МЕНАМ ВЕЛӦДЧЫСЬЯС
Висьт
Уджавны заводитӧмсянь коли тӧлысь. Медводдза тӧлысь менам уджлы! Комын лун. А меным кажитчӧ — коли нин комын тӧлысь. Эг думайт, мый тадзи лоӧ. Уджала дзик ӧтнам, велӧда нёль класс. Школаын дас вит зонка да нывка, дас вит чӧртпи. Мӧд во лоӧ кызь саяс. Сэки мӧдӧдасны мӧд мортӧс. А ӧні — ӧтнам. Сьӧкыд. Урокъяс вылын шум, серам. Челядь оз кывзыны. Збойӧсь. Журнал тырӧма «двойкаясӧн».
Ӧні рыт. Пукала да гижа. Сьӧлӧм гудрасьӧ, юр висьӧ. Ывлавыв пемыд, помся шливгӧ кӧдзыд зэр, лӧвтӧ тӧв, тринякылӧны ӧшинь стеклӧяс.
Ставыс кыдзкӧ не сідз. Мыйла ме велӧдчи педучилищеас? Тӧлысь уджалӧм бӧрын аддза: велӧдысь меысь оз артмы. Медводдза уроксянь эг куж босьтны челядьӧс киӧ. Ӧні эськӧ и казялі, мый колӧма зэлыдджыка кутны вӧжжисӧ, но — сёр нин.
Со ӧти урок.
Звӧнок. Челядь пыралісны классӧ. Тэрмасьтӧг веськӧдчис ӧдзӧслань и Павел, коді, колӧ шуны, велӧдчӧ зэв «зіля»: быд классын пукалӧ кык во. Эз удит пырны, кыдзи мышсяньыс сы вылӧ пелька чеччыштіс Геня: тыдалӧ, думыштіс классӧ пырны верзьӧмӧн. Павел зілис мынтӧдчыны, и кыкнанныс грымгысисны джоджӧ.
— Тіянлы звӧнокыс эз вӧв? — скӧра юалі ме.
Геня здук кежлӧ бергӧдліс пӧсялӧм гӧгрӧс чужӧмсӧ, чеччыштіс, чышкыштіс соснас ныр увсӧ, тэрмасьӧмӧн тувкнитіс Павеллы бокас да котӧртіс классӧ. А Павел эз тэрмась. Сійӧ «эз кыв» менсьым гӧлӧсӧс. Дышпырысь чеччис, сувтіс ӧдзӧс шӧрӧ, грӧзитіс Генялы:
— Ме тэныд петкӧдла на гаж!
— Павел!
Ме вылӧ видзӧдлытӧг Павел ньӧжйӧник катласис-муніс аслас местаӧ.
Ме пыри классӧ. Геня сулаліс парта саяс бӧрӧн, мыччаліс чернилаӧсь кулаксӧ Павеллы:
— Тэ петкӧдлан? Ме тэныд аслыд петкӧдла. Со!
— Геня! Урок!
— А мыйла сійӧ меным пырны оз сет? Водӧма сэтчӧ!
Ме лэпті киӧс:
— Лӧня! Заводитам урок. Нёльӧд класс, восьтӧй гортса тетрадьяс. Коймӧд класс, решитӧй дӧска вылӧ гижӧм примерсӧ. Мӧд класс, лыддьӧй...
Ас костаныс варовитігтырйи ӧтияс восьталісны тетрадьяс, мӧдъяс корсьысисны партаысь, сумкаысь. Швачкакылісны парта вевтъяс. Кодлӧнкӧ гӧгыльтчис ручкаыс да уси. Сэсся киссис чернила, чилӧстіс Оля. Ме, пиньясӧс мурчкурччӧмӧн, видзӧді, виччыси.
Дырӧн тетрадьяс лои восьталӧма, Павеллӧн да Генялӧн кындзи. Павел дувгӧдӧма ӧшиньӧ гудыр ва рӧма синъяссӧ, Геня сюйӧма нырсӧ сумкаас да лукйысьӧ.
— Геня! Тэнӧ дыр на ковмас виччысьны?
— Тетрадьӧй кытчӧкӧ вошӧма...
Гортса удж прӧверяйтігчӧж Геня дасысь кымын зэв збыльысь видлаліс тетрадьяссӧ.
— Эз сюр?
Генялӧн ыджыд руд синъясыс сюся югнитісны:
— Эз...
— А нолтӧ... — ме видзӧдлі тетрадьяссӧ да пукті Геня водзӧ арифметика кузя тетрадь: — А тайӧ мый?
Геня чӧв олӧ, вомдоръясыс тіралыштӧны, вот-вот паськаласны гажа нюмӧн.
Генякӧд сёрнитігкості класс кутіс ызгыны.
— Дугӧдны сёрнияс! Павел!..
Павел оз нин видзӧд ӧшиньӧ. Нюжӧдӧма голясӧ орчча парта сайын пукалысь Оляланьӧ да вежньӧдлӧ кыз вомдоръяссӧ:
— Мый? Кодлӧн гортса уджыс абу? Уна эн сёрнит, а то...
Збоймӧм Оля мыччыліс кывсӧ:
— Ик! Нитш юрӧ...
— Тырмас сёрнитны! — кыпӧді гӧлӧсӧс ме.
Павел бара «эз кыв».
— Вот урокыс помасяс да ме тэныд петкӧдла!
— Павел! — ме тӧдчымӧн скӧрми.
— Мый ме кера? — торъя тэрмасьтӧг бергӧдчис Павел да сувтӧдіс ме вылӧ синкымъяс увсянь видзӧдысь гудыр синъяссӧ.
— Сувт!
— Мыйла сувта? Хы-ы... Ме ог сувт.
— Кыдзи он сувт?! — пузи ме. — А нолтӧ, кыпӧдчы!
Павел пукаліс.
— Ме кодлы шуи?
Павел эз вӧрзьы.
«Тайӧ нӧшта мый?» — пӧсялі ме да тэрыба веськӧдчи Павеллань. Сійӧ, буракӧ, аддзис, мый ме ог шмонит, да кыпӧдчис.
— Веськыда сувт! Киястӧ лэдз!
Павел сувтіс, а челядь мыйкӧ вылӧ гораа серӧктісны. Ме шемӧсмӧмӧн бергӧдчи. Тайӧ Геня аддзӧма кытыськӧ сьӧд вурунтор, ӧшйӧдӧма сійӧс ныр улас да, класслань чужӧмсӧ бергӧдӧмӧн, зэв збыльысь вӧрӧдӧ вылыс вомдорнас. Ачыс оз весиг нюмъяв, а мӧдарӧ — чукыртчӧма да зэв шогпырысь довкйӧдлӧ юрнас.
— Геня, сувт!
Сувтіс. Бикиньяс резысь синъяссӧ лэдзис увлань, а ачыс сідзи и пыркалӧ гуся серамысла. Бӧръя парта сайын шӧпкӧдчысь нывкаяс бара прысьмуніны-серӧктісны.
Павел бергӧдчис наланьӧ:
— Но-о, зӧръя рокӧн, буракӧ, мамныс вердӧма...
Челядь окотапырысь гизьмунісны-серӧктісны.
— Ті ланьтанныд он?! — горӧді ме.
— Сералӧны сэтӧн! Э-э, — нерыштіс Геня да кань моз нявӧстіс.
— Геня, пет классысь!
Геня лои серьёзнӧй:
— Ме сэсся, Николай Андреевич, бура кута пукавны.
— Тэ унаысь нин кӧсйысьлін. Пет.
Геня петіс.
— Мыйысь сійӧс вӧтлінныд? — юаліс Павел.
Ме инді синъясӧн ӧдзӧслань:
— Тэ тшӧтш!
— Мыйла ме пета? Ме ог пет.
Павел пуксис.
«Вот тайӧ да!» — югнитіс юрын мӧвп. Ме тӧді: ог кӧ петкӧд ӧні Павелӧс, сэсся классын пӧрадок некор оз ло. Ӧдйӧ локті Павел дорӧ.
— Он пет? — Павел шашаритчис партаӧ кыкнан кинас. Ме босьті сійӧс паськӧм воротӧдыс, нетшышті парта сайысь.
— Эн кутчысь! — пыксис детинка. Но здук мысти ачыс лэбовтіс партаяс костӧд дӧска дорӧдз, сэсянь лӧга видзӧдліс ме вылӧ да уськӧдчис ӧдзӧсӧ.
Классын лои шы ни тӧв. Челядь йӧжгыльтчисны. Менам сотчис чужӧм, сьӧкыда лолалі. Эг вермы гижны мелӧн дӧска вылӧ. Висьталі мыйкӧ челядьлы да эг тӧд ассьым гӧлӧсӧс. Ме эг вермы нуӧдны уроксӧ водзӧ, лэдзалі челядьӧс гортаныс. Бур ещӧ, урокыс вӧлі медбӧръя. Классысь петігӧн аддзи Павелӧс да Геняӧс.
— Кыкнанныд кольччанныд! — чорыда шуи налы да пыри учительскӧйӧ. Юи кӧдзыд ва, горша куриті папироска. Талунӧдз ме некодӧс эг вӧрзьӧдлы киӧн. И вот, ковмис вӧрзьӧдны. Коді мыжа? Ышловзи да шуи: «Ачым».
Недыр шойччыштӧм бӧрын петі классӧ. Сэні пукаліс ӧтнас Геня.
— Кӧні Павел?
— Пышйис...
— Пышйис?!
«Ковмас гортас ветлыны», — думышті ачым.
— Петкӧдлы гортса уджтӧ, — кори Генялысь.
Гортса удж вӧлі, но вӧчӧма кыдзсюрӧ: черкайтӧма, пукталӧма кляксаяс.
— Гиж выльысь.
Геня вензьыны эз кут. Ышловзис да заводитіс гижны. Минута дас мысти видзӧдлі: гижӧма лёка, мукӧд лыдпасъяссӧ сьӧкыд тӧдны.
— Бур, — шуи ме. — А ӧні гиж нӧшта ӧтчыд.
— Коймӧдысь? — Геня шензьӧмӧн видзӧдліс ме вылӧ, сэсся букыштчис: — Ог гиж.
— Бур. Эн гиж. Пукав. Меным тэрмасьнысӧ некытчӧ, тэныд — сідз жӧ. — Ме пукси пызан сайӧ, восьті книга, куті лыддьысьны. Геня чӧв пукаліс минут вит кымын, сэсся видзӧдліс ме вылӧ, босьтіс ручка. Ме сувті:
— Тэ гиж, а ме ветла Павел дорӧ. Пышъян кӧ — гортад вола да вайӧда.
Геня кольччис, а ме муні.
Павел пукаліс пызан сайын, сёйис. Мамыс эз вӧв. Детинка видзӧдліс ме вылӧ синкым увсяньыс, пуктіс паньсӧ, веськӧдіс видзӧдлассӧ ӧшиньӧ.
— Тэ тӧрыт вунӧдін вӧчны арифметика кузя гортса удж, — шуи ме. — Ветлам школаӧ да сэні вӧчан.
— Ме ог мун, — букыштчис Павел.
— Да? — нюмъёвті ме. — Сідзкӧ, ме тэнӧ нуӧда. Босьта и нуӧда. Гӧгӧрвоин?
Павел ӧти здук видзӧдіс меным синъясӧ, сэсся лэдзис синвидзӧдлассӧ: буракӧ, гӧгӧрвоис.
— Пасьтась.
Пасьтасис. Мӧдӧдчим. Ме — водзын, сійӧ — бӧрын. Пырим классӧ. Кык друг ёрта-ёртыслы гусьӧник нюмъёвтісны, но некодыс нинӧм эз шуны. Геня мыччис тетрадьсӧ:
— Гижи.
Видзӧдлі: гижӧма бура. Менӧ весиг шемӧс босьтіс:
— Ме тэнсьыд татшӧм мича гижӧдсӧ эг на аддзыв, Геня. Тэ, вӧлӧм, зэв бура кужан гижны. Кута надейтчыны: быд гортса удж водзӧвылӧ кутан гижны татшӧм жӧ мичаа. А он кӧ — быд пӧрйӧ мӧдам гижны выльысь.
Геня чышкыштіс соснас ныр увсӧ, радпырысь нюммуніс:
— Позьӧ мунны?
— Позьӧ.
Геня — тӧлка детинка. Мый висьталан выльтор — гӧгӧрвоӧ пыр жӧ, сэсся оз вунӧд. Но вывті збой. Гижӧдыс характерыс кодь жӧ. Букваяс да лыдпасъяс тетрадяс коді пӧрӧма ӧтарӧ, коді мӧдарӧ. Ставныс быттьӧ ышмӧмӧн йӧктӧны.
Геня кӧть и ёна дӧзмӧдчӧ урокъяс вылын, но ме сійӧс радейта. Кӧть мый оз вӧч, а скӧрмыны сы вылӧ ог вермы. Мӧд делӧ — Павел.
— Эз артмы, — веськодьпырысь шуыштас сійӧ.
Тайӧ — збыль. Задачаяс решайтны сійӧ оз куж. Да, колӧ чайтны, эз и заводитлы.
— Тэ, Павел, задачасӧ весиг абу лыддьӧмыд.
Павел шензьӧмӧн видзӧдліс ме вылӧ, нюмъёвтіскодь:
— Эг. А ті мыйӧн тӧданныд?
— Кымӧсад гижӧма.
Ме думыштчи. Тӧлысь чӧж уджалӧм бӧрад ставыс бура тыдалӧ. Тӧдчӧ: сійӧ нывбаба-велӧдысьыс, коді вӧлі тайӧ школаас ме локтӧдз, абу сьӧлӧмсяньыс уджалӧма. Тайӧ тыдалӧ быдлаысь: челядь гижӧдысь, лыддьысьӧмысь, рисуйтчӧмысь, пуртӧн гижтӧм партаясысь, джоджӧ шыблалӧм ёгысь. Ог кӧ ме пыркнитчы да заводит уджавны сосъяс пуджӧмӧн, то вежон мысти челядь кутасны ветлыны ме вылын верзьӧмӧн.
— Вот мый, Павел, — шуи ме. — Тэ висьтав меным веськыда: тэныд дыш велӧдчынысӧ?
— Дыш, — веськыда висьталіс детинка.
— Мыйла?
— Юрӧй оз уджав...
— Коді тэныд тайӧс висьталіс? — шемӧс босьтіс менӧ.
— Фрида Гавриловна висьталіс, — кыліс ӧдзӧс дорсянь.
Ме бергӧдчи: тайӧ Геня сюйӧма юрсӧ ӧдзӧс костӧд да вильыша видзӧдӧ ме вылӧ.
— Тэ век на тані? Да нӧшта и кывзысян?
— Ме ог кывзысь. Павелӧс виччыся.
— Нолтӧ, пырав да висьтав, мый нӧшта висьталіс Фрида Гавриловнаыс?
Геня пырис, пӧрччис шапкасӧ да пуксис.
— Нитш юр пӧ тэ, вот нӧшта мый висьталіс. Юрыд пӧ барабан кодь жӧ тыртӧм. Тэ пӧ некор он велав решайтны задачаяс. Быд классын пӧ кутан пукавны кык-куим во. А нёльӧд класс помалігӧн пӧ лоан гӧгйӧдзыд тошка. Тэ кодь ӧстӧлӧпсӧ пӧ ме некытысь на эг аддзыв.
— Тэ, Геня, зэв варов...
— А менӧ Фрида Гавриловна быд урок дырйи пельӧд нетшкис, — ошйысьыштіс Геня.
— Окотапырысь эска, — нюмъёвті ме. — Вай мун сэсся гортад.
— А Павел нёльӧд классас кык во жӧ кутас пукавны? — ӧдзӧс дорсянь нин юаліс Геня.
— Оз, — чорыда шуи ме. — Сійӧ помалас тэкӧд тшӧтш.
Геня эскытӧг нюмъёвтіс да петіс.
Эскытӧг видзӧдіс ме вылӧ и Павел.
— Тэ быд классын пукалін кык во?
— Эг, первой классын ӧти во.
— Ме ог кӧсйы, Павел, мед тэ нёльӧд классын велӧдчин кыкысь. Тэ ӧні он на бура куж решайтны задачаяс, но велалан. Понедельниксянь быд лун кутам решайтны задачаяс урокъяс бӧрын. А талун мун гортад...
Ме думышті велӧдны Павелӧс решайтчыны. Ог ёна надейтчы, но видлам. Заводитам первой класса задачниксянь.
Мыйкӧ ковмас думыштны и Генякӧд. Тайӧ кык детинкасӧ кӧ кужа босьтны киӧ, ставыс лоӧ бур. Дерт, сьӧкыдджык лоӧ Павелкӧд. Детинкаыслы топыда сюйӧмаӧсь мӧвп, мый сылӧн юр пытшкас нитш, и велӧдчӧм сылӧн оз артмы.
Мӧд луннас Павелӧс кольӧді урокъяс бӧрын. Бура, тӧлкӧн сёрнитім задача йылысь, тшӧкті решитны. Ачым петі учительскӧйӧ. Здук-мӧд мысти локті, видзӧда: Павел абу. Ёна шензьыны эг кут. Тӧді: задачаяс Павеллы зывӧкӧсь. Пасьтаси да муні гортас.
— Бара нин мыйкӧ вӧчис? — гажтӧма юаліс мудз синъяса Анастасия Ивановна, Павеллӧн мамыс, да ышловзис: — Ог нин и тӧд, мый сэсся вӧчны. Кыв оз гӧгӧрво, нӧйтны ог вермы. Батьыс вӧралӧ да дзонь вежонъясӧн гортӧ оз волывлы... Батьтӧгыс дзикӧдз вельмис. Ва ведра оз вай, пес моздор оз пырт...
— Нинӧм сійӧ эз вӧч, Анастасия Ивановна, — нюмъёвті ме. — Оз омӧля велӧдчы. Дерт, арифметика кузя слабджык, но ми талунсянь заводитім решайтчыны урокъяс бӧрын. И ме думайта — Павел суӧдас ёртъяссӧ, накӧд тшӧтш помалас нёльӧд класс. Кывзысьӧ сійӧ ӧні менсьым.
Павел шензьӧмӧн видзӧдліс ме вылӧ, паськӧдіс вомсӧ. Сэсся лэдзис видзӧдлассӧ улӧ. Тӧдчис: детинка шӧйӧвошӧма. Виччысис, кӧнкӧ, гым да чардби, а ме ошка сійӧс!
— Локті ме со мыйла: регыд ноябрь сизимӧд лун. Миян челядь мыйсюрӧ дасьтӧны праздник кежлас: сьылӧмъяс, йӧктӧмъяс. А вот струннӧй инструментъясӧн ворсӧм ог вермӧ котыртны. Сюрисны кӧ эськӧ балалайкаӧн ворсысьяс... Тэнад, Павел, шуӧны, эм балалайкаыс?
Павел гӧрдӧдыштіскодь:
— Эм...
— Нолтӧ, видзӧдлам...
Ме видлі, ворсышті, сэсся мыччи Павеллы:
— Петкӧдлы, мый кужан.
Дивӧ! Ме водзын лои дзик мӧд Павел. Кытчӧ воши зумышлуныс? Гудыр синъясыс, кажитчӧ, лоисны сӧдзджыкӧсь, вомдоръяссӧ вӧрзьӧдыштіс нюм. Павел ворсіс бура. Мамыс кывзіс, кывзіс да сэсся ышловзис:
— Ворсны тай кужӧ... Локтас школаысь да мӧдарӧ помӧн жель оз бергӧд, рытбыд брунӧдчӧ...
Павел пуктіс балалайкасӧ, букыштчис. И со ме водзын бара нин важ Павел: лёк, топӧдӧм вомдоръяса, синкымъяс увсянь видзӧдысь.
— Но, вот мый, Павел: вай босьт балалайкатӧ да ветлам школаӧ. Мунігмоз корам Геняӧс. Видлам репетируйтчыштны. Гашкӧ, мыйкӧ и артмас. А сы бӧрын, оз кӧ ло дыш, и задачатӧ решитам.
Павел эскытӧг видзӧдіс ме вылӧ. Ме тӧді сылысь думъяссӧ: «Ы тӧдлӧ, некутшӧм ворсӧм оз ло. Сетас задачник да пуксьӧдас рытбыд кежлӧ...» Но тыдаліс, кыдзи ӧзйисны синъясыс.
— Но, мый нӧ? Он кӧсйы? Жаль, а ме надейтчи, — кокньыдика ышловзи да мӧдӧдчи ӧдзӧслань.
— Ме... мыйла ог? Ме... ветла! — тэрмасьӧмӧн кутіс пасьтасьны Павел.
— Вот и бур. Мӧдім, сідзкӧ, — кутчыси ме ӧдзӧс вугйӧ да друг, быттьӧ вӧлисти дум вылӧ уси, бергӧдчи Павеллань: — Да, Павел, ме дзикӧдз вунӧдчи: тэныд жӧ колӧ вайны ва, пес пыртлыны. Сідзкӧ, вот кыдзи сёрнитчам: тэ ӧні отсыштан мамыдлы, а нёль час кежлӧ локтан школаӧ. Бур?
Шӧйӧвошӧм детинка довкнитіс юрнас.
Тайӧ лунсяньыс ми Павелкӧд быд рыт пукалім ӧтлаын. Частӧ брунӧдчим балалайкаӧн, но нӧшта частӧджык решайтчим. Павел дыр эз эскы, мый кутас кужны решайтчыны. Но со ми венім первой класса задачник, сэсся вуджим мӧд классӧ. Быд пӧрйӧ ме сюйи юрас мӧвп: Павеллӧн юрвемыс некодысь абу лёкджык. Вот думыштан бурджыка и аддзан: задачаыс дзик вӧлӧма прӧстӧй.
И кутшӧм ме вӧлі рад, кор дыр пукалӧм бӧрын Павел чеччыштас места вывсьыс да горӧбтас:
— Гӧгӧрвои, Николай Андреевич! Ӧні решита!
Ме юала, кыдзи сійӧ кӧсйӧ решитны, сэсся шуа: — Сідзи и эм. Молодец, Павел! А нолтӧ, видзӧдлы тайӧ задача вылас...
Тӧлысь мысти школаӧ воліс Анастасия Ивановна.
— Ог тӧд, кыдзи нин тэнӧ аттьӧавны, Николай Андреевич. Дзик мӧд лои пиӧй. Локтас школаысь, сёяс да котӧртас вала. Ваялас ушат тыр. Сэсся пес пыртлас, джодж чышкас — ставсӧ вӧчас. Сэсся бара на юалас:
«Нӧшта мый колӧ вӧчны, мамӧ, висьтав ӧдйӧджык. Вӧча да школаӧ муна».
«Мыйла нӧ, мися, быд рыт сэтчӧ мунан? — юала. — Дӧзмӧдчан ӧд, кӧнкӧ, Николай Андреевичыдлы? А сійӧ тшапа: «Ми занимайтчам! Первой класса задачаяс тӧлысь чӧжӧн ставсӧ решитім! Тэ видлы, кутшӧмджык! Ӧні мӧдӧд класса задачник нин помалам». Но, мися, он кӧ мешайтчы велӧдысьыдлы, ветлы школаад. А тӧрыт, Николай Андреевич, локтіс пиӧй дай шуӧ: «Вай, колӧкӧ, джоджтӧ мыська, тэ пӧ тай висян жӧ-а. Ми школаын быд субӧта асьным мыськалам и ӧшиньяс, и партаяс, и джоджъяс». Дивӧ дай сӧмын!
Ме нюмъёвті: дум вылӧ уси, кыдзи Павел медводдзаысь мыськис классысь джоджсӧ. Воис ӧчередьыс, да нырсӧ кӧрис: ме пӧ ог мыськы. Челядь шумитӧны, топӧдісны сійӧс. Мый сыкӧд вӧчан? Ме ысті челядьӧс гортаныс. Колим кыкӧн.
— Но, Павел, ми колим кыкӧн, — шуи ме. — Кӧть мый, а джодж ковмас мыськыны. Кыдзи тэ думайтан: тэ мыськан али ме?
Павел чӧв оліс.
— Мый нӧ, тэныд кӧ дыш, ковмас, буракӧ, аслым мыськыны...
Пырті таз, сэсся шоныд ва. Павел вылӧ видзӧдігтырйи ньӧжйӧник пуджи сосъяс, босьті рузумтор. Павел нетшыштчис:
— Ме ачым...
Тэрыба пӧрччысис, пуджис дӧрӧм сосъяссӧ, гач кокъяссӧ. Недыр мысти джодж вӧлі мыськӧма. Кӧть и эз вӧв вывті сӧстӧм, но ме век жӧ ошкышті:
— Бура мыськӧмыд. А ещӧ шуан: ог пӧ куж...
Уна ноксьыны ковмис Павелкӧд да Генякӧд. Арнас нин казялі: Геня воштӧ уна кад лыйсянторъяс вӧчӧм вылӧ. То лӧсьӧдас рогатка, то ньӧввуж, то пуысь вӧчас наган да заводитас лыйсьыны кӧрт тувъясӧн. Став тайӧ добрасӧ ме сылысь мырддялі. Но Геня эз шогсьы: мӧд лунас жӧ сы киын вӧлі выль ӧружие. Унаысь сёрнитлі Генякӧд, но ставыс весьшӧрӧ. Ковмис корны школаӧ мамсӧ.
— Полина Сергеевна! Ме ог тӧд, мый вӧчны Генякӧд: сійӧ быд лун вайӧ школаӧ выльысь-выль ӧружие. Сы вылӧ видзӧдӧны ёртъясыс. И миян школа кутіс лоны военнӧй лагерь кодь.
— Ме ог жӧ тӧд, мый вӧчны, Николай Андреевич, — шога шуис Полина Сергеевна. — Ме фельдшер-акушерка. Геня унджык кадсӧ гортын бабыскӧд. Мый колӧ, сійӧс и вӧчӧ.
— Колӧ мыйкӧ думыштны.
— Бать сылы колӧ, — тэрыба видзӧдліс ме вылӧ гырысь лӧз синъяснас Полина Сергеевна да мыйлакӧ гӧрдӧдіс. — Батьтӧгыс сылы гажтӧм. Детинкаыс сюсь да визув, вот и ноксьӧ сійӧн, мый кажитчӧ интереснӧй.
Ме сюсьджыка видзӧдлі Полина Сергеевна вылӧ: сэтшӧм сійӧ вӧлі том да... мича. Гажа лӧз синъяс, вӧсньыдик синкымъяс, мичаник руд кудрияс. Банбокъясыс югъялыштӧны, алӧй рӧмаӧсь. «Да тайӧ жӧ том ныв! — гӧгӧрвои ме. — Кытысь сылы дас ӧти арӧса пиыс?!» Ме Генялысь юалі, и сійӧ висьталіс: бать пӧ менам вӧлі геолог. Ӧти экспедиция дырйи пӧ пӧгибнитӧма. Тайӧс пӧ мам висьтавліс. Ме видзӧді Полина Сергеевна вылӧ, и эг эскы, мый сійӧ Генялӧн мам. «Быдтӧ кодлыськӧ», — бергаліс юрын мӧвп. Но юасьны эг кут: абу лӧсьыд.
— Ме гӧгӧрвоа, Полина Сергеевна. Тіян прӧст кад абу. Но пиыдкӧд сёрнитыштӧй стрӧгджыка. Сетӧй кутшӧмкӧ интереснӧй удж, лобзикӧн пилитчыны ли мый ли...
Полина Сергеевна кӧсйысис топӧдыштны Геняӧс. И збыльысь, сійӧ ёна отсаліс меным. Унаысь казявлі: гортса уджсӧ Геня вӧчӧма кыкысь. Дерт жӧ, Полина Сергеевна тшӧктіс, кӧнкӧ, гижны выльысь. Геня тӧлысь-мӧд эз вайлы школаӧ некутшӧм ӧружие. Но ӧтчыд, тӧвнас, ӧшиньсянь аддзи: челядь босьтӧмаӧсь Геняӧс кытшӧ, корӧны:
— Петкӧдлы, петкӧдлы...
Геня кыйкнитліс школа ӧшиньясӧ да мыйкӧ петкӧдліс. Урокъяс помасьӧм бӧрын тшӧкті Генялы кольччыны, сэсся кори:
— Петкӧдлы выль ӧружиетӧ, Геня.
Геня шӧйӧвошис, гӧрдӧдіс. Тӧдчис: жаль выльторйыс. Но воштысьны некытчӧ. Ышловзис да мыччис кӧрт ствола наган. Ствол бокас вӧчӧма розь. Тыдалӧ: зарадитны колӧ порохӧн, а сэсся истӧгӧн ӧзтыны порохсӧ.
— Нда-а, — довкйӧдлышті ме юрнам. — Бур штука. Ылӧдз лыйӧ?
Геня нинӧм эз шу.
— Гашкӧ, козьналан меным? А со тэнад эм, а менам абу. Тэ аслыд выльӧс вӧчан. Трубкаясыд эм на? Абу кӧ, ме верма сетны. Татшӧм трубкаясыс менам крӧватьын квайт кымын эм. Зэв уна наган позьӧ вӧчны.
Геня чӧв оліс. Ми дыркодь пукалім, думайтім. Сэсся ме шуи:
— Вот мый, Геня: тэ ӧні ветлы гортад, сёйышт, отсышт мамыдлы ӧттор-мӧдтор вӧчыштны. Сэсся волы татчӧ. Эм ӧти делӧ. Интереснӧй делӧ.
Ме видзӧдлі ӧдзӧслань да гусьӧник висьталі:
— Лӧсьӧдам ми тэкӧд электрическӧй звӧнок. Гӧгӧрвоан? Сідз лӧсьӧдам: со этійӧ часіыс ачыс кутас звӧнитны, кор ковмас.
Парсӧ курччӧмӧн Геня дзоргис ме вылӧ. Синъясыс ӧзйӧны.
— Часіыс... кутас звӧнитны?
— Да, — эскӧді ме. Сэсся петкӧдлі детинкалы электрическӧй звӧнокъяс, аккумулятор, проводъяс. Та бӧрын ысті Геняӧс гортас, тшӧкті локны вит час кежлӧ. Но нёль часын Геня вӧлі школаын нин.
— Водз локтін, Геня. Ме ӧні нинӧм на ог вевъяв вӧчны. Аддзан: урокъяс кежлӧ лӧсьӧдча.
— А ті ӧмӧй урокъяс кежлас гӧтӧвитчыланныд жӧ? — ёна чуймис Геня.
— А кыдзи нӧ? Тэ со гижан уджъястӧ вӧчин, а история кузяыд эн на и лыддьысь. Сідз? Геня (кымынысь ме сійӧс видлі таысь) чышкыштіс ныр увсӧ соснас, вештіс видзӧдлассӧ бокӧ.
— Пуксьы да лыддьысь, а ме сэк кості помала.
Урокъяс кежлӧ лӧсьӧдчӧм бӧрын ми кутчысим уджӧ. Босьтім патефонлысь важ пластинка, розьӧдлім сійӧс, кыті колӧ, крепитім истӧг тув кызта ыргӧн сутугаысь вӧчӧм спираль, паяйтім провод помъяссӧ да пуктім пластинкасӧ маятника часілы циферблат пыддиыс. Минутнӧй стрелка помӧ паяйтім сутуга тор, кытчӧ сюйим аллюминийысь вӧчӧм ичӧтик кӧлеса, коді стрелка вешйигӧн гӧгыльтчис ыргӧн сутуга вывті. Сэсся крепиталім звӧнокъяс: классӧ, учительскӧйӧ, коридорӧ, ывлаӧ. Нюжӧдалім проводъяс, йитім найӧс часікӧд да аккумуляторкӧд. Ноксим куим рыт. Отсасис тшӧтш и Павел. Но ми сійӧс сибӧдлім ас дораным сӧмын куим-нёль задача решитӧм бӧрын.
Коркӧ ставыс лои дась. Субӧта рытӧ матыстім часі стрелкасӧ «ӧкмыс» лыдпас дінӧ, пуксим да виччысям. Геня гӧрдӧдӧма, сувтлас да пуксьылас. Часі вылысь синъяссӧ оз вештыв. Стрелка ньӧжйӧник вешйӧ, сыкӧд тшӧтш гӧгыльтчӧ и алюминиевӧй кӧлеса. Со сійӧ инмӧдчис сійӧ местаас, кытысь вуштӧма сутугавывса изоляциясӧ, и тайӧ жӧ здукас проводъяс кузя мӧдӧдчис ток, гажаа триньӧбтісны звӧнокъяс. Геня лэбаліс учительскӧйсянь классӧ, классянь коридорӧ да ывлаӧ, горзіс:
— Звӧнитӧны! Ставыс звӧнитӧны, Николай Андреевич!
Кутшӧм рад лои Геня! Ме видзӧді сы вылӧ да радлі жӧ.
Тайӧ лунсяньыс Геня век мыйкӧ вӧчис: то паяйтіс, то нюкляліс спиртовка би вылын стекляннӧй трубкаяс, то вӧчис ва кӧлеса, то стружитіс указка, и, сё збыль, сылы дзик некор вӧлі вӧчавны наганъяссӧ. Буретш сійӧ лунъясас волісны роноса инспекторъяс, ошкисны школаысь сӧстӧмлун, бур пӧрадок. Ме кывзі найӧс да думайті: «Волінныд мед ті сентябрь тӧлысьӧ. Вот сэки эськӧ аддзылінныд «бур пӧрадоксӧ». Инспекторъяс шензьыштісны и электрическӧй звӧнокъяс вылӧ, торйӧн нин сы вылӧ, мый часіыс звӧнитӧ ачыс.
— Тані, ёртъяс, менам мыжыс зэв этша, — дорйыси ме да инді Геня вылӧ: — Со тайӧ вӧчис став уджсӧ, а ме сӧмын кытісюрӧ индалі.
— Кутшӧм Геня? Коді сійӧ сэтшӧмыс?
— Пионеръяслӧн начальник, менам веськыд ки. Ог тӧд, мый эськӧ ме сытӧг и вӧчи...
Геня, дерт, кыліс тайӧ сёрнисӧ. Тайӧ кадсяньыс, шензяна кӧть абу, а велӧдчан во помасьтӧдз ме сэсся эг аддзыв Генясянь некутшӧм пакӧсть.
Дерт, вӧліны радлунъяс, вӧліны и шогъяс.
Ӧтчыд Геня эз лок школаӧ. Мӧд луннас бара локтіс. Гажтӧм, рам. Быттьӧ абу и ачыс. Пыр гажа да вильыш руд синъясыс чусмӧмаӧсь весиг.
— Мыйла тӧрыт эн волы школаӧ, Геня? — юала сылысь.
Детинка немтор оз шу.
— Висин?
— Эг.
— Мыйла нӧ, сідзкӧ, эн волы? Чӧв олӧ.
Урокъяс бӧрын ме тшӧкті сылы кольччыны. Кор челядь муналісны, пукси орччӧн да юалі:
— Но, висьтав, Геня, мый лои... Геня лэдзис юрсӧ. Кык синва войт тёпкысисны парта вылӧ. И ме аддзи, кыдзи кутісны сыркъявны детинкалӧн пельпомъясыс.
— Но, нинӧм, Геня, нинӧм... Эн бӧрд. Ставыс лоӧ бур... — ме малышті Геняӧс юрӧдыс, ышловзи да сідзи, нинӧм тӧдмавтӧг, и лэдзи гортас.
Рытнас ветлі сиктпомса неыджыд керкаӧ. Геня эз вӧв гортас. Эз тыдав и мамыс.
— Но, мый нӧ, виччысьыштам, — шуи ме пельтӧмкодь пӧчӧлы. — Геняныд тай мыйкӧ тӧрыт эз волы дай талун зэв гажтӧм вӧлі.
— Геняыс? — ышловзис пӧчӧ. — Да ӧд, бур мортӧй, шогыс сылӧн ӧні мыйта... Бӧрдӧ, коньӧр, дугдывтӧг...
Менам мышкӧй, кыла, кӧдзаліс:
— Кутшӧм шог?
— Мамыс ӧд сылӧн, бур мортӧй, зэв сьӧкыда висьмис. Тӧрыт Геня больничаӧ нуӧдіс... Ог и тӧд, справитчас ли, оз ли...
Ме здукӧн пӧсялі. «Полина Сергеевна, дзоридз кодь ныв, сьӧкыда висьӧ!» — югнитіс юрын. Ме пукалі ем вылын моз, курччалі вомдоръясӧс.
— Ме эг тӧд... Ме весиг думыштны эг куж, — шӧйӧвошӧмӧн шуалі да думайті: «А Геня? Кутшӧмджык ӧні Генялы?»
Комнатаын кутіс кажитчыны жар. Ме тэрмасьӧмӧн прӧщайтчи пӧчӧкӧд, петі ывлаӧ. Сьӧлӧм вылын вӧлі сьӧкыд. Синъяс водзын сулалісны Генялӧн гажтӧм синъясыс. «Ӧтнас, пӧрысь пӧчӧкӧд, — думайті ме».
Ме восьлалі тӧвся туй кузя, горша лолалі кӧдзыд сынӧдсӧ да думайті, думайті. Кутшӧм частӧ ми, велӧдысьяс, видзӧдам сӧмын сы вылӧ, велӧдӧма-ӧ велӧдчысьыс уроксӧ. Мукӧдторйӧдзыс миян быттьӧкӧ делӧ абу. Унджыкысьсӧ ог тӧдӧ, мый велӧдчысьыслӧн сьӧлӧм вылас, ог зільӧ тӧдмавны, мыйӧн мортыс интересуйтчӧ, кутшӧм сылӧн шог либӧ радлун.
Мӧд луннас Геня бара эз во школаӧ, и рытъявылыс ме муні сы ордӧ.
Гырдмӧм синъяса Геня паныдаліс менӧ чӧв олӧмӧн.
— Вот мый, Геня, — гажаа шуи ме. — Аски вӧскресенньӧ. Вай корам колхозлысь вӧв да ветлам мамтӧ видлыны.
Геня лэптіс юрсӧ, шензьӧмӧн видзӧдліс ме вылӧ.
Детинка радпырысь сӧгласитчис. Мӧд лун асывводзнас ми рӧдтім нин дзуртысь туй кузя, кадысь-кадӧ чеччыштлім доддьысь да котӧртім: кӧдзыдыс эз сет вӧля куйлыны, а ме ещӧ яндыси пасьтавны малича, петі пальтоӧн.
Больничаӧдз вӧлі дас вит километр. Эг на вевъялӧ прӧйдитны джын туйсӧ — поводдя кутіс вежсьыны. Лои шоныдджык. Но сы пыдди дзик немтор эз кут тыдавны.
Кытыськӧ чӧртыс вайис турӧб, и сійӧ лышкыда кояліс ми вылӧ посни лым, емъясӧн моз бытшлаліс чужӧмӧ, эз сет видзӧдны водзӧ.
Но дырӧн ми воим больничаӧ. Полина Сергеевна видзӧдліс ми вылӧ, заводитліс нюмъёвтны, но нинӧм эз артмы, сӧмын ышловзис. Лӧз синъясыс кажитчисны вывті гырысьӧн. И сы мында наын тыдаліс дой, мый менам топавліс сьӧлӧмӧй.
Геня матыстчис мамыс дорӧ, дзебис кӧтасьӧм чужӧмсӧ сылы морӧсас. Куньса синъяса Полина Сергеевна малаліс писӧ юрӧдыс:
— Ставыс лоӧ бур, пиук, эн бӧрд...
Пырис томиник нывбаба, тыдалӧ, врач, шензьӧмӧн видзӧдліс ми вылӧ:
— Вевъялінныд нин локны? Ми дзик на ӧні звӧнитлім.
— Кытчӧ звӧнитлінныд? — юалі ме.
— Колхозаныд. Корим ыстыны вӧв: висьысьсӧ колӧ ӧні жӧ нуӧдны районнӧй больничаӧ операция вылӧ. Ми тӧрыт корлім хирургӧс, но сійӧ эз вевъяв локны. Талун корлім вертолёт, но, асьныд аддзанныд, поводдяыс дзугсис.
Геня лэптіс юрсӧ. Сылӧн гӧгрӧсмӧм синъясас вӧлі сы мында повзьӧм, мый ме кокньыдика тапкӧдышті мышкас, кыдз верми гажаа шуи:
— Эн пов, Геня! Со врачыс шуӧ: колӧ пӧ вӧчны неыджыд операция. И ставыс зэв бура прӧйдитас...
Ме тӧждысьӧмӧн видзӧдлі врач вылӧ. Врач гӧгӧрвоис менӧ, висьталіс:
— Да, да, нинӧм ӧпаснӧйыс абу... Вай мӧдӧдчӧй.
Сестра отсӧгӧн Полина Сергеевна пасьтасис. Петкӧдім ывлаӧ, водтӧдім рӧзвальни- доддьӧ, гартім шоныд эшкынъясӧн. Гырдмӧм синъяса Геня пуксис доддьӧ, босьтіс вӧжжи.
Куим вежон мысти ми Генякӧд бара ветлім районнӧй центрӧ: вайӧдны Полина Сергеевнаӧс гортас. Кор пырим больничаӧ, нывбаба вӧлі пасьтасьӧма нин.
— Видза оланныд, Полина Сергеевна!
— Мам! — Геня уськӧдчис Полина Сергеевналы сьыліас. Сылӧн ыпнитісны банбокъясыс.
— Петкӧдны тіянӧс доддьӧ? — нюмъёвті ме. Том нывбаба гӧрдӧдіс нӧшта на ёнджыка.
— Аттьӧ. Кыдзкӧ ачым нин...
— Мунамӧй, сідзкӧ...
— Мунамӧй! — чеччыштіс Геня.
Полина Сергеевна долыда нюммуніс алӧй паръяснас, и сылӧн нюмысь ёнтыштіс менам сьӧлӧмӧй.
Вӧв шойччӧдӧм бӧрын мӧдӧдчим гортлань. Полина Сергеевна бергӧдчыліс мелань да юаліс:
— А еджыд партаясыд, Николай Андреевич, эз на лякӧссьыны чернилаӧн?
Колӧ висьтавны: каникулъяс дырйи ми став партаяссӧ мавталім белилаӧн.
— Мый ті! Кыдзи нӧ лысьтасны челядь лякӧсьтны лым еджыд партаяс, кор найӧс краситісны белилаӧн асьныс да бать-мамныс!
Сёрнитігтырйи рӧдтім водзӧ. Ми костын пукалысь шуда Геня бура шоналіс да унмовсис. Ме видзӧдлі мама-пиа вылӧ да бара эг эскы, мый найӧ мама-пиа: ньӧти абу ӧткодьӧсь.
— Полина Сергеевна, — ньӧжйӧник шӧпниті ме, — меным мыйлакӧ кажитчӧ: Геняыс абу тіян пи.
— Мыйла нӧ сідз думайтанныд?
— Вывті нин тэ том.
Полина Сергеевна серӧктіс, но нинӧм эз шу.
— Кор пӧгибнитіс Генялӧн батьыс? — гусьӧник юалі ме.
Ныв видзӧдліс узьысь детинка вылӧ да ышловзис:
— Генялы вӧлі сӧмын на кык арӧс...
— Сылӧн батьыс — геолог?
— Да. Муніс экспедицияӧ и бӧрсӧ эз во. Геня — менам чойлӧн пи. Кагасӧ чужтӧм бӧрын чой куліс.
Писӧ быдтіс мам (меным сэк вӧлі дас куим арӧс), а сэсся ме.
Полина Сергеевна сьӧкыда ышловзис.
Воим гортӧ. Пырим Полина Сергеевнаяс керкаӧ. Геня нуӧдіс конюшняӧ вӧв, а Полина Сергеевна пуктіс самӧвар. Ме видзӧді нывлӧн лӧсьыдик туша вылӧ, тэрыба вӧрысь кияс вылас. Сьӧлӧм вылын шоныд, лӧсьыд. Окота сьывны, окота топӧдлыны Полина Сергеевналысь кисӧ, висьтавны сылы мыйкӧ меліӧс, бурӧс.
Колис бӧрӧ тӧв, воис тулыс. Воис и сійӧ луныс, кор школаӧ медбӧръяысь волісны нёльӧд класса велӧдчысьяс. Зэв гажаа юим чай. Сэсся ме сёрнитышті челядькӧд:
— Вот ті и помалінныд нёльӧд класс. Сэсся кутанныд велӧдчыны орчча сиктын, но ассьыныд школатӧ эн вунӧдӧй, частӧджык пыравлӧй. Кутанныд висьтавлыны меным, кыдзиджык велӧдчанныд. Меным зэв окота лоӧ тӧдны, кыдзи ті кутанныд сэні велӧдчыны да овны. Зэв ёна ӧбидитча, он кӧ ті кутӧй пыравлыны ме дорӧ. Ме зэв рад, мый бура помалісны школасӧ и Геня, и Павел... Уна задача ми решитім Павелкӧд, ӧні сійӧ некодысь оз лёкджыка решайтны. Ёна отсасис меным Геня, уна буртор вӧчис.
Друг ме шензьӧмӧн казялі: Геня лэдзис юрсӧ да кутіс частӧ кыскыштавны нырнас сынӧдсӧ. Павеллӧн доршасис синваыс. Сэсся и мукӧдъяс тшӧтш вевттисны чужӧмъяснысӧ. Нывкаяс найӧ бӧрдісны яндысьтӧг.
— Но, мый нӧ ті? — зіли серӧктыны ме. Но кылі: аслам горш дінӧй гӧрддзассис, лои сьӧкыд лолавны.
Сё збыль, ме муртса эг бӧрддзы, и ӧдва верми ньылыштны горш дінӧ сибдӧм курыд ёкмыльсӧ. Нокси, нокси челядькӧд во чӧж, унаысь дӧзмылі, унаысь скӧрмылі. Но со, ковмис торйӧдчыны, и синваыд петӧ. Жальӧсь, сьӧлӧм чепӧльтмӧн жальӧсь...
