ГӦРД МИКАЛЬ ДА БАРУНЯ
— Сударыня-баруня, баруня-сударыня! — сьылыштіс Гӧрд Микаль, сэсся тапкӧдыштіс мыш кузяыс Баруняӧс, ёнысь-ён да дышысь-дыш вӧлӧс. — Тэ нӧ мый сулалан? Велӧдчысьясыс подӧн али мый мунісны?
Конюшняысь петіс Меркур дядь.
— Доддяв менсьым вӧвсӧ, — тшӧктіс Гӧрд Микаль. — Щельяюрӧ колӧ ветлыны.
— Но, Михаил Гордеевич, вӧлыс абу! — шӧйӧвошис конюк.
— Кыдзи абу? — эз гӧгӧрво бригадир.
— Велӧдчысьяс доддялӧмаӧсь! Корадодьсӧ нуӧмаӧсь и...
Гӧрд Микальлӧн чужӧмыс кельдӧдіс:
— Т-тэ! Тэ кыдз лысьтін сетны челядьлы менсьым, бригадирлысь, вӧвсӧ?!
— М-ме... Ме эг сет. Асьныс босьтӧмаӧсь...
Скӧрмӧмысла Гӧрд Микаль муртса эз нӧйт конюкӧс. Сэсся юаліс:
— Баруняыс нӧ мыйла налы, зырымбедьяслы, эз лӧсяв? Медся ён вӧвсӧ сетім школааныс ветлыны...
— Асьныд тӧданныд, кутшӧм сійӧ Баруняыс: ыръянитӧ, челядьлысь оз кывзысь. Войдӧрлун сы вӧсна сёрмӧмаӧсь вӧлі. Тӧрыт сувтӧма Мича шор дорӧ да бӧрӧ ни водзӧ. Челядь сэсся подӧн мунӧмаӧсь да бара сёрмӧмаӧсь. Баруня сійӧ Баруня и эм, менсьым сӧмын и кывзӧ...
— А менсьым оз кывзы? — син пӧвсӧ читкыртліс Микаль.
— Ог тӧд, — шевкнитіс кияснас Меркур дядь. — Доддявла, колӧкӧ.
— Доддяв! Суӧдла зырымбедьясӧс да гач пытшканыс лым сюяла!
Недыр мысти Гӧрд Микаль пукаліс важиник доддьын.
Мича шорӧдз рӧдтісны буракодь, а сэсся Баруня кежис турун ваялан туйӧ. Михаил Гордеевич ёрччыштіс, нетшыштіс вӧжжиӧн да швачкис вӧвлы. Водзлань чепӧсйӧм пыдди Баруня сувтіс. Гӧрд Микаль скӧрмис да кучкис ёнджыка. Вӧв вылӧ-вылӧ кыпӧдліс бӧр кокъяссӧ.
А кор сылы вурыштісны нӧшта ӧтчыд — мӧдӧдчис бӧрӧн.
Ёна чуймӧм Гӧрд Микальлӧн весиг серамыс петіс. Баруня петитчис дыркодь, кытчӧдз эз во шорбердса бырӧдӧ. Кор доддьыс лои сӧнікын, Баруня сувтіс да видзӧдліс доддьын пукалысь вылӧ. Михаил Гордеевичлы весиг кажитчис, мый вӧв нюмъёвтіскодь.
— Ак тэ, пеж лов! — пузис бригадир, сувтіс доддьӧ да заводитіс прамӧя шонтыны Баруняӧс.
Час джын ӧвтіс Гӧрд Микаль, час джын йӧктіс Мича шор дорын Баруня. Сэсся, буракӧ, дышӧдіс йӧктынысӧ. Нем виччысьтӧг сійӧ нетшыштчис водзлань. Йизьӧм сювъяса додь эз и вӧрзьыв, а вот сісь заверткиясыд трачмунісны-орисны. Михаил Гордеевич эз удит весиг ёрччыштны, кыдзи сійӧс кок пӧлӧ гаровтчӧм вӧжжиӧн нӧбӧдіс доддьысь. Баруня долыдпырысь гӧрӧктіс да, додь вожъясӧн шарӧдчигтыр, тӧвзис сиктлань. Ас бӧрсяыс кокньыдика кыскис шудтӧм Микальӧс.
Бригадир горзіс, зілис судзӧдчыны да мынтӧдчыны вӧжжиысь, но весьшӧрӧ. Ыж ку пасьыс пуджсис, гаровтіс юрсӧ да кияссӧ. Туй вылысь лым-бус кыпӧдігтырйи Михаил Гордеевич тӧвзис сиктлань кокъяснас водзӧ. Туй южӧ зыртчӧм вӧсна ватнӧй гачыс ыджыдакодь воссис, и сэтчӧ пырис тырмымӧн уна лым.
Сикт дорӧ матыстчигӧн Гӧрд Микаль кыдзкӧ-мыйкӧ мездысис гын сапӧг пӧвсьыс. Сувтіс да ӧти здук воштытӧг шыблаліс гач пытшкӧссьыс лымсӧ. Сэсся зэвтіс кӧмтӧм кок вылас кепысь пӧв да зіля кырссис медводдза керкалань...
Мӧд луннас Михаил Гордеевич локтіс конюшня дорӧ водз. Бокӧ видзӧдӧмӧн, сійӧ зумыша тшӧктіс:
— Сет челядьыслы школаас ветлӧдлыны бурджык вӧв. А этійӧ Барунянас ачыд и ветлӧдлы...
