МИСЬТӦМ ДЕЛӦ
Колхознӧй мӧсъяс бур силостӧ нюмъялігтыр сёйӧны. Да и Дарьялӧн Сюрукыс радейтӧ. Дарья мӧд лун нин кыскалӧ мӧдлапӧлысь силос, ассьыс мӧссӧ оз жӧ удзӧд. О-оз, мый ті! И эн шогсьӧй: силос абутӧм вылӧ Сюрук ӧні сэсся оз кут норасьны. Дарья со тӧрыт пуд мында кежӧдіс, дай талун эз вунӧдчы. Кыдзи и тӧрыт, сійӧ воис мӧдлапӧлысь медбӧръяысьсӧ пемыдӧн нин, и скӧтнӧй дворӧ кежигмоз куканьяслӧн помещение пельӧсӧ шыбитіс силоссӧ мичакодь пласт: ружӧктытӧг, пӧжалуй, он и лэпты.
Эз удит Дарьяным сайӧдчыны пельӧс сайӧ, кыдзи куканьяс дорысь чепӧсйис Нина — томиник кукань видзысь, кодлӧн еджыд кудриясыс читкылясьӧмаӧсь кымӧс вылас, а ачыс пыр сэтшӧм мудера нюмъялӧ, сійӧс и видзӧд, казьтыштас тэнсьыд кутшӧмкӧ грек да ковмас гӧрдӧдны. Тӧданныд?
Нина ноксис силос пласт дорын, но мый сэні вӧчис — пемыд вӧснаыс эз бура тыдав. Бӧр локтігас Дарья доддяс мыйкӧ тай пуктіс жӧ-а.
Конюшняысь воӧм бӧрын Дарья личкалӧмӧн пукталіс силосӧ ыджыд ведраӧ да лэптіс паччӧрӧ шонтыштны. А паччӧрын вуграліс Дарьялӧн мамыс: пӧрысь мортыдлы ӧд паччӧрсьыд любӧ немтор абу. Дай ті на, ме думайта, окотапырысь кайлывланныд мышныдтӧ шонтыштны, кӧть йӧз дырйиыс и соссянныд-а.
Куйліс, куйліс пӧчӧ паччӧрын, сэсся заводитіс исавны сынӧдсӧ. Ӧтчыд кыскыштас нырнас, мӧдысь, а ачыс видзӧдӧ джоджӧ: кытысь эськӧ вермис петны сэтшӧм чӧскыдтӧм дукыс? Медбӧрын гӧгӧрвоис сюйлыны чуньсӧ паччӧр вылын сулалысь ведраӧ да вайӧдлыны ныр улас. И пыр жӧ бӧрдан гӧлӧсӧн шыасис:
— Дарьюш! Ойя жӧ нин, дай ойя... Паччӧрад тай куйӧд пӧжсьӧ!
Дарьялӧн паськаліс вомыс, а синъясыс шензьӧмысла кайисны кымӧс шӧрӧдзыс:
— Куйӧд?! Коді нӧ паччӧрас куйӧдсӧ катліс?
— Ведранад тай пыртӧмыд! Ойя жӧ нин, кутшӧм тэ ныв...
Дарья чуймӧмӧн тӧвзис паччӧр дорӧ, катовтіс ведрасӧ, исыштіс, но пӧдӧм нырнад уна-ӧ кылан? Нуис ведрасӧ би дорӧ, видзӧдліс: сё дивӧ, збыль ӧд куйӧд и эм! Эз верит синъясыслы да бура дыр чабраліс кинас, сэсся сьӧласигтыр петкӧдіс «силоссӧ» ывлаӧ.
...Тайӧ войӧ Дарья узис вывті лёка. Войбыд вӧтасис, быттьӧ вайис мӧдлапӧлысь силос, а кутіс ректыны — дзик свежӧй куйӧд, весит руалӧ.
Мӧд лунӧ Дарьяӧс корисны правлениеӧ.
— Тэ, шуӧны, бур ныв, силос гусявлан, а?
Дарьялӧн кӧдзаліс кынӧм пытшкӧсыс:
— М-ме? Ог... Коді шуӧ?
— Ме шуа! — стрӧга видзӧдліс Нина.
— Войдӧрлун гусялін, дай тӧрыт на зэв ыджыд пласт нуин... силоссӧ. Ачым аддзылі...
Ниналӧн бандзибъясыс алӧймисны лукавӧй серамысь.
— Тэ и арнас турун гусявлін, кӧть туруныд и тырмымӧн: неважӧн додь турун вузалін, — кыліс Дарья сотчысь пельяснас. — Штрапуйтам ӧні вит трудоденьӧн... Яндзимыд абу... Мун...
Дарья бергӧдчис ӧдзӧслань.
— Штраф? — юаліс Нина да кутчысис кынӧмас. — Ой-ой-ой, сійӧ жӧ тӧрыт куканьяслысь куйӧдсӧ гусяліс! Ме вежи... Куканьяслы мӧсъяслӧн яслиысь колляссӧ вольсавлі, дзик силос кодь лоӧма, Дарья пемыднад и...
Дарья яндзимысла эз тӧд, кытіджык и пырны му пытшкас, да уськӧдчис ывлаӧ.
— Го-го-го!.. — кыліс бӧрсяньыс пукалысьяслӧн гӧрдлӧм.
Овны Дарьялы лои сьӧкыд. Скӧтнӧй дворын частӧ юасисны, мый сылы, Дарьялы, удайтчис гусявны бӧръя лунъясӧ, сёйис-ӧ мӧскыс куйӧдсӧ да сідз водзӧ.
Первойсӧ Дарья ёна мыччаліс пиньсӧ, сэсся кутіс чӧв овны.
А ӧтчыд Нина зэв збыльысь ышловзис:
— Мыйкӧ тай нӧ куйӧдыс зэв уна чукӧрмӧма. Пемыдджык войясӧ тэ, Дарья, ну кӧть гортад додь-мӧд...
Дерт, дугдывтӧг кӧ сералӧны тэ вылын — сьӧкыд сэки, вывті сьӧкыд. И Дарьялӧн югнитіс синваыс.
Та бӧрын серавны мыйлакӧ дугдісны. Ог тӧд мыйла. Гашкӧ, Дарья ачыс висьталас.
