ЙӦЗЫСЬ БОКЫН
Повесть
ИВАН ИГНАТОВИЧ СЁРНИТӦ ТОМ ЙӦЗКӦД
«Веськыд туй» колхозса клубын пукалісны том йӧз да варовитісны. Серафим Бикинев, гырысь сьӧд синъяса том морт, комсомольскӧй организацияса секретарь, тапнитіс кинас пызанӧ:
— Колӧ лэдзны «Лежнӧгӧ» Шыр Кольӧс! Кык вежон нин уджалам видз вылын, а сійӧ кык лун на уджаліс. Быд лун подольникасьӧ...
— Лэдзам! — шыасис Сергей, серамбана, кудриа юрсиа том морт, комсомольскӧй сатирическӧй газетса редактор. — Ветлӧй кодкӧ да корӧй Люсяӧс... Сытӧг миян омӧлик газет петас.
— Лэдзнысӧ эськӧ и лэдзам, — мӧвпалігтыр чуньяснас пызанӧ барабанитіс Серафим. — Да вот пӧльзаыс оз быд пӧрйӧ тыдав...
Сергей чеччыштіс места вывсяньыс:
— Тэ сёрнитан ыджыд пыж лӧсьӧдӧм йылысь?
Серафим довкнитіс юрнас. Сергей лукйысьыштіс рисунокъяс чукӧрын да ӧвтыштіс ӧти заметкаӧн:
— Ме лэччылі нин правлениеӧ куим лун сайын! Бригадирыс кывзыны оз кӧсйы!
— Филипп Петровичыс? — кыптісны вывлань Серафимлӧн сьӧд синкымъясыс — лок лэччылам!
Том йӧз мӧдӧдчисны правлениеӧ. Серафим да Сергей ӧтлаын быдмисны, ӧтлаын велӧдчисны да весиг ӧти частьын служитісны армияын. Сергей пыр вӧлі серамбана, гажа, шмонитысь, мичаа ворсіс пӧшти быд сикас музыкальнӧй инструментӧн. А Серафимӧс челядь дырсяньыс кыскис машинаяс дорӧ. Сійӧ и ӧні частӧ ноксис трактористъяскӧд, шофёръяскӧд, разбирайтчис уна сикас моторъясын ӧткымын механикъясысь не омӧльджыка.
— А-а, комсомолия! — кык другӧс аддзӧм бӧрын гажаа шыасис парторг Иван Игнатович, Сергейлӧн батьыс, коді дзик ӧтнас пукаліс правлениеын. — Пуксьӧй, шойччӧй! Ме со ӧтнам пукала, виччыся Филипп Петровичӧс, кӧсъя видчыштны да юавны, мыйла бригадаас унаӧн оз уджавны, шляйччӧны...
— Миянлы Филипп Петрович жӧ колӧ, — шуис Серафим.
— Видчыны жӧ кӧсъям, — нюмъёвтіс Сергей.
Иван Игнатович бергӧдіс турилӧн кодь кузь нырсӧ пиыслань:
— Мый сідз?
— Артельнӧй пыжыс орчча бригадасьыс пыр на катӧдтӧм! — ӧшинь пыр тыдалысь Изьва юлань индіс Сергей.
— А колхозникъяс ставныс вуджавлӧны видз вылӧ асланыс пыжъясӧн и пышйӧдлӧны кос турун, — содтіс Серафим.
— Да, да, — Иван Игнатовичлӧн векньыдик чужӧмыс зумыштчис. — Став уджалысьыс кӧ кутасны вуджавны ӧти артельнӧй пыжӧн, кокньыдджык лоӧ вермасьны турун гусявлӧмкӧд... Сэсся вот мый, комсомолия... Ті зэв бура тӧданныд Лудік Мишӧс, мырсьӧ медсясӧ аслас овмӧсын. Кымыныськӧ вуджавліс и видз вылӧ, но, думайтсьӧ, гусявлӧ турун: быд во на вузаліс. Кытысь сылы та мында туруныс? Дядьӧ сылы оз козьнав. Сідзкӧ, ачыс гусялӧ артельнӧй видзьяс вылысь да кытчӧкӧ бадьяс костӧ гусьӧник чӧвтӧ. Меным Филипп Петровичлӧн гӧтырыс, Дарья, тӧрыт висьталіс нин: ме пӧ аддзылі Лудік Мишӧс бадьяс костысь кос турун нӧбйӧн. Ме эськӧ кори тіянӧс, комсомолецъясӧс, дугӧдны турун гусявлӧм. Турун нӧбъяс вуджӧдлӧмтӧ позьӧ бырӧдны. Артельнӧй пыжсӧ орчча бригадаысь верманныд асьныд катӧдны, нинӧм дядьӧ вылӧ надейтчыны. Сьӧкыдджык вермасьны турунсӧ бадьяс костӧ пышйӧдлӧмкӧд. Ставыс тайӧ вӧчсьӧ синъяс сайын, бокын, мукӧд дырйи войын. Позьӧ надейтчыны, мый ті петкӧданныд Лудік Мишӧс шонді водзӧ?
— Видлам, — довкнитіс юрнас Серафим.
— Сэсся вот мый, — водзӧ сёрнитіс Иван Игнатович. — Шыр Коль быд лун кыйӧ чери. Кутӧй тӧд вылын: сійӧ зільӧ нуӧдны Лудік Мишӧс Печора вылӧ тывъясьны. Ӧткӧн тывнад он вермы вӧдитчыны. Оз кӧ артмы Лудік Мишлӧн турун гусялӧмыс — сійӧ петас Шыр Колькӧд Печора вылӧ. Кутасны кыйны чери, вузавлыны. Ӧні, июль помланьыд, войяс пемыдӧсь нин, кутасны кыйны сьӧмга. Дядьӧ вылӧ ог кутӧй надейтчыны, татшӧм йӧзсӧ колӧ аслыным босьтны крепыд киясӧ...
Пырис Филипп Петрович Ульныров, кос тшак кодь сьӧд да чукыртчӧм чужӧма морт, «Веськыд туй» колхозса мӧд бригадаысь бригадир.
— Тэ корлін менӧ, Иван Игнатович?
— Корлі. Тэ, Филипп Петрович, мыйла он инды удж вылӧ Шыр Кольӧс? Лун-лун чери кыйӧ! Председательыс вӧлі, да полыштіс на, а мыйӧн сійӧ муніс карӧ — ни ӧти лун на эз уджав. Тэ мый, бара дядьӧ вылӧ надейтчан? Дядьӧ тэ пыдди ыстас сійӧс удж вылӧ?
— Лешакыс мед ыстас сійӧс удж вылас! — ӧвтыштіс кинас Ульныров.
— Тэ ыстан, Филипп Петрович, тэ!
Серафим довкнитіс юрнас Сергейлы, и найӧ петісны правлениеысь.
— Позис, дерт, аслыным лэччывны пыжысла! — дӧзмӧмӧн шуис Серафим.
— Сідзкӧ, нинӧмла и «Лежнӧгсӧ» вӧлі лэдзны, — воча шыасис Сергей. — Лэччылам...
Пуксисны правление водзвывса скамья вылӧ. На водзын лӧзвидзис Изьва. Мӧдар берегас тыдаліс ыджыд кузь ді.
— Люсяыс мыйкӧ дыр оз лок, — сиктлань видзӧдліс Серафим. — Шонді нин со лэччӧ, сэсся сёр лоӧ...
— Со локтӧ!
Зонъяс мӧдӧдчисны паныд. Люся, томиник мичаник ныв, здук кежлӧ кыпӧдліс зонъяс вылӧ сӧдз руд синъяссӧ, юаліс:
— Бара «Лежнӧг»?
— Бара, Люся, — меліа нюммуніс Серафим.
Люся вӧлі Лудік Мишлӧн ныв. Сійӧ рисуйтіс «Лежнӧгӧ» Шыр Кольӧс да кадысь кадӧ гусьӧник ышлолаліс. Сьӧлӧмыс поліс: ковмас кӧ тадзи жӧ рисуйтны батьсӧ — мый кутас вӧчны? Люсялы дум вылас уси: батьыс висьталіс, мый аски ковмас видз вылӧ водз вуджны. Эм пӧ чӧвтан удж. Тіянӧс пӧ йӧз локтавтӧдзыс вуджӧда, а ачым виччысьла берег дорас Филиппӧс да сыкӧд сёрнитышта.
Миш ас кежас мӧвпаліс: «Сулея кӧ петкӧдла — оз кут ыръянитны да висьтавлыны, кӧнӧсь ми».
— Йӧзыс ӧд абу йӧйӧсь, — ышловзис Люсялӧн мамыс.
— Тэ чӧв ов! — горӧдіс батьыс.
Люся дугдіс рисуйтчыны. Сійӧ курччаліс алӧй паръяссӧ да думайтіс, мый вӧчны. «Вуджа мӧдлапӧлас да муна куртны артельнӧй видз вылӧ, а бать дорӧ ог мун, мед ачыс куртӧ-чӧвтӧ», — думыштіс ныв, но эз эскы аслыс; мый вермас вӧчны тадзи: раминик ныв ёна поліс батьсьыс.
Лудік Миш чӧвтӧ
Асывводзнас, кор Лудік Миш, ляпкыд тушаа, польдӧм гӧрд чужӧма ён мужичӧй, кутіс тэрмӧдлыны гӧтырсӧ да Люсяӧс, гӧтырыс раминика шуис:
— Гашкӧ, нывнымӧс ыстам йӧзыскӧд уджавны? Став семьянаным кӧ мунам аслыным турун пуктыны, абу жӧ ӧд мича...
Люся рытнас шӧпкӧдчис мамыскӧд комсомольскӧй собраниевывса сёрнияс йылысь, и ӧні синкым увсяньыс видзӧдігтыр виччысис, мый шуас батьыс.
— Мый абу мича? Мунамӧй вай! Больганныд сэні нинӧм абусӧ!
— Меным оз позь мунны, — лэдзис синвидзӧдлассӧ Люся, ачыс ёна гӧрдӧдіс батьыслы воча сёрнитӧмысь.
— Оз позь? — шензьӧмысла ыдждӧдіс синъяссӧ Лудік Миш. — А сёйнытӧ йӧвсӧ да нӧксӧ позьӧ? Мӧдӧдчы вай, он кӧ кӧсйы видлыны тасмалысь кӧрсӧ! Ме ог видзӧд, мый ыджыда быдмӧмыд да комсомолӧ пырӧмыд! Комсомолияыд тэнӧ оз верд ни оз пасьтӧд.
Люся бергӧдчис мӧдарӧ, мед дзебны доршасьысь синвасӧ. И кӧть ӧбидаӧн тырӧм морӧс пытшкыс пуис, ныв век жӧ мӧдӧдчис.
Мӧдлапӧлӧ вуджӧм бӧрын Лудік Миш нуӧдіс мама-нылаӧс ді помӧ, пыртӧдіс бадьяс костті неыджыд кушинӧ.
— Куртыштӧй, а ме ветла берег дорӧ: сёрнитыштны колӧ бригадирыскӧд, — Миш мӧдӧдчис бӧр.
Люся видзӧдліс: кушин ытшкӧма, куртан да лоӧ юр-мӧд турун. Татчӧ, дерт, бадьяс пытшкад кык юр турун вӧснаыд колхозникъяс оз пырны. Но тані жӧ чукӧрын куйлісны нӧб кызь турун.
— Тайӧ нӧ кытысь? — дивуйтчӧмӧн юаліс Люся, юрас югнитіс мӧвп: «Видз вылысь, кӧнкӧ, пышйӧдліс!»
— Кытысь? — бергӧдчыліс батьыс да мисьтӧмакодь видзӧдліс: — Татшӧм жӧ кушинъясысь чукӧрті!
Лудік Миш скӧра думыштіс: «Аслам рӧднӧй нылысь лоӧ дзебны. Весиг сылы он лысьт висьтавны, мый туруныс артельнӧй видз вылысь. Мукӧд зорӧдъяссӧ ковмас Шыр Колькӧд чӧвтны: сыкӧд лӧсьыдджык, бурджыка гӧгӧрвоам ёрта-ёртнымӧс...»
Берег дорӧ воӧм бӧрын Миш пуксис да кутіс виччысьны колхозникъясӧс, кодъяс тыдалісны нин мӧдар берегдорса пыжъяс дінын.
Филипп Петрович горзіс сёрӧн локтысьяс вылӧ:
— Тэрмасьыштӧй, тэрмасьыштӧй, бабаяс!
— Аслад гӧтырыд тай медся сёрӧн локтӧ, — бытшкыштіс Сергей.
Бригадирлӧн зумыш чужӧмыс нӧшта на ёна чукыртчис. Гӧтырыс вылӧ видзӧдтӧг Филипп Петрович горӧдіс:
— Яндысьтӧм синъяс! Он вермӧй торйӧдчыны саӧсь пачьяссьыныд!
Дарья, Филипплӧн ён да ыджыд гӧтырыс, нюмъёвтіс:
— Мыйла нӧ пинясян, Филипп Петрович? Талун эг окав да сійӧн али мый?
Берегдорса йӧз серӧктісны. Филипп сьӧлыштіс да босьтіс пелыс. Вуджисны вит-квайт пыжа, мукӧдъяс йӧткысялісны берегысь.
— Бӧрти рытнас лэччыламӧй мӧд бригадаӧ ыджыд пыжла, — шуис Серафим.
Сергей довкнитіс юрнас, нюммуніс:
— Босьтам гудӧк, корам нывъясӧс... А то нывъястӧгыд гажтӧм.
Серафим корсис синъяснас Люсяӧс, но эз аддзы.
Мӧдар берегын Филипп ӧдйӧ да бура юкліс йӧзӧс удж вылӧ. «Оз кӧ эськӧ ылав румка дорӧ — зэв бур бригадир, да вот юыштӧмыс торклывлӧ», — думыштіс Иван Игнатович да заводитіс ёсьтавны зорӧд пиньяс.
— Босьт уль майӧг да писькӧдлы розьяссӧ, — тшӧктіс том чӧвтысьлы.
— Эстшӧм чорыд муад розьяссӧ писькӧдлыны лӧм эськӧ колӧ, — чорыд муӧ дыркодь майӧгӧн тувкӧдӧм бӧрын ышловзис том морт.
— Розяс ва кисьт, — тшӧктіс Сергей. — Муыс небзяс да зорӧд пиньыс кокниа пырас...
Том морт кывзысис. Кисьтіс розьӧ ва, кыпӧдіс майӧг да мыйвынсьыс зутшкис. — Оп-па!
Брызьмуні-кайис кык метр судта няйт фонтан. Том мортлӧн чужӧмыс эз кут тӧдчыны, весиг ныр розьясыс няйтӧн тырисны. Йӧз сералісны. Локтіс Филипп да шуис:
— Тані тай мужичӧйыс вывті уна. Юръясыд ӧд абу на. Тэ, Лудік Миш, мун да со эстчӧ кодйы силос гу. Шыр Коль сэні нин.
— Силос гу? Петкӧдлы, кытчӧ кодйынысӧ, — корис Лудік Миш.
— Эсійӧ бадьяс саяс, — петкӧдліс кинас Филипп Петрович.
Лудік Миш нуӧдыштіс бокӧ бригадирӧс да, гӧгӧр видзӧдлӧм бӧрын, шӧпнитіс:
— Юрыд висьӧ, Филипп Петрович? Татчӧ вуджигӧн босьті ӧти доз, гашкӧ, мися, пӧкмӧлитчыштам...
Филипплӧн сьӧдгӧрд чужӧмыс югдыштіскодь, но синъяссӧ вештіс бокӧ:
— Асывводзсяньыс кыдзкӧ абу лӧсьыд...
— Мыйла абу лӧсьыд? — ыдждӧдіс синъяссӧ Лудік Миш. — Этшаникӧн позьӧ. Лок пыралам эстчӧ кустъяс пытшкас...
Филипп эз пыксьы, и кык друг вошины кустъяс сайӧ. Юыштісны.
Лудік Миш чышкыштіс вом дорсӧ да нюммуніскодь:
— Ытшкышті лун куим сайын, Филипп Петрович, да колӧ эськӧ талун чӧвтыштны. Гӧтыр куртӧ нин. Код тӧдас ӧд, поводдяыс кутшӧм лоӧ. Зэрмас кӧ, вошӧ туруныс...
Филипп исыштіс няньтор, сюйис сійӧс вомас да нямлясигтырйи ӧвтыштіс кинас:
— Валяй!
— Вот и бур. Гашкӧ, коляссӧ курыштан?
— Курыштам!
— Вот и бур. А силос гутӧ ӧд Шыр Коль ӧтнас кодъяс, мыйта вермас...
— Кодъяс...
Лудік Миш муніс чӧвтны, а неуна гажмыштӧм Филипп петіс кустъяс сайысь.
Серафим доддяліс ытшкан машинаӧ вӧвъясӧс да эз казявлы Лудік Мишлысь да бригадирлысь кустъяс пытшкӧ пыравлӧмсӧ. Сӧмын аддзыліс, кыдзи Лудік Миш муніс кӧрт зырйӧн бадьяс дорӧ.
«Силос гу кодйыны ыстӧмаӧсь, — думыштіс зон. — Луншӧр-луна ӧд оз жӧ лысьт турун гусявлыны! Эм кӧ чӧвтаныс, рытнас кольччас. Ковмас сэки видзӧдлыны...»
Ӧбедайтігӧн Серафим юаліс:
— Кӧні нӧ Лудік Мишыс?
— Ог тӧд, кӧні сійӧс лешакыс новлӧдлӧ, — синъяссӧ бокӧ вештӧмӧн нурбыльтіс Филипп.
Гӧтырыс сюся видзӧдліс сы вылӧ:
— Коді нӧ тӧдӧ?
— Ме нӧ мыйӧн тӧда? — пузис Филипп. — Ме тай ыстылі сійӧс силос гу кодйыны-а.
— Шыр Коль тай абу жӧ? — шензьыштіс Сергей.
Сёйыштӧм бӧрын Серафим пуксис вӧв вылӧ да мигнитіс Сергейлы.
Силос гу кодъянінын чӧскыда узис дзугсьӧм сьӧд юрсиа том мужичӧй — Шыр Коль. Силос гу эз на тыдав. Шыр Коль весиг кӧрт зырсӧ на абу босьтлӧма. Пальӧдісны. Шыр Коль синва петтӧдзыс очсыштіс, гыжъясьыштіс да гаровтіс чигарка.
— Сёйыштны окота. — Шыр Коль видзӧдліс том йӧз вылӧ сюсь сьӧдгӧрд синъяснас. — Оз на ӧбедайтны?
— Ӧбедайтӧны, — кӧдзыда вочавидзис Серафим. — А тэ зэв на кӧ этша кодйӧмыд-а?
— Этша? Эг на заводитлы да этша на, дерт! Лудік Мишӧс виччыся.
— Сійӧ эз волы?
— Эз...
Шыр Коль муніс ӧбедайтны.
— Лудік Миш сідзкӧ чӧвтӧ, — шуис Серафим.
— Тэ, Сергей, катыд ветлы, а ме кывтыд рӧдтыла...
А Лудік Миш тайӧ кадас зіля чӧвтіс. Зорӧдсӧ вӧчис бадьяс пытшкӧ, а эня-ныла ваялісны матӧджык нӧбъяссӧ.
— Ӧдйӧджык, ӧдйӧджык! — виж пиньяссӧ топӧдӧмӧн тэрмӧдліс сійӧ гӧтырсӧ да нывсӧ. — Ӧдва вӧранныд! Мӧсъяс...
— Шойччы, мамӧ, — турун юр улысь нӧсилка пуяс кыскӧм бӧрын шуис Люся, пуксис да сой кызта руд кӧсаяссӧ вештіс мыш сайсьыс морӧс вылас. Любовь Сергеевна, ичӧт тушаа еджыд гӧгрӧс чужӧма мича нывбаба, ышловзис да пуксис орччӧн.
— Но, ті, дыш кӧбылаяс! — горӧдіс Лудік Миш. — Куим нӧб коли вайны, да лажгӧдчинныд сэтчӧ!
— Тэ, папа, эн горзы, — гӧрдӧдіс Люсялӧн мича чужӧмыс. — Ми асывводзсяньыс на эг пуксьылӧй. Пыр горзан...
— «Горзан, горзан»! — резсис дульнас Миш. — Мӧскыдлы туруныс пӧльыштӧмӧн оз артмы, уджавны колӧ! Йӧвтӧ да нӧктӧ, небось, радейтан?
— Михаил Спиридонович, кӧзяин, мый нӧ тэ лоин? — раминика шыасис Любовь Сергеевна да видзӧдліс гажтӧм, мудз синъяснас верӧсыс вылӧ. — Ассьыд нывтӧ кӧритан?
Люся нӧшта на ёнджыка гӧрдӧдіс, сувтіс да тіралысь гӧлӧснас шуис:
— Тэ пыр горзан да кӧритан, папа...
— Но-но, нӧшта оз тырмы, мед ті кутінныд няргыны, — букӧстіс Миш да босьтіс гез. — Ветламӧй локтӧ эстчӧ... Йӧзыс ӧбедайтігкості миян ставыс эштас.
— Кытчӧ? — юаліс Люся, коді дась нин вӧлі бӧрддзыны.
— Мунам да аддзанныд...
Эня-ныла вӧтчисны. Метр сё кымын мунӧм бӧрын воисны гырысь турун юръяс дорӧ.
— Ті нӧсилканас нуанныд, а ме нӧбъяла, — надзмӧдіс гӧлӧссӧ Миш.
— Тайӧ нӧ миян жӧ? — юаліс Люся.
— Миян, — нурбыльтіс батьыс, босьтіс ыджыд моздор мича кос турун да пуктіс гез вылӧ.
— Михаил Спиридонович, — полігтырйи шыасис Любовь Сергеевна.
— Мый лоис? — сыланьӧ бергӧдчис польдӧм скӧр чужӧма верӧсыс.
Люся видзӧдліс водзын сярвидзысь юръяс вылӧ да гӧгӧрвоис:
— Тайӧ абу миян. Колхозлӧн тайӧ...
— Эн горзы, сӧтана, — пиньяссӧ векыштіс батьыс да вӧр моз видзӧдліс ӧтарӧ-мӧдарӧ.
— Тайӧ гусясьӧм лоӧ! — скӧра видзӧдіс сы вылӧ нылыс. Чужӧмыс ыпъяліс, а мичаник алӧй паръясыс топалісны.
— Кутшӧм гусясьӧм? Мый сӧран? Ми ӧд колхозникъяс жӧ! — сьӧкыда лолаліс Лудік Миш.
— Мунам татысь, а то ме висьтала йӧзыслы, — эз ӧвсьы Люся.
— Та вылӧ ме тэнӧ быдті? — кусьыс петіс Миш. — Ак, тэ, пеж лов! Гез ковмис?!
— Мишӧ! — сылы киас кутчысис Любовь Сергеевна. — Мишӧ, ӧвсьы. Аттӧ жӧ нин да аттӧ.
«Петас кӧ киысь — сёр лоӧ велӧднытӧ!» — думыштіс Лудік Миш, нетшыштчис да кӧин моз уськӧдчис ныв вылас. Люся чеччыштіс бокӧ, повзьӧмӧн да гӧгӧрвотӧг видзӧдліс ярмӧм батьыс вылӧ, сэсся вевттис кияснас кельдӧдӧм чужӧмсӧ, уськӧдчис пышйыны.
— Люся! — бӧрдан гӧлӧсӧн чукӧстіс мамыс. — Люсенька!..
— «Люсенька!» — нерыштіс Миш. — Быдтӧмыд тай Люсенькаӧс! Аслас рӧднӧй батьлысь оз кывзысь. Тьпу!
Лудік Миш нӧбъяліс турун да тшӧктіс:
— Босьт нӧсилка пуяссӧ да мунам: эштӧдны колӧ зорӧдсӧ. А? Мый сэні ружтан кукань вайысь мӧс моз?
Любовь Сергеевна сьӧкыда ышловзис да вӧтчис верӧсыс бӧрся.
А Люся котӧртіс эбӧсыс быртӧдз, сэсся уськӧдчис турун юр вылӧ да бӧрддзис. Бӧрдіс дыр, кытчӧдз эз ло кокньыдджык сьӧлӧм вылас.
«Кутшӧм ме шудтӧм, — думайтіс ныв. — Мукӧдыслӧн бать кыдзи бать, уджалӧны йӧзыскӧд тшӧтш, а менам... Туруныс али мый оз тырмы? Йӧзыс тай оз гусясьны, да трудоденьяс вылӧ босьтӧм туруннас видзӧны мӧсъяссӧ?»
Нывлы забеднӧ, мый батьыс гусясьӧ, вузасьӧ гуся туруннас. Таво тулысын на вузаліс бокӧ быдса вит додь. А мамыс полӧ шыасьны.
Люся чеччис, чышкаліс синвасӧ да мӧдӧдчис бадьяс пӧлӧн берег дорӧ, кӧні верст джын сайын кымын тыдалісны ӧбедайтысь колхозникъяс.
— Люся! — друг кыліс нывлы тӧдса гӧлӧс, кодӧс кылӧм бӧрын заводитіс ёна тіпкыны сьӧлӧмыс, а кельыдлӧз чужӧмӧ пыр жӧ кайис алӧй вир.
«Серафим! — югнитіс Люся юрын долыд мӧвп. — Но меным ӧні яндзим паныдасьны сыкӧд! Пышйыны?»
Зон матыстчис нин сы дінӧ да чеччыштіс вӧв вылысь.
— Люся, — меліа шуис Серафим, — тэ тані? А ме думайті...
«Мый думайтін? — кӧдзаліс морӧс пытшкыс нывлӧн. — Шу, мый думайтін...» Но Люся нинӧм эз юав. Сійӧ юрсӧ лэдзӧмӧн гартіс чунь гӧгӧрыс кӧса помсӧ. Серафим кӧсйис юавны, кӧні Люсялӧн батьыс, но мыйкӧ кутіс сійӧс юалӧмсьыс. Тӧдіс, буракӧ, сьӧлӧмнас кыліс, мый юалас кӧ — Люсялы ковмас гӧрдӧдны. Тадзи сулалісны найӧ здук-мӧд, сэсся Серафим юаліс:
— Тэ ӧні берег дорӧ мунан?
— Да, — муртса кывмӧн вочавидзис ныв, — юрасьны...
— Сідзкӧ, гашкӧ, пуксян вӧв вылас? — гажаа дзирдыштісны сьӧд синъясыс Серафимлӧн.
— Подӧн муна, — нюммуніс Люся да мӧдӧдчис. Но неуна муныштӧм бӧрын бергӧдчыліс: — «Кытчӧ мунӧ Серафимыс»?
Сьӧлӧм тіпкис вӧвлытӧм ёна. Люся кӧсйис, мед Серафим ветлас ді помлань, кӧні чӧвтіс батьыс, и сэки жӧ эз кӧсйы: ӧд сэки нывлы ёна ковмас гӧрдӧдны: ачыс тшӧтш отсасис, дай мамыс жаль.
Серафим эз мун ді помӧ. Мый йылысь кӧ мӧвпалігтыр сійӧ пукаліс вӧв вылын да ньӧжйӧник вӧтчис Люся бӧрся. Ныв надзмӧдіс воськовъяссӧ. Но Серафим друг крута бергӧдіс вӧвсӧ, швичкис сылы ньӧрйӧн да заводитіс кыккокйыв лэбны ді помлань.
«Ме ог Люсякӧд тышкась, а Лудік Мишкӧд! — паськыд сьӧд синкымъяссӧ кӧрис зон. — Люся гӧгӧрвоас менӧ...»
Люся, кор аддзис, кытчӧ скачитӧ Серафим, кутчысис морӧсас да муртса эз горӧд. Дыр сулаліс вӧрзьытӧг, сэсся ыджыда ышловзис да муніс йӧз дорӧ, кӧть и вӧлі яндзимкодь.
Лудік Миш, кор кыліс вӧв кок шы, кватитіс гӧтырсӧ ки пӧлӧдыс да пӧшти нин помалӧм зорӧд дорысь кыскис сійӧс кустъясӧ. Повзьӧм чужӧма Любовь Сергеевна кыв шутӧг вӧтчис сы бӧрся.
— Чӧв ов! — пиньяс пырыс шӧпнитіс верӧс. — Гашкӧ, оз аддзы зорӧдсӧ.
Збыльысь, бадьяс пӧвстысь Серафим эз аддзы зорӧдсӧ. Лудік Миш петіс да заводитіс тэрмасьӧмӧн шыблавны коляс турунсӧ зорӧд вылӧ.
— Тэ куртышт зорӧд дорсӧ, а ме керышта нӧшта бадь-мӧд да сатшка зорӧд бокас: эталадорсяньыс, меным кажитчӧ, зорӧдыс тыдалӧ на...
Тринькнитіс чер, а сэсся кышакылігтырйи пӧри бадь. И со бара нин кутіс кывны вӧв кок шы. Миш ёрччыштіс, корис кинас гӧтырсӧ и гозъя дзебсисны.
Неыджыд кушинӧ, код бокын сулаліс Лудік Мишлӧн зорӧдыс, петіс вӧла. Серафим здук-мӧд сулалыштіс восьсаинын, сэсся веськӧдчис дзебӧм зорӧд дорӧ: вӧв вывсяньыд, буракӧ, мичаджыка тыдалӧ.
— А, кодкӧ бура и дзебӧма гусялӧм турунсӧ! — гораа шуис Серафим. Син улас уси зорӧд дорын сулалысь вила. Зон босьтіс сійӧс, видзӧдліс, сэсся аслыс моз шуис:
— Лэбыныс Лудік Мишлӧн...
Зон ёсь синъяснас видзӧдліс гӧгӧр да горӧдіс:
— Михаил Спиридонович! Эй, петав, зорӧдтӧ примитам! Зэв бур турун. Додь кык, ме чайта, лоӧ...
«Но, нӧрӧвитлы, пеж лов!» — ку пиас эз тӧр Миш.
— Михаил Спиридонович! — гажаа чуксаліс Серафим. — Петав, колӧкӧ, а то лэбынтӧ нуа!
«Нуас ӧд и эм! — повзис Лудік Миш. — Став йӧзыслы петкӧдлас. Менсьым лэбынӧс чӧвтысьяс зэв бура тӧдӧны...»
Лудік Миш бадь улысь эз пет.
Серафим босьтіс лэбынсӧ да мӧдӧдчис. А Мишлӧн юрас чужис нин выль дум. «Ковмас турунсӧ выльлаӧ новлыны, — мӧвпаліс сійӧ и сэн жӧ скӧраліс нылыс вылӧ: — Куимӧн кӧ уджалім, важӧн эськӧ ставыс эштіс». Вӧлі кӧ тані нылыс, — эськӧ прамӧя жӧ ӧні гезйӧн велӧдіс, но Люся эз вӧв.
Миш лёксӧ песіс гӧтырыс вылын.
— Мунам! — зургис Любовь Сергеевналы бокас. — Нинӧм сэсся тані вӧчнысӧ...
«Кутшӧм сьӧкыд овнысӧ тэкӧд, Михаил Спиридонович», — гажтӧма думыштіс гӧтырыс да шога видзӧдліс верӧсыслӧн сыв пасьта мыш вылӧ.
— Куртны-юрасьны ӧні он нин мун, — бергӧдчыліс Миш. — Кутасны юасьны: кӧні вӧлін да мый вӧчин... Сэтӧрла кӧ ветлан — бурджык лоӧ. Ме силос гу дорын кодйысьышта. Да сёрмӧдчышт. Пыжыд тай асланым. Йӧз бӧрвылас вуджам. Турун нӧб кӧть тшӧтш вуджӧдам...
— Люся муніс йӧзыс дорӧ, — шуис Любовь Сергеевна.
Лудік Миш зумыша сулалыштіс, сэсся ӧвтыштіс кинас:
— Тэ мун жӧ, а то бара шум кыпӧдасны...
Гӧтырыс ышловзис да муніс, а Лудік Миш заводитіс корсьны Филиппӧс. Аддзис, кӧсӧякодь видзӧдліс неылын сулалысь зорӧд вылӧ, кӧні тыдалісны чӧвтысьяс да гажтӧма нюммуніс:
— Нинӧм эз артмы, Филипп Петрович...
— Мый эз артмы? — скӧракодь чушнитіс Филипп. Жар вӧснаыс сійӧс вугрӧдліс, сэтчӧ жӧ висис юрыс...
— Серафим аддзис зорӧдсӧ, — нораа висьталіс Лудік Миш.
— Серафимыд аддзас, — вомсӧ вежыньтліс Филипп. — Дошлӧй морт лоӧ коркӧ...
— Ковмас став турунсӧ мӧд местаӧ кыскавны, — ышловзис Миш.
— Ковмас, дерт. Серафимыд талун шум кыпӧдас. Аски примитам да зорӧдыд колхозлӧн лоӧ...
— Ок, сюра лешак! — ёрччыштіс Лудік Миш, — а сэсся ас кежас думыштіс: «Войнас вешта ылӧджык...»
Но Лудік Миш, тыдалӧ, омӧля на тӧдіс Серафимӧс: эз удит ветлыны кӧрт зырла, а Серафим сэні нин вӧлі.
— Пӧсь чолӧм, Михаил Спиридонович! — шыасис сійӧ. — Босьт лэбынтӧ. Весьшӧрӧ ӧнтай эн шыась: татшӧм мича зорӧднад ошйысьны колӧ...
Миш эз тӧд, мый шуны. А Серафим бергӧдчис мӧдарӧ да чукӧстіс:
— Иван Игнатович! Волы татчӧ!
— Кутшӧм зорӧд? — нинӧм гӧгӧрвотӧм улӧ лэччысис Миш. — Тэныд кажитчӧ али мый?
— Он тӧд, кутшӧм зорӧд? — серӧктіс зон. — Тэ, Филипп Петрович, он жӧ тӧд?
Серафим сьӧд синъяснас ёся видзӧдліс бригадир вылӧ, быттьӧ сотыштіс.
— Ме нинӧм на эг кывлы, — шевкнитіс кияснас Филипп. — А мый? Ме ыстылі Мишӧс силос гу кодйыны... Мыйын делӧыс?
Матыстчис Иван Игнатович.
— Силос гу кодйӧм пыдди Михаил Спиридонович чӧвтіс гусялӧм турун, — висьталіс Серафим.
— Мыйла «гусялӧм»? — Лудік Мишлӧн скӧрысла сідз пӧльтчис чужӧмыс, мый вот-вот потӧ. — Ме ачым ытшки!
— Ытшкин? — нюмъёвтіс Серафим. — Сійӧ кушинсьыс уна вылӧ шедӧ кык нӧб, а тэнад зорӧдын кык додь!
— Ветлам да примитам колхозлы, — шуис Иван Игнатович.
— Сідз, дерт, — довкнитіс юрнас Филипп да думыштіс: «Нинӧм он вӧч, осечка лои тэнад, Лудік Миш!»
— Мунам тшӧтш, — корис Лудік Мишӧс Иван Игнатович.
— Мый сэні меным вӧчны? — бергӧдчис мӧдарӧ Лудік Миш.
— Сідз, дерт. Зорӧдыс чӧвтсьӧма, и вӧчнысӧ сэні, збыльысь, нинӧм, — шуис Серафим.
Лудік Миш сьӧлыштіс да муніс зорӧдъяс дорӧ.
Час-мӧд сійӧ чӧвтіс йӧзыскӧд тшӧтш. Зумыш, скӧр, некод вылӧ эз видзӧд ни эз сёрнит. Сійӧ думайтіс, кыдзи эськӧ бӧр босьтны «ассьыс» турунсӧ.
Иван Игнатович, Серафим да нӧшта морт-мӧд мунісны выль местаӧ. Зорӧд помавны колисны кык морт: Сергей да Миш. Бригадир ыстіс йӧзсӧ ю береглань, кӧні нывбабаяс юрасисны нин.
Татысь, бадьяс дорысь, став туруныс лои зорӧдъясын. Зорӧд вылӧ медбӧръя турун клӧк кыпӧдӧм бӧрын Лудік Миш да Сергей босьталісны лэбынъяс, черъяс.
— Кутшӧм лешак нуис менсьым кепысьясӧс? — шӧйӧвошис Миш. Ме татчӧ кольлі...
Видзӧдлісны — некӧн абу.
— Чӧвтісны, буракӧ, зорӧдас, — шуис бригадир.
— Тӧвнас сюрӧ, — нюммуніс Сергей.
— Дзик выль кепысь вӧлі! — зумыштчис Лудік Миш.
— Дӧмасъясыс кӧ выльӧсь вӧлісны-а, — эльтіс Сергей.
Лудік Миш скӧра видзӧдліс сы вылӧ:
— Ме абу сэтшӧм озыр, медым быд зорӧдӧ кепысь гоз чӧвтны...
— Тэ нӧ мый, корсьны кӧсъян? — шемӧс босьтіс Сергейӧс.
— Ковмас разьлыны зорӧдсӧ, — чатӧртіс юрсӧ Лудік Миш.
— Тэ йӧймин кӧ-а? — дивуйтчӧмӧн юаліс Филипп.
— Разьла, — зорӧд вылӧ видзӧдігмоз чорыда шуис Лудік Миш.
Сергей сьӧлыштіс да сералігтырйи муніс мӧд местаӧ.
А Лудік Миш гусьӧник вилькъяліс. «Ті менсьым зорӧдӧс босьтінныд, а ме тіянсьыныд кондышта жӧ! — думайтіс сійӧ. — Турунтӧг кӧсъянныд кольны? Оз артмы!» И заводитіс зіля бергавны зорӧд гӧгӧр. Зорӧд абу ыджыд — додь куима. Дыр-ӧ сійӧс разьны верстьӧ мужичӧйлы?
Рытланьыс Сергей шуис Серафимлы:
— Ме ветла, видзӧдла, мый вӧчӧ Лудік Мишыс.
— Ветлы, — сӧгласитчис Серафим.
Сергей пуксис вӧв вылӧ да рӧдтіс бадьяслань. Воис зорӧд дорӧ. Чӧвтӧма. Ачыс абу. Майӧг йылын ӧшалӧны дӧмасӧсь кепысьяс — сюрӧма. Сергей видзӧдліс гӧгӧр, бергалыштіс бадьяс дорті, но Лудік Миш некӧн эз тыдав. «Купайтчӧ, кӧнкӧ, пӧсялӧм бӧрад», — думыштіс зон да заводитіс вуджны бадьяс вомӧн. Векньыдик, муртса тӧдчысь туйлӧн ӧтар-мӧдарбокса бадьяс вылӧ кӧнсюрӧ ӧшъялӧмаӧсь турун сіяс. Ёсь синъяса Сергей аддзис тайӧс да шензьыштіс: «Коді нӧ таті турун нӧбнас кыскасьӧма? Лудік Миш?»
Сергей сьӧкыдпырысь писькӧдчис водзӧ, сэсся лэччис вӧв вылысь да, бадьясӧ кольышталӧм турун сіяс вылӧ видзӧдігтыр, кань моз, ньӧжйӧник муніс водзлань. И со воис сук бадьяскостса кушинӧ. Тані куйлісны гырысь нӧбъяс. Бадьяс костті лӧзвидзис куръя. Сергей кыліс сялькӧдчӧм шы. Лудік Миш збыльысь купайтчис.
«Сідз, сідз, — думыштіс Сергей, — гусясин, а сэсся ыркӧдчан? Ладнӧ...»
Зон гусьӧник матыстчыліс берег дорӧ, босьтіс Мишлысь гачсӧ да косіс бӧр. Петіс бадьяс пытшкысь, пуксис вӧв вылӧ да рӧдтіс ёртъяс дінас.
Лудік Миш петіс ваысь, синъяснас кутіс корсьны гачсӧ. Сійӧ некӧн эз тыдав.
— Но, сюра лешакӧ, понъяс ӧд эз жӧ гачавны?! — шензис Миш, дыр шӧйӧвошӧмӧн бергаліс, сэсся шыасис: — Эй, коді гачсӧ босьтінныд? Тырмас ворсны!
Некод эз шыась. Миш эз тӧд, мый и вӧчны. Сэтчӧ жӧ ёна дӧзмӧдчисны номъяс да гебъяс. Ковмис мунны зорӧд дорӧ да дзебсьыны турунас.
Буретш сэки жӧ Сергей локтіс ёртъясыс дорӧ да висьталіс:
— Лудік Миш зорӧдсӧ чӧвтӧма, кепысьыс сюрӧма. Мекӧд ыстіс ассьыс гачсӧ: меным пӧ жар...
Чӧвтысьяс эскытӧг видзӧдлісны Сергей вылӧ:
— Ачыс нӧ кӧні?
— Тшак вотӧ...
Сергей ӧшӧдіс Лудік Мишлысь гачсӧ майӧг йылӧ да заводитіс чӧвтны. Серафимлы да батьыслы, дерт, висьталіс, мыйын делӧыс.
— Тэ, Сергей, век на челядь кодь, — дивитыштіс писӧ Иван Игнатович, кӧть ачыс дась вӧлі сьӧлӧмсяньыс серавны. — Аддзин кӧ гусясьӧм, колӧ ставыслы висьтавны, медводз, дерт, бригадирлы. А тэ, Филипп Петрович, ачыд юӧрт колхозникъяслы, дядьӧ вылӧ эн надейтчы. Оз ло лёк, вӧчан кӧ неыджыд собрание.
— Зорӧдсӧ бӧр чӧвтӧма? — юаліс Филипп.
— Чӧвтӧма, но абу ставсӧ ӧти местаӧ.
Филипп эз гӧгӧрво:
— Кыдзи абу ӧти местаӧ?
— Нӧб дас кымын дзебӧма...
— Вот кыдзи?! Збыльысь, талун гортӧ вуджӧм водзвылын ковмас висьтавны йӧзыслы. Тадзи абу мича...
Филипп босьтіс Лудік Мишлысь гачсӧ да муніс корсьны гачлысь кӧзяинсӧ. Мишӧс аддзис зорӧд бокысь. Шыбитіс гачсӧ:
— Пасьтась, лешак! Турунсӧ бӧр ваяв. Зорӧдысь он жӧ кӧ гусяв-а!
Лудік Миш гачасис да, кыв ни джын шутӧг, заводитіс бӧр кыскавны турун нӧбъяс. Воис Серафим. Ӧтлаын чӧвтісны гусявлӧм турунсӧ.
— Мыйла тэ, Филипп Петрович, колян уджавны Михаил Спиридоновичӧс ӧтнассӧ? Аддзан, кыдзи сійӧ «уджалӧ»? — юаліс Серафим.
Филипп Петрович нинӧм эз шу, буракӧ, дум вылас уси Лудік Мишӧн мыччӧм румкаыс. Миш пиньяссӧ топӧдіс, букыштчис да нинӧм жӧ эз шу.
— Мунам ӧні силос гу кодйыны, — корис Филипп Петрович.
Миш ньӧжйӧник довгис.
Шыр Коль вӧлі заводитӧма кодйыны, но уджалӧма дыша. Аддзис Лудік Мишлысь зумыш, скӧр чужӧмсӧ, юаліс:
— Мый сэтшӧм гажтӧм? Али кодйысьнысӧ абу окота?
Лудік Миш ышловзис:
— Заводитлі турунтор пуктыны, да ставсӧ мырддисны... Эк!
— Да? — довкйӧдлыштіс юрнас Шыр Коль. Серафим, кӧнкӧ, крукаліс?
— Серафим? Медсясӧ сійӧ...
— Нырас сетны колі.
— Нырас! Ме эськӧ, позис кӧ, ӧнтай юрбӧрас зорйӧн косьышті, мед кыкнан синмыс чеччыштіс син гурансьыс! — пиньяс пырыс сӧдзӧдіс Миш.
Кык друг дышпырысь заводитісны кодйыны гу.
Рытнас Филипп Петрович чукӧртіс колхозникъясӧс. Синъяссӧ бокӧ вештӧмӧн висьталіс:
— Лудік Миш вот аслыс турун пуктӧ, видз вылысь нӧбъясӧн новлӧ...
— А тэ сылы отсасян, — сюйыштіс Сергей.
— Но, лешакӧ, тэ нӧ мый сӧран? — шуис Филипп Петрович, а ачыс повзьыштіс.
— Талун на ӧтлаын юинныд! — лӧня шуис Серафим.
— Яндысьтӧм синъяс! — зывӧкпырысь видзӧдліс верӧсыс вылӧ Дарья.
Уджалысьяс шызисны.
Люся да Любовь Сергеевна сулалісны бокын. Яндзимысла Люсялӧн синъясыс ойдісны синваӧн. «Мунам берег дорӧ, пыжъясланьыс», — шӧпнитіс мамыс.
— Михаил Спиридонович, висьтав йӧзыслы, дыр-ӧ кутан гусявлыны артельнӧй турунсӧ? — юаліс Иван Игнатович.
Миш дзебис гырд синъяссӧ, тыдалӧ, сьӧкыд вӧлі видзӧдны йӧз вылас.
Дыркодь чӧв олісны. Нывбабаяс броткигтырйи кутісны пуксявны пыжъясӧ.
— Мыйла нӧ нинӧм он висьтав, Михаил Спиридонович? — шыасис Сергей. — Висьтав кӧть сы йылысь, кыдзи тэ турун пиын гачтӧгыд пукалін...
Йӧз серӧктісны. Лудік Миш ярмӧмӧн видзӧдліс вилькъялысь вылӧ да тэрыба веськӧдчис пыжлань. Сійӧ вӧлі быдӧн вылӧ лӧг, но торйӧн ёна Серафим вылӧ да Сергей вылӧ.
Берег дорын здук кежлӧ кыптыліс шум: кодсюрӧ нывбабаяс пиысь вуджӧдӧны турун нӧбъяс. Серафим ёртъясыскӧд эськӧ и заводитліс жӧ косӧдны нӧбъяссӧ, но уна пыжъяссьыд этша косӧдан, кодсюрӧ вевъялӧмаӧсь нин вуджны.
«Лежнӧг»
Видз вылысь воӧм бӧрын Серафим ужнайтіс. Сёйигмоз висьтавліс паччӧрын куйлысь пӧрысь дедыслы, кыдзи-мый коли луныс, кутшӧм делӧяс вӧліны.
— Сёясны коркӧ Лудік Мишъясыд, быдлаӧ сюйсян да, — ышловзис Серафимлӧн мамыс. — Быдлаӧдз тэныд делӧ... «Лежнӧг» кутшӧмӧскӧ лӧсьӧдӧма... Виасны коркӧ. Шыр Кольыд ӧд Лудік Мишсьыд на лёк. Мыйла тэныд быдлаӧдз делӧ? Мыйла мукӧдыс моз рамджыка он ов?
— Нинӧм абусӧ эн сёрнит, — шыасис паччӧрсянь Серафимлӧн дедыс, пӧрысь коммунист, коді гражданскӧй война дырйи сюрлӧма Мудьюг вылӧ и век жӧ кольӧма ловйӧн, а сэсся яра тышкасьӧма Изьваын Сӧветскӧй власть ёнмӧдӧм вӧсна. — Бикиневъяс нэмсӧ мунісны воддза радъясын. Батьыс со Берлинӧдз воис...
Серафимлӧн горш діныс гӧрддзасьліс: батьыс уси 1945-ӧд вося май 8-ӧд лунӧ.
Радлыны колӧ: пиыд мортӧн быдмис, — сьӧкыда лолалігтырйи помаліс дед.
— Да ме нинӧм ог шу, — правдайтчис нывбаба. — Мед вӧчӧ, кыдзи йӧзыслы колӧ...
Серафим пасьтасис да петіс, муніс лэдзны «Лежнӧглысь» выль номер.
Клуб дорӧ мунігӧн зон сувтовкерис Лудік Миш керка дорын.
— Люся гортын? — юаліс сійӧ кильчӧ дорын ноксьысь баблысь.
— Гортын...
Ӧшиньӧд мыччис юрсӧ Лудік Миш.
— Ме тэ дорӧ ог волывлы, и тэныд ме ордын дзик жӧ нинӧм вӧчнысӧ, — лӧгпырысь шуис сійӧ.
— Михаил Спиридонович, ме эг тэ дорӧ лок, — нюммуніс Серафим.
— Кӧть мед код дорӧ! — горӧдіс Миш. — Тэтӧг зэв бура овсьӧ!
Но Люся петіс нин кильчӧ вылӧ да юалана видзӧдліс Серафим вылӧ.
— Люся, вай корав редколлегияса мукӧд членъяссӧ да волы клубӧ, — шуис Серафим, — колӧ лэдзны «Лежнӧглысь» выль номер.
— Пукав гортын! — лёкысь горӧдіс Люсялы батьыс. — «Лежнӧг»! Асьтӧ мед ог лежнӧгав!
Люсялы синва петмӧныс яндзим лои батьыс вӧсна, но, кыв ни джын шутӧг, котӧрӧн лэччис кильчӧ вылысь да тэрыба муніс сиктлань. Лудік Миш муртса эз пӧд, лёкысла мыкталіс, да сідз нинӧм эз и вермы шуны.
Чукӧрмисны редколлегияса членъяс. Вайисны стеклӧа рама, бумага.
Кор Люся петіс краскаясла да вала, Серафим шуис:
— Колӧ эськӧ лэдзны газетӧ Лудік Мишӧс турун гусявлӧмысь, но рисуйтас-ӧ Люся?
Кодсюрӧ довкйӧдлыштісны юрнаныс:
— Ог тӧд...
— Нда-а, сьӧкыд делӧ...
— Мый нӧ кӧть и бать? Мед оз гусясь! — скӧралісны мукӧдъяс.
— Нинӧм уна сёрнитны. Шуим кӧ лэдзны — колӧ лэдзны, бать сэн кӧть мам, дай кӧть весиг и асьным. Сатирическӧй газет! Крӧшитны кӧ, весьтас колӧ крӧшитны! — пӧся сёрнитіс Сергей.
Серафим кывзіс-кывзіс да клопвартіс кипыдӧснас пызан пӧвйӧ:
— Лэдзам! Тайӧ номерӧ сэсся нинӧм оз ков. Верманныд петны залас да йӧктыны. Делӧыс Люся сайын. Локтас да ме сёрнита аскӧдыс. Нылыс тӧлка, гӧгӧрвоас...
Том йӧз петісны. Недыр мысти пырис Люся, аддзис, мый Серафим ӧтнас, да лэдзис синвидзӧдлассӧ увлань: яндысис, буракӧ. Ныв пуксис. Серафим видзӧдіс-видзӧдіс сы вылӧ да кокньыдика ышловзис: «Да, тэн кӧ ковмас гӧрдӧдны аслад батьыд вӧсна, меным тожӧ лоӧ сьӧкыд, но мый нӧ вӧчны? Ме некыдз ог вермы чӧв овны. Оз позь чӧв овны. Гӧгӧрво менӧ...»
— Люся, — ньӧжйӧник шыасис Серафим. Люся лэптіс юрсӧ да лап-лапкерис синъяснас. Найӧ сэтшӧм меліа да шоныда дзирдалісны, мый Серафим муртса эз нюжӧд нывлы кияссӧ да шу: «Кутшӧм тэ дона меным, Люсенька!», но кутчысис, сьӧкыдпырысь веськӧдіс синвидзӧдлассӧ ныв синъясӧ:
— Тэ эн ӧбидитчы, Люся. Но колӧ, гӧгӧрвоан, колӧ рисуйтны «Лежнӧгӧ» батьтӧ...
Люсялӧн чужӧмбаныс ыпнитіс. Ныв лэдзис синъяссӧ, кажитчӧ шуис:
«Гӧгӧрвоа, Серафим, гӧгӧрвоа, но ӧд сійӧ менам бать! Кӧть кутшӧм эз вӧв лёк, а век жӧ бать...» Сэсся муртса кывмӧн шуис:
— Ог вермы, Серафим... Ог вермы... Меным яндзим...
Люсялӧн синъясыс вазисны. Серафим синъяссӧ лапйӧдлӧмӧн видзӧдіс ныв вылӧ да шӧйӧвошискодь. Нывлӧн тіралісны паръясыс. Серафим сувтіс:
— Люся...
Но Люся бергӧдчис да юрсӧ лэдзӧмӧн петіс комнатаысь.
«Вот и лэдзим «Лежнӧгтӧ», — ышловзис Серафим да, юрас кутчысьӧмӧн, дыр пукаліс пызан сайын. Сэсся петаліс да корис редколлегияса членъясӧс.
— Люся эз рисуйт, — висьталіс Серафим.
— Батьсӧ, сідзкӧ, оз кӧсйы? Тожӧ, комсомолка! Корлыны собрание вылӧ да буриника быгзьӧдны сьылісӧ! — пузис Сергей.
— Но, но, тэ ньӧжйӧджык, — шуис Серафим. — Собраниеыд оз отсав, сӧмын дзикӧдз ӧбидитам нывкасӧ...
Сергей чӧвусис.
— Гӧгӧрвоны колӧ, — зумыштчис Серафим. — Думышт бурджыка, асьтӧ пуктыв Люся местаӧ да вӧлись собрание вылад кор...
— Но газетсӧ ӧд колӧ лэдзны! — шызис ӧти комсомолец.
— Нӧрӧвитлӧй, ме ӧти здук! — Сергей воши ӧдзӧс сайӧ. Здук-мӧд мысти пырис бӧр, моздор тырыс пыртіс «Крокодил» да «Чушканзі» журналъяс.
— Вот-вот, — радлыштіс Серафим. — Татысь ми аддзам мыйкӧ лӧсяланаӧс да сы вылысь и рисуйтам...
Мӧд лунас амбар стен бокӧ чукӧрмисны видз вылӧ мунысь йӧз.
— Вот тайӧ да! — кылісны гӧлӧсъяс.
— Ай да, том йӧз!
— Збыльысь «Лежнӧг»!
— Мый нӧ, мый?
— Лудік Мишӧс лежнӧгалӧмаӧсь!
Миш буретш вӧлі сулалӧ берег дорын да мӧвпалӧ, вуджны али не вуджны талун видз вылӧ. Ассьыс нимсӧ кылӧм бӧрын Лудік Миш дрӧгмуні. Сэсся матыстчис амбар стен дорӧ, сувтӧдіс синъяссӧ «Лежнӧг» вылӧ. Ыркмуні сьӧлӧмыс. Татчӧ вӧлі рисуйтӧмаӧсь сійӧс асьсӧ. Весьт кузьта гӧрд ныра, Лудік Миш пызйӧ пывсян ыджда турун нӧбйӧн джынвыйӧ чӧвтӧм турун зорӧд дорӧ да шуалӧ: «ӧдйӧджык, ӧдйӧджык! Нӧшта кӧ вевъяла гусявны вит-квайт нӧб — зорӧдӧй тырӧ!»
Лудік Миш топӧдіс пиньяссӧ. Пӧльтчис вирӧн чужӧмыс, сьыліыс, пельясыс, и со нин доналӧм чужӧм вылас кутісны югъявны ньылӧм войтъяс.
— Ошкӧмаӧсь? — юаліс нинӧмысь повтӧм Дарья. Верӧссьыс полысь Любовь Сергеевна вешйис бокӧ, а то код тӧдас, звермӧм верӧсыд вермас сетыштны чужӧмад.
— Правильнӧ лэдзӧмаӧсь, — чорыда шуис Иван Игнатович.
Лудік Миш сулаліс-сулаліс, сэсся кыв ни джын шутӧг пуктіс ыджыд кияссӧ рама вылӧ, нетшыштіс рамасӧ стенсьыс, ӧвтыштчис да швачкис амбар пельӧсӧ. Зильмуні-резсис стеклӧ торпыриг, ӧтарӧ-мӧдарӧ лэбисны рама торъяс.
— Т-тэ... Тэ нӧ мый вӧчан?! — ёсь гӧлӧснас чилӧстіс Иван Игнатович да кутчысис Лудік Мишлы сояс, но Лудік Миш йӧткис сійӧс, пиньяссӧ векыштӧмӧн торпыригӧдз косявліс «Лежнӧг» листъяс да, некод вылӧ видзӧдтӧг, лэччис пыжъяс дорӧ. Йӧз шызисны:
— Вот тайӧ да!
— Правильнӧ жӧ лэдзӧмаӧсь! Мыйла лысьтӧ косявлыны?
— А кӧть и эз вӧв правильнӧ — оз позь вӧрзьӧдны: коді лэдзис, сійӧ и ӧтвечайтӧ...
— Оз ӧд и пов!
— Нинӧм, повзяс!
Матыстчис Серафим да нюмъёвтіс:
— «Лежнӧг» лыддянныд? Но и мый, кажитчис эз?
— Лыддим тай эськӧ да...
— Сӧмын абу нин-а...
Серафим чуймис:
— Кыдзи абу?
Видзӧдліс стенӧ да юаліс:
— Коді босьтіс?
Серафимлӧн сьӧд синъясыс ёсьмисны, а паськыд синкымъясыс лэччисны увлань.
— Лудік Мишлысь юав, — зумыша шуис Иван Игнатович.
Серафим кыліс, кыдзи став тушаыс зэлаліс. Чужӧмыс кельдӧдіс. Тіралысь кияснас Серафим чукӧртіс косявлӧм «Лежнӧглысь» лестукъяссӧ, сюйис сумкаас да лэччис пыжъяс дорӧ.
Пыжын пукалісны Лудік Миш да Шыр Коль, мый йылысь кӧ варовитісны.
— Тэ мыйла стенгазетсӧ косявлін? — вежсьӧм гӧлӧсӧн юаліс Серафим.
— Стенгазетсӧ? Нинӧм, выльӧс ӧшӧданныд, — Серафим вылӧ видзӧдлытӧг шуис Лудік Миш.
— Ковмас вӧчны выль рама, стеклӧавны да ӧшӧдны амбар стенӧ, — кӧдзыда шуис Серафим.
— Ӧшӧдны? Ладнӧ, секретарь, — вежыньтліс вомсӧ Лудік Миш да думыштіс: «Нинӧм ӧд он тӧд... Коркӧ паныд веськалан векни туй вылын, сэки и сёрнитыштам. Сэки ме тэныд висьтала кыв-мӧд!»
— Но, вай вуджамӧй, вуджамӧй сэсся! — горӧдіс Филипп. — Бара нин дасӧд час!
— Луныс ӧд кузь на, — очсыштіс Шыр Коль.
— Михаил Спиридонович, тэ ӧд, буракӧ, вуджан жӧ? — юаліс Филипп. — Пуксьы лок...
— Менам аслам пыж эм, — пинь пырыс висьталіс Лудік Миш.
— А-а... Но, но... А тэ коркӧ пуксян пыжас али он? — нем виччысьтӧг эрыштчис гӧтырыс вылӧ Филипп. Сылӧн висис юрыс, а пӧкмелитчынысӧ эз сюр, и та вӧсна бригадир вӧлі скӧр.
— Филипп Петрович, бара нин горзан? — нюммуніс Дарья да пуксис пыжӧ.
— Эн, кӧнкӧ, окав да сійӧн, — серӧктісны пыжын.
— Окалі талун, — небыдик гӧлӧснас сьылыштіс Дарья да нюмъёвтӧмӧн видзӧдліс верӧсыс вылӧ.
— Тьпу, бабаяс! — сьӧлыштіс Филипп да босьтіс пелыс. Дум вылас уси, кыдзи тӧрыт, видз вылысь вуджӧм бӧрын «гогналіс» сійӧс гӧтырыс Лудік Мишкӧд румка дорын исасьӧмысь.
Лудік Миш вӧчӧ рама
Лун лои кымӧра, гажтӧм. А лунвывсянь бара на уйисны пемыдлӧз кымӧръяс.
«Зэрмас, — думыштіс Иван Игнатович. — Чӧвтӧм талун оз артмы».
Колхозса председатель муніс карӧ уна сикас делӧясӧн, и сы ветлігкості Иван Игнатович председателяліс.
Иван Игнатович восьтіс правление ӧшинь, видзӧдліс, ставныс-ӧ вуджӧмаӧсь. Берег дорын ӧтнас пукаліс Лудік Миш да видзӧдіс мӧдлапӧлӧ.
«Абу вуджӧма, ӧбидитчис, тыдалӧ, — думыштіс Иван Игнатович. — А ачыс мыжа. Колӧ сёрнитыштны...»
— Михаил Спиридонович, пырав! — горӧдіс Иван Игнатович. — Эй, Михаил Спиридонович!
Югыдвож сикт сулаліс Изьва кыркӧтш вылын, и Лудік Миш бура кыліс горӧдӧмсӧ, но бергӧдчис дышпырысь.
«Мый сылы колӧ?» — скӧра думыштіс, но век жӧ мӧдӧдчис сиктӧ. Пырис правлениеӧ.
— Мыйла эн вудж видз вылӧ? — юаліс Иван Игнатович.
— Видз вылас? Нинӧм сэні вӧчнысӧ, — нурбыльтіс Миш.
— Туруныс ӧд эз на пуктыссьы, — зілис видзӧдны Лудік Мишлы синмас Иван Игнатович, а сійӧ видзӧдіс бокӧ.
— А гусясьнытӧ верстьӧ мужикыдлы абу мича, — водзӧ сёрнитіс Иван Игнатович. — Эновт гусясьӧмтӧ. Уджав бура, дядьӧ вылӧ эн надейтчы, и туруныд мӧстӧ видзны трудоденьяс вылад воас... Да мый тэныд висьтавлынысӧ. Ачыд зэв бура ставсӧ гӧгӧрвоан. Аскисянь бӧр пет удж вылӧ. А рамасӧ, кодӧс талун жугӧдін, ӧні жӧ вӧч! — ки пыдӧснас тапнитіс пызанӧ Иван Игнатович. — Вӧч и ӧшӧд! Эн думайт, мый тэныд ставсӧ позьӧ: и гусясьны, и стенгазетъяс косявлыны. Йӧзсьыс яндысьны колӧ, нывсьыд тшӧтш и.
Миш нинӧм эз шу, сувтіс да веськӧдчис ӧдзӧслань.
Ывлаын зэрис. «Лешак сыкӧд, мед зэрӧ. Миш чатӧртліс юрсӧ енэжлань. — Бур, мый эг вудж видз вылӧ... Турун пуктӧм таво эз артмы... Но да ладнӧ, мыйкӧ думыштам. Шыр Коль важӧн нин корӧ чери кыйны: ӧтнамлы пӧ некыдз тывнас вӧдитчынысӧ».
Лудік Миш пырис гортас. Керкаын некод эз вӧв: гӧтырыс да нылыс видз вылынӧсь. «Курӧг поз кӧть вӧча, важыс зэв ичӧт», — думыштіс Миш да петіс посводзӧ. Стружитчигӧн дум вылас уси Иван Игнатовичлӧн рама йылысь сёрниыс. Лудік Миш думыштіс: «Комсомолецъясыд ӧд воласны жӧ. Наысь он мын, торйӧн нин эсійӧ Серафимсьыс...»
Но век жӧ заводитіс вӧчны курӧг поз.
Видзвывса уджалысьяс час-мӧд нин пукалісны зорӧд бокын. Ставныс кӧтасьӧмаӧсь. А зэр шлявгис и шлявгис.
Филипплӧн воши терпеньеыс:
— Вуджамӧй сиктӧ, нинӧм тай, тыдалӧ, талун оз артмы...
Вуджисны. Люся тэрыба котӧртіс гортас.
— Вӧч рамасӧ, — батьыс дінӧ пӧся шыасис Люся. — Ставыс сёрнитӧны! Яндзим.
Мукӧдъяс кайисны варовитігтыр.
— А Лудік Мишыд эз и вуджав, — шуис Серафим. — Вай, ёртъяс, пыраламӧй сы ордӧ...
— Чай юны? — серӧктіс дзикӧдз кӧтасьӧм Сергей.
Том йӧз, морт дас кымын, мӧдӧдчисны Лудік Миш керкалань. Мунігмозыс Сергей босьталіс амбар бокысь жугласьӧм рама торъяс.
Миш буретш вӧлі вӧчӧ курӧгъяслы выль оланін. Аддзис том йӧзӧс, кодъяс тэрыба матыстчисны сы керка дорӧ, да повзискодь: «Серафим тшӧтш сэні... Оз прӧста локны!»
— Чолӧм, Михаил Спиридонович! — гажаа шыасис Сергей. — Тэ тай видз вылас эн вуджав? Чайтам, гашкӧ, мися, висьӧдчан, да локтім видлыны...
Миш эскытӧг видзӧдліс Сергей вылӧ да нурбыльтіс:
— Зэрласьӧ тай да, эг и вудж...
— А тайӧ нӧ мый, рамасӧ «Лежнӧглы» вӧчан? — муртса на стружитӧм пуяс вылӧ индіс Серафим.
— Кутшӧм рама? — синъяссӧ сувтӧдіс Миш.
— Тӧдан ӧд, кутшӧм рама, Михаил Спиридонович, — лӧня шуис Серафим. — Вай ог кутӧ ёна шумитны, а вӧч. Тэ морт мастерӧвӧй, ӧдйӧ вӧчыштан...
— А ме сэк кості клейсӧ пуа! — гажаа ниртыштіс ки пыдӧсъяссӧ Сергей. — Кӧні клей банкаыд?
— Джаджъяс, — нинӧм думайттӧг шусис Лудік Мишлӧн.
— Вот и бур! — Сергей судзӧдіс банкасӧ, кисьтыштіс сэтчӧ ва. — А тэ, Серафим, висьтав мортыслы, кузь-ӧ да паськыд-ӧ колӧ рамкаыс. — Серафим гусьӧник нюмъёвтіс: «Но и сюсь жӧ миян Сергей!», копыртчис, босьтіс ӧти пу тор да зэв збыльысь пасйис:
— Та кузя кӧ и, бур лоӧ...
Мишлӧн морӧс пытшкӧсас варкйис-пуис. Кыпӧдліс ёсь синвидзӧдлассӧ том йӧз вылӧ: оз-ӧ валькъявны? Оз, некод оз серав. Мӧдарӧ, ставныс видзӧдӧны стрӧга, кӧдзыда. Лудік Миш босьтіс Серафимлысь пу торсӧ да пычиктіс:
— Но, мый нӧ, асланыд ӧд оз жӧ артмы-а...
— Кысь нин миянлы! — сӧгласитчис Сергей. — Вай петкӧдлы, кыдзи колӧ вӧчнысӧ да мӧдысь, жугӧдасны кӧ, кӧть асьным кужам вӧчны...
Том йӧз кытшын бергаліс Лудік Миш да вӧчис рама. Асьсӧ такӧдіс сійӧн: «Мырдӧн тшӧктыны меным некод оз вермы... Ачым окотиті рамасӧ вӧчны...»
Час мысти выль рама вӧлі гӧтов. Миш ышнясис:
— Но мый? Кужӧ оз уджавны Лудік Миш?
— Бура вӧчӧма, — сьӧлӧмсяньыс шуис Серафим, — топыда...
— Кыдзи аслым! — тӧдчӧдіс Лудік Миш, а Серафим думыштіс: «Да, аслыд тэ ставсӧ бура вӧчан».
— Мавтыштан жӧ ӧд? — юаліс Сергей. — Гӧрд краска эм?
— Мавтыштам...
Мавтісны ӧдйӧ косьмысь лакӧн да ӧшӧдісны косьтыны. Коли вӧчны медся сьӧкыдторсӧ: клеитны ӧтлаӧ рисунокъяслысь лестукъяссӧ. Серафим веськодьпырысь юаліс:
— Михаил Спиридонович, а тіян сюрӧ сӧстӧм бумага лист?
— Сюрӧ, — кӧсӧйтчыліс Лудік Миш, — а мыйла?
— Эм кӧ — петкӧдышт...
Миш петкӧдіс плакат.
— Татчӧ колӧ клеитлыны этайӧ бумага торъяссӧ. — Серафим кыскис сумкасьыс косявлӧм «Лежнӧг». Лудік Мишлӧн синъясыс лёкысь югнитісны, чужӧмыс зумышмис, а пельясыс гӧрдӧдісны.
— Ог! — орӧдіс сійӧ. — Клеитлӧй асьныд, ме абу челядь!
— Ладнӧ, — шуис Серафим, — стеклӧав рамасӧ, а клеитны ми асьным вермам.
Ӧш моз букыштчӧм Лудік Миш мурчнитіс пиньяснас да пырис керкаӧ алмазла.
Том йӧз зіля заводитісны йитлыны «Лежнӧгсӧ». Петіс Миш, кӧсӧя видзӧдліс ноксьысь йӧз вылӧ да заводитіс дзижгыны-вундавны стеклӧ.
Том йӧз бурӧн эз лэччысьны. Кор эштіс став уджыс, Мишлы тшӧктісны ещӧ ӧшӧдны стенгазетсӧ важ местаас. Нинӧм он вӧч. Ковмис босьтны рамасӧ, рисунокъяссӧ бокнас тупкӧмӧн мӧдӧдчис восьлавны зонъяс бӧрся да ӧшӧдны амбар бокӧ. Сьӧлӧмыс личалыштіс, мый мыніс «татшӧм кокньыда».
Чери гусявлысьяс
Лудік Миш дыр жӧвъяліс ывлаын, керкаӧ эз пырсьы, та вӧсна лэччис берег дорӧ. Зумыш да скӧр, сійӧ дыр пукаліс кыр бокын да мӧвпаліс. Ок, и чорыда жӧ сійӧ ӧбидитчис Серафим вылӧ!
«Но, энлы, зырымбедь! — улыс парсӧ йирис Миш. — «Лежнӧгнад» менӧ он ёна повзьӧд! Быд во пуктылі турун дай таво пукта! Туруныд менам лолас на, весиг вузавны вичмас! Топӧдсьӧма!» — тадзи думайтіс Миш, и век жӧ ачыс аслыс омӧля эскис. Веськыда кӧ шуны, оз везит сылы таво: кыті оз заводит кыссьыны, сэті и потшӧны. Збыльысь, буракӧ, топӧдны кутісны. Со и талун пач сайӧ пакӧститӧм каньӧс моз исӧдісны лякӧсьтӧминӧ.
— Н-нда! — сьӧкыда ышловзис Миш и буретш сэки казяліс берегӧ сибӧдчысь пыжаӧс. Пыжысь петіс пелькиник тушаа косіник том мужичӧй. Миш тӧдіс Шыр Кольӧс, коді шутьлялігтырйи шыблаліс берегӧ пелысъяс, чер, вугыр шатинъяс. Сэсся ыджыд ведраӧ лӧдіс гырысь сынъяс, кыскыштіс пыжсӧ, томналіс якӧр кольчаӧ.
Коль локтіс да пуксис Миш дорӧ.
— Куритны окота, вай папиростӧ...
Миш мыччис.
— Черитор кыйышті, — ведраӧ юрнас индіс Коль. — Гашкӧ, ньӧбан?
— Ачыд сёй, — нурбыльтіс Миш.
— А тэныд абу окота сёйнысӧ али мый? Видзӧдлы, кутшӧм чериыс: кыпӧдан юрӧдыс да бӧжсьыс вый виялӧ... Сёйигад кывтӧ ньылыштан!
«Кужӧ кыйнысӧ, скӧтинаыд, — думыштіс Миш. — Быдлаысь сылы шедӧ. Ныриса, дявӧлыд! Ме чайта, скӧтнӧй двордорса няйт гӧптӧ кӧ чӧвтлас тывсӧ и сэтысь пуд-мӧд кебӧс кӧвтыштас!»
— Спирт доз вылӧ сета, — эз лэччысь Коль. — Юыштны окота...
— Ведра сын вылӧ спирт доз? — кӧсӧйтчыліс Лудік Миш. — Госсялан!..
— Кило кӧкъямыс-ӧкмыс лоӧ. Сэсся ӧд тэкӧд жӧ и юам!
— Хм, — югдіс чужӧмыс Мишлӧн.
Шыр Коль нюммуніс:
— Но, кыдзи?
— Рӧзӧритан тэ менӧ, но да ладнӧ, — ӧвтыштіс кинас Миш, босьтіс чери тыра ведрасӧ да мигнитіс:
— Сідзкӧ, ме босьта сулея да тэ дорӧ и пыра. Тэнад, ме чайта, закуска вылас и гӧрд черитор на сюрас?
— Чериыд эм! — нюммуніс Коль, да пыр жӧ ӧлӧдіс ёртсӧ: — Сӧмын кодлыкӧ кӧ ӧти кыв...
— Гӧгӧрвоа... Абу челядь.
Лудік Миш тэрыба шавксьӧдіс сиктӧ. Сэтысь сьӧмыд медся ӧдйӧ сюрӧ. «Тайӧ небзьӧм сынсӧ гортӧ ог жӧ пырт! — думайтіс сійӧ. — Шыр Кольыд, гажмас да, бурджык чери на сетас. Кыз Марья ордӧ пырала. Верӧсыс абу. Чайта, ньӧбас...»
Миш кежис Марья керка дорӧ да чукӧстіс:
— Марья Максимовна, петав!
Ӧшиньӧд мыччысис пож пасьта чужӧм.
— Чери тай казьтылан вӧлі тӧрыт, — кыпӧдліс ведрасӧ Лудік Миш. — Ме со войнас подольникаси да этшаник шедыштіс. Кӧсъя вӧлі солыштны, но думышті: меным, мися, бара на шедӧ, а тэ пӧ висьӧдчан...
— Ок, кутшӧм тэ бур, Михаил Спиридонович! Да лок пырав, пырав!
— Сыныс гырысь. Сизимдас урӧн кило вузала... Мукӧдлы кӧ эськӧ эг сет, а тэныд сета. Верман веситны. Ме тай веситі, да дас кило кыскис-а.
— Абу небзьӧма?
— Мый тэ? Унджыкыслӧн на бӧжыс вӧрӧ! — эскӧдіс Лудік Миш.
Недыр мысти Лудік Миш пукаліс нин Шыр Коль ордын, юисны вина, закусывайтісны вомад сылысь розӧвӧй сьӧмгаӧн.
— Талун видз вылӧ эг и вуджав, — ошйысис варовмӧм Миш.
— Правильнӧ, — ошкис сійӧс гӧрдӧдӧм чужӧма Коль. — Мый сэні вӧчнысӧ, видз вывті кыскасьтӧг кынӧмыд зэв бура пӧтас.
— Сійӧ сідзи, да туруныд колӧ, Николай Адамович. Турунтӧгыд нӧкйыд да рыськыд оз ло. Ӧтилаысь гудйыштан, мӧдлаысь курыштан... видзӧдан да, мӧскыд пӧт и вузалыштны на лишалӧ, а деньгаыд овмӧсад некор абу лишнӧй.
— Сьӧмыд зептӧ оз зырт, — сӧгласитчис Шыр Коль, — но мӧд ног на сійӧс позьӧ нажӧвитны. Эновт туруннад ноксьыны. Петалам Печора вылӧ. Кык-куим вой ноксьыштам — чериаӧсь и деньгааӧсь лоам. Менам быдсяма пӧлӧс тывйыс эм. Гашкӧ и сьӧмга сюрыштас.
— Бур эськӧ да, сӧмын ӧд чериыд пыжас ачыс оз жӧ кай, — падъяліс на Лудік Миш.
— Ветлам, каитчыны он кут, — эскӧдіс Шыр Коль.
Кык друг воисны ӧти кывйӧ. Налы веськодь, мый ӧні турун пуктан кадӧ колхозын быд морт дона.
Лудік Миш муніс гортас, чуланысь перйис резинӧвӧй сапӧг, ноп.
— Кытчӧкӧ мунан, Михаил Спиридонович? — юаліс гӧтырыс.
— Печора вылӧ, — дженьыда шуис верӧсыс.
— Шыр Колькӧд? — волнуйтчӧмӧн юаліс Люся. — Чери гусявлыны, вузасьны?
— Вузасьны? Тэнад, нылӧ, кывйыд кутіс кузь лоны! — ыдждӧдіс гӧлӧссӧ бать.
— Меным йӧзсяньыс яндзим! — синва сорӧн горӧдіс Люся. — Ывлаӧ петны ог лысьт! Йӧзыс уджалӧны, а тэ гусясян.
— Гусяся? Кыдз тэ сёрнитан мекӧд, зырымбедь? — ырыштчис батьыс.
— Эн шумитӧй, ен могысьӧн, — повзис Любовь Сергеевна.
— Мен, гашкӧ, юасьтӧг и гортысь нин оз позь петны да? — дульнас резсис верӧсыс. — Али ас кынӧм вӧсна сӧмын тӧждыся? Йӧвсӧ да черисӧ ӧтнам сёя?
— Кутшӧм тэ, батьӧ! Пыр сӧмын и кӧритчан! Ми жӧ мамӧкӧд быд лун уджалам, и тэнад черитӧг пӧтам. Сідзи и тӧд, мунан кӧ Шыр Колькӧд, висьтала...
— Кутӧ куля! — дзикӧдз пузис Миш.
Любовь Сергеевна йӧткыштіс нывсӧ орчча комнатаӧ, клопкис-пӧдлаліс ӧдзӧссӧ да ачыс йӧжгыльтчис ӧдзӧс дорӧ:
— Эн шумит, Михаил Спиридонович... Мун, кытчӧ мӧдӧдчӧмыд, сӧмын эн шумит.
— Тэ сэтшӧм жӧ! — лёкысь сьӧвзис джоджӧ верӧсыс. — Доръян! Сійӧ увтӧ батьыс вылӧ, а тэ доръян!..
Час мысти Ижма кузя тургигтырйи кывтіс мотора пыж. Лудік Миш шы ни тӧв куйліс пыж пыдӧсын: тадзи тшӧктіс Шыр Коль — вод пӧ да мед он тыдав. Боксянь видзӧдысь кутас думайтны, мый пыжас ӧти морт...
Шыр Коль пыжӧн веськӧдлігмоз шпуткис-куритчис да кадысь кадӧ копыртчыліс пыж боклань, гумовтліс содзнас ва, юис: вина юӧм вӧсна ёна косьмис горшыс.
Пыжа петіс Печора вылӧ. Паськыд юлӧн лӧнь ваыс меліа лӧзаліс-дзирдаліс. Ылын тыдалысь мӧдар берегыс вӧлі пемыд, сэні ваыс кажитчис сьӧдӧн, вывті-вывті джуджыдӧн, а таладорыс лӧсталіс би кодь гӧрд рӧмӧн: тайӧ лэччысь шондіыс ворсіс ю веркӧс вылын. Печора вылын сэні и тані паськалісны гырысь да посни ва кытшъяс: ворсіс чери. Пыжа веськӧдчис Печора мӧдар береглань. Берегдорса бадьяс пиысь чепӧсйис ӧнӧдз рама пукалысь тӧвру, гызьӧдіс-серӧдіс васӧ. Кутісны дзӧрны и берегдорса бадьяс, кышакылісны-шӧпкӧдчисны, быттьӧ юасисны ёрта-ёртыслысь: «Мыйсяма йӧз локтісны пыжнас?»
Гыяс вочасӧн быдмисны, кутісны нин сьӧлавны-резны пыж пытшкӧ, сэсся заводитісны шыблавны пыжсӧ.
— Тӧвзьысьӧ тай! — шензьыштіс Лудік Миш.
— Нинӧм, шондіыс лэччас да лӧняс! — моторлӧн тургӧм шы вӧсна мый вынсьыс горзіс Шыр Коль.
Неуна кывтыштӧм бӧрын сувтісны берегӧ. Шонді лэччис. Ывлавыв заводитіс пемдыны. Чери гусявлысьяс лӧсьӧдісны тыв-завӧд.
— Шыбитлам ӧтчыд тывсӧ и пусям, — шуис Коль. — Сёйны окота...
Миш сулаліс берегын да кутіс гез пом, а ёртыс пукаліс пыжын, сыніс. Нора дзуркнитлывліс уключина. Кыліс табъяслӧн да изъяслӧн гольскакылӧм.
Недыр мысти пыж сьӧкыда да дыша матыстчис береглань. Лудік Миш, гӧгрӧсмӧм синъяса, мыджсьӧма гӧгйӧдзыс сапӧга кокъяснас берегӧ да кутӧ зэлалӧм гез помсӧ.
Шыр Коль чеччыштіс пыжысь. Тыв локтіс ньӧжйӧ да сьӧкыда. Тыв пытшкас ваыс пуӧмӧн-пуис. Со ӧддзӧдчис, чеччыштіс да звиркнитіс сюрӧс вомӧн поводнӧй ыджыд сир.
— Кутшӧм дошлӧй! — горӧдіс Лудік Миш.
Здук мысти визьнитіс-лыйыштіс тыв пытшкысь мӧд сир, сэсся коймӧд, нёльӧд...
Миш пузис:
— Мый нӧ эстшӧмыс!
— Нинӧм, — тыв кыскигмоз такӧдіс Шыр Коль. — Сиръяс — найӧ молодечьяс: кужӧны овны. Миянлы ӧд пусьыны кӧ кольӧ и... Главнӧйыс — войнас. Сэки эн зевайт.
Сюри ведра куим-нёль чери, но ставыс сэтшӧм-татшӧм: кельчи, сир, сынпиян, йӧрш, ёкыш. Бур чери — кебӧс, нельма, печорскӧй зельдь да мукӧд — эз вӧв. Шыр Коль тшӧктіс:
— Тэ, Миш, эсійӧ бадьяс саяс биась. Корсь мыльк сай, мед биыс ю вывсянь эз тыдав! А ме чери весала...
Пестісны би, пусисны. Юисны вина. Сэсся зэв азыма сёйисны.
Пуксис вой. Берег дорын сьӧдвидзисны кустъяс. Гӧгӧр чӧв-лӧнь, пемыд да весиг шуштӧм.
— Инспекторъяс войнас оз шӧйтны? — мыйлакӧ гусьӧн юаліс Миш.
Коль нюммуніскодь:
— Найӧ медсясӧ войнас и шӧйтӧны. Волас кодкӧ и талун, но тэ эн пов: пыр нин позьӧ пышйыны либӧ дзебсьыны...
Сёйӧм-юӧм бӧрын войся пемыдас кутісны дзуртны уключинаяс, таркакывны. Кыйсьысьяс уджалісны чӧв ланьтӧмӧн, пошиктігтыр. Кор тыв лои берегын, Лудік Миш нимкодьпырысь лолыштіс: «Вот тайӧ, да! Вот тайӧ чери!»
Пыжӧ сӧвтісны пуд дас кымын зельдь.
— Нӧшта ӧти тӧня — и тырмас, — шуис Шыр Коль.
— Тэ йӧймин кӧ-а? — шензьӧмысла пӧсяліс Лудік Миш. — Чериыс ачыс пырӧ пыжӧ, а тэ — «тырмас»!
— Нӧрӧвитлы, — тувкнитіс Лудік Мишлы бокас Шыр Коль. — Видзӧдлам, мый мӧд тӧня бӧрас лоӧ. Менам нырисӧй кылӧ!..
Мӧд тӧня шензьӧдіс весиг Шыр Кольӧс. Кор тіралысь кияснаныс ректісны пыжӧ кебӧс да зельдь, пыж сідз сьӧктіс, мый вот-вот пуксяс. Лудік Миш горшлуныс вӧсна став тушанас тіраліс. Вермис кӧ эськӧ, Печораысь став черисӧ кураліс аслас пыжӧ.
— Тырмас кӧ-а? — юаліс Шыр Коль.
— Нӧшта ӧти тӧня кыскам, Микулай Адамович! — корис Миш.
— Пыжным сэсся оз лэпты, — ышловзис Шыр Коль.
— Но и дошлӧй жӧ тэ морт, Микулай Адамович! — шензис Лудік Миш. — Тэкӧд позьӧ уджавны...
Шыр Кольлы нимкодь лои ошкӧмсьыс, но тӧждысьӧмпырысь видзӧдліс кывтыд и катыд, кывзысьыштіс, кӧнкӧ оз-ӧ тургы мотор. Но ставыс вӧлі лӧнь.
— Вот мый, другӧ, — шуис Шыр Коль. — Чери миян эм, ӧні колӧ усйысьны...
— А сьӧмгаыс? — повзис Миш. Сылы бара на эз тырмы пыж тыр чериыс.
— Коркӧ мӧдысь... Аддзан, пыжным вӧйны кӧсйӧ? Пуд нелямын лоӧ. Регыд югдыны кутас. Колӧ меститны...
Вуджисны Печора мӧдарӧ.
— Вай, другӧ, сибӧдчылам эсійӧ кустъяс дорас, — индіс Коль. — Черисӧ тэчам мешӧкъясӧ да, абу кӧ окота тӧдмасьны инспекторкӧд, регыдджык усйысям...
Недыр мысти чери тыра мешӧкъяс, быттьӧ госа порсьяс, куйлісны пыжын. Уркнитіс мотор, и пыж веськӧдчис Ижма вомлань. Сувтісны медся матыса сиктӧ. Шыр Коль пальӧдіс сельпоса председательӧс. Эз вунӧд пыртны сылы ыджыд ведра тыр свежӧй чери. Важ тӧдсаяс ӧдйӧ гӧгӧрвоисны ёрта-ёртнысӧ.
Кызь пуд зельдь регыд лои сельпо складын.
— Магазинъяс воссьӧм бӧрын кык час мысти ни ӧти лов оз коль: гожӧмбыд эз вӧв свежӧй чериыс, — шуис председатель, сэсся вашкӧдіс. — А гӧрд чериыс кӧть ӧти лов абу?
— Абу, — юрсӧ пыркӧдіс Шыр Коль. — Но талун войнас лоӧ. Сӧмын вай восьтлы магазинтӧ: горш косьмӧ, дай куритчанным быри...
Люся корсьӧ Серафимӧс
Батьыс мунӧм бӧрын Люся пасьтасис жӧ.
— Тэ кытчӧ, нылукӧй? — юаліс мамыс.
— Ветла... Серафим дорӧ, — вочавидзис Люся.
— Гашкӧ, оз ков, Люся? — нора видзӧдіс мамыс.
Люся сывйыштіс сійӧс, окыштіс:
— Колӧ, мамӧ, колӧ. Мед велӧдыштӧны. Тэн ӧд сьӧкыд жӧ тадзисӧ овны. Ме жӧ ставсӧ аддза...
Любовь Сергеевна ышловзис, эз мӧд кутны нывсӧ.
Серафимӧс Люся эз аддзы. Дедыс висьталіс: воліс пӧ тракторист да нуӧдіс Ыджыд шор сайӧ. Тракторныс сувтӧма, а механикныс вежон нин ветлӧдлӧ кӧнкӧ Щельяюрын. Корисны пӧ видзӧдлыны.
Ныв кежаліс Сергей ордӧ, но сійӧ эз жӧ вӧв гортын: кывтӧма орчча бригадаӧ.
«Найӧс корсигкості вӧръясыд Печора вылынӧсь нин лоӧны», — гажтӧма думыштіс Люся, но век жӧ котӧрӧн-сорӧн мӧдӧдчис Ыджыд шорлань.
Серафим збыльысь вӧлі трактор дорын. Маслӧӧсь чужӧма, сійӧ мыйкӧ гажаа висьталіс трактористлы. Том тракторист долыда серӧктіс, тапнитіс Серафимлы мышкас:
— Но, аттьӧ жӧ тэныд, Серафим!
Трактор уркнитіс да заводитіс путкылявны эжасӧ.
Гырддзаӧдзыс маслӧӧссьӧм кисӧ няйт рузумӧн чышкалігас Серафим аддзис Люсяӧс. Зонлӧн сьӧд синъясыс тырины радлунӧн.
— Люся! — горӧдіс сійӧ. — Тэ кытысь татчӧ усин?
— Гортысь, — шуис ныв да кымынкӧ кывйӧн висьталіс, мыйла сійӧ локтіс татчӧ.
— Мунам, — сой пӧлӧдыс нылӧс кутіс Серафим.
Зон гусьӧн видзӧдлывліс ныв вылӧ. Статя тушаа, кыз кӧсаяса, гырысь сӧдз синъяса Люся кажитчис мича дзоридзӧн. «Вӧйны позьӧ тэнад синъясӧ, Люсенька!» — думыштіс Серафим. Люся мыйкӧ висьталіс, но зон сӧмын кывзіс сылысь гӧлӧссӧ, а кывъясыс тайӧ здукас кажитчисны веськодьӧн.
Воисны шор дорӧ.
— Горш косьмӧ, — шуис Серафим, кодлӧн збыльысь косьмис горшыс. — Юыштам...
— Сэні вылынджык эм ключ, — индіс Люся. Муныштісны. Му улысь збыльысь петіс ключ. Люся копыртчис, гумовтіс содзнас да юис.
— Кутшӧм кӧдзыд! — шензис сійӧ. — Весиг пиньяс доймӧны...
Серафим видзӧдліс аслас маслӧӧсь кияс вылӧ да шыасис ныв дінӧ:
— Менӧ тшӧтш юктав, Люся.
— Содзнам али мый? — серӧктіс Люся.
— Содзнад, — нюммуніс Серафим.
Люся гумовтіс содзнас сӧдз васӧ, нюжӧдіс кияссӧ:
— На, ю...
Серафим чӧсмасигтыр юис ныв ки пыдӧсъясысь васӧ. Но уна-ӧ ва тӧрӧ нывлӧн ичӧтик соддзӧ? Зонлӧн вом дорыс инмис нывлӧн небыд киясӧ.
— Нӧшта, Люся, нӧшта, — корис Серафим.
Куимысь ли нёльысь нин зон юис, а дугдыны эз и кӧсйы.
— Гашкӧ, тырмас нин? — серӧктіс ныв.
— Тырмас, — шуис зон. — Аттьӧ, Люсенька. Мунам, корсьлам Сергейӧс.
Ныла-зонма лэччыштісны шор бокті увлань, медым кытшовтны няйтсӧ. Воисны бурджыкинӧ.
— Вуджӧдны тэнӧ? — юаліс Серафим да нюжӧдіс кияссӧ.
— Кияс вылад? — гажаа дзирдыштісны нывлӧн синъясыс. — Аттьӧ, кыдзкӧ ачым нин!
Люся ӧддзӧдчӧмӧн чеччыштіс. Лэччысь шонді югӧръяс улын югнитісны гожъялӧм крепыд кокъяс, мыш вывсьыс чеччыштлісны вывлань руд кыз кӧсаяс.
Шор вуджӧм бӧрын ныла-зонма тэрыба мӧдӧдчисны сиктлань. Сиктӧ воигӧн нин Люся эскана синъясӧн видзӧдліс Серафим синъясӧ:
— Ті ӧд он кутӧй тышкасьны батькӧд?
— Кыдз нӧ тышкасьтӧгыс, — падмис Серафим. — Кулакъясӧн тышкасьны, дерт, огӧ кутӧ, а чирыштны ковмас. Миянлы ӧд тшӧтш лоӧ бур, батьыд кӧ кутас йӧзыс моз жӧ уджавны...
— Ме гӧгӧрвоа, — лӧня шуис Люся. — Мен ӧд яндзим жӧ... Бать ӧд сійӧ...
Серафим ышловзис: дум вылас уси аслас батьыс.
— Но, ме котӧрта корсьны Сергейӧс, колӧ чайтны, сійӧ катӧдіс нин пыжсӧ орчча бригадаысь. Шондіыс лэччӧ, сёрмам, пемыднад нинӧм ог аддзӧй... А тэ, Люся... — Серафим падмис.
Люся юалана видзӧдліс сы вылӧ.
— Бур ныв, — шӧпнитіс зон, сэсся топӧдліс Люсялысь кисӧ да тэрыба веськӧдчис вадорлань.
Люся видзӧдіс сы бӧрся. Видзӧдіс пӧся, меліа.
Шонді кыйкъяліс нин син пӧвнас пуяс сайсянь, кор Югыдвож сиктдорса берегысь торйӧдчисны кык моторнӧй пыжа да лэччисны Изьва кузя. Печора вылӧ петӧм бӧрын пыжаяс бергӧдчисны катыд. А час-мӧд мысти кывтыдсянь сьӧкыда катіс чери тыра пыж да пырис Изьва юӧ.
Том йӧзлы тайӧ пӧрйӧ эз удайтчы кутны браконьеръясӧс.
Войся тыш
Мӧд лун рытнас Серафим, Сергей да нӧшта кык морт бара кывтісны увлань. Тайӧ жӧ кадас Щельяюрысь петіс коймӧд пыжа: Серафим юӧртіс чери гусявлысьяс йылысь инспектор Тувъяловлы.
Вой. Чӧв-лӧнь. Сӧмын кылӧ Лудік Мишлӧн да Шыр Кольлӧн пошиктӧмыс. Дыр мысти тыв сибаліс. Берегдорса ваын кыптіс ыджыд шум. Ва пуис, увгис, бузгис. Кӧть Печора вӧлі лӧнь, тані ветлісны гыяс: ныриса Шыр Кольлы удайтчис тывйыштны сьӧмга.
— Кыскы, кыскы, — пиньяс пырыс тшӧктіс Коль. — Ваад накӧд нинӧм он вермы вӧчны...
Зіля уджалісны кык друг. Куим сьӧмга кражъяс моз куйлісны нин берегын, а тывлӧн «кӧшельыс» ловъя моз на кыпавліс да вӧрис.
Буретш тайӧ здукъясас Шыр Коль кыліс моторлысь жургӧм шы да мисьтӧма ёрччыштіс. Налӧн эз нин вӧв кадыс пышйыны ни дзебсьыны, эз кӧ кӧсйыны кольны татчӧ пыжсӧ, моторсӧ, тывъяссӧ да сьӧмгасӧ.
— Вештам пыжсӧ катыдлань! — гораа шӧпнитіс Шыр Коль. — Тыв дорсьыс вешйыны колӧ...
Кыдз позьӧ ӧдйӧджык котӧртісны пыж дорӧ да берег пӧлӧн кыскисны пыжсӧ метр ветымын сайӧ катыд.
Мотора пыж матыстчис ӧдйӧ, вывті ӧдйӧ. Кӧть вӧлі прамӧй пемыд, но сюсь синма мортлы эз вӧв сьӧкыд аддзыны берег дорын сулалысь пыжтӧ.
Шыр Коль шуис водзсасьны. Кык вӧр дзебсисны бадьяс сайӧ. Коль шӧпнитіс:
— Инспектор кӧ — ловйӧн ог лэдзӧй... Уна нин ми вокыслы дӧзмӧдчис.
Моторка-пыж уркнитіс орччӧн, сувтіс. Берегӧ чеччыштіс том морт. Югнитіс электрическӧй фонариклӧн би, югдӧдіс Шыр Кольлысь пыжсӧ, сэсся берегдорса лыа вылысь ясыда тӧдчысь кок туйяс. Кок туйяс кузя фонариклӧн лучыс веськӧдчис бадьяслань. Том морт кымыныськӧ воськовтіс и нем виччысьтӧг югдӧдіс Лудік Мишлысь кельдӧдӧм чужӧмсӧ.
— Дзебсинныд? — стрӧга юаліс воысь.
Шыр Коль тӧдіс рыбинспектор Тувъяловӧс.
— Нимтӧ-овтӧ эн висьтав, — ёртыслы шӧпнитіс Шыр Коль. — Ковмас кӧ, отсась меным, а то эта мында ловсьыд мынтысьнытӧ мӧскыд оз тырмы...
— Петӧй татчӧ, — тшӧктіс Тувъялов, кодкӧд чери гусявлысьяс унаысь нин заводитлісны ладмӧдчыны бурӧн и лёкӧн, но нинӧм эз артмыв.
Шыр Коль гусьӧн лэптіс ружьесӧ.
Том морт стрӧга юаліс:
— Сьӧмга кыянныд?
— Кутшӧм сьӧмга? — шыасис Шыр Коль. — Ми вуграсям...
— Вуграсянныд? — эскытӧг юаліс Тувъялов. Сійӧ тӧдіс, кутшӧм «вуграсьысьяс» тані: луннас телефонӧн сёрнитіс Серафимкӧд. Видзӧдліс пыжӧ — нинӧм эз аддзы. Муныштіс берег пӧлӧн, сувтіс, кывзысьыштіс. Кӧнкӧ муртса-муртса кылыштіс мотор шы: тыдалӧ, вӧтчӧны том йӧз. А дзик матын мыйкӧ ёнакодь шумитіс, сялякыліс. Инспектор муныштіс водзлань, горӧдіс:
— Нолтӧ, волӧй татчӧ!
— Ваас сюям, — шӧпнитіс Шыр Коль. — Печораыд джуджыд: некод оз казявлы...
Лудік Миш тіраліс, кӧть и эз вӧв полысь рӧдысь.
— Ог... Мортӧс вины ог вермы, — мыкталіс сійӧ.
Матыстчисны.
— Тіян удж? — фонарик лучнас Тувъялов индіс сьӧмгаяс вылӧ.
«Вуграсьысьяс» чӧв олісны.
— Тэнӧ кыдз шуӧны? — инспектор юаліс Лудік Мишлысь. — Шыр Коль?
Миш чӧв оліс.
— Ті Югыдвож сиктысь Шыр Коль да Лудік Миш? — бара юаліс Тувъялов. — Он кӧсйӧ сёрнитны?
— Ме абу татысь, — тіралан гӧлӧсӧн шыасис Лудік Миш. — Ме вӧв корся...
— А-а, — явӧ сераліс сы вылын Тувъялов. — Тэ вӧв корсян? А нолтӧ лэптӧ тывнытӧ да лэдзӧй сьӧмгаяссӧ!..
Шыр Коль ырыштчис ружьенас. Инспектор повтӧг воськовтіс сылань:
— Вай татчӧ ружьетӧ!
Тувъялов унаысь нин паныдасьліс браконьеръяскӧд и бура тӧдіс найӧс: ӧтияс пышйӧны, мӧдъяс пыр жӧ заводитӧны каитчыны, окотапырысь висьталӧны ним-овнысӧ, сӧмын пӧ ӧні лэдзӧй да эн штрапуйтӧй, а сэсся ми некор нин татчӧ ог волӧй, а коймӧдъяс грӧзитӧны, яра водзсасьӧны, оз яндысьны и усьласьны.
— Ружье ог сет! — бӧрыньтчис Шыр Коль, кыпӧдіс ствол помсӧ: — Ӧні жӧ пуксьы пыжад да мун, кытысь локтін! Корсь ассьыд Шыр Кольтӧ, а миянӧс эн вӧрзьӧд, овнытӧ кӧ окота!
Инспектор чирк моз чеччыштіс да нетшыштіс сылысь ружьесӧ.
— Тырмас дурнытӧ, — горӧдіс сійӧ. — Лэдзӧй сьӧмгаяссӧ.
Повзьӧм Миш, кыв шутӧг, веськӧдчис тывлань. Шыр Коль мурчнитіс пиньяснас да вӧтчис сы бӧрся. Тывйысь чери лэдзалігӧн сійӧ шӧпнитіс ёртыслы: «Ме уськӧдча, пӧрӧда кок йывсьыс, тэ кияссӧ кут...»
— Лэдз миянӧс, Тувъялов ёрт, — тыв ректӧм бӧрын нор гӧлӧсӧн шыасис Лудік Миш. — Ӧшыбка лои...
— Прӧстит, — бӧрддзис Шыр Коль да сувтіс пидзӧсъяс вылас.
— Сувт, — зывӧкпырысь шуис Тувъялов. — Коді тэ сэтшӧмыс, мыйла он висьтав?
— Прӧстит, — няргис Шыр Коль, ачыс пыр матӧджык уйис инспектор дорӧ. — Босьт ружьесӧ аслыд, сӧмын лэдз миянӧс...
— Тэ — Шыр Коль?
— Прӧ-ӧ-стит...
Тувъялов кыскис вспышкаа фотоаппарат, но эз удит кыпӧдны синъяс весьтӧдзыс, кыдзи пидзӧсъяс вылас сулалысь Шыр Коль звирк чеччыштіс, уськӧдчис Тувъяловлы кокъяс улас, кӧсйис нетшыштны кокъясӧдыс асланьыс, но пыр жӧ ымӧстӧмӧн нюжӧдчис берегдорса няйтӧ: инспектор чорыда чужйис сылы кынӧмас.
Друг нырд сайсянь кутіс гора кывны мотор шы. Лудік Миш дзикӧдз падмис. Шыр Кольлӧн ружьеысь Тувъялов грымӧбтіс-лыйис вылӧ.
Минута мысти мотора пыж сувтіс берегӧ.
— Сеня! — кыліс пыжсянь Серафимлӧн гӧлӧсыс.
— Лок, ме тані, — шыасис Тувъялов.
Пыжысь чеччыштісны Серафим, Сергей да ещӧ гоз-мӧд морт. Сергей солькнитіс му вылӧ бензин, шыбитіс сэтчӧ ӧзтӧм истӧг тув. Ыпнитіс би, югдӧдіс Шыр Кольӧс, ружьеа Тувъяловӧс, гӧгрӧсмӧм синъяса кельыд чужӧма Лудік Мишӧс.
— Сёрмыштім, — правдайтчӧм могысь шыасис Сергей. — Вежӧн локсьылӧма...
— Буретш воинныд, — шуис Тувъялов. — Босьтӧй со ружьесӧ... эсійӧ дядьӧыс оз куж пӧльзуйтчынысӧ: морт вылӧ веськӧдӧ.
Тувъялов висьталіс, кыдзи уськӧдчылісны сы вылӧ кык друг.
— Шыбитӧй ваас ружьесӧ! — шуис кодкӧ.
Сергей босьтіс Шыр Кольлысь ружьесӧ ствол помӧдыс, ӧвтыштіс да бруткис-шыбитіс ва шӧрӧ.
— Асьнысӧ тшӧтш колӧ шыбитны! — скӧраліс Серафим.
— Керав тывтӧ! — Шыр Кольлы тшӧктіс Тувъялов.
Том йӧз кыскисны тывсӧ берегӧ.
Шыр Кольлы выль капроновӧй тыв кералӧм дорысь, гашкӧ, кокньыдджык вӧлі керавны ассьыс юрсӧ. Но лои вӧчны, мый тшӧктӧны.
«Ок и сиралі жӧ ме юрӧс! Мыйла и вӧлі Шыр Кольыскӧд кӧртасьны!» — каитчис Лудік Миш. Турун гусявлӧмыд ӧні, татшӧм делӧ дорад, кажитчис челядь ворсӧмӧн.
Шыр Коль пыжысь моторсӧ том йӧз босьтісны. «Вуграсьысьяслы» колисны кык пелыс.
— Мед бруткӧны, — шуис Серафим. — Кадыс унджык лоӧ думайтлынысӧ.
Мотора пыжъяс мунісны. Шыр Коль да Лудік Миш колины пемыд берегӧ.
Гажтӧм думъяс
Шыр Коль воис гортас шыр кодь рам. Эз вӧв збодерджык и Лудік Миш. Став тушаас кыліс мудзлун: эз узь войсӧ, а сэсся кызь километр упкис-сыніс ва катчӧс. Мудзлун дінӧ содісны сьӧкыд думъяс. Кутшӧм кокниа да лӧсьыда оліс сійӧ бӧръя вояссӧ! Кань моз. И вот ставыс кутіс дзугсьыны, ставыс гугӧн мӧдӧдчис. Торйӧн нин сьӧкыд да гажтӧм лои чери кыйны ветлӧм бӧрын. Лудік Миш ачыс оз тӧд стӧча, мый сійӧс сёйӧ медся ёна: каитчӧм, йӧз вылӧ лӧгалӧм, скӧралӧм али прӧстӧ гажтӧмлун, сэтшӧм гажтӧмлун, кӧть пет звӧз вылӧ да пон моз омляв.
Гӧтырыс, Любовь Сергеевна, чӧв оліс, сӧмын дугдывтӧг ышлолаліс. Мый сійӧ ышлолалӧ? Тувъяловкӧд сійӧ эз тышкась, йӧз водзын эз гӧрдӧдлы. Йӧзыслысь сёрнисӧ кылӧ да сійӧн? Дерт, сиктад сёрнитӧны: Лудік Миш Шыр Колькӧд ветлӧма гусясьны, сэсся пӧ тышкасьӧмаӧсь инспекторкӧд, кӧсйӧмаӧсь лыйны, но Серафим том йӧзкӧд буретш воӧма, мырддьӧма моторнысӧ, да Лудік Мишыд ныр вылас усьтӧдз сынӧма. А Шыр Коль пӧ, тшӧктӧмаӧсь да, ассьыс тывсӧ кералӧма.
Лудік Миш мурчнитіс пиньяснас. Тӧдіс: буретш татшӧм сяма сёрни ветлӧ ӧні сиктын, видз вылын, быдлаын. Кӧть ывлаӧ эн пет. Лудік Миш чеччис крӧвать вылысь, кытысь эз на вӧрзьыв гортас пырӧм бӧрын, ружтыштіс: гӧгӧрвоис, мый том йӧз вермалісны сійӧс. Эз нӧйтны, эз пинявны, весиг собрание вылӧ эз корлыны, а век жӧ вермалісны. Тайӧ вӧлі вывті ӧбиднӧ, но мый нӧ вӧчан? Мешӧкӧ ӧд он пыр. Оз кӧ эськӧ сэсся вӧрӧдны — олан нин, но ӧдвакӧ делӧыс тайӧн помасяс. Инспектор вылӧ уськӧдчылӧмысь код тӧдас на кыті кыскаласны. Оз кӧ пуксьӧдны — бур нин да.
Мышкыртчӧма, рам, гажтӧм, синъяссӧ улӧ лэдзӧмӧн, Лудік Миш ветлӧдліс джодж кузя.
Пырис Шыр Коль. Сійӧс аддзӧм бӧрын Мишлӧн скӧрлунӧн ӧзйисны синъясыс.
— Мый гажтӧм? — зумыша шыасис Шыр Коль. — Юыштны абу окота?
Кыв ни джын шутӧг кӧзяин вайис кык стӧкан. Юыштісны. Чӧв олыштісны. Сэсся Шыр Коль юаліс:
— Мый кутам вӧчны?
— А мый?
— Куим сьӧмгасьыс штрап колӧ мынтыны. Джынсӧ тэ мынтан, — синкым увсяньыс видзӧдліс Коль.
Миш нинӧм эз вочавидз, сӧмын думыштіс: «Штрап мынтӧмӧн кӧ мынам, бур на да».
Чӧв олыштісны. Сэсся керка кӧзяин сьӧкыда ышловзис:
— Тувъяловыд, дерт, кӧнкӧ, судӧ сетас.
— Ог тӧд, — шуис Коль, сэсся зілис и сёрнисӧ вуджӧдны шуткаӧ. — Сетас кӧ, ӧтлаын лоам. Кыкнад гажаджык...
Шыр Кольлӧн шуткаыс ку пиысь петкӧдіс Лудік Мишӧс:
— Тэ, тэ менӧ воштін аслад пеж черинад! «Сьӧмга кыям!» Вот и кыйим! Закусит ӧні...
Кык друг заводитісны видчыны. Код тӧдас, мыйӧн эськӧ помасис налӧн сёрниыс, эз кӧ таркӧдны ӧшиньӧ.
— Михаил Спиридонович! — кыліс сэні тӧдса гӧлӧс. — Сельсӧветӧ корисны.
Лудік Миш восьтіс ӧшиньсӧ. Сы вылӧ видзӧдіс серамбана Сергей.
— А кодъяс сэні? — синвидзӧдлассӧ бокӧ вештіс кӧзяин.
— Абу унаӧн, — шуис Сергей. — Иван Игнатович, Серафим да... Тувъялов.
Лудік Мишлӧн гӧрд чужӧмыс, кажитчӧ, бледӧдіс.
— Шыр Коль эз волы? — юаліс Сергей.
— Кытчӧ сійӧс бесыс нуас, — ружтыштіс Миш. — Тані...
— Тувъяловлӧн сыысь гажыс бырӧма, — шпынняліс Сергей. — Мед пӧ тшӧтш волас.
Мишлӧн сьӧлӧмыс личалыштіс: «Слава богу, оз ӧтнамӧс корны».
Сергей шутьлялігтырйи муніс. Лудік Миш лӧг синъясӧн дыр видзӧдіс сы мышкӧ, сэсся сьӧкыда мӧдӧдчис сельсӧветӧ.
Эз вывті ёна вилькъяв и Шыр Коль. Сійӧ Миш моз жӧ, кыв шутӧг, петіс ывлаӧ. Югыд мича луныс кажитчис пемыдӧн да мустӧмӧн. Ставыс дзугсис. Некутшӧм петан туй абу. Мыйла вӧлі тышкасьнысӧ? Мед сюрим, мед воштім тывсӧ, мед мынтім штрап, но ӧд ставыс на эськӧ вӧлі бур, нинӧм вӧсна эз ков ёнасӧ шогсьыны. «Лешакыс тойыштіс менӧ кыпӧдны ружьесӧ, — видіс асьсӧ Шыр Коль. — Мый кута вӧчны, делӧыс кӧ воас судӧдз?»
— Тэ эськӧ, Николай Адамович, пыралін мед гортад да зельдёвка-тывтӧ тшӧтш вайин, — шуис Лудік Миш.
— Аддзин йӧйӧс! — скӧрмис Шыр Коль, а кор гӧгӧрбок ставсӧ артыштіс, ачыс жӧ и думыштіс: «А ӧд Мишыс прав... Сета тывсӧ... ӧтисӧ кералі, мӧдсӧ сета... Гашкӧ, делӧыс оз во судӧдз...»
Шыр Коль кежис гортас. Сійӧс виччысигмоз Лудік Миш пуксис туйбокса кер вылӧ. Дум вылас усины гӧтырыс да нылыс. Сійӧ тӧдіс: нылыс вӧсна найӧ сюрины. Но нылыс ӧмӧй мыжа? Мукӧдъяс тай нӧ оз гусясьны ни оз браконьеравны, да олӧны жӧ. Сьӧкыд, ок сьӧкыд лои сьӧлӧм вылас. Кӧть йӧз син водзас он мыччысь. А йӧзтӧгыд олӧмыд, вӧлӧмкӧ, абу олӧм. Миш корсис думнас и эз аддзы мортӧс, кодкӧд эськӧ позис кокньӧдыштны сьӧлӧм, сёрнитыштны, сӧветуйтчыштны. Мыйла сылӧн абу ни ӧти ёрт? Мыйла сылы ставыс паныд, весиг аслас Люсяыс?
Оз, тадзи овны водзӧ оз туй!
Лудік Миш пукаліс юрсӧ ӧшӧдӧмӧн да думайтіс, чорыда думайтіс...
