НӦК

(Челядьлы ичӧтик висьт)

Нёль арӧса Серёжа сьӧлӧмсяньыс стрӧитӧ выль автомашиналы гараж. Регыд нин помасяс, сӧмын вот ещӧ вевт колӧ.

— Коля, картонтӧ кӧсйылін, а абу, — шыасис вокыс дінӧ Серёжа. Но Коля комнатаын эз вӧв. Шай-паймунӧм Серёжа видзӧдліс пач сайӧ, пыраліс крӧвать улӧ, но эз аддзы вошӧм воксӧ да уськӧдчис посводзӧ.

Ӧдзӧслысь дзуртыштӧмсӧ кылӧмӧн, Коля тэрмасьӧмӧн ньылыштіс булалысь коляссӧ, тэрыба нюлыштіс лӧжкасӧ да сюйис зептас.

— Коля, мыйла нӧ вом дорыд нӧкйӧсь? Тэ нӧк сёйин? — гӧгӧрвоис Серёжа.

Коля чышкыштіс соснас ныр увсӧ да нӧкйӧн лякӧссьӧм паръяссӧ да скӧрмӧдчис:

— Тэ йӧймин кӧ-а! Ме картонтӧ тэныд корси да вот эг на аддзы. Ковмас шыпӧлӧсӧ кайлыны...

Коля зэв тэрыба кутіс кавшасьны содйӧд.

— А джоджас нӧ, Коля, мый войталӧма?

Коля лапйӧдлыштіс синъяснас:

— Збыльысь. Мыйкӧ войталӧма и эм. Краска навернӧ...

Аддзӧмӧн, мый Серёжа копыртчис, тшукӧдліс чуньнас еджыд чутӧ да кӧсйӧ нюлыштны, Коля пӧся шуис:

— Гашкӧ и нӧк, но Серёжа. Ме нӧктӧ эг сёй. Ме сӧмын вом доръясӧс мавтышті потласьӧмаӧсь да. Но мамлы тэ всё равно эн висьтав. Юалас кӧ — шу: «Коля нӧксӧ эз сёй». Но?

— Но, — сӧгласитчис Серёжа. Сэсся чатӧртіс юрсӧ да юаліс: — Кӧн нӧ картоныс?

— Дзик пыр, Серёжа, аддзам! — шыпӧлӧсӧ кайиг моз нин горӧдіс Коля.

Рытнас, удж вылысь локтысь мамсӧ аддзӧмӧн, Серёжа котӧртіс сылы воча:

— Мам, со менам — гараж! Мам босьтіс Серёжаӧс ки вылас, нюмъёвтіс:

— Бура олінныд? А кӧні Коля?

— Коля гортын. Мам, а нӧктӧ Коляыд эз сёй. Сійӧ сӧмын вом доръяссӧ мавтіс.

— Да? — серӧктіс мамыс да банкасӧ видзӧдлӧм бӧрын шуис:

— Дерт жӧ сійӧ эз сёй, а сӧмын лӧжкаӧн паняліс.

— Ужнайтігӧн мам сетіс нӧксӧ и батьлы и Серёжалы, и аслыс босьтіс, а Колялы эз сет.

— Мам. А Коля мыйла оз сёй нӧксӧ?

Мам видзӧдліс гӧрдӧдӧм Коля вылӧ да шуис:

— Сылы тай мыйкӧ талун нӧкйыс оз ков...