасина лампаӧн?

— Оз кӧ кус... Карасина лампаыд ӧд медся на надежнӧй...

«Оз кус! — муртса эг горӧд ме. — Некор сэсся оз кус миян школаысь югыд би!»

Тайӧ рытыс меным вӧлі збыльысь зэв ыджыд праздникӧн!

«БАБИКОВ, ПЕТ КЛАССЫСЬ!»

Сентябрлӧн медводдза лун. Школа дорын жуӧны челядь. Первоклассникъяс локтӧмаӧсь бать-мамкӧд либӧ гырысьджык чой-воккӧд. Краситӧм, белитӧм, пелькӧдӧм, сӧстӧм классъясын тыр жӧ челядь.

Ставныс вӧччӧмаӧсь, быттьӧ ыджыд праздник кежлӧ. Да талун праздник и эм: заводитчӧ выль велӧдчан во. Ме выль костюма жӧ, ёна волнуйтча.

Велӧдысьяс сувтӧдалісны велӧдчысьясӧс классъяс серти. Сизимӧд класса велӧдчысьяс сеталісны первоклассникъяслы козинъяс — тетрадьяс, ручка-карандашъяс, пеналъяс да мукӧдтор.

Сэсся Лидия Ивановна пӧся чолӧмаліс велӧдчысьясӧс да велӧдысьясӧс выль велӧдчан воӧн да эскӧмӧн шуис, мый таво челядь пондасны велӧдчыны торйӧн нин бура да мӧд во кежлӧ, гашкӧ, оз коль ни ӧти морт.

— Ме бара коля, — чӧв-лӧняс зумыша шыасис менам Павел.

Ызӧбтіс серам. Директор син пӧвнас кыйкнитліс ме вылӧ, гӧрдӧдіс-скӧрмис:

— Т-тэ?! Тэ коля-а-ан! Дыш пон! Эн на заводит велӧдчынысӧ, а мӧдӧд во кежлӧ нин кольччыны лӧсьӧдчан!

Гажаа триньӧбтіс медводдза звӧнок. Челядь разӧдчалісны классъясӧ.

Меным удж лоӧ тырмымӧн: витӧд классын — арифметика, квайтӧдын — став математикаыс да физика, сизимӧдын — физика да черчение, содтӧд — витӧд да квайтӧд классъясын — рисование.

Медводдза урокнас вӧлі сизимӧд классын черчение.

Дзик медводдза урок выль школаын. Тані абу галпомса посни челядьыд, а гырысьджык сорт! Ӧні тӧда нин: медводдза уроккӧд, ок, уна йитчӧма! Медводдза урок вылын кӧ ог куж крепыда босьтны вӧжжи — удж, позьӧ шуны, оз артмы!

Стрӧглун, стрӧглун да нӧшта ӧтчыд стрӧглун! Главнӧйыс — дисциплина!

Сьӧлӧм тіпкӧ-чеччалӧ. Ӧдзӧс дорын сувтовкери. Зіли топӧдны, зэлӧдыштны ачымӧс. Некутшӧм нюм, некутшӧм шмонитӧм медводдза урокъяс вылын, а то бӧрыннас бӧрдны ковмас!

Классын, кылӧ, ызгисны челядь. Ыджыда лолышті да пыри. Челядь сувтісны. Комын кӧкъямыс пара син дзоргисны ме вылӧ. Класс вӧлі зэв ыджыд. Сёрнияс лаймалісны, но дзикӧдзсӧ эз на лӧньны. Некымын зонка пукалісны парта бӧр выланыс, а видзӧдан да дзик быттьӧ сулалӧны. Ӧти бергӧдлӧ киас ручка, нывкаяс кодсюрӧ нямлялісны сир, а медбӧръя парта сайӧ лажыньтчӧма, позьӧ шуны, куйлӧ, ён да мича том детинка, син пӧвсӧ читкыртӧмӧн наяна нюмъялӧ да видзӧдӧ меным веськыда синмӧ: «Но, мый пӧ тэ выльторсӧ висьталан, выль учитель?»

Дум вылӧ уси: «Велӧдчысьясыд оз на кужны сулавны».

— Здравствуйте, ребята! — стрӧга шуи ме.

— Здравствуйте! — уна пӧлӧс гӧлӧсъясӧн шыасис класс.

А мича зонка век пукаліс да нюмъяліс.

— Сизимӧд во велӧдчанныд да абу на велалӧмаӧсь весиг сулавны! — стрӧга шуи ме. — А нолтӧ петкӧдлӧй, кыдзи тіянӧс велӧдлісны сулавны учитель водзын!

Челядь веськӧдчисны, кияс лэдзисны, дугдісны нямлясьны, а кык-куим детинка нарошнӧ вылӧ кыпӧдісны морӧснысӧ, чатӧртісны юрнысӧ да гӧгрӧстісны синъяснысӧ. «Кужӧны карасьнытӧ!» — югнитіс юрын.

— Кужанныд, вӧлӧмкӧ! А тэ нӧ, бӧръя парта саяс, мый, он вермы сувтнытӧ?

Чӧв олӧм. Важ мозыс нюмъялӧ, весиг бурджыка на лажмӧдчис пельӧсланьыс.

— Кокъясыд висьӧны али мый?

Класс гизьмуні-серӧктіс.

— Сувт!

Эз и вӧрзьыв, нюмъялӧ.

— Кыдзи тэнӧ шуӧны? Мый нимыд?

Чӧв олӧм. Юалі класслысь:

— Кыдзи сылӧн фамилияыс?

Шы ни тӧв. Быдӧнлы зэв интереснӧ, мыйӧн тайӧ помасяс. А висьталан ним-овсӧ, да татшӧм ён дылдаыд медводдза урок бӧрас жӧ пӧттӧдзыд нӧшалас.

— Пуксьӧй! — тшӧкті ме.

Челядь пуксисны.

— Вай тӧдмасям, — водзӧ сёрнитны куті. Аслам сьӧлӧм, кыла, прамӧя нин пузис.

— Менӧ шуӧны Николай Степановичӧн. Велӧдны кутам тіянкӧд физика да черчение. А кыдзи шуӧны быдӧнӧс тіянӧс — ӧні жӧ тӧдмалам.

Восьті класснӧй журнал.

— Ануфриев Николай!

— Вокуева Вера!

Ӧти бӧрся мӧд сувталісны нывкаяс да зонкаяс.

— Бабиков Михаил!

Некод эз сувт.

— А, сідзкӧ, тэ и эм Бабиковыс. Сувтны колӧ, Миша!

— Хы-ы... Мыйла сувтлынысӧ? Сё ровно ӧд бӧр пуксьыны ковмас...

— Сувт!

— Хы! Мыйла ме сувта? Ме ог сувт!

«Оз кӧ сувт — тайӧ классын некутшӧм дисциплина оз ло!» — югнитіс юрын ёсь мӧвп. Пукті журнал да партаяс костті мӧдӧдчи ыръянитысь зон дорӧ, видзӧді веськыда синмас. Сійӧ лэдзис синвидзӧдлассӧ увлань, но сувтны эз тэрмась.

— Нолтӧ, вешйыв бокӧ! — тшӧкті ёртыслы да босьті Бабиковӧс сой пӧлӧдыс, зіли кыскыны аслань. Но ён зонмыд сідз шашаритчис партаас, мый эз и вӧрзьыв пукаланінсьыс. Эбӧснас меысь эз вӧв, пӧжалуй, слабджык.

— Пет классысь!

— Мыйла ме пета? Хы-ы... Ме ог пет!

Ни ӧти здук падъявтӧг грым пӧрӧді партасӧ боквыв. Бабиковлы быть лои сувтны да кыдзсюрӧ петны пӧрӧдӧм парта сайысь. Зонка лӧга югнитіс ме вылӧ сьӧд синъяснас да мӧдӧдчис ӧдзӧслань, петіс.

Классын лои шы ни тӧв, быттьӧ некод абу. Сэсся кодкӧ нывкаяс костысь, кылӧ, гораа шӧпкӧдіс ёртыслы:

— Бабиков кольӧм во ни ӧтчыдысь эз сувтлы ни ӧти учитель пыригӧн, а таво выль велӧдысьыд медводдза урок вылас жӧ сувтӧдіс!

Ме локті пызан дорӧ да, быттьӧ немтор эз и вӧв, заводиті урок:

— Черчение, ёртъяс, зэв сьӧкыд предмет, зэв стрӧг, сӧстӧм, чёткӧй да точнӧй наука.

Урокъяс помасигӧн, кор вот-вот триньӧбтас звӧнок да челядь гузьгысясны школаысь, ме сулалі нин сизимӧд класслӧн ӧдзӧс дорын да, мыйӧн петіс велӧдысь, пыр жӧ «арестуйті» Бабиковӧс.

— Пуксьы, эн тэрмась, сёрнитыштам! — крепыда куті сійӧс пельпомӧдыс, мед оз уйкнит.

— Мен жӧ гортӧ колӧ мунны! Вит километр!

— Воан!

— Хы-ы! «Воан!» Ёртъяс колясны!

— Туйсӧ он тӧд али мый?

Зонкалы ковмис кольччыны. Ме эг вид сійӧс кывзысьтӧмысь, а пукті ныр улас еджыд лист да тшӧкті вӧчны сійӧ жӧ уджсӧ, кутшӧмӧс вӧчисны ёртъясыс, сӧмын ӧлӧді:

— Эн тэрмась! Вӧчан омӧля — ковмас чертитны мӧдысь!

— Хы-ы! Коймӧдысь на, гашкӧ?

— Овлывлӧ и сідзи. Весиг витысь вӧчлывлӧны ӧти и сійӧ жӧ уджсӧ...

— Хы-ы!

— Вот тэныд и «хы!» Коді мыжа?

Бабиков зіля, тэрмасьтӧг, чертитчис. Эштіс да видзӧдлі: артмӧма тырмымӧн бура.

— Молодеч! Четыре! Но, мун сэсся гортад. Югыдӧн на воан...

Миша нем виччысьтӧг нюмъёвтіс, дзирдыштісны еджыд пиньясыс:

— Аддзысьлытӧдз, Николай Степанович!

ПӦСЬ ПЕЧЕНЧА

Вежон сӧмын и велӧдчим: ыстісны колхозӧ картупель босьтны.

Ми гӧгӧрвоам: картупель пуктӧма уна, а босьтны некодлы. Колхозникъяслӧн пӧ уджыс юр выв тыр: ӧтияс век на заптӧны турун да силос, мӧдъяс — скӧт дорын, коймӧдъяс стрӧитӧны выль карта, нёльӧдъяс пыжъясӧн вуджӧдлӧны видз вылысь турун арся лёк поводдя кежлӧ, кор Изьва вомӧн он вермы вуджны пыжӧн ни вӧлӧн.

Картупель кӧ и картупель. Быд ар тадзи дзик быдлаын. Нинӧм он вӧч. Менӧ ыстісны Галпом сиктӧ, Мичашорсянь куим километр ылнаын. Сетісны велӧдчысьяслысь кызь кык морта список — витӧд, квайтӧд да сизимӧд классъясса велӧдчысьяс. Ставсӧ пӧ петкӧд муяс вылӧ да быд лун пасъяв, коді кымын ведра картупель ӧктас. Бригадирлысь пӧ ваян справка, кымын тонна картупель идралінныд, ыджыд-ӧ площадь уберитінныд.

Мичашорысь петі водз, мед кӧкъямыс час асыв кежлӧ лоны контораын. Вои ас кадӧ, но тані бергалісны сӧмын «менам» велӧдчысьяс, весиг ачыс бригадирыс эз вӧв. Шензьӧдіс сійӧ, мый эз вӧвны Геня да Павел.

— Кӧнӧсь нӧ мукӧдыс? — шемӧс босьтіс менӧ. — Кӧні бригадирыс?

Зэв ичӧтик тушаа, зэв збой да пытш кодь тэрыб детинка окотапырысь висьталіс-сярӧдіс:

— Бригадирыс конюшня дорын, вӧв доддялӧ. А мукӧдыс — гортаныс, кӧні нӧ сэсся! Гришка паччӧрас, узьӧ на, Саня да Маня ӧшинь уланыс мамныскӧд картупель босьтӧны...

— Тэ, Петшӧр, ставсӧ кӧ тӧдан, кӧнӧсь нӧ эськӧ Канев вокъяс?

— Тӧрыт рытнас чери кыйны лэччӧны вӧлі вой кежлӧ да эз на локны: черисӧ катны, буракӧ, оз вермыны...

Серӧктісны.

— А Геня да Павел тшакла вӧлі мӧдӧдчӧны, — юӧртіс Петшӧр.

— Тшакла?! — шемӧсми ме. — Оз вермы лоны!

— Эз тшакла мунны, думайтанныд? Гашкӧ, инӧ, пувла, — эз вензьы Петшӧр.

Ме заводиті скӧрмыны. Медся ёна шензьӧдіс сійӧ, мый абу бригадирыс. Мый вӧчны, кытчӧ кутчысьны? Кӧні мешӧкъяс, зыръяс? Кутшӧм му вылӧ мунны?

— Лок, Петшӧр, ветлам конюшня дорас, — кори збой зонкаӧс.

Челядь серӧктісны. Гӧгӧрвои: Петшӧрӧн нимті да сійӧн. Кватитчи да юалі:

— Да, кыдзи нӧ тэнӧ шуӧны, варов зонка? И мыйла ме тэнӧ ог тӧд, вежон чӧж нин велӧдчим да? Кутшӧм классӧ котралан?

— Сизимӧдӧ! Он тӧдӧй менӧ сы вӧсна, мый ми тӧрыт на локтім Колгуев ді вылысь батькӧд. Сэні турӧбаліс дас лун чӧж, да лэбнысӧ эг вермӧй. А нимӧй менам Витя. Виктор Петшӧров.

Бригадирӧс аддзим, збыльысь, конюшня дорысь. Миянӧс аддзис да, ачыс шензьыштіс:

— Ме думайті, школа заводитас уджавны ӧкмыс чассянь, да сійӧн ньӧти ог тэрмась. Важӧн нин эськӧ вӧлі ті дорын. Ме ӧд медводдза лунъяс на бригадирала да ог на ставсӧ тӧд, кыдзи-мый. Тіянӧс, Николай Степанович, дерт, тӧда: кольӧм тӧв миян школаын учителялінныд... Но, мунамӧй, сідзкӧ. Витя, пуксьы вӧв вылас, тэ збойджык!

Воим му дорӧ.

— Участок тіян абу зэв ыджыд, кык гектар сӧмын. Босьтны картупельсӧ ковмас, дерт, ки помысь. Кӧрт зыръяс, вилаяс, ведраяс челядь мед босьтӧны гортсьыныс: колхозлӧн абу. Колхозлӧн эм сӧмын тыртӧм мешӧкъяс да вӧв. Новлыны картупельсӧ видзанінӧ аслыныд жӧ ковмас: отсӧг вылӧ сетны, сӧвтны-грузитны некодӧс ог вермы. Весита да примита ачым. Но, бура уджалӧй. Ен мед сетас тіян бур поводдя! Зільджыка кӧ уджыштанныд — вежонӧн, чайта, эштас. Кольӧм во вежонӧн жӧ босьтісны та ыджда жӧ му вылысь.

«Быдса кык гектар кӧрт зырйӧн лукйыны!» — шемӧс босьтіс менӧ. Но нинӧм он вӧч. Колӧ ӧдйӧджык чукӧртны челядьӧс да видзӧдлыны, коді ыджыдджык да ёнджык.

Локтім контора дорӧ. Челядь пырӧмаӧсь пытшкас, пукалӧны, варовитӧны.

— Кодлӧн эм зыр либӧ вила? — юалі налысь. Ведра быдӧн босьтӧмаӧсь, а кодйысяныс некодлӧн абу. Ёнджык детинкаясӧс, ысті гортаныс зырла-джыбанла.

— Тэ, Витя, котӧртлы да пальӧд Гришатӧ. Шу: Николай Степанович корис пӧсь печенча сёйны!

А ме тэрыба мӧдӧдчи Геня дорӧ. Эз эскыссьы, мый тшакла либӧ вотӧсла пышйис. Зонка быйкнитіс-петіс паныд. Синъясыс наяна югъялӧны:

— Здравствуйте, Николай Степанович! Пыралӧй керкаас. Мам удж вылас мунігӧн шуис: Николай Степановичыд кӧ локтас — мед пыралӧ пӧсь шаньга сёйны!

— Бӧрти пырала. Сэсся, Геня, эн сӧр: пувла вӧлі кӧсъянныд пышйыны?

— Ті пыдди кӧ кодкӧ мӧд локтіс — пышйим эськӧ Павелкӧд! — эз соссьы зонка. Тэрмасьтӧг матыстчис Павел. Кык друг видзӧдлісны ёрта-ёрт выланыс, нюмъёвтісны.

— Тэ пувла жӧ мӧдӧдчылін? — юалі Павеллысь, сюмӧд падъянсӧ аддзи да.

— Ме жӧ эг тӧд, мый ті локтанныд! Тӧді кӧ — мешӧк-мӧд босьті нин эськӧ картупельсӧ, мед ассьым нормаӧс водзджык помавны.

Сьӧлӧм вылын лои долыдджык. Кыкнаннысӧ ысті чукӧртны велӧдчысьясӧс контора дорӧ да мед босьтӧны зонкаяс зыр либӧ джыбан.

Недыр мысти ставӧн чукӧртчисны, весиг чери кыйысь вокъяс танӧсь вӧліны.

— Норма — быдӧнлы ӧктыны вит мешӧк картупель! — гораа висьталі ставыслы. — Быд мешӧкын — нёль ведра. Ме кута гижавны.

— О-о, вит мешӧк! Кольӧм во нёль вӧлі!

— Таво ті быдмыштінныд да ёнмыштінныд нин! — шуи ме.

— А унджык кӧ ӧктам? — юаліс Петшӧр.

— Унджык кӧ — премия: пӧсь печенча.

— Печенчатӧ ми и асьным пӧжалам!

— Он! — потша ме. — Некутшӧм би оз ло! Би дорад сулалігӧн да шонтысигӧн миян ковмас кык гектар картупельтӧ лым усьтӧдз дзимлявны...

— Кӧдзыд, Николай Степанович! — шызисны челядь. — Кияс кынмӧны!

— Ӧдйӧджык уджалам да шоналам. Дай луныс талун со шондіа, шоныд. Но, босьталӧй зыръяс, ведраяс, мешӧкъяс да мунам сэсся! — тшӧкті ме. Ёнджык зонкаяс дорӧ, кодъяслӧн вӧлі зыр либӧ джыбан, торйӧді нывкаясӧс, мед ӧктӧны картупельсӧ.

Бригадир меным сетіс нёль вожа ён джыбан. Аскӧд босьті вит нывкаӧс, слабджыкъясӧс, мед на серти ас кадӧ аддзыны, кор кутасны гегдыны ичӧтик чуньясныс.

Заводитім зіля уджавны.

— Ачыс тшӧтш кодйысьӧ! Дивӧ! — кыліс гора шӧпкӧм. Петшӧр эз терпит:

— Николай Степанович, тіянлы жӧ колӧ бригадаса контораӧ пырны да сэні пукавны!

— Мыйла?! — чуйми ме.

— Василий Кузьмич тай вӧлі век контораын пукалӧ! Сэсянь жӧ зэв бура тыдалӧ, коді уджалӧ, а коді филонитӧ! Сэні, сэсся, шоныд!

Василий Кузьмич — сійӧ миян биолог, ӧш кодь ён да госа мужичӧй.

Петшӧр варовитіс водзӧ:

— Петалас вӧлі контораысь, локтас ми дорӧ, нюлыштас вом дорсӧ, быттьӧ нӧк панялӧма, да шуас: «Дак вот, ребята, нӧшта час — и ӧбед! Давай, давай, уджалӧй филониттӧг!»

Ме гусьӧник нюммуні: «Абу весьшӧрӧ тэнӧ Петшӧрнас нимтӧмаӧсь! Но мый сійӧ «филонитны» кывйыс? Дышӧдчыны али мый? Талунӧдз ме татшӧм кывсӧ эг кывлы ни эг лыддьыв некытысь.

— Сэсся пырас бӧр, пукалас-пукалас да бара быйкнитас. Ачыс век нювсьӧ, варенньӧӧсь ли мый ли вом доръясыс. «Дак вот, ребята, нӧшта час — и гортӧ! Давай, давай, эн филонитӧ!»

Челядь кывзісны да сьӧлӧмсяньыс гигзисны-сералісны.

Недыр мысти казялім: шонді дзебсис сьӧд кымӧр сайӧ, пыр жӧ лои ыркыд. Пӧльыштіс вой тӧв.

— Хиуз петіс, — йӧжгыльтчыліс да висьталіс Витя.

Хиуз — изьвасаяс ногӧн — кӧдзыд вой тӧв. Аддза: менам нывкаяслӧн ичӧтик чуньясныс дзик гӧрдӧсь. Сюйӧны киныссӧ питшӧганыс, зептаныс. Удж кутіс мунны ньӧжйӧ.

— Павел, Геня! — горӧді ме. — Бипур ӧзтӧй!

Пессӧ челядь заптӧмаӧсь, вӧлӧм, водзвыв. Недыр мысти ӧзйис и бипур.

— Мунӧй, шонтысьыштӧй, нывъяс, — ысті ме ассьым звеноӧс. Челядь гузьгысисны гажа би дорӧ, кытшалісны сійӧс.

Шонтысьыштім, шойччыштім. Би дорад зэв лӧсьыд, но ӧд лунтыр он сулав: уджавны колӧ. И со бара нин зіля кодйысям, ӧктысям. Содӧны мешӧкъяс. Ковмис сэсся котыртны грузчикъяслысь бригада. Босьті аскӧд куим ёнджык зонмӧс, заводитім сӧвтны да новлыны картупельсӧ складӧ.

Бригадир, Сергей Вокуев, примитіс урожайсӧ веситӧмӧн.

— Менсьым юаласны, уна-ӧ картупельыс, дай тіян колӧ тӧдны, уна-ӧ босьтінныд, — шуис сійӧ. — Колхоз, бура ли, лёка ли, но век жӧ мынтыштас сьӧмтор...

Лун шӧр кежлӧ став босьтӧм картупельыс новлыссис. Тэрмассис менам, кужтӧгыд. Челядьӧс лэдзавны водз на, час колӧ на уджавны.

— Коді кужӧ бура, соттӧг, пӧжавны картупель? — юалі челядьлысь.

Серӧктісны:

— Ставыс кужӧны!

— Торйӧн нин дась пӧжалӧмасӧ сёйны! — сюйыштіс Петшӧр.

— Ха-ха-ха!

«Абу тай ёна кынмӧмаӧсь ни мудзӧмаӧсь!» — рад лои меным.

— Петшӧр медся мастер! — ошкис Геня. — Сійӧ весиг Колгуев ді вылын, Ледовитӧй океанын, печенча пӧжавлывлӧма!

— Вот мед, сідзкӧ, и пӧжалӧ картупель комын-нелямын. А ми сэк кості кыпӧдам да босьтам нӧшта тайӧ куим радсӧ, — инді ме. Челядь эз вензьыны.

И со чукӧртчим бипур дорӧ. Водзджык кодйӧминсӧ мичаа гӧгӧртім, ӧктім колялӧм, быд посни и гырысь картупель, лӧдім мешӧкӧ да нуим жӧ складӧ.

Ме висьталі, уна-ӧ вӧчим удж, да шуи:

— Пасибӧ, ёртъяс, да зэв бура уджалінныд! Аски локтӧй дружнӧйджыка, мед талунъя моз оз ков некодӧс корсьны. Сідзи вӧчам?

— Сідз! Локтам стӧч кӧкъямыс час кежлӧ! — кылісны гӧлӧсъяс.

— Вот и бур!

Петшӧр збыльысь кужӧ вӧлӧм пӧжасьнытӧ: пӧим пытшкас картупельыс небзьӧма зэв бура. Окотапырысь чӧсмасим пӧсь печенчаӧн да разӧдчим гортӧ.

КОНТРОЛЬНӦЙ УДЖ

Вежон мысти картупель идралӧм помасис нёльнан колхозысь, нёльнан сиктысь, кытысь челядь велӧдчӧны миян школаын.

Бара пуксим партаяс сайӧ. Меным сетісны 5 «А» класс. Класснӧй руководитель, сідзкӧ, куим во чӧж, кытчӧдз челядь оз помавны школасӧ. Пуксялӧмаӧсь, коді кыдзи веськалӧма. Мед пукалӧны. Кадыс петкӧдлас, гашкӧ, кодсюрӧӧс ковмас и мӧдлаӧ вештыны. Веськыда кӧ сёрнитны, ме радейта, кор ӧти парта сайын пукалӧны ныла-зонма либӧ кык нывка. Сэки дисциплинасӧ кокниджык кутны.

Казялі пыр жӧ: збойджыкъяс да дышджыкъяс медбӧръя партаяс сайӧ пуксялӧмаӧсь — «камчаткаӧ». Кыдзи жӧ! Сэні, на думысь, позьӧ вӧчны мый окота: гусьӧн лыддьыны интереснӧй книга, ворсны «морскӧй бойӧн», дӧзмӧдчыны воддза партаяс сайын пукалысьяслы, шыбитны юрбӧраныс нямлялӧм бумагаторйӧн либӧ, кор ёртсӧ корасны дӧска дорӧ, гижыштны мышкас крест.

— Медводз повторитӧй четвёртӧй класслысь арифметика кузя материал да вӧчӧй контрольнӧй удж, — чорыда шуис Лидия Ивановна. — И весьшӧрӧ ті, Николай Степанович, вуджӧдінныд витӧд классӧ Павелӧс. Асланыд жӧ содтӧд неуспевающӧй лоӧ дай школалысь успеваемость прӧчентсӧ лэдзанныд.

Ме нинӧм эг шу.

Арифметика урокъяс вылын некымын лун решайтім нёльӧд класса сьӧкыдджык материалъяс.

И со — контрольнӧй удж. Дӧска вылӧ гижӧма задачаяс да примеръяс. Классын пукалӧ школаса директор, стрӧга видзӧдӧ, мед некод оз кыйяв водзын либӧ бӧрын пукалысь ёртыс вылӧ. Синсӧ оз вештыв Павел вылысь.

Шы ни тӧв. Челядь думайтӧны, решайтӧны, черкайтӧны да бара гижӧны. Ме, дерт жӧ, ёнакодь волнуйтча, кӧть менам тані нёльӧн сӧмын Галпом школа помалысьыс. Геня да Павел пукалӧны орччӧн. Павел пӧсялӧма, гӧрд чужӧма, йирӧ ручка помсӧ. Задачаыс, буракӧ, оз артмы. А Геня юрсӧ оз кыпӧдлы, гижӧ-решайтӧ.

Медводз дугдіс уджавны ыджыд тушаа ён нывка — Элида. Пуктіс тетрадьсӧ парта помас да видзӧдліс ме вылӧ, нюмъёвтіс. Матыстчи:

— Эн гӧгӧрво али мый задачасӧ?

— Гӧтов, — шӧпнитіс Элида.

Ме шензьышті: урокыс сӧмын на заводитчис. Видзӧдлі: ставыс правильнӧ, гижӧма-решитӧма зэв сӧстӧма, быд точка ас местаас.

— Бур. Позьӧ петны, Элида.

Нывка нюмдіс:

— Ме пукышта на...

— Эштіс кӧ — пет! — тшӧктіс Лидия Ивановна. Сійӧ поліс, буракӧ, мед нывка гусьӧник оз отсав мукӧдыслы.

«Крепыд нывка, юрнас и тушанас!» — ошкӧмӧн думышті ме.

— Гӧтов! — гораа юӧртіс сьӧд синъяса да сьӧд юрсиа Юрий, зумыда тэчӧм зонка.

— Эштіс кӧ — сдайт, а горзынысӧ нинӧмла: ёртъясыдлы мешайтчан! — стрӧга шуис директор.

Ӧти бӧрся мӧд помалісны уджсӧ детинкаяс да нывкаяс да петалісны классысь.

— Павел! — кыліс гора стрӧг гӧлӧсыс директорлӧн.

— Мый ме кера? — зумыша бергӧдчис зонка.

— Мыйла шӧпкӧдчанныд?!

Геня пыр жӧ бергӧдіс вильыш чужӧмсӧ:

— Ме юалі Павеллысь, кытчӧ воши пыж улысь нидзув банкаыс? Тӧрыт вуграсим — вӧлі, а талун лэччылі да — абу нин, а сэні кольлі на нидзулыс. Вугыр шатинъяс кодкӧ нуӧма-и.

Классын кыптіс серам. Менам нюмъёвтсис жӧ.

Сӧмын директор эз серав.

— Контрольнӧйтӧ решитӧй, верманныд кӧ! — скӧра шуис сійӧ. «Нидзув банка»!

— Да ме решиті нин! — ошйысьыштіс Геня.

— Сдайт да пет, сідзкӧ, а эн шӧпкӧдчы!

Ме шыаси:

— Прӧверит зэв бура, Геня. Да эн сёрнит и мешайтчы.

Геня петіс. Классын витӧн сӧмын колины. Урокыс помасьӧ нин, а век на мыйкӧ гижӧны да черкайтӧны.

Триньӧбтіс звӧнок.

— Контрольнӧй уджъяссӧ кыкӧн прӧверитам, — кӧдзыда шуис директор да босьтіс пызан вылысь тетрадь чукӧрсӧ. Сэтчӧ жӧ ӧтлаӧдіс и налысь, кодъяс эз вермыны помавны уджсӧ. Меным, дерт, эз во сьӧлӧм вылӧ директорскӧй контрольыс, кор сійӧ оз эскы меным, учительлы. Но мед. Сэсся ӧд, мӧдар боксянь кӧ видзӧдлыны, директор-математиклы колӧ тӧдны, кутшӧмджык челядьӧс ыстісны таво орчча школаясысь.

Контрольнӧй бӧрын миян кыкнаннымлӧн веськалі «ӧшинь», урок вылӧ оз ков мунны. Пуксим прӧверяйтны контрольнӧй уджъяс. Абу вывті лёка уджалӧмаӧсь: вит пятёрка, сы мында жӧ четыре, дас кык тройка да нёль двойка.

— Но вот, классад лоӧ медся этшаыс нёль неуспевающӧй арифметика кузя, — ышловзис директор. — Да мукӧд предметъяс кузя... Слабиник класс, жебиник...

Павеллӧн, ме шуд вылӧ, лои три: задачасӧ решитӧма, а примеръяссӧ абу вевъялӧма.

— Весьшӧрӧ радланныд, — шомаа кӧрсис Лидия Ивановналӧн. — Павелыд неуспевающӧй жӧ лоӧ. Ме тӧда, кыдзи ті кыскинныд пельясӧдыс кольӧм во, мед йӧткыны нёльӧд классысь...

Ме гӧрдӧді:

— Эг пельясӧдыс кыскы, а тӧвбыд артасим вынъяс ни кад жалиттӧг! Кутас велӧдчыны и оз ло неуспевающӧй.

— Видзӧдлам! Ме уджала, слава бог, математикӧн дас во нин да тӧдышта челядьтӧ, коді мый вермӧ!

Вензьыны эг кут: опытыс сылӧн збыльысь, ыджыд, а ме вӧлись на заводита уджавны.

Медбӧръя урокыс аслам классын аслам жӧ вӧлі — рисование. Дерт, медводз быдӧнлы зэв окота вӧлі тӧдны, кутшӧмджыка гижисны контрольнӧй удж. Тӧдмӧді, сэсся шуи:

— Ставӧн, кодъяслӧн двойкаяс да тройкаяс, кольччасны урокъяс бӧрын. Кодлӧн два — решитас ассьыс вариантсӧ, кодлӧн три — орчча вариантсӧ.

— Кодлӧн три — тожӧ кольччыны?! Мыйла? — шызисны челядь.

— Вот мый, витӧд класс. Кывзӧй, сюркнялӧй пель саяныд да тшупӧй юраныд: быд письменнӧй либӧ контрольнӧй бӧрын, кодлӧн лоӧ два да три, — уджсӧ кутасны вӧчны выльысь! Эн кӧ кужӧй вӧчны урок вылас — вӧчанныд урок бӧрас!

Ме, дерт, эг тӧд, тадзи-ӧ вӧчӧны мукӧд математикъяс, но ме кольӧм во нин тадзи уджалі галпомса челядькӧд. Письменнӧй да контрольнӧй удж математика кузя кӧть кыдз, а век мед вӧлі вӧчӧма!

— Бура гӧгӧрвоинныд, челядь? А ӧні — рисуйтчыны.

Петкӧді челядьӧс ывла вылӧ. Шондіа, гажа. Мунім туйбокса вӧр дорӧ.

— Бӧрйӧ медся ичӧт пожӧм да рисуйтӧй. Эн зільӧй вуджӧдны бумага вылӧ став посниторсӧ, а пасйӧ медводз самӧй главнӧйсӧ, со тадзи: вӧсньыдик визьӧн гижтам ствол, гырысьджык лапъяс, сэсся и рисуйтам. Позьӧ рисуйтчыны сувтсӧн, позьӧ пуксӧн, позьӧ весиг водсӧн, позьӧ сёрнитны, сьывны, но рисунокыс мед вӧлі дась! Гӧгӧртӧй пу гӧгӧрыс да сюся видзӧдӧй. Ті аддзанныд, мый быд воськовтігӧн пулӧн мыгӧрыс ставнас вежсьӧ, лоӧ мӧд пӧлӧс. Сідз?

— Сідз!

— Сідзкӧ, кытчӧ сувтанныд либӧ пуксянныд, сэтысь сэсся эн нин вешйӧй, кытчӧдз серпасыс оз ло дась.

Тадзи и вӧчим. Челядь зэв вӧліны дӧвӧленӧсь тайӧ ывлавывса урокнас. Эг и казявлӧ, кыдзи лэбовтіс урокыс. Но ме эг казяв и мӧдтор, кыдзи лэбовтісны гортланьыс кодсюрӧ урокъяс бӧрӧ кольӧдӧмаяс пиысь. Эз тыдав и Павел. Ме скӧрми:

— Юрий, Геня да нӧшта морт-мӧд, коді повтӧмджык, суӧдӧй пышйысьясӧс да кыскӧй татчӧ шошаӧдныс!

Челядь пыр жӧ вувзьысисны пышйысьяс бӧрся.

Вайӧдісны веськыда классӧдз. Ставныс пошиктӧны.

— Ті нӧ мый, пышъялӧмсянь кӧсъянныд заводитны велӧдчан восӧ?! Тӧдӧй, мый велӧдчӧмыс тіян — медся главнӧй удж. Шуисны кӧ кольччыны урок бӧрӧ — кольччы да вӧч уджсӧ кыдз позьӧ бурджыка да сэсся и мун гортад нюмъялігтырйи. Коді ті пиысь кӧсйӧ кольччыны витӧд классӧ мӧдӧд во кежлӧ? Лэптӧй кинытӧ!

Ни ӧти ки, дерт, эз лыб.

— Но вот, некод оз кӧсйы кольччыны мӧд во кежлӧ. Сідзкӧ, восьтӧй тетрадьястӧ да заводитӧй артасьны.

Татшӧм ногӧн контрольнӧй удж лои вӧчӧма выльысь.

ВАЛЯ

Школаса завхоз-кассир Валя, том ныв, долыдпырысь юӧртіс:

— Талун кинопередвижка локтӧма! Кино лоӧ, а сы бӧрын йӧктӧм!

Ныв бергӧдіс мелань чужӧмсӧ да нюмъёвтіс краситӧм вом доръяснас:

— А Николай Степановичӧс ме эг на аддзыв клубысь. Оз ветлывлы ни кино вылӧ, ни танцы вылӧ. Манак!

Сьӧд синъясыс нывлӧн сералісны.

— Полӧ кӧнкӧ, мед тэ кодь збой нывъяс оз окавны, — шуис мича чужӧма, сьӧдов гӧрд гырысь синъяса Софья Ильинична, роч кыв да литература велӧдысь. — Весиг рытнас некытчӧ оз петавлы, век дедсӧ да бабсӧ караулитӧ...

— Занимайтчыны жӧ колӧ! Заочнӧ велӧдча! — дорйыси ме. — Но кино вылад кӧть ӧтчыдысь колӧ, дерт, ветлыны...

— А сэсся, гашкӧ и, йӧктыштны? — юаліс Валя.

— Сьывны-йӧктыны ме ог куж. Эз велӧдлыны...

Рытнас лэччи важиник ичӧтик клубӧ, кӧні пуклӧсъяс пыдди вӧліны ас киӧн вӧчӧм пу скамьяяс. Мыйлакӧ лоим Валякӧд орччӧн. «Кампет кӧть колӧ вӧлі ньӧбны», — думышті ме.

Кино бӧрын скамьяяс вешталісны стенъяс бердӧ. Магнитофонъяс да радиолаяс тані, ылі сиктад, эз на тыдавны. Ичӧтик сцена вылӧ кавшасис да пуксис улӧс вылӧ гӧгрӧс гӧрд чужӧма, еджыд юрсиа да еджыд синкымъяса зон — колхозса бригадир Закар. Стрӧга видзӧдліс йӧз вылас лӧзовруд синъяснас да збоя чажӧбтіс гудӧкӧн. Ворсны кужис мичаа. Сиктса том йӧз, нывъяс да зонъяс, пыр жӧ заводитісны бергавны-йӧктыны.

Валя бергӧдчис мелань:

— Ті, кӧнкӧ, карса мортыд, быдсяма йӧктӧмъяссӧ тӧданныд! Велӧдӧй кӧть ӧтиӧс!

— Ме, Валя, сиктын быдми да сиктын и уджала. А йӧктыны, збыльысь, ог куж. Некор да нинӧмысь миян вӧлі йӧктынысӧ: война дырйи да сы бӧрын на олім тшыг нисьӧ пӧтӧн...

— Но, лок, инӧ, ме велӧда, он кӧ куж.

Ныв босьтіс менӧ ки пӧлӧд.

— Сё збыль, Валюша, ньӧти ог куж! Йӧзыслысь серамсӧ ог жӧ петкӧдлы! Лок, бурджык, петалам ывлаас, гуляйтыштам.

— Но сэні жӧ пемыд, — нюмъёвтіс ныв да гӧрдӧдіс.

— А тэ пемыдсьыс полан?

— Ог эськӧ да. Тікӧд нинӧмысь повнысӧ.

Петім, ме босьті нылӧс сойбордйӧдыс. Ывла вылын, збыльысь, вӧлі прамӧй пемыд, но век жӧ туйыс и сиктыс тыдалісны.

Валя топӧдчис ме дорӧ:

— Ыркыд...

Ме сывйышті сійӧс. Водзті ме некор на эг кутыштлы нылӧс и, веськыда кӧ висьтавны, тайӧ зэв ёна воис сьӧлӧм вылӧ!

Ныв ланьтіс, ышловзис. Колӧ вӧлі мый йылысь кӧ сёрнитны, но ме чӧв олі. Сэсся серӧктігмоз шуи:

— Но и клуб жӧ тіян! Вывсяньыс видзӧдлан да, дзик быттьӧ важ склад либӧ пес сарай!

— Кытысь миян, колхозыслы, бурджыкыс? Но том йӧз оз гажтӧмавны: быд рыт сьылӧны да йӧктӧны! А тіян, буракӧ, некор клубъястіыс ветлӧдлынысӧ?

— Тадзи и эм, пӧжалуй. Рытъяснас унакодь колӧ занимайтчыны, лӧсьӧдчыны урокъяс кежлӧ. Ӧд ме медводдза во на уджала математикӧн и мукӧд задачаяс решитігӧн, алгебра, геометрия дай арифметика кузя дыркодь лоӧ пукавны. Сэсся заочнӧ велӧдча, тӧвся сессия кежлӧ нин лӧсьӧдча. Математическӧй анализ некыдз оз сетчы...

— Абу тай кокни тіян, — ышловзис ныв. — И жалитыштнытӧ, отсыштнытӧ некодлы...

— Некодлы...

— Гӧтрасьны колӧ! — серӧктіс ныв. — Невестаыс миян зэв уна.

— Эмӧсь, дерт...

— Но тэныд, дерт жӧ, учительница колӧ? Сэтшӧм-татшӧмыд оз на, кӧнкӧ, лӧсяв?

— Мелі, мича да шань медтыкӧ вӧлі-а, — нюмъёвтсис менам пемыдас. — А мыйӧн уджалӧ — абу медся главнӧйыс.

— Ті быдса во учителялінныд Галпом сиктын. Невестаясыс сэні абу жӧ этша. Некод ӧмӧй эз во сьӧлӧм выланыд?

Меным пыр жӧ уси дум вылӧ Полина Сергеевна. Шоныд да лӧсьыд лои сьӧлӧм вылын. Рӧмыд да ыркыд ывла вылыс весиг лои шоныдджык да югыдджык, а сьӧдовлӧз енэжсянь гажаа кутісны дзирдавны уна рӧма кодзувъяс.

«Вежон чӧж картупель босьтім Галпом сиктын, да сідз эг и пырав Полина Сергеевна дорӧ! — видышті ачымӧс. — Да мыйлакӧ ни ӧтчыдысь эг и аддзыв. Эз вӧв, буракӧ, гортын. Дзонь вежонӧн эськӧ ӧд усьлі жӧ син улӧ...»

Ме ышловзи.

— Дум выланыд уси кодкӧ? — гӧгӧрвоис Валя. Ме дрӧгмуні быдсӧн: «Думъясӧс лыддис!»

— Дум вылӧ уси патераӧй, — пӧръялі ме.

— Оз во сьӧлӧм вылад?

Ме кылі ныв гӧлӧсысь радлун.

— Да кыдзи шуны... Пӧрысь йӧзыд оз эськӧ, дерт, ӧбижайтны, оз шумитны, оз мешайтчыны занимайтчынытӧ, век дась сёянтор. Но век жӧ... Олам ӧти жырйын...

— А колӧ эськӧ торъя жыр, — гӧгӧрвоис ныв. — Но миян сиктысь сьӧкыд аддзыны: быдӧнлӧн ыджыд семья, челядь...

Валя чӧв олыштіс, думайтіс, буракӧ, сэсся корис:

— Позьӧ эськӧ ми ордӧ овмӧдчыны да. Аддзам тіян торъя жыр.

— Да мый тэ, Валя! Ме некодӧс ог кӧсйы дзескӧдны!

— А ті некодӧс он и дзескӧдӧй. Эм миян зэв мича жыр — чардак, пач-плита и быдӧн сулалӧ. Ӧшинь пыр зэв ылӧдз ставыс тыдалӧ: Изьва ю и мӧдлапӧв, видзьяс и вӧр. Лок, пыралам, видзӧдлам!

— Да мый тэ, Валя! Абу лӧсьыд: вой. Мый думыштасны бать-мамыд?

— Нинӧм оз думыштны. Ме абу нин дас квайт арӧса нывка, тэ абу код морт, а миян учитель, локтін патера юавны. Мунам!

Валя кутіс кыскыны менӧ ки пӧлӧд. Вӧтчи сы бӧрся.

Воим Мичашор дорӧ. Ляпкыдик, сялькӧдчӧ изъяс костті. Пемыднад дыр-ӧ вольскӧбтыны изъяс вывсьыс? Валя туфелькияса. Дыр думайттӧг босьті нылӧс моздорӧ. Сійӧ сывйыштіс менӧ сьыліӧд. Ыпмуні-ӧзйис чужӧм. Видзчысьӧмӧн вуджӧді. Нылыс сэтшӧм шоныд, мелі, небыд! Вуджӧді, но моздорысь лэдзны муас эг тэрмась. Эг и казявлӧ, кыдзи синъясным куньсисны, а пӧсь вом доръясным ӧтлаасисны.

«Ай да, Николай Степанович! Ай да, молодеч! — вирдыштіс юрын лэчыд мӧвп, кодкӧ, быттьӧ, такӧдіс. — Ӧти здукӧн ставыс лои дась — гӧтыр дай патера!»

Ме лэдзи нылӧс муӧ. Сійӧ нинӧм эз шу, сӧмын ыджыда ышловзис. Пырим керкаӧ.

Бать-мамыс оз на вӧлі узьны, виччысьӧны нывсӧ.

— Миянсьыным выль учительӧс, Николай Степановичӧс, вайӧді патераӧ, — юӧртіс Валя. — Мед миянын олӧ. Пӧрысь гозъякӧд ӧти жырйӧ йӧршитчӧмаӧсь, некӧн ни занимайтчыны, ни шойччыштны!

— Мед олӧ, бласлӧ кристос, — нюмъёвтіс Валялӧн мамыс.

— Мед олӧ, — шуис кӧзяин да гыжйыштіс тош увсӧ: — Ме мужикыс ӧтнам, да бабаяс топӧдӧны жӧ-а... Кыкнад озджык вермыны... Тӧрам, керка миян ыджыд. Женя кӧ нинӧм оз шу, локтас да...

— Коді сійӧ, Женяыс? — юалі Валялысь.

— Менам вок. Флотын служитӧ. Мӧд во тулысын локтас, — висьталіс ныв да шуис бать-мамыслы: — Женялӧн аслас комната эм, мыйла сійӧ кутас сюйсьыны?

— Оз, оз! — эскӧдіс мам. — Пӧрччысьӧй. Самӧвар дзик пыр пукта...

— Лок, Николай Степанович, видзӧдлам выль оланінтӧ, — корис Валя. Кайим чардакӧ. Ныв ӧзтіс карасина лампа. Комната югдіс. Стенъяс шпалеритӧма, пӧтӧлӧкыс еджыд, белитӧма. Паськыд, воссялана ӧшинь. Эм и плита-пач. Уна жыръяса пызан дорын кык небыд улӧс. Быд пельӧсын, ӧшинь вылын — дзоридзьяс. Тані, збыльысь, вӧлі зэв лӧсьыд. Менам, эг и казявлы, нюмъёвтсис.

— Тані зэв лӧсьыд, бур, — ошкышті ме.

— Вот и овмӧдчӧй! — зэв рад лои Валя. — Аски жӧ и локтӧй. А ӧні лэччам уліас, ужнайтыштам...

Ме мӧд лунас жӧ кыпыд сьӧлӧмӧн вуджи выль патераӧ.

ВОСЬСА ЖУРНАЛ

Менам урокъяс вылын унаыськодь пукавліс Лидия Ивановна, а сэсся индаліс тырмытӧмторъяс вылӧ, пасъяліс и бурторсӧ. Опытнӧй велӧдысь юксис аслас тӧдӧмлунъясӧн, видзис менӧ ӧшыбкаясысь. Тайӧ, дерт жӧ, вӧлі зэв бур, кӧть асьтӧ и он зэв бура чувствуйт, кор тэ бӧрся видзӧдӧ да кывзысьӧ бокӧвӧй морт.

— Арифметика кузя оценкаяс зэв уна пукталӧмыд, тайӧ бур, — шуис ӧтчыд директор. — Но эн ӧшыбитчы четвертнӧй оценкаястӧ тэчигӧн. Устнӧй воча кывъясысь оценкаыд нинӧм на оз висьтав. Четверть кузя оценкаястӧ пуктав сӧмын письменнӧй да контрольнӧй уджъяс серти. А то тэнад, оценкаяс серти кӧ видзӧдлыны, ставыс успевающӧй. А татшӧмыс арифметика кузя витӧд классын некор эз на вӧвлы да оз и ло!

Вот кыдзи: «Эз на вӧвлы да оз и ло!»

— Нӧшта ӧтчыд висьтала: зэлыдджыка пуктав четвертнӧй оценкаястӧ. А то артмас: медводдза четвертьын ставыс успевающӧй, а экзаменъяс вылын джынйыс провалитасны!

Вӧчисны дженьыдик педсӧвет буретш оценкаяс йылысь. Класснӧй руководительяс висьталісны, кыдзи-мый делӧыс.

— Журналъяслӧн лист бокъяс тыртӧмӧсь, — шуис директор. — А четверть помыс тыдалӧ нин. Ті нӧ урокъяс выланыд нинӧм он вӧчӧй али мый? Мыйла абуӧсь оценкаяс?

Сувтіс биолог Василий Кузьмич, кодӧс медся ёна видісны.

— Дак вот, картупель лукйим тӧлысь джын, — нюлыштіс сійӧ вӧсни вом доръяссӧ, — кытысь нӧ оценкаясыс? Тіян, языковедъяслы да математикъяслы лӧсьыд: нуӧдін письменнӧй удж дай быд велӧдчысьлӧн эм оценка! А миян колӧ быд школьникӧс, быд филонӧс, торйӧн юавны! Кытысь нӧ оценкаыс? Ӧти урок вылын куим мортӧс юалан, унджыкӧс он вевъяв: выль материалӧн колӧ тӧдмӧдны...

— Важсӧ оз на тӧдны-а... — сюйыштіс директор.

Василий Кузьмич гӧрдӧдіс, нюлыштіс вом дорсӧ да крапкис:

— Экзаменыс петкӧдлас!

Василий Кузьмич Бугаев да Лидия Ивановна — гозъя. Но ме казялі нин: оз зэв ладмыны школаын, век зыртчӧны.

— Вежон мысти колӧ пуктавны предварительнӧй оценкаяс став предметъяс кузя да тӧдмӧдны велӧдчысьясӧс. Талун субӧта, мӧд субӧтаӧ прӧверита став журнал, — шуис директор бӧръя кывсӧ, помаліс педсӧвет.

Выльлунӧ, ыджыд перемена дырйи, ме кольччи аслам классӧ да выльысь заводиті видлавны класснӧй журнал. Збыльысь, уналӧн эз вӧв ни ӧти оценка ботаника, история да мукӧд предметъяс кузя.

Челядь босьтісны менӧ кытшӧ.

— Ник-Степаныч, менам кутшӧм оценкаяс?

— Ник-Степаныч, а менам?

— Менсьым петкӧдлӧй жӧ!

Павел парта сайсяньыс нюжӧдӧма голясӧ:

— Меным мый пукталӧмаӧсь, Николай Степанович?

— Тэнад ставыс бӧжа пять! — долыдпырысь юӧртіс Геня.

— Ме тэныд петкӧдла «бӧжа пять»!

— Тэ петкӧдлан?!

— Геня, пуксьы! — ӧлӧді ме. — Быдӧнлы окота тӧдны, кутшӧм оценкаяс сылӧн, а урокъяс велӧдны дыш. Да чуньнаныд эн ниртӧй журналсӧ, став лист бокъяссӧ няйтӧсьтанныд! Синнаныд видзӧдӧй.

Ньӧжйӧник листалі журнал. Челядь горша дзоргисны. «А ӧд найӧ унджыкыс оз тӧдны ассьыныс оценкаяссӧ! — гӧгӧрвои ме. — Тӧдісны кӧ, мый весиг оценкаыс абу, либӧ двойка сулалӧ — дерт жӧ, эськӧ бурджыка гӧтӧвитчисны урокъяс кежлӧ.

А мый, вӧчны кӧ восьса журнал? Тайӧ абу сьӧкыд, а пӧльзаыс, дерт жӧ, лоӧ!

Урокъяс бӧрын босьті ватман лист да рисуйті юргижӧд: «Миян оценкаяс». Сэсся чертиті, гижалі велӧдчысьяслысь ним-овъяс, предмет нимъяс да вуджӧді журналысь став оценкаяссӧ. Видзӧдлі да аслым любӧ лои: восьса журнал да и сӧмын! Ставыс тыдалӧ! Тайӧ журналсьыс, ме думысь, пӧльзаыс лоӧ не сӧмын челядьлы, но и велӧдысьяслы...

Мӧд лунӧ асывсяньыс челядь, кодзувкотъяс моз, жуисны восьса журнал дорын.

— А менам биологияысь ни ӧти оценка на абу! — шай-паймунӧма Элида.

— Велӧд урокъястӧ, кӧть эн велӧд — ставсӧ двойкаяс шнёпӧдӧны! — синкым увтіыс зумыша видзӧдӧ журнал вылӧ Митя. — Ботаникаысь «Дак-вот» два жӧ тяпкӧма, историяысь бара жӧ два...

— Ме медся озыр! — радлӧ Геня.

— Мыйӧн, Геня? — нюмъёвті ме.

— Быдсяма оценкаыс эм, быд предметысь!

— Пятьыс эм?

— Эм!

— Единицаыс?

— Эм жӧ!

— Молодеч!

— Аттӧ дивӧ! — юрбӧрсӧ гыжъялӧ Юрий. — Важӧн нин колӧ вӧлі тайӧс ӧшӧдны, Николай Степанович! Менам кык предметысь ни ӧти оценка абу, талун вӧлись казялі. Тӧді кӧ — быд лун эськӧ велӧді уроксӧ пять вылӧ да быть вӧзйыси висьтавны, кыкнан кияс лэптӧмӧн!

Павел локтӧма Геня дорӧ:

— Тэ шуан вӧлі: ставыс пӧ бӧжа пять, а ӧти двойка сӧмын!

— Талун юаласны да мӧдӧс пуктасны! — кӧсйысьӧ Геня.

Тӧдчис: восьса журнал колӧ, дай ас кадӧ вӧчсьӧма.

Директор зэв ӧдйӧ аддзис выльторсӧ. И со ӧти классын, сэсся мӧдын, коймӧдын кутісны тыдавны восьса журналъяс.

ОШЙЫСЬНЫ НИНӦМӦН

Талун урокъяс бӧрын педсӧвет — четвертьлӧн итогъяс.

Директор тшӧктіс лӧсьӧдны карасина лампаяс. Ме нинӧм эг шу: мед лӧсьӧдӧны, а ме лӧсьӧдча жӧ.

Челядькӧд петкӧдлім будкаысь электростанция. Будкаыс вывті ичӧт, да дзескыд сэні бергавнысӧ. Матыстчис Миша Бабиков, дзоргӧ станция вылӧ.

— Двигательыс двухтактнӧй, Николай Степанович? — юаліс Миша. Ме зэв ёна чуйми:

— О-о, да тэ грамотнӧй! Двухтактнӧй, дерт.

— Отсыштны колӧ? Миян эм жӧ мотора пыж, ноксьывла сійӧн...

— Заводит, сідзкӧ, двигательсӧ, кужан кӧ...

Бабиков восьтіс бак, видзӧдліс, эм-ӧ бензиныс. Восьтіс кран, сиптіс карбюраторлысь заслонка, личкыштіс кнопка вылӧ. Бензин тюрӧбтіс ем кызта струяӧн. Нетшыштіс рычаг.

— Ур-р-р!

Челядь радӧсь, чеччалӧны, горзӧны.

— Прамӧй механик! — ошкышті зонмӧс. — Ӧні мед уджыштӧ сідз, а кор ӧзъяс учительскӧйын карасина лампа, кабель помсьыс штепсельсӧ чуткы со татчӧ, генераторса розеткаас.

Петкӧдлі, кыдзи-мый вӧчны.

— Гӧгӧрвоин? Да станция дорысь ылӧ эн мун, бергалышт тані, кытчӧдз ме ог пет.

Ылі сиктъясса челядь ӧні оз ветлывлыны гортаныс вежон чӧж, олӧны школьнӧй интернатын, а урокъяс бӧрын час-мӧд шойччӧны, ворсӧны, а сэсся вӧлись нин пуксьӧны вӧчны гортса уджъяс. Сійӧн и Бабиковыс тшӧтш тані.

— Кор ӧзъяс учительскӧйын карасина лампа — минут-мӧд мысти сет школаӧ электрическӧй би, — тшӧкті Мишалы нӧшта ӧтчыд да пыри учительскӧйӧ.

Директор видзӧдліс ме вылӧ да юаліс:

— Электростанция, кылӧ, заводитіс уджавны. Гашкӧ, югыд би лоӧ?

— Позьӧ сетны, — кыдз позьӧ веськодьпырысь шуи ме. Велӧдысьяс дзоргисны ме вылӧ кыдзкӧ выль ног: то ли шензьӧмӧн, то ли ошкӧмӧн. Сӧмын Василий Кузьмичлы, буракӧ, ставыс вӧлі веськодь. Сійӧ весиг очсыштіс:

— Дак вот, татшӧм станция вылад надеяыс зэв ичӧт: уджалас вежон-мӧд дай жугалӧ. Со Красноборса школаын оз нин уджав. Карасина лампаыд жӧ добра: некор оз подведит.

— Гашкӧ, зэв бура уджалас. Выль станция! — скӧракодь видзӧдліс верӧсыс вылӧ Лидия Ивановна. — Тэ век паныд кӧть кутшӧм выльторлы! Весиг восьса журналтӧ эн вермы лӧсьӧдны, класснӧй руководитель! «Карасина лампа»! Сартаса биӧн, гашкӧ, кутам велӧдчыны, электростанция эм да!

— Ме пайысь...

Василий Кузьмич ӧзтіс карасина лампа да нюлыштіс вом дорсӧ.

Заводитчис педсӧвет.

— Сёрнитам сизимӧд классянь, — шуис директор. — Галина Исаевна, кывзам...

Галина Исаевна Сметанина — сизимӧд класса руководитель.

— Класс — зэв ыджыд. Успеваемостьӧн ошйысьны оз позь. Кык второгодник, и кыкнанныс неуспевающӧй. Бабиков коймӧд во нин велӧдчӧ, а двойкаясӧн жӧ тырӧма. Тешкодь морт. Учитель пырӧ классӧ — оз и сувтлы весиг, барин моз лажмӧдчӧма да пукалӧ. Весиг ме дырйи, класснӧй руководитель дырйи, оз сувтлы. Ме макниті нин сы вылӧ...

— Кыдзи оз сувтлы?! — шемӧс босьтіс директорӧс. — Первойысь кыла!

— Директор пыригӧн, дерт, сувтӧ, а мукӧд дырйи — оз.

Ме нинӧм эг шу, эг, дерт, ошйысь, кыдзи воюйті зонмыскӧд медводдза урок вылын. Но менӧ дзикӧдз шемӧсмӧдіс мӧдтор:

— Кыдзи «коймӧд во велӧдчӧ сизимӧд классын»?! Мыйкӧ некыдз ог гӧгӧрво! Сідзкӧ, оз кӧсйы велӧдчыны! А оз кӧ кӧсйы — мед уджалӧ колхозын!

— Партияӧн да правительствоӧн пуктӧма мог: сӧветскӧй том йӧзлы — всеобщӧй средньӧй образование! — бергӧдчис мелань Галина Исаевна. — Все-об-щӧй! Дзик быдӧнлы!

— Но оз кӧ кӧсйы мортыс велӧдчынысӧ? И вӧтлыны оз позь?

— Оз, — ышловзис директор. — Отсев лоӧ. А отсевсьыд... Всеобуч! Ті унатор на он тӧдӧй, Николай Степанович. Уджыштанныд да тӧдмаланныд...

Ме сэсся нинӧм эг куж шуны. Галина Исаевна сёрнитіс водзӧ:

— Но Бабиковлӧн, шензяна кӧть абу, алгебра, геометрия да коми кыв кузя — три, роч кыв кузя — четыре, а физика да черчение кузя — весиг пять! А сэсся... сэсся — ставыс два! Вермӧ зэв бура велӧдчыны, но оз кӧсйы.

— Физика сійӧ радейтӧ! — нюмъёвтсис менам. И тайӧ здукас яръюгыда ыпнитісны-югзисны электрическӧй лампочкаяс. Виччысьтӧмысла ставӧн горӧбтісны.

Нывбабаяс весиг кекӧначасисны:

— Миян школаын — югыд би!

— Коді сетіс бисӧ? — юаліс директор.

— Бабиков, — шуи ме.

— Но и но! — довкйӧдлыштіс юрнас Лидия Ивановна. — Весиг директор оз тӧд, мый вӧчсьӧ сылӧн школаас. Кыдзи нӧ ті лысьтанныд дӧверитны третьегодниклы выль электростанция?! А жугӧдас кӧ?! Ӧд сійӧ весиг нарошнӧ вермас жугӧдны!

— Оз жугӧд, Лидия Ивановна. Сійӧ кужӧ дай радейтӧ техникасӧ, аслас эм мотор и...

— Дак вот, тіян Бабиковныд, — гӧрдӧдіс сідз нин гӧрд Василий Кузьмич. — Четверть чӧжӧн вомсӧ эз восьтыв ни биология, ни химия урокъяс вылын. Ставыс два! Дак вот, ме юала: мый тӧлкыс татшӧм филонсьыс? Вӧтлыны вӧлі колӧ сьылідзиръяс сетӧмӧн кольӧм во нин. Мед куйӧд кыскалӧ колхозын! Но директор оз лысьт вӧтлынысӧ: полӧ, мый отсевысь ассьыс сьылісӧ быгзьӧдасны!

— Пукав! Он вермы заставитны велӧдчыны! Лягушаясӧн да нидзувъясӧн тӧдмӧдан велӧдчысьяссӧ, дай найӧс оз тӧдны! А кыдзи нӧ ми математикасӧ налы сюям юраныс!

Педсӧвет муніс водзӧ. Ковмис и меным сёрнитыштны. Педагогическӧй сӧвет вылын ме сёрнита медводдзаысь на и, дерт, волнуйтча.

— Витӧд «а» классын четыре да пять вылӧ велӧдчӧны сӧмын куимӧн, зато неуспевающӧйыс квайт. На лыдын — Митя да Павел.

— Дак вот, кыкнаннысӧ колӧ бӧр ыстыны нёльӧд классӧ, — шуис Василий Кузьмич да нюлыштчис.

— Мыйла? — эг гӧгӧрво ме.

— Абу найӧ пятиклассникъяс. Некыдз эз велавны торйӧдны пестик да тычинка. Кыкнанныс пӧ ӧткодьӧсь!

— Велӧд! — нем виччысьтӧг горӧдіс Лидия Ивановна. — Ми, математикъяс, тай заставляйтам велӧдны! Урокъяс бӧрын колям, урокъяс водзвылын занимайтчам, гортса удж сетам, веськыда нямлялӧмӧн сюялам воманыс тӧдӧмлунъяссӧ.

— Оз кӧсйыны велӧдчынысӧ, — дорйысис биолог. — Петкӧді ме найӧс школьнӧй град йӧрӧ, мися, тӧдмӧда град выв пуктасъясӧн. Петкӧдлі. Сэсся пыралі школаӧ: мися, босьта ичӧт вески да медся ыджыд кӧчансӧ веситам. Петі да кӧчаныд абу нин: чашйӧмаӧсь да сёйӧмаӧсь! Дак вот, велӧд татшӧм филонъяссӧ!

Велӧдысьяс серӧктісны.

Ме ставсӧ бура висьтавлі, кыдзи-мый делӧясыс миян классын. Сэсся сёрнитіс директор:

— Устнӧй предметъяссӧ — ботаника, история, география — велӧдасны. Наысь кӧть и двойкаяс петісны — повны нинӧм. Мед учительяс асьныс прамӧйджыка уджалӧны! А кыдзиджык делӧыс арифметика кузя?

— Нинӧмӧн ошйысьны, — гажтӧма висьталі ме. — Квайт мортлӧн двойка...

— Павеллӧн?

— Кӧкъямыс письменнӧйысь да контрольнӧйысь — нёль двойка... Четвертнӧйсӧ два жӧ пукті...

Колӧ шуны: Павеллы зэв бура позис пуктыны три. Но пукті два. Мед зэлӧдчыштлӧ! Бурджык ӧні два, да мед экзаменсӧ сдайтіс!

— Ме жӧ шулі тіянлы — Павел лоӧ неуспевающӧй. Сідзи и лои. Арифметикаысь кык экзамен — устнӧ дай письменнӧ. Кыкнансӧ вермас провалитны. Мӧд во кежлӧ кӧ кольӧ — тіян сӧвесть вылын лоӧ, Николай Степанович. Нинӧмла Павелсӧ вӧлі мырдӧн кыскыны татчӧ, мед пукаліс мӧд во нёльӧд классын. Сэки эськӧ классаныд вӧлі ӧти неуспевающӧйӧн этшаджык. А ӧні ноксьӧй...

Педсӧвет вӧлі сьӧкыд. Успеваемость быд классын улын, школа эз воӧдчы весиг ӧкмысдас прӧчентӧдз.

— Йӧзыслы матыстчӧ ыджыд праздник — Великӧй Октябрлӧн годовщина. А миян — синва, а абу праздник. Тадзи и уджалам, — сьӧкыда ышловзис Лидия Ивановна.

Миян, велӧдысьяслӧн, зэв жӧ сьӧкыд вӧлі сьӧлӧм выланым.

Педсӧвет помасьӧм бӧрын петі ывлаӧ. Бабиков пукаліс электростанция дорын. Менӧ аддзис да нюммуніс.

— Кусӧд сэсся, Миша. Педсӧвет помасис, — тшӧкті ме. Станция пыртім будкаӧ. Чышкышті маслӧӧссьӧм киясӧс да мыччи рузумсӧ зонкалы:

— Чышкы киястӧ, механик.

Ме мӧвпалышті да ньӧжйӧник шуи:

— Миша, меным сэтшӧм нелӧсьыд вӧлі педсӧвет вылын...

— Мыйла, Николай Степанович?

— Тэ вӧсна тшӧтш... Ачыд думыштлы: Михаил Бабиковлӧн физикаысь пять, а биология-химияысь — два, история-география — два... Эк, Миша, Миша... Лёкторсӧ ӧд тэ аслыд вӧчан, а он Василий Кузьмичлы либӧ Галина Исаевналы...

Миша лэдзис синвидзӧдлассӧ, чӧв оліс. Сэсся кыв шутӧг ньӧжйӧник довгис интернатӧ...

А век жӧ пыркнитчис мортыд! Помаліс ӧд сизимӧд класстӧ!

Коркӧ, некымын во мысти, ме веськавлі Печора карӧ. Виччысьтӧг чукӧстіс тӧдса гӧлӧс:

— Николай Степанович!

Сувті, бергӧдчи. Паныд тэрыба локтӧ речникъяслӧн формаа мича том морт, нюмъялӧ долыда:

— Здравствуйте, Николай Степанович! Пасибӧ тіянлы! Сьӧлӧмсянь зэв ыджыд пасибӧ!

— Миша Бабиков?! Мыйысь нӧ пасибӧыс? — чуйми ме. — Партанад пӧрӧді да сыысь али мый?

Сералӧ:

— Сыысь, Николай Степанович! Пыркнитінныд, пальӧдінныд ті менӧ сэки. Помалі школа, сэсся велӧдчи водзӧ. Ӧні — капитан нин, уджала Печора вылын.

Со ӧд кыдзи овлӧ олӧмад!

МУСА НЫВ

Арся каникулъяс вылӧ лэдзавтӧдз сёрниті аслам класскӧд.

— Но вот, том ёртъяс, и помасис медводдза четверть. Ошйысьны миян тікӧд дзик нинӧмӧн: урожайным слабиник. Ӧтияс, Элида да Юрий, бура велӧдчисны, унджыкыс — шӧркодя, а квайтӧн, Митя, Павел дай нывкаяс тшӧтш, — омӧля, гортаныс мам-батьыслы нуӧны сӧмын тройкаяс да двойкаяс. Но велӧдчан воыс сӧмын на заводитчис и ставыс на водзын...

— И двойкаясыс — тожӧ, — сюйыштіс Геня.

— Тэ, Геня, эськӧ мед чӧв олін: ставыс три!

— Физкультураысь четыре!

— Ӧні, челядь, бура шойччӧ, да мӧд четверть заводитам выль вынъясӧн, мед тӧвся каникулъяс дырйи некодлы эз ковмы иславны двойкаяс вылын. Дневникъястӧ мед кырымалӧны ай-мамныд.

Двоечникъяскӧд торйӧн варовитыштім:

— Тіян, том да дыш ёртъяс, ме сета каникул кежлӧ неыджыд удж. Каникулъяс вит лун чӧж. Быд лун решитанныд вит задача, куимӧс асывводзнас да кыкӧс — рытнас. Со тіян торъя тетрадь. Каникулъяс дырйи вола прӧверитны.

Сеті удж и налы, кодъяслӧн вӧліны тройкаяс. Геня пузис:

— Ме жӧ успевающӧй!

— Триыд, Геня, абу прамӧй оценка: зэв ӧдйӧ вермӧ шыбӧлитны двойкаӧ! Вӧчан кӧ луннас кык-куим задача — гӧгйыд оз вӧрзьы.

Лэдзи челядьӧс да муні выль патераӧ. Тані менӧ вывті бура видзӧны, весиг яндзим. Кӧзяйка зэв мелі:

— Степанович, лэччы завтракайтыштны. Пӧсь шаньгаяс со руалӧны!

— Степанович, пывсьыны, гашкӧ, кӧзяинкӧд лэччыланныд?

— Степанович, блин со пӧжышті, сёйышт выйнас, пока пӧсь!

— Степанович, пӧжӧм йӧвсӧ юышт: морӧс улад шоныд лоӧ.

А Валя, сійӧ ме гӧгӧр и бергалӧ, весиг мыссигӧн ки чышкӧд киас кутӧ. Яндзим, дерт, но мый нӧ вӧчан, сэтшӧм бур сьӧлӧма йӧз дорӧ веськалі да.

Праздник лунъясӧ кӧсъя вӧлі гӧгӧртны сиктъясӧд, пыравны аслам класса велӧдчысьяс ордӧ, но, думышті да, эг мун. Абу лӧсьыд: йӧзыс гажӧдчӧны, а ме, важся поп моз, шӧйта керкаысь керкаӧ. Сэсся ӧд, абу дивӧ, быдлаын кутасны стопка мыччыны...

Муні праздникъяс бӧрас пыр жӧ. Галпом сикт аддзи да, сьӧлӧмӧй тіпкыны кутіс пельясын кывмӧн! Полина Сергеевна тані олӧ. Поля-Полинушка! Сьӧлӧмшӧрӧй, шондіӧй менам!

Матыстчи на керка дорӧ. Геня быйкнитіс воча.

— Николай Степанович! Мам шаньга пӧжалӧ да кебӧс черинянь. Локтӧй, пырӧй, пӧжалуйста!

— «Пӧжалуйста»! Со ӧд кутшӧм культурнӧй миян Геняыс. Школаын кӧ эськӧ татшӧм жӧ вӧлін!

Пыри. Полина, збыльысь, сулаліс жар пач дорын, пӧжасис.

— Ме ӧд шулі: мися, Николай Степанович волас! — радліс Геня.

Полина Сергеевна дзирдыштіс сьӧд гырысь синъяснас, кӧні, ме аддзи, югнитіс радлун!

— Пуксьӧй, шойччӧй, Николай Степанович. Буретш черинянь да шаньга пӧжассисны.

— Геня дорӧ колӧ вӧлі пыравны, — ылӧдлі, но сэки жӧ и эг пӧръясь ме. — Видзӧдлыны, решайтчывлӧ али оз.

— Пуксьывлӧ тай-а...

— Нёль задача нин гӧтов!

— Нёль сӧмын? Абу ёна пӧсявлӧмыд...

Полина Сергеевна вайис пызан вылӧ сьылысь самӧвар.

— Сэні, шкапас, важ чайникын цейлонскӧй чай вӧлі, — шыасис баб. — Век видзи: мися, коркӧ, гашкӧ, бур морт пыралас...

Менам бурмис-нормис сьӧлӧм: «Тані менӧ виччысьӧны дона гӧстьӧс моз. А ме... Вежон чӧж тані бергалі да ни ӧтчыдысь эг пырав. Ок, эськӧ!»

Ныв ваяліс пызан вылӧ черинянь, шаньгаяс, сола тшак, сола чери да пуӧм яй. Сэсся шоныда да меліа нюмъёвтіс:

— Пуксьӧй чай юны, Николай Степанович.

— Дозсӧ нӧ мыйла он вай? — юаліс баб.

Полина вайис вина доз:

— Праздник вӧлі да эг и восьтылӧй: некодлы юнысӧ...

Геня видзӧдліс мамыс вылӧ, ме вылӧ да кутіс пасьтасьны:

— Ветла Павел дорӧ...

Тӧлка зон кыліс, буракӧ, ичӧт сьӧлӧмнас, мый сытӧг миян лоӧ бурджык да весиг гажаджык.

Ныв кисьталіс румкаясӧ вина.

— Меным оз позь, Полина Сергеевна: пыравны на кытчӧсюрӧ колӧ, а вина дукнад...

— Асьныд тӧданныд. А ми бабкӧд ичӧтика юыштам праздник вӧсна да ыджыд гӧсть вӧсна...

— Бур здоровье тэныд, бур пи! — шуис баб. — Мед челядьӧс бура велӧдны да аслыд шудаӧн лоны!

Баб збодера гумыльтіс румкасӧ, а Полина Сергеевна сӧмын видлыштіс.

— Сёйыштӧй, Николай Степанович, — корис ныв. Ме чӧскыдпырысь сёйи пӧсь шаньга, черинянь.

— Кутшӧмджыка уджавсьӧ ыджыд школаын, Николай Степанович? — чай кисьталігмоз юаліс Полина. — Югыд би пӧ ӧзтӧмныд?

— Челядькӧд уджавны зэв интереснӧ: некор он гажтӧмтчы! А югыд биыд, збыльысь, эм. Сетісны выль электростанция. Быд школаӧ эськӧ!

— Миян школаын карасина лампаяс на...

— А ті, Полина Сергеевна, сентябрь заводитчигӧн эн тыдалӧй. Ми тані вежон чӧж картупель босьтім — эг аддзыв.

— Курсъяс вылын вӧлі. Миянӧс ӧд, ветфельдшеръястӧ, кадысь кадӧ ыстывлӧны жӧ велӧдчыны.

— Пасибӧ тіян, зэв чӧскыда гӧститӧдінныд! — чеччи сэсся пызан сайысь. — Ветла Павел дінӧ.

Полина петіс колльӧдыштны. Кильчӧ вылын юаліс:

— Зэв бура, кӧнкӧ, овсьӧ, Николай Степанович, Мичашор сиктын? Йӧзыс висьталісны: выль учитель пӧ выль патераын. Невестаыс орччӧн и...

Ме гӧрдӧді. Полиналӧн ыпнитіс жӧ мича чужӧмыс, но сьӧд синъясыс мыйлакӧ векняммисны.

— Мый тэ, Полинушка! — шӧйӧвошӧмӧн дорйыси ме. — Кутшӧм невеста!

— Йӧзыс тай шуӧны, ме нӧ мыйӧн тӧда...

Тэрыба видзӧдлі нывлы синмас, майшасьӧмла дыркодь чӧв олі, сэсся, Полялӧн гырысь сьӧд синъясӧ вӧйигмоз, пӧдӧм гӧлӧсӧн шуи:

— Менам невестаыс абу Мичашорын...

— Кӧні нӧ? — тэрыба юаліс ныв.

— Тані... Орччӧн со...

Ме босьті нылӧс киӧдыс, но сійӧ нетшыштіс кисӧ:

— Ме — невеста?! Моздорад Валяӧс новлӧдлан да окалан, а ме — гӧтырпу?!

Ме дзикӧдз шӧйӧвоши да эг тӧд, мый шуны, кыдзи дорйысьны. «Дзик пемыднас аддзылӧма кодкӧ шор вуджӧмсӧ али Валя ачыс ошйысис?» — вирдаліс юрын. Сулышті чӧв, мыр моз, сэсся мыжапырысь висьталі:

— Сідзи артмис, Полина. Но Валя дорӧ сьӧлӧмӧй оз куйлы, эскы меным, Полинушка... Пасибӧ чай-сакар да шаньга вылад. Ветла Павел дорӧ. Извинит, кӧть ме и абу зэв ёна мыжа...

Муні. Павелъяслӧн керка дорӧ кежигӧн бергӧдчылі. Полина век на сулаліс кильчӧ вылас да видзӧдіс мелань. Сьӧлӧм топавліс, ёнтыштіс...

Геня да Павел пукалісны пызан сайын. Ныр уланыс — задачник. Тайӧ меным, дерт, любӧ вӧлі. Павел абу весь олӧма, быд лун артасьӧма. Сьӧлӧм вылын кокниджык лои. Но мый вӧчны Полякӧд? Кыдзи миритчыны? Мый вӧчны, мед нылыс эскис меным? Ӧд ӧні ме кыла нин сьӧлӧмӧн, став юр вемӧн: Полина меным вывті любӧ, колана. Сӧглас кӧ — кӧть ӧні жӧ гӧтрася!

Бӧр косавны колӧ ныв дорӧ! Но мый висьтала? Мыжа, шуа, сэсся некодӧс ог кут моздорын кыскавны. Падъялі дыркодь, сэсся чеччи. Муна, ветла ныв дорӧ, мый лоан ло!

Локтім Генякӧд. Пукси кильчӧ выланыс.

— Ыстыв мамтӧ, — тшӧкті Генялы.

Петіс Полина. Юалана, кӧть и кӧдзыдакодь, видзӧдліс ме вылӧ.

— Поля, — сувті да матыстчи ме. — Полинушка, эн лӧгав ме вылӧ, бур ныв. Мыйӧн нӧ мыжа тэ водзын? Но, вуджӧді шор вомӧн, но и мый? Ва жӧ туфлинас вуджнысӧ! Кодкӧ Валя пыдди кӧ мӧд вӧлі либӧ коймӧд — вуджӧді жӧ эськӧ. Дай ӧні вуджӧда. А кытчӧ воштысян?

Полина Сергеевна серӧктіс. Ме ӧти здукӧн ловзи. Ныв гӧгӧрвоис, буракӧ: ыджыд мыжыс менам, збыльысь, абу. Сэсся ӧд ми эг сетлӧй ёрта-ёртлы некутшӧм кыв, миян костын дзик нинӧм некор эз вӧв!

Ме сувті дзик орччӧн да гораа шӧпкӧді:

— Поля... Полина... Полинушка... Полиночка... Полечка...

— Нӧшта кыдзи кужан? — меліа нин нюмъёвтіс ныв.

— Полина Сергеевна! — гораа нин шуи ме. — Вай кыкнан китӧ!

Дзикӧдз збойми: босьті ӧд кыкнан киӧдыс.

— А сэсся?

Ме кӧсъя вӧлі сывйыштны нылӧс, но — абу Валяыд! — ныв мыджсис морӧсӧ кыкнан кинас:

— Вешты киястӧ! Зэв тэрыб!

— Мунам сельсӧветӧ, талун жӧ гижасям!

— Збыльысь тэрыб! «Локтіс, аддзис, вермис!»

— Поля!

— «Поля, Поля!» Лок пыр керкаас. Чайыс эз на кӧдзав...

— Дай винатор эм! Солькнитан румка джын?

— Кисьтыны кӧ нин — дзонь румка!

Вӧвлытӧм кыпыд сьӧлӧмӧн, долыдпырысь вӧтчи радейтана ныв бӧрся. Шуда жӧ ме морт!

БАТЬ-МАМЛӦН РЫТ

— Бать-мамкӧд собрание колӧ нуӧдны, тӧдмӧдны медводдза четвертьлӧн итогъясӧн, — тӧждысьӧ Лидия Ивановна. — Бара джын йӧзыс оз локны... Колӧ мыйкӧ вӧчны, мед ставыс локтісны, а мый? Думайтӧ, класснӧй руководительяс, думайтӧ, учительяс!

— А мыйла, збыльысь, оз локны ставӧн? Ме ог гӧгӧрво! Сӧветскӧй школаӧ корам сӧветскӧй челядьлысь сӧветскӧй бать-мамӧс и — оз локны? Ог гӧгӧрво...

Роч кыв да литература велӧдысь Софья Ильинична очсыштіс:

— Став собраниеыс дзик ӧткодь: отчёт-доклад, отчёт-доклад... Гажтӧм, очсӧдлӧ, вот и оз локны йӧзыс. Коді бура велӧдчӧ — ошкам, коді омӧля велӧдчӧ — видам тшӧтш и бать-мамсӧ. А кодлы нӧ любӧ пинясьӧмыд, да нӧшта уна йӧз дырйи? Вот и оз локны.

— А кыдзи вӧчны, мед вӧлі интереснӧ, мед тырыс вӧлі йӧз, мед локтісны весиг найӧ, кодъяслӧн челядьыс оз на велӧдчыны? Думайтӧ!

— Дак вот, мый сэні думайтнысӧ? Унджыкыс локтас, — шуӧ Василий Кузьмич. — А ме пайысь, кӧть мед некод оз волы, некутшӧм пӧльза тайӧ собраниеяссьыс абу.

— Тэ, тэ век паныд! Гортын и школаын! Думайтӧ, учительяс, думайтӧ. Этійӧ дундукыс вылӧ эн видзӧдӧй!

Учительяс серӧктісны, кӧть найӧ и велалӧмаӧсь нин вӧлі гозъя костын быд лунъя зыртласьӧм вылӧ.

— Вай вӧчамӧй бать-мамлысь рыт, а ог собрание, — шуис Софья Ильинична. — Мед некутшӧм доклад эз вӧв, а прӧстӧ сідз сёрнитыштам-баитыштам, кыдзи бать-мам бать-мамкӧд. Гашкӧ, самӧвар пуктыны, печенньӧ-кампетӧн чай юны да сідз, пызан сайын и варовитыштны...

— Юӧртӧмсянь колӧ заводитны, — шуис коми кыв да литература велӧдысь, сійӧ жӧ и завуч, Тамара Михайловна Козлова. — Коми йӧз костын олам, коми кыв вылын велӧдам челядьӧс, а став объявлениеяс, лозунгъяс-плакатъяс гижам рочӧн, кӧдзыда, коса.

— Вот и гиж комиӧн! — тшӧктіс Лидия Ивановна.

— Ме ог куж гижнысӧ.

— Текстсӧ лӧсьӧд, а Николай Степанович рисуйтас-гижас уна рӧмӧн. Водзӧ думайтӧ, мый нӧшта вӧчны!

— Софья Ильинична главнӧйсӧ висьталіс нин: самӧвар! — килькъяліс Бугаев. — Дак вот, ме содта бур мӧвп: ньӧбны спирт, мед бать-мам варовмасны. Вот лоӧ собрание так собрание!

— Ланьт! Нинӧм выльторсӧ он кӧ куж думыштны — йӧзыслы эн мешайт! Самӧвар да объявление... Сэсся?

— Чай юны — медбӧрын. Йӧзыд чукӧрмӧны ньӧжйӧ. Коді водзджык воас — мед класснӧй тетрадьяс челядьыслысь видзӧдласны, класснӧй журналъяс, — содтіс Галина Исаевна.

— Правильнӧ! — ӧзйис Лидия Ивановна. — Думайтӧ, думайтӧ!

— Физикаысь позьӧ петкӧдлыны интереснӧй опытъяс, — шуи ме.

— Правильнӧ! — ошкис директор. — А химияысь оз ӧмӧй позь?

— Позьӧ! — збодермис тшӧтш Василий Кузьмич. — Дак вот, верма петкӧдлыны...

— Аддзан! — Лидия Ивановна ошкӧмпырысь видзӧдліс верӧсыс вылӧ. — Физика-химияысь интереснӧй опытъяс быдӧнлы интереснӧ видзӧдлыны. Нӧшта мый?

— Ме, гашкӧ, ог бура гӧгӧрво, но сійӧ бать-мамыскӧд, кодъяслӧн челядьныс лёка велӧдчӧны, колӧ сёрнитны торйӧн, пуксьывны кутшӧмкӧ классӧ да сэні, а не видны став йӧз дырйи...

— Правильнӧ, Галина Исаевна, — ошкис директор. — Тайӧс мед вӧчасны класснӧй руководительяс дай предметникъяс тшӧтш. Но вот, аддзанныд, ӧтув и лӧсьӧдім зэв бур программа!

Ме рытывбыд гижи-рисуйтчи да мӧд лунас ӧшӧді клуб стенӧ тырмымӧн бура мичмӧдӧм гижӧд:

«Талун лоӧ школаын

БАТЬ-МАМЛӦН РЫТ

Водзвылас: физикаысь да химияысь шензьӧдана опытъяс. Тетрадьяс да журналъяс видлалӧм. Сёрни: кыдзи велӧдчӧны миян челядь. Бӧрыннас — чай юӧм.

Школа.»

Квайт час рыт кежлӧ школалӧн ӧшиньяс югзисны электрическӧй биясӧн. И йӧз локтісны тайӧ пӧрйӧ шензьымӧн уна. Локталісны весиг найӧ, кодъяслӧн пи-нывъясныс пырасны первой классӧ во-мӧд мысти.

Бать-мам да учительяс вӧччӧмаӧсь, нюмъялӧны ёрта-ёртыслы.

Ыджыд пызан вылын — челядьлӧн класснӧй тетрадьяс, тшӧтш и черчение да рисование кузя. Бать-мам абу на вунӧдӧмаӧсь ассьыныс велӧдчӧмсӧ да, тетрадьяс видлавтӧдз, майтӧгӧн мыськӧны киясныссӧ. Видлалӧны дыр, бура, ас костаныс сёрнитӧны.

— Абу ӧд и яндзим тадзи гижнысӧ! — броткӧ, кылӧ, кодлӧнкӧ мамыс. — Ставсӧ гӧрдӧн исправляйтӧмаӧсь! Три на ӧд пуктӧмаӧсь!

— А менам, менам, мадаясӧ, видзӧдлӧ! Со ӧд кутшӧм бура решайтчӧ: ставыс пять!

— Тэнад пиыд, сватӧ, художник лоӧ: со кутшӧм мичаа рисуйтӧма пожӧмсӧ, ловъя быттьӧ!

Уна шензьӧм да дивуйтчӧм вӧлі опытъяс петкӧдлігӧн, кор, шуам, кӧдзыд ва пузьӧ воздушнӧй кӧлӧкӧл улын либӧ ичӧтик электромагнитысь некыдз он вермы торйӧдны кӧрттор, а блюдце ыджда магдебургскӧй полушариеяс эз вермыны торйӧдны кык ён мужичӧй.

Торйӧн нин ёна воис сьӧлӧм выланыс бать-мамлы электрическӧй би.

— Кор бара миян керкаясын лоӧ югыд биыс-а?

— Коркӧ ӧд лоӧ жӧ. Выль вый вӧчан завод со стрӧитӧны. Сэтысянь пӧ лишалас электричествоыс и сиктӧ тшӧтш...

Медся главнӧйыс, дерт, сійӧ, мый челядьлӧн велӧдчӧм да школалӧн удж йылысь сёрниыс артмис бур да ыджыд. Торъя батькӧд-мамкӧд сёрнитім классъясын, зілим воӧдчыны ӧти кывйӧ, мый да кыдзи вӧчны, мед ныв-пиян велӧдчисны бурджыка.

Чай юӧм зэв жӧ лӧсьыда да бура артмис. Заваритім изьваса ногӧн, крепыда. Вӧлісны преник-печенье, кампет. Унаӧн вайӧмаӧсь кӧлӧб-шаньга, сола чери, мукӧдтор. Пукалім-сёрнитім пӧшти дас час рытӧдз.

И бать-мам, и велӧдысьяс — ставным вӧлім зэв дӧвӧленӧсь татшӧм аслыссяма рытнас.

ВЫЛЬ СЕМЬЯ

— Талун субӧта, а клубын — кино да танцы, — юӧртіс Валя. Меліа нюмъёвтіс меным: — Лэччылам, Николай Степанович?

Меным уси дум вылӧ шор вомӧн вуджӧм да чукыртчылі, быттьӧ пинь юковтіс. Сэсся шуи:

— Талун менам аддзысьлӧм!

— Кӧні, кодкӧд?! — ыдждісны, гӧгрӧсмисны нывлӧн синъясыс.

— Ог висьтав, а то дзугсьыны вермас. Но — збыльысь!

Валя дузмуні, лӧгасис да тэрыба лэччис чардакысь.

Ме, рыт вылӧ видзӧдтӧг, выльысь бритчи, пасьталі выль дӧрӧм да муні Галпом сиктӧ.

Полина буретш вӧлі гортас. Радлунӧн дзирдыштісны синъясыс. Воча радлунӧн ыпнитіс менам сьӧлӧм.

— Самӧварсӧ пукты, Поля, — пыр жӧ тшӧктіс мам. — Пӧжӧм йӧлыс эм и... А тэ, Геня, ломты кӧрт пачсӧ. Ме блин кисьтышта.

Менам небзис сьӧлӧм, быттьӧ дыр ветлӧм бӧрын гортӧ локті.

Самӧвар пузигкості видлалі Генялысь тетрадьяссӧ.

Блинъясӧн чӧсмасьӧм да чай юӧм бӧрын кори Полинаӧс гуляйтыштны ывла вылын. Мӧдӧдчим сиктӧд.

Ме сывйышті нылӧс коскӧдыс:

— Вай ӧтлаасям сэсся, Полинушка! Мый сэсся виччысьнысӧ? Мыйла ми торйӧн олам? Ӧтлаын жӧ бурджык! Да и зэв гажтӧм тэтӧг, Полинушка...

— Та ыджда сиктын олан да — гажтӧм? Клуб тіян эм, кино, танцы, а колӧ кӧ — библиотека.

— Оз меным ков ни клуб, ни танцы. Тэ сӧмын колан, Поля!

Бергӧді нылӧс аслань, топыда сывйышті да пӧся-пӧся окышті.

— Поля-Полинушка тэ менам! Шудлунӧй, шондіӧй! Ӧтлаасям, аски жӧ гижасям!

— Но, а кӧні нӧ кутам овны, Николай Степанович? Тэ татчӧ локтан да кутан быд лун куим километр сайӧ ветлӧдлыны али менӧ нуӧдан Мичашорӧ, чардакад овмӧдан Валя дорӧ?

Ме падми, чӧв уси. А збыльысь, кӧні нӧ овнысӧ?! «Ӧтлаасям!» — нерышті ачымӧс. А кытчӧ пыртӧда гӧтырӧс?!

Кынмыны кутім да пырим керкаӧ.

— Кынминныд, пӧсь пӧжӧм йӧвнас шонтысьӧй, — шыасис Парась баб. Ми юыштім пӧжӧм йӧв сорӧн пӧсь чай. Геня петӧма другыс дорӧ. Баб куйлӧ паччӧрын.

— Эз ков тэныд татысь мунны, Николай Степанович, — шуис баб. — Мед век тані и велӧдін, тані и олін. Поля — зэв шань ныв. Ме ӧд аддза: зэв ёна ті лӧсяланныд, ёрта-ёртныдлы любӧӧсь. Ӧтлаасьӧй да олӧй-вылӧй, ен тікӧд. Ӧні позьӧ, майбыр, сьылігтырйи овны да вывны да уджавны. Ставыс эм.

— Корся Мичашорысь патера да нуӧда Полинатӧ, сетан кӧ, Парасковья Петровна, — раминика шуи ме.

— Юаланныд ӧмӧй ті менсьым, — ышловзис пӧчӧ. — Но овмӧдчӧй, ен тікӧд, абу нин челядь, уджаланныд. Геня тані лоӧ, пестӧ да ватӧ пыртас, дай ті пыравланныд коркӧ-некоркӧ.

Тайӧ рытсяньыс чардакын олӧмыс менам пыр жӧ вежсис. Эз нин меліа корны блин сёйны. Валя дугдіс пыравлыны чышкыштны-дзимлялыштны жырсӧ. Мелі нюмсӧ мӧс нюлыштӧма, век кӧрсьӧма, быттьӧ быд лун кынӧмыс висьӧ. Асывводзьясын эз нин чуксавны завтракайтны. Пуктасны пызан вылӧ нянь шӧрӧм да йӧв стӧкан — и ставыс. Колӧ кӧ — сёй, а оз кӧ — сідз мун школаад. Ужнайтны эз кутны корны. Лэччылан кӧ — бур, а он кӧ — нӧшта на бурджык!

Колӧ корсьны выль патера. Кытчӧ овмӧдчыны? Сёрни пані та йылысь директоркӧд.

— Патера? — шензьӧмӧн юаліс Лидия Ивановна. — Тэнад жӧ эм зэв шоныд да югыд патера! Невеста орччӧн и. Гӧтрась Валя вылас — сьыв да ов! Бухгалтерскӧй образованиеа, коймӧд во нин интернатса зав дай школаын завхоз-кассир, удждон дай джын босьтӧ, деньгаа.

— Патера да деньга вылӧ гӧтрасьны, сідзкӧ? — эг гӧгӧрво ме.

— Ачыд жӧ шуан: патера пӧ корся! Патераяснад, Николай Степанович, миян зэв дзескыд, кӧть и сиктын олам. Ми со Василий Кузьмичкӧд кык челядьӧн йӧршитчӧмаӧсь интернатса жыръясӧ. Ӧні эськӧ и кыпӧдам ассьыным керка, да кор на сійӧ лоӧ дась? Миян нывбаба-учительницаяс петалісны верӧс сайӧ татчӧс йӧз сайӧ да олӧны дедъяс-батьяс керкаясын, казеннӧй патера некодлӧн абу дай некор эз и вӧв. Да мый патера, школаным — кулак керкаын! Сёрни мунӧ выль школа да учительяслы керка стрӧитӧм йылысь, но кор найӧ лоӧны? Изьваыс косьмыны вевъялас!

Ме чорыда думыштчи. Директор менӧ тырвыйӧ эскӧдіс: матысса воясӧ весьшӧрӧ виччысьны государственнӧй патера. Колӧ аслыд бергавны!

Парась бабыд, пӧжалуй, прав вӧлӧма: гашкӧ, збыльысь, эз ков мен мунны Галпомсьыс? Гӧтраси эськӧ Полина вылӧ да сьылі-олі на ордын. Но ӧні он нин кос, колӧ думайтны водзӧ олӧм йылысь.

Бара петі сиктӧ патера корсьны. Индісны: Габовъяслӧн пӧ чардакныс тыртӧм, позьӧ овны. Бара чардак! Но мед, ылӧджык тыдалӧ!

Тані плита-пач эз вӧв, но сулаліс ичӧтик кӧрт пач. Содъя пыраніныс вӧлі посводзсянь. Тайӧ воис сьӧлӧм вылӧ: локтам-мунам кӧ Полинакӧд водзджык ли сёрджык — оз ков дӧзмӧдны кӧзяеваӧс.

— Кӧрт пачыд шоныдсӧ, дерт, ӧдйӧ да бура сетӧ, но пестӧ сёйӧ кирпичысь тэчӧм пач сертиыд куим пӧв унджык, — висьталіс Клавдия Николаевна, керкалӧн кӧзяйкаыс. — А пескыс миян зэв этша...

Сійӧ пыртіс... вит пестор, бедь кызтаӧс.

— Вой кежлас ломтыштам, мед он кынмы. Луннас тэ школаын, а аски рытнас бара ломтыштам. Пессӧ ме ачым пыртла.

«Вит паличӧн лун! — думышті ме. — Но нинӧм, вӧрын олам, ог, гашкӧ, кынмӧ».

— Пессӧ, гашкӧ, ньӧбны позьӧ кодлыськӧ?

Кӧзяйкалӧн серамыс петіс:

— Коді нӧ тӧв шӧр тӧлын пес вузалас?!

Татшӧм кӧдзыд патераын меным эз на удайтчыв узьны! Пальтоӧн и быдсӧн шебрасьӧма вӧлі, но войбыд «кӧнтусь сёйи!» Аддзи ӧшинь пыр, кор школаын ӧзйис карасина лампа, уборщицаыс локтіс пачьяс ломтыны, да котӧрті сэтчӧ шонтысьны.

Луннас юалі директорлысь пес йылысь.

— Кутшӧм шоныд патераын вӧлін да эн куж овны, — кӧритіс Лидия Ивановна. — Кык кубометр сета, унджык ог вермы: школанымлы ӧдва тырмас. Учительяслы эськӧ и пӧлагайтчӧ сетны дась пес, но миян сельсӧвет ӧдва вермӧ ломтыны школасӧ, а велӧдысьяслы деньгаӧн мынтысьӧ. Пессӧ асьным заптам быд тулыс...

Пасибӧ Лидия Ивановналы: пес вайисны сійӧ жӧ лунас. Овны лои шоныдджык да гажаджык!

Ӧтчыд выль патера видзӧдлыны вайӧді Полинаӧс. Водзджык жара ломті пач. Но менам невеста эз ёна радлы:

— Тані скворешникас и олан? Дай менӧ на кӧсъян вайӧдны, семья лӧсьӧдны? Весиг плитаыс абу! Ог лок ме татчӧ, Николай Степанович. Кӧні нӧ сёянсӧ кута пуны?

— Кӧрт пач вылас оз пусьы али мый! — дӧзми ме. — Колӧ кӧ, ӧні жӧ яя шыд пуа!

Полина нинӧм эз шу, видзӧдӧ ме вылӧ, мӧвпалӧ.

— Но да, ладнӧ, — дыр мысти ышловзис сійӧ. — Ковмас кӧ мыйкӧ пӧжавны, кӧлӧб-шаньга либӧ черинянь — кӧзяйка дорас лэччыла дай...

— Вот тайӧ прамӧй сёрни! — рад лои ме да здукӧн кыпӧді шампанскӧй доз.

— А вот тайӧ оз ков, — довкйӧдлыштіс юрнас Полина Сергеевна.

— Мыйла? Абу ӧд спирт либӧ водка!

— Мыйла нӧ ми, ныла-зонма, дзик кыкӧн кутам юны вина? Мый водзын? Ми абу на гозъя, а гозъя кӧ — ӧтувъя олӧмсӧ юӧмсянь колӧ заводитны али мый?

Мен ковмис чӧв усьны. Гӧститӧді, мыйӧн верми, юкталі чайӧн. Но узьны Полинушкаӧй менам эз кольччы. Кытчӧдз пӧ ог гижасьӧй, ме тэныд абу гӧтыр!

А шампанскӧйтӧ ми юим мӧд лунас жӧ сельсӧветын, а сэсся босьті колхозысь вӧв да вайӧді гӧтырӧс став приданнӧйнас, кӧні вӧлі и гӧн вольпась.

Выль патераын лои збыльысь шоныд!

КӦЛЫСЬ

Сарапана поштаыд сиктад зэв бура уджалӧ. Рытын, пемыдӧн нин, вайӧді Полинаӧс, а асывнас, муртса пыри учительскӧйӧ, ставыс нюмъялӧны.

— Николай Степанович пӧ гӧтрасьӧма! — долыда нюмъялӧ Галина Исаевна. — Ме ог гӧгӧрво, кор вевъяліс?

Лидия Ивановна кӧсӧйтчыліс ме вылӧ:

— Гижасьӧмаӧсь пӧ тай нин. Ветфельдшер Полякӧд чердакӧ овмӧдчӧма. Эз куж гӧтрасьнысӧ. Валя со миян уджалӧ, интернатса зав, завхоз-кассир, бухгалтерскӧй образованиеа. Асланыс керка, куим жыр дай шоныд чардак! Мӧс видзӧны, кукань, ӧшпи быдтӧны, дай ыжъяс на эмӧсь. Во чӧж — асланыс йӧв да яй, нӧк да рысь. Мотора пыж эм, тыв. Сьӧмга да кебӧс оз бырлы. Он куж овнытӧ, Николай Степанович!

— Любовь! — ӧттшӧтш горӧбтісны том велӧдысьяс Софья Ильинична да Тамара Михайловна. — Сердцу не прикажешь!

— «Любовь», радейтчӧм... — чукыртчыліс директор. — Верӧс сайӧ петтӧдз да гӧтрасьтӧдз, гашкӧ, мыйкӧ и эм, асъя ру сяма, а семья лоӧ да челядь — кутшӧм нин сэки любовь! Медтыкӧ кынӧмыд вӧлі пӧт, керкаад шоныд, челядьыд дзоньвидзаӧсь да выліад вӧлі мый кӧмавны-пасьтавны... Ми со Василий Кузьмичкӧд дас во нин олам пон да кань моз, быд лун пурсям. Но быдтам кык челядьӧс, олам, стрӧитчам! «Любовь»!

— Кор нӧ свадьбаныд? — чӧв олыштӧм бӧрын юаліс Лидия Ивановна.

Ме неуна шӧйӧвошикодь. Та йылысь сёрнитлім Полякӧд да шуим свадьбуйтны майскӧй праздникъяс дырйи: ӧні сьӧмным эз вӧв некоднаннымлӧн.

— Майын...

— Майын?! — гӧгрӧсмисны синъясыс директорлӧн.

— Оз гӧгӧрвоны изьвасаяс кӧлысь-свадьбатӧг гӧтрасьӧмтӧ, — шуыштіс Галина Исаевна. — Скупердяйясӧн шуасны!

— Кӧлысь колӧ вӧчны ӧні жӧ, талун! — тшупис директор. — Ме ог кӧсйы, мед миян учитель гӧтрасис гусьӧн, гажӧдчытӧг! Дай миянӧс ставнымӧс зэв ёна ӧбидитан, Николай Степанович!

— Но мый нӧ вӧчны? — шӧйӧвоши ме. — Кыдзи артмас свадьба талун?! Ӧд нинӧм абу дась!

— Ставыс дась лоӧ! Столӧвӧйлы тшӧктам пӧжавны котлетъяс. Ме сета тэныд отсӧг вылӧ интернатса пӧварӧс — Фекла тьӧтӧс. Да патераса кӧзяйкаыд отсыштас, да аслад том ичмоньыд сэні... Оз ӧд сё мортлы ков пусьыны-пӧжасьны! Школаысь лоӧ сӧмын дас кык велӧдысь, да гӧтырыдлӧн рӧдняыс...

— Мамыс сӧмын...

— Колхозса предӧс коран, сельсӧветса предӧс — со и ставыс! Кызь морт оз чукӧрмы! — кыв кӧрталіс Лидия Ивановна. — Медводдза урок бӧрас тэнад, Николай Степанович, «ӧшинь», урокыд абу. Вот и лэччыв том гӧтыр дорад да сёрнит тшӧтш керкаса кӧзяйкаыдкӧд. Ме ӧні жӧ звӧнитла столӧвӧйӧ, мед котлетъяс пӧжалӧны, Фекла тьӧтӧс ыста ті дорӧ. Уна вина оз ковмы, миян некод абу уна юысьыс... Ме аскисянь ӧтпускын, путёвка со воис курорт вылӧ, почкаясӧс колӧ бурдӧдыштны. Талун рытнас педсӧвет, сы бӧрын — кӧлысь. Ме тэныд коля ассьым урокъяс. Абу уна: сизимӧд классын алгебра-геометрия да квайтӧдын тшӧтш. Кык урокӧн лун тэн сӧмын и содас. Дерт, сьӧкыдджык лоӧ, но тэ том, выныд уна, ӧні на курсъяс вылысь локтін. Ӧти тӧлысь чӧж бергалыштан кык математик пыдди...

Татшӧм «речь» бӧрын ме прамӧя пӧсялі.

А учительяс нюмъялісны, коді жальпырысь, а коді и радліс.

Ме эськӧ и кыпӧдлыны заводитлі щӧтьӧс:

— Лидия Ивановна, кӧлысь вылӧ ӧд сетсьӧ куим лун! А ті... Рытнас педсӧвет, аски урокъяс дай содтӧд тіян предметъяс кузя.

— «Куим лун»! Висьталан жӧ! Ӧд тэнад жӧ быд лун вит-квайт урок! Кутшӧм сӧвестьӧн нӧ тэ кӧсъян гуляйтны-отпускавны куим лун?! Коді вежас та мында уроксӧ да кыдзи тэ кутан вӧчны программасӧ? Али тшӧктан меным шыбитны татшӧм сьӧкыда шедӧм путёвкаӧс да не мунны курорт вылӧ?

Ме чӧв уси, каитчи нин, мыйла и пані сёрнисӧ...

Медводдза урок бӧрын жӧ котӧртлі гортӧ. Полина, муса гӧтырӧй менам, эз шӧйӧвош:

— Вӧчам ставсӧ, эн маитчы! Сьӧмыс, чайта, удждысьтӧг на тырмас...

Пызан сайӧ пуксялім сёр рытын: дас час нин вӧлі. Гӧстьяс кындзи, керка тырыс вӧліны йӧз — видзӧдысьяс. Коді тӧрис, пуксьӧдім жӧ пызан сайӧ.

— Горько-о!

Яндзим, дерт, йӧз дырйи окасьны, но кытчӧ воштысян?

Гӧстьяс азыма юисны-сёйисны, ошкисны жӧникӧс да невестаӧс, кевмисны кузь нэм да бур шуд, крепыд здоровье да уна челядь.

Ичӧтик румкаӧн сувтіс Парась тьӧт, менам тьӧща.

— Олӧй бура, тӧлкӧн да ладӧн, — лӧня шуис сійӧ. — Ёрта-ёртныдтӧ асьныд бӧрйинныд. Ёрта-ёрт сертиныд мичаджыкӧс да бурджыкӧс некоднанныд сэсся некор эн корсьӧй да эн аддзӧй!

Пӧрысь мортлӧн кывъясыс пыдӧ йиджисны меным сьӧлӧмӧ.

Йӧз гажӧдчисны-йӧктісны мудзтӧдзныс, вой шӧрӧдз.

Сэсся пондісны нин разӧдчыны. Ми Полякӧд чеччим жӧ нин пызан сайысь да кӧсъям кайны чардакӧ, но эг вевъялӧ: пырисны выль гӧстьяс — колхозса бухгалтер Альберт Сметанин ёртъясыскӧд да Валя кутшӧмкӧ нывбабаяскӧд. Ставныс кодӧсь.

— Горько, Николай Степанович да Полина свет Сергеевна! — горӧдіс Валя да пуктіс пызан вылӧ спирт доз.

— Горько-о-о! — равӧстісны код мужичӧйяс.

Сьӧлӧм топавліс, но окыштчим: ӧбидитчасны да кутшӧмкӧ лёк кывъяс вермасны шуны.

Лёк кывъяссӧ пырысьяс збыльысь сьӧрсьыныс вӧлӧм вайӧмаӧсь. Друг кыліс Валялӧн гора шӧпкӧмыс:

— Невестаыс скӧтнӧй дворысь оз петавлы! Мӧс бӧж увъяс малалӧ! Дінсьыс век ӧвтӧ куйӧд дук да лекарство дук! Уп, татчӧдз со кылӧ! Аддзӧма тай, код вылӧ гӧтрасьны!

Полина менам пӧсявтӧдзыс гӧрдӧдіс, лэдзис юрсӧ. Ме топӧді сылысь кисӧ. Мый вӧчны? Вӧтлыны? Сувтны да ыджыд матьӧн вевттьыны?

Мисьтӧм, дойдана кывъяссӧ кыліс и Парась тьӧт. Сійӧ сувтіс да копыртчыліс:

— Локтӧй матӧджык, дона гӧстьяс! Пуксьӧй пызан саяс, мадаяс, юыштӧй винатор, сёйыштӧй да вӧлись нин висьталӧй том гозъялы мелі бур кывъястӧ...

Ӧдзӧс дорын сулалысьяс шай-паймуніны, ланьтісны.

— Корисны кӧ — пуксьыны колӧ! — гораа шыасис Альберт. Вайисны вина, кисьталісны.

— Горько! — горӧдіс Альберт.

Поля эз кыпӧд юрсӧ.

— Горько, мися! Али пельтӧм невестаыс?

Бригадир Закар чажӧбтіс гудӧкӧн, горӧдіс сьывны.

— А ме шуа: горько!!! — мый вынсьыс равӧстіс Сметанин.

Ме сувті, скӧрмӧмла тіравны куті. Полина кутчысис меным сойӧ кыкнан кинас.

Захарий Евдокимович пуктіс гудӧксӧ да матыстчис бухгалтерлань. Пызан сайысь чеччисны морт-мӧд-коймӧд, колхозникъяс.

Закар лӧня, но кабырсӧ топӧдӧмӧн шуис:

— Тэ, Альберт, эн сэтшӧм ёна паськӧдлы горштӧ, а то гӧлӧстӧ воштыны верман...

Бригадирлӧн сюйсьӧм бӧрын Сметанин лӧнис.

Йӧз муналісны. Кӧлысь помасис.

Мӧд лунас ме чеччи водз.

— Тэ кытчӧ, Коленька? — кыпӧдіс юрсӧ Полина.

— Кыдзи «кытчӧ»? Школаӧ!

— Кыдзи «школаӧ»? — чуймис гӧтыр. — Тӧрыт жӧ свадьба вӧлі!

— Но и мый?

— Куим лун сетсьӧ!

— Ӧти лунсӧ весиг эз сетны. Талун вит урок!

Поля тэрыба чеччис, лӧсьӧдіс, катіс улысь, кӧзяйка ордысь, пӧсь котлетъяс, кӧдзыд йӧв.

Ме сёйышті да муні уджавны.

Школаын нин Галина Исаевна ышловзис:

— Ме ог гӧгӧрво, мыйла тӧрыт Альбертыс да Валяыс шумсӧ кыпӧдісны.

Василий Кузьмич гӧгӧрвоӧдіс:

— Дак вот, Альберт — Валялӧн двоюроднӧй вок. Сылы ӧбиднӧ, мыйла миян жӧникным новлӧдліс моздорас Валяӧс, а гӧтрасис мӧд вылӧ. А Валя ачыс нин вайӧдліс жӧниксӧ, позьӧ шуны, крӧватьӧдзыс, а Николай Степанович эновтіс сійӧс. Воас татшӧмторйыс сьӧлӧм вылас том нывлы?

Директор муніс курорт вылӧ. Школаын кӧзяйкаӧн коли завуч Тамара Михайловна. А менам заводитчисны сьӧкыд лунъяс. Пӧшти быд лун — вит-квайт урок. Мукӧддырйи юр висьмытӧдзыд лоӧ: лунтыр математика!

Пасибӧ Полялы: ёна отсаліс. Ньӧбис термос да быд лун пуктыліс меным школаӧ пӧсь, крепыд да юмов чай, выйӧн мавтӧм нянь, калбас. Ыджыд перемена дырйи ме нуръясьлывлі, и тайӧ ёна отсаліс, торйӧн нин пӧсь, крепыда заваритӧм чайыс.

Тадзи уджалі тӧлысь чӧж.

ПЕМЫД КЛАССЫН УРОК

Асыв. Ӧкмыс час нин матыстчӧ, а ывлаын сап пемыд. Учительскӧйын ӧзйӧ карасина лампа.

Декабрь, медся дженьыд лунъяс. Ме пасьтаси: колӧ петкӧдны ывла вылӧ электростанция да сетны югыд. Татшӧм кӧдзыдъяс дырйи станциясӧ узьтӧдлім школа коридорын, вевттьывлім асбестӧвӧй эшкынӧн. Станция пыртны школа пытшкӧ оз, дерт, позь: школасӧ шонтӧны уна лыда пачьяс. Но мӧд ног бара жӧ некыдз: комын-нелямын градуса мороз дырйиыд станциятӧ он зэв заведит!

Но, со, кылӧ, электростанция турӧбтіс, и пыр жӧ ыпнитісны-ӧзйисны электрическӧй лампочкаяс.

— Молодеч, Бабиков! — горӧбті ме. Да со и ачыс пырис учительскӧйӧ. Кынмӧма ноксигкостіыс, тіралӧ весиг.

— Николай Степанович, бензиныс бак пыдӧсас сӧмын!

— Экма! — шусис менам. — Дзикӧдз вунӧдчим тӧрыт! Дай складыс вевт вывтіыс тырӧма-толӧма лымйӧн. Но, гашкӧ, медводдза уроксӧ тырмас... Югдыштас, да заправитам...

Бабиков петіс. Галина Исаевна видзӧдліс сы бӧрся да йӧжгыльтчыліс:

— Ме ог гӧгӧрво, кыдзи сійӧ татшӧм кӧдзыднас...

Миша — прамӧй отсасьысь менам. А «наградаыс» — кынмалӧм, бензин дукӧн ӧвтысь паськӧм да лякӧссьӧм чужӧм-кияс... Жаль зонкаыс, но мый нӧ вӧчан? Ӧтнамлы быд асыв ноксьыны тожӧ некыдз дай некор. Мукӧддырйи, дырджык оз заведитчы моторыс да, урок вылӧ сёрма, а виччысьӧ быдса класс. А Бабиков кӧ сёрмас — ӧтнам нокся...

— Гӧгӧрвоны, Галина Исаевна, збыльысь сьӧкыд, — эг вермы сэсся терпитны да куті скӧрмыны ме. — Ме ог жӧ гӧгӧрво. Школьнӧй электростанцияӧдз некодлы абу делӧ! Бабиковлы кӧвъялім дай ставыс — мед ноксьӧ да кынмӧ быд асывводз и рыт!

— Асьныд жӧ кӧвъялінныд, Николай Степанович! — шензьыштіс директор.

— Но ӧд ӧні тӧв, со кутшӧм кӧдзыдъяс сулалӧны! Моторыс некыдз оз заведитчы... Кыкӧн ноксям, некод быттьӧ сэсся школаас абу... А югыд биыс быдӧнлы колӧ, быдӧнлы любӧ...

— Дерт, и Бабиковлы, и Николай Степановичлы сьӧкыд, — гӧгӧрвоис Галина Исаевна. — Но ме ог гӧгӧрво, коді тіян вермас отсавны? Электростанциятӧ ӧд быд мортлы он дӧверит!

— Но, кодӧс сетам? — юаліс директор. — Мортӧс босьтам сиктысь, а коді мынтас? Некод оз — ни сельсӧвет, ни роно... А миян ставыс нывбабаяс...

— А Василий Кузьмич? Босьтас ёнджык зонкаясӧс да...

— Ме пайысь! — пыр жӧ ӧвтыштіс кинас Бугаев. — Ме бара ог! Этатшӧм кӧдзыд дырйиыс — ывла вылӧ?! Кӧртас чуньыд сибдӧ! Дак вот, ме ӧні ӧзта карасина лампа да нуа классӧ, но моторӧ ог кутчысь!

Югыд би дрӧгмуні да кусі: быри бензиныс.

— Звӧноксӧ урок вылас сетам ог? — юаліс завуч Тамара Михайловна.

— Мый нӧ, кутам тані пукавны, югдӧм виччыны?! — скӧрмис директор. — Сетӧй звӧнок да муналӧй урокъяс вылӧ!

Звӧнокыс талун триньгис кыдзкӧ гажтӧма. Пемыд ӧшиньяс пыр муртса-муртса сӧдзӧдчис пемыдлӧз югӧр.

— Лампаяссӧ уборщицаыс кытчӧкӧ уберитӧм дай, карасиныс на пытшкын эз нин вӧв, помнитсьӧ.., — висьталіс завуч. — Быд классын сап пемыд...

— Мый нӧ он ӧзты лампаястӧ? — скӧра юаліс верӧсыслысь Лидия Ивановна.

— Лампаясыс ни карасиныс абу — эн ӧмӧй кыв...

Галина Исаевна босьтіс журнал:

— Менам история урок. Юасьны да выль материал висьтавны позьӧ и пемыдінын...

Муніс.

Бугаев эз вӧрзьы местасьыс:

— Дак вот... Эм кӧ би — муна урок вылӧ, а абу кӧ — пукала тані. Удждон локтӧ... Ха-ха-ха!

— Он мун?! — дзикӧдз пузис директор. — Мунан! Тэ абу гортын — школаын!

— Ме пайысь! Вай югыд — муна ӧні жӧ. Ме абу кань: пемыдын ог аддзы. Классӧ ог пет: кутшӧмкӧ филон швачкас чужӧмӧ чернилаӧсь рузумӧн да лунтырӧн он вермы мыськыны...

Учительяс вакӧдісны. Директорлӧн петіс жӧ серамыс.

— Но, муналӧй, муналӧй сэсся, — шуис, — займитӧй мыйӧнкӧ челядьсӧ. Со ызгӧны-грымгӧны, школасӧ кисьтасны!

Ме сеті Василий Кузьмичлы карманнӧй пӧнар.

— Ачыд мыйӧн? Кималасӧн? Ха-ха-ха!

— Менам арифметика. Устнӧ решайтчыны позьӧ...

Петі аслам витӧд классӧ. Челядь, кыла, сувтісны. Лои чӧв-лӧнь.

— Видза оланныд, том ёртъяс! — здоровайтчи класскӧд.

— Здравствуйте!

— Заводитам урок. Водзджык артасьыштам. Со ӧти задача: миян классным квайт метр кузьта, вит пасьта да кык да джын судта. Тӧдмалӧй, кымын кубометр сынӧд миян классын.

Чӧв олӧны, артасьӧны, буракӧ.

— Мый колӧ вӧчны, Павел, висьтав.

— Джоджлысь площадьсӧ босьтны судта вылас.

— Вот и арталӧ.

— Площадьыс — комын, — шуис Павел.

— Павел, юрад артав!

— Ме арталі нин! — медводз шыасис Элида.

Ме локті сы дорӧ:

— Шӧпнит пелям...

Шӧпнитіс.

— Правильнӧ, Элида! Но мед мукӧдыс арталӧны жӧ...

Виччысям. Ставнысӧ, буракӧ, дзугис кык да джын метрыс.

— Ме арталі! — горӧбтіс Геня.

— Уна-ӧ?

— Сизимдас вит!

— Мый «сизимдас вит»? Мешӧк?

— Сизимдас вит кубометр сынӧд миян классын!

— Молодеч, Геня! Пять!

— Пуктанныд?

— Ӧбязательнӧ, кор югдас.

Татшӧм ногӧн решитім вель уна задача.

Урок помланьыс сеталі шмонитана задачаяс.

— Ӧні — пемыд. Вот, шуам, ӧзтім ми классӧ вит сись. Кыкӧс, вывті югыд лои да, кусӧдім. Кымын коли?

— Куим!

— Вит!

— Кык!

— Думайтӧ!

Вӧлӧмкӧ, сӧмын кык кольӧма: куимыс сотчисны...

А ӧти задача вель дыр решайтны ковмис да урок помӧдз эз и эшты.

— Паныдасисны дас тӧдса морт, киасьӧны-здоровайтчӧны. Киысь киӧ кутчысьлӧмыс кымын лои?

Сідз эг и вермӧй артавны, колим гортса удж пыдди. Триньӧбтіс звӧнок.

Ог тӧд, кыдзи мукӧдыслӧн, а миян урокыс сап пемыд классын муніс зэв бура.

— Тайӧ абу удж! — эз вӧв местаын сьӧлӧмыс Лидия Ивановналӧн. — Василий Кузьмич, ӧні жӧ босьт аслад классысь ёнджык зонкаясӧс да дзик пыр зыртӧй лымсӧ бензин склад дорысь! Ӧтчыд кӧть отсышт Николай Степановичлы. Ӧд тэнад — квайтӧд класс! Дай ачыд абу коньӧр кодь!

Василий Кузьмич сьӧкыда ышловзис, но петіс. Эз, дерт, ачыс босьт зырсӧ — челядьӧс ыстіс.

— Николай Степанович, заправит, пӧжалуйста, станциятӧ. Со тай, и мӧд урок вылас пемыд на лоӧ, а бӧръя урок вылын бара нинӧм он кут аддзыны.

Недыр мысти югыд би бара сявкнитіс классъясӧ.

— Ура-а! — юрӧбтіс школаын.

УНАТОР МАЙШӦДЛӦ

— Аски локтӧны инспекторъяс, ачыс завроноыс тшӧтш! — юӧртіс Лидия Ивановна.

Инспекция эз вӧв виччысьтӧмторйӧн: быд во овлӧ шӧр да семилетньӧй школаясад. Волывлӧны гежӧдика и начальнӧй школаясӧ. Кольӧм во со Вениамин Михайлович ачыс пыраліс ме дорӧ.

Инспекторъясыдлы некод ёнасӧ оз, дерт, радлы, но мый нӧ вӧчан, любӧ кӧть абу, а лоӧ терпитны, кывзыны быд индӧд да вӧчны сідз, кыдзи тшӧктӧны. Прӧверка лунъясӧ, чайта, быдӧн зільӧны уджавны кыдз позьӧ бурджыка: кодлы нӧ окота нимавны-кывсьыны лёкиник велӧдысьӧн да воспитательӧн?!

Директор индаліс:

— Класснӧй руководительяс, урокъяс бӧрын кольӧдлӧй челядьсӧ недыр кежлӧ да бура сёрнитӧй накӧд. Мед кӧть нин тайӧ лунъясӧ бурджыка велӧдчасны, зільджыка лӧсьӧдчасны урокъяс кежлӧ. Мед кӧть дзикӧдз ог яналӧй. Зэв уна зонкалӧн юрсиныс кузь. Мед талун жӧ шырсьӧны! Дӧрӧм-ковтаныс мукӧдлӧн — яндзим видзӧдны, бур мортлӧн нямӧдыс сӧстӧмджык! Галстукъяссӧ мед мыськӧны да гладитӧны. Тэ, Валентина Павловна, интернаттӧ бурджыка видзӧдлы. Найӧ ӧд бара интернатса челядь дорӧ овмӧдчасны. Ставсӧ видзӧдласны да аддзасны. Абу жӧ, гашкӧ, челядьыд, енмӧй видз, тойӧсь?

Валя гӧрдӧдіс да кыв шутӧг петіс.

Квайтӧд урок бӧрын пыри аслам классӧ да видзӧдлі велӧдчысьяс вылӧ, сідз шуны, инспектор синъясӧн. Збыльысь, унатор синмад шыбитчӧ, мый быд лун уджалігад он быттьӧ и аддзы: велалан, буракӧ.

— Митя, Павел, Геня, кӧні пионерскӧй галстукъясныд?

Кыскисны гач зепсьыныс, няйтӧссьӧм гез помъяс кодьӧсь.

— Тайӧ, ті думысь, галстукъяс?!

Синъяссӧ бокӧ вештӧны: век жӧ яндзим.

— Талун жӧ мыськӧй да гладитӧй. Сэсся шырсьыны колӧ, том ёртъяс. Инспекторъяс локтӧны аски. Тіян зэв окота петкӧдчывны татшӧм юрсинас? Пельясныд со оз нин тыдавны! Талун жӧ шырсьӧй!

Павел букыштчис:

— А коді шырас? Айӧ — вӧрын, мамӧ оз куж, дай машинкаыс абу...

— Вай, колӧкӧ, ме чирскӧда ыж шыранӧн, — вӧзйысис Геня. — Зэв мича лоӧ юрыд!

— Ме тэнӧ чирскӧда гортӧ мунігӧн, эн пов! — кӧсйысис Павел.

Дум вылӧ уси: Галпомын на, дзикӧдз дӧзми дольны юрси шырӧм йылысь да, ньӧблі машинка, унаысь шырлывлі кузь юрсиа зонкаясӧс.

— Коді оз вермы шырсьыны талун — аски локтӧй школаӧ водзджык, кодлысь вевъяла — тшӧтшӧдышта юрсисӧ, — кори ме.

Вежон чӧж инспекторъяс видлалісны школалысь удж, кывзісны урокъяс быд велӧдысьлысь, тшӧтш и директорлысь. Вениамин Михайлович пукаліс сӧмын менам да директорлӧн урокъяс вылын. Ёнакодь шензи: менсьым кывзіс дзик став урокъяс, весиг чертитчӧм да рисуйтчӧм. А сэсся висьтавліс, кыті менам артмис бурджыка, а кыті эзджык. Кыптыліс и пӧсь сёрни.

— Зэв ёна воӧ сьӧлӧм вылӧ Ларичевлӧн алгебра кузя выль учебник, — ошки ме. — Любӧ сы серти уджавны!

— Да, таво медводдзаысь уджалам выль задачникӧн. Став математикъяс ошкӧны.

— Татшӧм жӧ учебникъяс эськӧ арифметика кузя! Сэсся, Вениамин Михайлович, мыйла нӧ арифметикасӧ ми велӧдам комиӧн?

— Но ті жӧ уджаланныд коми школаын и став предметсӧ колӧ велӧдны чужан кыв вылын. Коми челядь бурджыка гӧгӧрвоӧны.

— Но геометрия жӧ роч!

— Кыдзи нӧ вуджӧдан коми кыв вылӧ геометрия? Оз артмы!

— Арифметикасӧ весьшӧрӧ жӧ вуджӧдісны. Задачниксӧ, гашкӧ и, колӧ: челядьлы гӧгӧрвоанаджык. Но учебниксӧ мыйла? Мыйта правилӧ весьшӧрӧ зубритӧны челядьыс! «Медым юкны смешаннӧй числӧ смешаннӧй числӧ вылӧ...» Правилӧ велӧдігас не сӧмын кывйыд вермас гӧрддзассьыны, но и юр вемыд вежыньтчас. Прӧстӧй дробьяс вылӧ воштам сы мында кад — юрсиыд сувтӧ! А коркӧ ӧмӧй ковмасны оліг-уджалігӧн прӧстӧй дробьясыс? Некор да некӧн оз ковмыны! Быдлаын — десятичнӧй дробьяс, прӧчентъяс. Ме думысь, прӧстӧй дробьясӧн колӧ сӧмын тӧдмӧдны, а став кадсӧ сетны десятичнӧй дробьяслы...

Вениамин Михайлович нюмъёвтіс:

— Ті, Николай Степанович, медводдза во на уджаланныд математикӧн, а дасьӧсь нин революция вӧчны!

— Та йылысь вӧлі сёрни и семинар вылын, — дорйыси ме.

— Но и мый? Эм государственнӧй школьнӧй программа, а сійӧ — закон, колӧ пӧртны олӧмӧ, кӧсъян тэ али он! Но ӧтиторйын тэ, Николай Степанович, прав: арифметика кузя коми правилӧяс зубритӧм — ковтӧм удж. Сетім кӧ унджык кад артасьӧм вылӧ — дерт жӧ, бурджык вӧлі. Но нӧшта ӧтчыд шуа: школьнӧй программа — сійӧ закон! Сы вылӧ и ми, инспекторъяс, танӧсь, мед видзӧдлыны, кутшӧмджыка ті пӧртанныд олӧмӧ государственнӧй программаяс. Но тэнӧ, Николай Степанович, некод оз кут, кужан кӧ, прӧйдитны прӧстӧй дробьяссӧ дженьыдджык кадӧн, сэки унджык урок позьӧ вичмӧдны десятичнӧй дробьяслы, торйӧн нин прӧчентъяслы. Но программа мед вӧлі пӧртӧма олӧмӧ. Сійӧс дженьдӧдны мед думыд весиг эз вӧв!

Ёсь сёрнияс пансисны педсӧвет вылын, коді воссис инспекционнӧй прӧверка помасьӧм бӧрын.

— Сӧмын миян школаным, став Изьва район пасьта, йӧршитчӧма кулаклӧн керкаӧ, — ышловзис Лидия Ивановна. — Быдлаын школа кыдз школа, а миян — пӧтӧлӧкӧдзыс кинад судзан, бергӧдчыны некӧн, ни физика-химия кабинет, ни залтор, физкультура некӧн нуӧдны. Учительяслы некӧн овны, ни ӧти велӧдысьлӧн ни аслас керка, ни государственнӧй патера абу. Думайтӧны оз, Вениамин Михайлович, коркӧ миян сиктӧ школасӧ кыпӧдны? Учительяслы оланін?

— Выль пятилетка заводитчис, но планын тіян школа абу. Мӧд пятилеткаас кӧсйӧны сюйны. Сэсся ӧд, кӧть и планас лоӧ, оз ӧд зэв ӧдйӧ артмы. Пожӧмъягӧ со вит во нин стрӧитӧны, а помыс оз на тыдав: то сьӧмыс абу, то стройматериалыс. Но коркӧ, во дас мысти, квайтымынӧд воясӧ, кыптас и тані выль школа да учительяслы нёль патераа керка!

Учительяс шызисны: дас во!

— Школаыд миян — позьӧ на эськӧ кыдзкӧ-мыйкӧ уджавны да, — шуис завуч Тамара Михайловна. — Кӧть и дзескыд, но классъясын шоныд. Со Пожӧмъягса школаын челядьыс пальто-шапкаӧн пукалӧны урокъяс вылас, парта выланыс чернилаыс йизьӧ. Медся водз миян колӧ детсад-ясли! Миян велӧдысьяс — ставыс челядя мамъяс. Регыд, колӧ чайтны, и Николай Степановичлӧн семьяыс ыдждас. А кытчӧ челядьсӧ воштан? Менам со куим челядь, медся ыджыдыслы вит арӧс. Пасибӧ, Эжва берегысь кольӧм во, буретш коймӧд кага чужигкежлӧ, мамӧй локтіс да ме кыкнан киӧн шашаритчи сы бердӧ: кольччыв, мамукӧй, ӧти во кежлӧ, эн пӧгибӧ вошты! Но ӧд сійӧ бӧр мунас: пӧрысь батьтӧ пӧ ӧтнассӧ ог эновт дай овмӧс на эм, мӧс и быдсӧн. Мунас — мый кута вӧчны?! Уджӧс эновтны ковмас! Колхозлӧн эм ичӧтик ясли, но сійӧ йӧршитчӧма Сам Володь керкаӧ, дас вит местаа сӧмын, аслыныс оз тырмы...

— Менсьым тай, бласлӧ-кристос, кыдзкӧ-мыйкӧ босьтісны нылукӧс, — нюммуніс Софья Ильинична. — Эз кӧ верӧсӧй колхозник вӧв — эз, дерт, сибӧдӧй.

— Интернатӧн пӧльзуйтчӧмын, челядьӧс овмӧдӧм-видзӧмын тӧлкыс да ладыс абу жӧ, — висьталіс Лидия Ивановна. — Артмӧ сідз: этша челядя, кокниа олысь семьяысь босьтам, а сьӧкыда олысь, уна челядя семьяысь — ог. Со Печора бокса Ёдӧм ичӧтик сиктын кымынкӧ семья сӧмын и олӧ, челядь этша, школа абу. И челядьсӧ первой классянь государство интернатын вердӧ, кӧмӧдӧ-пасьтӧдӧ дас во! Со Гуляй Паладьлӧн куим челядь и ставыс интернатын жируйтӧны-олӧны. Ачыс орчча сиктса лавкаын вузасьӧ, гӧтырыс — колхозница, но медсясӧ горт гӧгӧрыс бергалӧ. Кык мӧс да ӧш, Печораысь кебӧс-сьӧмга, зельдь кыйӧны, вузалӧны вый да чери. Челядь вӧсна некутшӧм тӧждысьӧм ни шог! Олӧны важся кулак серти озырджыка. А татысь, Мичашорысь, квайт-сизим челядя семьяысь ни ӧтиӧс интернатӧ ог вермӧ босьтны: оз позь, местнӧй!

— Ме ог гӧгӧрво, мыйла абу справедливостьыс? — ышловзис Галина Исаевна. — Артмӧ: ачыс государствоыс быдтӧ интернатъясын сӧветскӧй иждивенецъясӧс! Кутшӧм йӧз наысь петасны?

— Дак вот, — шыасис Василий Кузьмич. — Сійӧ жӧ Ёдӧмсьыс Ванька-Шарик ошйысьлӧма: комын во пӧ олі да эг на сёйлы ас киясӧн нажӧвитӧм нянь шӧрӧм! Школаӧ пыртӧдз ай-мам вердісны, сэсся дас во — интернатын, сэсся куим во — Армияын, а сы бӧрын кӧкъямыс во тюрьмаын вердісны...

Гажтӧма сералыштім. Галина Исаевна бара ышловзис:

— Ме ог гӧгӧрво: ставыс дась, а велӧдчыны дыш. Мӧдӧд во кежлӧ на кодсюрӧ кольӧны...

Лидия Ивановна скӧрмӧмысла дзикӧдз гӧрдӧдіс:

— Да и вӧтлыны оз позь ни интернатысь, ни школаысь: отсев!

— Отсев, збыльысь, оз позь лэдзны, — шуис Вениамин Михайлович. — Но и интернатнад роно нинӧмӧн оз вермы отсавны: эг ми лӧсьӧдӧй татшӧм пӧрадоксӧ. Эм тані асланыд Сӧветскӧй власть — сельскӧй Сӧвет, сыкӧд ӧтвыв и индӧй, кодӧс да кытысь босьтны интернатӧ...

— Мый вермас вӧчны сельсӧвет? — ӧвтыштіс кинас директор. — Нинӧм оз да оз и кӧсйы весиг. Ме шыасьлі. Предыс, Егор Петрович, кинас макнитіс: тіян интернаттӧг пӧ уджыс юр выв тыр. А ачыс гежӧда и пыравлӧ сельсӧветас, век быттьӧ орчча колхозъясын, а сэтысь зэв жӧ гежӧда аддзывлӧны... Пестӧ весиг учительяслы оз вермыны сетны, деньгаӧн мынтысьӧны: асьныд пӧ заптӧй.

— Корны колӧ! — шуис роноса зав. — Сессия вылын сёрнитны исполкомлӧн заседание вылын. Асьныд, Лидия Ивановна, тшӧкыдджыка пыравлӧй сельсӧветас. Корӧй, топӧдлӧй председательсӧ! Бӧрдтӧм кагатӧ оз потны!

— Аски жӧ пыралам Софья Ильиничнакӧд кыкӧн. Сійӧ — профсоюзса юралысь, мед тӧждысьӧ учительяс вӧсна!

Софья Ильиничналӧн наяна дзирдыштісны сьӧдгӧрд гырысь синъясыс:

— Збыльысь, пыралам! Егор Петрович — мича, ён мужичӧй. Читкыртла ме сылы син пӧвнам гоз-мӧдысь, менам артмас! Мися, абу ӧмӧй тэныд жальӧсь ме кодь мича том нывбабаясыс, пес налы тшӧктан пӧрӧдны-пилитны да поткӧдлыны!

Велӧдысьяс да инспекторъяс сералыштісны. Кузь, сьӧкыд педсӧвет помасис век жӧ бура, серам сорӧн.

ЭКЗАМЕНЪЯС

Колины бӧрӧ медся кузь коймӧд четверть да дженьыдик тувсов каникулъяс.

Нёльӧд четверть, торйӧн нин помланьыс, эз жӧ вӧв кокни: быд лун мӧдысь «гындім» прӧйдитлӧм материал, лӧсьӧдчим экзаменъяс кежлӧ. Ме, дерт, полі: медводдза экзаменъяс... Кутшӧм задачаяс куйлӧны роноӧн ыстӧм конвертъяс пытшкын — код тӧдас!

И со воис экзамен лун. Класс мичмӧдӧма. Гӧрд дӧраӧн вевттьӧм пызан, дзоридзьяс. Кӧкъямыс час асылын ми вӧлім нин школаын. Лидия Ивановна кыскис шкапысь печатьяса конверт:

— Ноко, видзӧдлам, мый тані!

Тіралысь кияснас восьтіс. Галина Исаевна, экзамен вылын ассистент, шуис:

— Ме бара ог тӧд, мый сэні!

Менам сьӧлӧм тіпкӧ вӧвлытӧм ёна: «Мый конверт пытшкас: менам шуд али позор? Полинушка, отсав меным! Мамӧ, кӧні тэ?»

Серав кӧть эн, а тадзи эг на волнуйтчыв!

Лидия Ивановна синъяс пырыс тэрыба нуӧдіс задачасӧ да мыччис листсӧ меным:

— Абу сьӧкыд текст, эн пов...

Босьті да медводдза здукъясас некыдз ог аддзы, мый гижӧма, ставыс быттьӧ ру пытшкын. Сэсся сайкалышті, синъяс югдісны. Задачаясыс, збыльысь, эз вӧвны вывті сьӧкыдӧсь, но уналы век жӧ ковмас пӧсявлыны!

Директоркӧд пуксим, артасям. Водзджык аслыным непременнӧ колӧ артавны: мукӧддырйи пӧ текстас овлывлӧны ӧшыбкаяс, найӧс колӧ аддзыны, а то челядьыдлӧн нинӧм оз артмы.

Арталӧм бӧрын видзӧдлі часі вылӧ: кольӧма дас минут задача вылӧ. Бур.

Задачаяссӧ гижим дӧска вылӧ. Ставыс дась, позьӧ корны велӧдчысьясӧс. Петі коридорӧ. Челядь рамӧсь, быттьӧ абу и миян вильыш, збой зонкаяс да нывкаяс. Дзоргӧны юалана, полӧмӧн.

— Пырӧй, том ёртъяс! — кыдз позьӧ збодерджыка кори ме да нюмъёвті: — Эн полӧй, задачаяс абу сьӧкыдӧсь, ставныд верманныд артавны. Павел, тэ мый гӧрдӧдін? Задачасӧ эн на лыддьы-а...

— Ручкаӧс вунӧді...

— На, менсьым босьтлы.

Зонка тшапа видзӧдліс ёртъясыс вылӧ, ӧти здукӧн збодермис мортыд.

Комиӧн и рочӧн тӧдмӧді задачаясӧн. Сэсся юалі, кодлы мый абу гӧгӧрвоана. Некод нинӧм эз юав. Ставыс, сідзкӧ, гӧгӧрвоана.

— Арталӧй, сідзкӧ, ньӧти тэрмасьтӧг, — висьталі челядьлы. — Тіян сетӧма дзонь кык час. Абу кык урок, а кык час.

Классын лои шы ни тӧв. Коли час джын. Ме инам эг ӧшйы, сэтшӧм окота вӧлі гӧгӧртны классӧ, видзӧдлыны, коді мый вӧчӧ, но куті ачымӧс.

Но сэсся терпенньӧӧй поті. Сувті, воськовті, но джӧмді Лидия Ивановналӧн стрӧг да кӧдзыд видзӧдласӧ: пукав пӧ лӧня, экзамен!

Мый вӧчан, ковмис пуксьыны бӧр. Гусьӧник ышловзи: «Бура арталӧй, муса челядь менам! Бура сдайтӧй медводдза экзамен!»

Элида лэптіс кисӧ:

— Позьӧ сдайтны?

— Прӧверитін?

— Да.

— Вай, сідзкӧ.

Тіралыштысь киӧн босьті медводдза удж, видзӧдлі: вӧчӧма зэв сӧстӧма да бура. Любӧпырысь пукті гӧрд чернилаӧн мича пятёрка.

Сэсся вайис ассьыс уджсӧ Юра.

— Менам дась жӧ! — гораа юӧртіс Геня. Синъясыс сідзи и ӧзйӧны.

— Прӧверит!

— Кыкысь нин прӧвериті.

— Коймӧдысь прӧверит!

Ӧти бӧрся мӧд петалісны классысь челядь. Мӧдӧд час помланьыс колисны некымынӧн: Павел, Митя, Зина да нӧшта морт-мӧд.

Павел, тыдаліс, эштӧдӧма нин уджсӧ, но полӧ сетны. Пукалӧ, видзӧдӧ гижӧд вылас, нёнялӧ ручка помсӧ. Сэсся сувтіс:

— Эштіс, Николай Степанович.

— Бура прӧверитін?

— Бура...

Гӧлӧс сертиыс тӧдчӧ: оз тӧд, правильнӧ али абу.

— Видзӧдлы нӧшта ӧтчыд бурджыка.

Николай Степанович, тані жӧ экзамен! — кӧритіс Лидия Ивановна. — «Прӧверит да прӧверит»! Эштӧма — мед сдайтӧны!

Ме чувствуйта: Павеллӧн абу ставыс лючки-ладнӧ арталӧма! Ёся, пиньяс векыштӧмӧн видзӧда зонкалы синъясас.

Зонка, тыдалӧ, гӧгӧрвоис, пуксис бӧр, кымӧссӧ чукыртӧмӧн видзӧдӧ аслас гижӧдъяс вылӧ.

Колис кыкнан часыс. Экзамен помасис. Эз вермыны помавны уджсӧ куимӧн: Павел, Митя да Зина. Куим провал, сідзкӧ, а гашкӧ и унджык на: уджъяс прӧвериттӧмӧсь на.

Челядь петалӧм бӧрын видлалім став уджсӧ.

— Тайӧяс ар кежлӧ колисны, — шуис директор. — Арсяньыс нин вӧлі тыдалӧ: Павел, Митя да Зина — мӧд во кежлӧ кольӧны. Август тӧлысьын занимайтчан накӧд, да выль велӧдчан во водзын сетам запаснӧй текст. Но ӧдвакӧ вермасны...

— Оз, дерт; гожӧм чӧжнас вунӧдасны и сійӧс, мый тӧдӧны ӧні. Оз ӧмӧй позь устнӧй экзамен бӧрас запаснӧй текстсӧ сетны? Гашкӧ, кӧть Павелыс решитас!

— Оз позь: инструкция! Позьӧ сӧмын августын.

Зина бӧрдіс. Митя пыр жӧ муніс гортас. Павел пукаліс школа кильчӧ вылын гажтӧмсьыс-гажтӧм. Нюкыртіс сьӧлӧмӧс и менсьым. Мыйта занимайтчим Галпомса школаын и тані! И со тай, кыдзи лои. Эк, Павел, Павел!

— Мун гортад, — тшӧкті зонкалы. — Аски — консультация...

— Ме ог лок, — шуис Павел.

— Нӧшта мыйкӧ он-ӧ шу!

— Ог лок. Сё ровно ме — мӧд во кежлӧ...

— Нинӧм на ог тӧдӧй, — зіли сьӧлӧмсӧ бурмӧдны. — Сдайтан арифметика кузя устнӧй экзаменсӧ, сэсся ми юалам роноса заведующӧйлысь — помнитан, воліс тай, кор ми Галпомас школаад звӧноксӧ лӧсьӧдім? Прамӧй дядьӧ, надейтча, мый тшӧктас вӧчны экзаменлысь мӧд вариантсӧ...

Павеллӧн югдыштіс чужӧмыс:

— Кутшӧм мӧд вариант?

— Запаснӧй задача жӧ ыстӧны экзаменъяс вылас!

Устнӧй экзаментӧ Павел сдайтіс.

Пыр жӧ звӧниті Вениамин Михайловичлы. Сійӧ шуис жӧ: письменнӧй экзамен мӧдысь нуӧдӧм — инструкция дзугӧм. Но ме пӧ тӧда и мӧдтор: ар кежлӧ кольӧмысь пӧльза эз на лолы! Ачыд кӧ пӧ эскан, мый зонкасьыс тӧлк лоӧ квайтӧд классын — нуӧд экзаменсӧ мӧдысь, мый лоан ло! Та йылысь жӧ сійӧ сёрнитіс и школаса директоркӧд.

Павел вуджис квайтӧд классӧ! Ме вӧлі тожӧ вывті рад, тапкӧді мышкас, малышті юрӧдыс:

— Молодеч, Павел, молодеч!

ШОЙЧЧАН КАД

Со и помасис велӧдчан во. Эз вӧв кокни медводдза воыс выль школаын. Став предметыс — выль, урокъяс кежлӧ лоӧ вӧлі лӧсьӧдчыны некымын час чӧж, таысь кындзи — тӧлысь чӧж сеталі урокъяс тшӧтш и директор-математик пыдди. Уна вын да кад босьтӧ заочнӧя велӧдчӧм. Но век жӧ колӧ шуны, воыс помасис эз нин сэтшӧм омӧля: мӧд во кежлӧ менам классысь коли сӧмын кык морт.

Ӧні позьӧ и шойччыштны. Кассир Валя сетіс отпускнӧй сьӧм — дзонь ноп! Долыдпырысь лэччи гортӧ, том гӧтыр дорӧ.

— Отпускын? — радліс Полина. — Но и шойччан кад жӧ тіян, учительяслы, сетӧны — квайтымын лун! Мудзанныд шойччынытӧ!

— Сійӧ на мый! Тэ лок сьӧмсӧ менсьым лыддьы.

Гӧтыр долыдпырысь серӧктіс:

— Ог йӧрмӧ! Сессия вылад на ӧд ковмас тӧлысь кежлӧ мунны и.

— Отпуск, шойччан кад, но весь овнытӧ, збыльысь, оз зэв уна сюрлы. Аскисянь жӧ пес колӧ заптыны — тьӧщалы дай аслыным.

— Заптам! Ме вӧзйыси жӧ отпускӧ...

Мӧд лунас жӧ босьтім чер да пила, мӧдӧдчим вӧрӧ. Ме нуа тшӧтш сёян тыра ноп, Поля — ва тыра бидон.

Бурджык пес заптанін, кыддза-козъя джуджыд вӧр, абу матын — кык километр бура лоӧ.

Воим. Луныс заводитчӧ шондіа, гажа. Бурджык эськӧ вӧлі — петіс кӧ вой тӧв: ыркыд керасьны-пӧрӧдчыны дай номъясыд озджык дӧзмӧдчыны.

Заводитім зіля уджавны. Ме пӧрӧдча, Поля увйысьӧ. Кужӧмӧн уджалӧ, нинӧм он шу. Тринякылӧ лэчыд чер, ӧдйӧ усялӧны му вылӧ кыдз-пипулӧн коръяссьыны заводитӧм вожъяс, коз лапъяс.

Ӧбедӧдз зэв ёна уджалім ни ӧтчыдысь шойччывтӧг. Сэсся ӧд, шойччынытӧ-пукавнытӧ он зэв и вермы: номъяс сатшкысьӧны — сук!

Мудзтӧдз керасьӧм-пӧрӧдчӧм бӧрын ме ӧзті бипур. Ӧшӧді пӧрт. Картупель весалігкості ваыс пузис.

— Яя шыд пуам али шӧна рок, Коля?

— Ӧні — яя шыд, бӧрти — рок!

— Кыдзи кӧзяин тшӧктӧ — сідзи и вӧча, — оз паныд мун гӧтыр.

— Пу, мый кӧсъян, — шуи ме. — Мен веськодь: ӧтмоз азыма няръяла рок кӧть шыд, кынӧм сюмаліс — дась кын картупельсӧ сёйны!

Ӧбед пусигкості ме вӧчи пес пилитан скамья.

Зэв чӧскыда, бура ӧбедайтім, юим йӧв да чай, шойччыштім.

Кык вугъя пила ме ачым кеслі зэв бура, лэчыда, уль пуад чажгӧ-пырӧ выйӧ моз. Час куим зіля пилитчим.

— Эн на мудз? — юалі гӧтырлысь, аддзи кельдӧдыштны заводитӧм чужӧмсӧ да.

— Мудзи, Коля! — мыжапырысь нюммуніс Поля.

— Пу, сідзкӧ, шӧна роктӧ да гудрав сэтчӧ тушёнкатӧ унджык, а ме сэк кості поткӧдчышта...

Кык пу костӧ лӧсьӧді пес тэчаслы места. Уліас пукталі ён кражъяс, мед тэчасыс оз пӧлӧстчы да бужды.

Поткӧдчышті неуна. Сэсся зэв бура пажнайтім.

Сэсся бара на прамӧй дыр да бура уджалім. Ме поткӧдлі чуркаяс. Колӧ шуны, уль чуркаясыд зэв кокниа швачкакылӧны-потласьӧны. Полина тэчис пес. Ньӧти дышӧдчытӧг уджалім шонді лэччытӧдз.

Тадзи ми мырсим лун дас кымын. Тырмымӧн пес заптім аслыным да тьӧщалы. Поткӧдӧма и тэчӧма. Гожӧмнас сідз косьмас — триньгыны кутас.

— Аски шойччам, — шуис Полина. — Вуджам лыа пляж вылӧ да лунтыр гожйӧдчам-купайтчам!

— Позьӧ ӧти лунтӧ! — сӧгласитчи ме.

Но оз, вӧлӧм, ставыс сідз артмы, кыдзи кӧсъян.

Асывводзнас чардак ӧдзӧсӧ торкӧдчисны. «Кодӧс лешакыс вайӧ татшӧм водзсӧ?! — чуйми ме да восьті ӧдзӧс.

— Бур асыв, Николай Степанович! — гораа шыасис колхозса бригадир Захарий Евдокимович. — Кутшӧмджыка отпускалан?

— Быд лун на пес заптім...

— Колӧ! Заптыссис?

— Тӧрыт помалім.

— Вот и бур! Гашкӧ, вуджалан видз вылӧ чӧвтыштны? Костӧ веськӧдыштан... Пестӧ керигӧн ӧд век копрасьны колӧ... А чӧвтігад юрыд вылын гоннялӧ! Тӧрыт ді вылӧ, гашкӧ, витсё юр коли чӧвттӧм... Зэрмас кӧ... Вуджав, отсышт. Пасибӧ висьталам, дон мынтам дай турун на сетам. Сэсся ӧд пестӧ ваявны вӧв ковмас и. Кытчӧкӧ мунны-локны — бара жӧ колхозӧ шыасьны лоӧ...

— Сідз, дерт, Захарий Евдокимович, но...

— Полина гӧтырыд кӧ тшӧтш вуджас видз вылас — нӧшта на бур!

— Шойччыштны жӧ колӧ, Захарий Евдокимович, кӧть ӧти лун! Сэсся — сессия, лӧсьӧдчыны колӧ...

— Кор сессияыд вошйӧ?

— Дас кык лун мысти...

— Со ӧд, пӧшти кык вежон на сэтчӧдз! Унджык туруныс миян сэк кежлӧ пуктыссяс. Сессия вылад и зэлӧдчылан. А ӧні юртӧ колӧ прамӧйджыка шойччӧдны, сессия водзад, Сэтӧра ді вылын. Югыд шонді, сӧстӧм сынӧд да сӧдз ва, веж видз да турун дук, зарни лыа пляж орччӧн — мый нӧшта колӧ? Гӧтырыд век на узьӧ?

— Полина важӧн нин фермаӧ муніс. Отпускын, шусьӧ...

— Но ме, Николай Степанович, муна сэсся. Дыр эн нюжмась. Сёйышт да лэччы берег дорӧ, час мысти вуджам мӧдлапӧлӧ. Сьӧрсьыд сёян-юан оз ков босьтны: яя шыд пуасны, рок, йӧв вуджӧдам — ставыс лоӧ. Паньтӧ эн вунӧд. Гӧтырыдлы гижӧдтор коль, мед оз вошты тэнӧ.

Мый сэсся татчӧ шуан?

Локтіс гӧтыр, кодӧс водза-водз чукӧстлісны скӧтнӧй дворӧ. Ме висьталі, мый йылысь сёрнитім бригадиркӧд. Полина ньӧти эз шензьы:

— Гожся страда вылӧ корасны, дерт. Вуджам! Миян ставыс дась. Уджыштам, дай купайтчынытӧ сьӧлӧм бурмытӧдз на сюрлӧ!

Вуджим. Паськыд да шыльыд видз вылын тшем сулалӧны турун юръяс.

Лӧмӧн да уль баддьысь вӧчӧм ён майӧгӧн писькӧдлім зорӧд пиньяслы розьяс.

— Тані медся кузь сабри овлывлӧ — нелямын пиньӧдз! — висьталіс бригадир. — Зымӧбтанныд кӧ талун тайӧ зорӧдсӧ — нинӧм сэсся оз и ков.

Чӧвтны заводитім квайтӧн. Зорӧд мӧдарас мекӧд паныд — сиктса пельшер Александр Иванович Тюрнин, роч морт. Ляпкыд тушаа, кынӧмтор нин быдмӧма, но ён мортыд! Вӧлӧн вайӧм вель ыджыд турун юр, упнитас да, муртса дзоньнас оз кыпӧд зорӧд вылӧ! «Укшальмӧдас дзикӧдз!» — повзьылі ме, но сэсся — нинӧм, прамӧйджыка зэлӧдчывны куті да ньӧти эг кольччы сыысь.

Ӧбед дырйи азыма, ньӧти лукавиттӧг, пӧттӧдз сёйим шыд да яй. Пуӧм яйсӧ чӧвтысьяслы сетісны, повзьылі быдсӧн, ыж юр ыджда тор! Мися, вывті лышкыдӧсь. Вӧлӧмкӧ, чань яй да сійӧн жалиттӧг вердӧны. Чань кӧ и чань, зэв чӧскыда ставным мутшким-сёйим. Ме сэсся пӧрӧдчи Полина дорӧ шойччыштны. Бригадир висьталіс: час джын кежлӧ пӧ позьӧ вугыртлыны, шойччанныд да бурджыка уджаланныд.

Унйылысь моз кыла Захарий Евдокимовичлысь ньӧжйӧник сёрнитӧм:

— Учительясыд вот абу жӧ ӧткодьӧсь. Василий Кузьмич дорӧ кымынысь пыралі: мися, татшӧм мича поводдянас отсышт чӧвтны, вуджав, уджышт кӧть лун-мӧд, кӧть нин лун шӧр бӧрас вуджав час-мӧд кежлӧ, кор турун юръясыс медся уна чукӧрмӧны. Ме пӧ отпускын, шуис дай. Ме пайысь пӧ! А со босьт выль учительтӧ. Мортыс отпускын, но ни ӧти лун абу на шойччӧма. Пес заптӧма аслыс дай тьӧщаыслы. Талун медводдзаысь шыаси: мися, Николай Степанович, он-ӧ отсышт чӧвтны? Пыр жӧ вуджисны гозйӧн! А ӧд мортыс заочнӧ велӧдчӧ, сессия ныр улас, гӧтӧвитчыны колӧ.

— Зэв бура чӧвтӧ! — ошкис, кылӧ, кодкӧ. Косіник, но крепыд сӧнъяса, буракӧ: Тюрнинкӧд паныд чӧвтӧ, ньӧти оз кольччы! А Тюрниныд моз юръястӧ кыпӧдлыны оз быдӧн вермыны!

Ок, и сюсь жӧ тэ, Захарий Евдокимович! Ӧд тӧдан жӧ, мый ме кыла тайӧ сёрнисӧ! Ошкыштӧм бӧрад, дерт, сэсся быд лун ковмас вуджны видз вылӧ. Сідзи и лои: сессия вылӧ мунтӧдз медбӧръя лунӧдзыс чӧвті. Полина, дерт, вуджавлывліс жӧ, куртіс бадьяс дор, юрасис, но сылӧн отпускыс зэв дженьыд, да ни ӧти лун шойччытӧг бӧр петіс уджавны, ветпельшеравны сельсӧветувса нёльнан колхозас.

А ме сэсся тӧлысь чӧж вӧлі сессия вылын, сдайталі экзаменъяс, зачётъяс, прамӧякодь лои зунявны учебникъяс, «бӧжтӧгыс».

Тадзи, эг и казявлы, коли гожӧм.