МЕДБӦРЪЯ ЧИГАРКА

Пырис Коля. Ме вӧчи скӧр чужӧм да кори сійӧс ас дінӧ:

— Нолтӧ, пиӧ, волы матӧджык!

Пи шензьӧмӧн видзӧдліс ме вылӧ матыстчис.

— Тэ, зырымбедь, шуӧны, куритан? — синкымъясӧс ӧшӧдӧмӧн кыдз позьӧ скӧрджыка юалі ме да пуркниті пилы чужӧмас табак тшын.

— Коді шуӧ? — ыдждӧдіс руд синъяссӧ Коля.

— Батур Вань Марья аддзылӧма...

— Батур Вань Марья? Сылӧн аслас Егорыс куритӧ! — кыпӧдіс нор гӧлӧссӧ пи.

— Гугӧдлы зепъястӧ, — довкниті ме юрӧн. Пи букыштчис да заводитіс ньӧжйӧник гугӧдны гач зепсӧ. Гугӧдіс джынйӧдзыс кымын, сэсся синкым увсяньыс видзӧдліс ме вылӧ да вештіс синвидзӧдлассӧ бокӧ.

— Но мый нӧ он гугӧд? Полан, мед табакыд оз киссьы?

Ме бура видзӧдлі гач зеп вурысъяссӧ. Мыйкӧ эм! Лыа али табак? Копыртчи да исышті. Сэсся веськӧдчи, тэрмасьӧмӧн весалі нырӧс, но вӧлі сёр нин: менам вомӧй ньӧжйӧник паськаліс, нырӧй кӧрсис, синъясӧй ыдждісны, и друг ме тэрыба апниті сынӧдсӧ да, водзлань нетшыштчӧмӧн, сэтшӧм чорыда несйи, мый Коля чеччыштіс бокӧ. Кӧсйи висьтавны: «Сюрин, пиӧ, зептад табак вӧлӧма!», но эг вермы: бара зэв чорыда несйӧдіс, да сэсся заводитіс помся несйӧдлыны. Гӧтыр вевъяліс нин пузьӧдны самӧвар, а ме, пӧсялӧма, гӧрд, кокъясӧн зымӧдӧмӧн да акайтӧмӧн, сӧмын несъяла да несъяла. Верми сӧмын кадысь кадӧ ёрччыштны да петкӧдлыны пилы кулакӧс.

Медбӧрын ме чышкышті синваӧс да шуи:

— Но, вот мый: талун ме тэнӧ ог нӧйт. Надейтча, мый сэсся некор он босьтлы вомад чигарка. Но видзӧд: казяла кӧ вомсьыд либӧ зепсьыд табак дук — кутӧ куля! Гӧгӧрвоин?

— Енмӧй видз, кутшӧм челядь! — ружӧктіс паччӧр вывсянь менам пӧрысь мам. — Витӧд классын велӧдчӧ, а куритӧ! Он-ӧ нин батьыд моз сизим арсянь курит?

Ме дӧзмӧмӧн видзӧдлі паччӧр вылӧ:

— Коді сизим арсянь куритіс? Тэ, мам, нинӧм абусӧ эн сёрнит!

— Чӧв нин, Микулай! Батур Вань керкаысь став нитшсӧ шедӧдлінныд да куритінныд. Быд рыт вӧлі тэнӧ ньӧрйӧн вайӧда гортӧ...

Пи менам чошнитіс пельяссӧ, синъясыс долыдпырысь югнитісны. Нюмъёвтіс и гӧтыр.

Меным зэв эз ло лӧсьыд. «Вот и велӧд сэсся питӧ! — скӧра думышті ме. — Казьтылӧны, мый оз ков...»

— Тэ, мам, сералан, а детинкаыс збыль думайтӧ! — сямми шуны ме, сэсся содті кыдз позьӧ тӧдчӧдӧмӧнджык: — Кутшӧм ті гӧгӧрвотӧм йӧз...

Ужнайтӧм бӧрын воді да юр кушмытӧдз думайті: мый вӧчны? Нӧйтӧмнад нинӧм оз артмы, ас серти тӧда. Бать эськӧ и вурлас жӧ вӧлі тасманас, да эг шыбит куритӧмтӧ. Гусьӧн куриті. Бать сэсся шуис: сотас пӧ керкатӧ, мед пӧ эрдын куритӧ. Ӧти кӧшельысь кутім шпуткыны. Ок, и радлі жӧ ме сэки! Ӧні эськӧ и каитча жӧ, да сёр нин. Водіг да чеччиг со кызӧдан-керасян, син бугыльясыд муртса оз петны.

Дыр бергалі бок вылысь бок вылӧ, мӧвпалі пи йылысь. Кӧть быд рыт сылы доль, мый куритӧм — лёктор, но ачым кӧ кута куритны — мича сёрниясыд весьшӧрӧ вошӧны. Нӧйтӧмыд оз жӧ отсав. Дыр думайтӧм бӧрын сьӧкыда ышловзи: колӧ шыбитны, пи вӧсна колӧ шыбитны куритӧмӧс...

Асывводз чеччи да, кыдз и век, час джын мында «кераси», сэсся и шуи пилы:

— Бабыд тӧрыт сераліс: сизим арӧссянь пӧ курита... Кха-кха-кха... Ылӧдчӧ, пӧрысьыд! Талунсянь сэсся, пиӧ, вомӧ ог босьтлы чигарка и тэныд ог тшӧкты. На, шыбит табак кӧшельсӧ пачӧ!

Коля чуймӧмӧн видзӧдліс ме вылӧ, босьтіс табак кӧшель, нӧшта ӧтпыр бергӧдчыліс мелань да вувзис биӧ.

Сёйыштім. Коля муніс школаӧ, а ме сюйи киӧс зептӧ табак кӧшельла, сэсся кватитчи, мый кӧшель ӧні кымӧръяс сайын нин лэбалӧ, да гажтӧма ымӧсті. Куритны вӧлі зэв окота. Скӧракодь видзӧдлі нюмъялысь гӧтыр вылӧ, пасьтаси да муні ферма стрӧитанінӧ.

Лун джынсӧ терпиті, эг курит. Ёртъяслы висьталі: мися, морӧсӧ бытшкӧ, ог вермы куритнысӧ. А аслам дулльӧй петӧ.

Ӧбедайтӧм бӧрын бара окота лои кыскыштны табак тшын — кӧть бӧрд. Весиг кынӧм пытшкӧсӧй гудрасьны кутіс. Ёрччигтырйи муні удж вылӧ да медводдза мортыслысь жӧ кори:

— Вай, другӧ, куритӧд!

— Морӧсыд оз нин вись?

— Кокниджык тай лои...

Тіралысь киясӧн гаровті чигарка да сэтшӧм горша апышті тшынсӧ, — синъясӧй пемдылісны. Сэсся бара рытӧдз терпиті. Гортӧ вои скӧр. Коля сюся видзӧдіс ме бӧрся.

Ужнайтӧм бӧрын воді. Некыдз эг вермы унмовсьыны, думайті бур йӧз йылысь, кодъяс водӧм водзвыланыс лӧзӧдтӧдзныс куритісны, дай войнас на куим-нёльысь гаровтласны майӧг кодь чигарка. А ме татшӧм шудсӧ сэсся кувтӧдз нин ог аддзыв.

Мӧд луннас садьми водз. Кыдзи век, дыр «кераси» да пальӧді ставсӧ. Луныс вӧскресенньӧ вӧлі. Ӧттор-мӧдтор вӧчи гортын, а ачым век табак йылысь думайта. Петалі кильчӧ дорӧ: оз-ӧ, мися, сюр чигарка пом, но немтор эг аддзы. Ӧтикӧс эськӧ и кыпӧдлі жӧ, но уль лым вылад дзикӧдз нёдздӧма вӧлі. Исышті да шыбиті бӧр. Сэсся кӧрт тувла быттьӧ лэччылі магазинӧ да кори папирос пачка. Сьӧлӧм лои местаын.

Сӧмын вот кӧні чӧсмасьыштны? Пиӧй пыр кыйӧдчӧ. Йирк вылӧ кайны абу окота. Керкаын — тшын лоӧ. Кильчӧ вылӧ петны бара жӧ оз позь: сэні пи ноксьӧ конькиӧн, даддьӧн. Недыр думайтыштӧм бӧрын гӧгӧрвои. Восьті пач труба, сюйи юрӧс пач вомӧ, ӧзті папироска да чӧскыдпырысь апниті вом тыр тшын.

Друг воссис ӧдзӧс. Пырис Коля.

— Батьӧ, тэ кӧрт тувъястӧ катін?

Ме вевъялі сюйны ӧзйысь папироскасӧ гач зепӧ да кыскыны юрӧс пач вомысь.

— Каті, со пызан вылас...

Пи шензьӧмӧн видзӧдліс ме вылӧ:

— Нырыд са... Пач пытшкас пыралін али мый?

— Видзӧдлі тай, уна-ӧ саыс трубаас чукӧрмӧма, — веськодьпырысь шуи ме да тӧждысьӧмӧн содті: — Колӧ весалыштны трубасӧ...

Веськыд кок гач зеп весьті кутіс прамӧя шонавны. Ме сюйлі киӧс зеп пытшкӧ да тэрыба бӧр кыски: гач пытшкын лоӧма пӧжар.

А пи тэрмасьтӧг ӧтиӧн-ӧтиӧн босьталіс пызан вылысь кӧрт тувъяс. Ме ымӧсті: лядьвейӧс кутіс сотны.

Коля шензьӧмӧн бара видзӧдліс ме вылӧ. Ме куті жӧдзны места вылын, сэсся эг вермы терпитны да горӧді:

— Но, мый нӧ сэсся вугыртін пызан дорас? Труба тай, мися, колӧ весавны! Лысла ветлы!

Коля повзьӧмӧн видзӧдліс ме вылӧ да уськӧдчис ӧдзӧслань. Мыйӧн саялі ӧдзӧс сайӧ, ме ӧдйӧ пӧрччи ватнӧй гачӧс да заводиті зіля кусӧдчыны. Еджыд гачысь бисӧ кусӧді ӧдйӧ, но вот ватнӧй гачнад ёна мучитчи: ӧтилаті кусӧда, а мӧдлаті бара нин тшыналӧ. Вошті терпениеӧс да бувкниті-кисьті ватнӧй гач вылӧ ведра ва. Сӧмын сэки тӧрыт на ньӧбӧм гач дугдіс тшынавны.

Пырис гӧтыр. Аддзис, мый керка тыр тшын, джодж пасьтала ва, а ачым сулала еджыд гача, да шӧйӧвошӧмӧн швачнитіс аслас бокъясас:

— Мый нӧ, Микулай, лои?

Ме зумыша видзӧдлі гӧтыр вылӧ да немтор эг шу.

Да и мый шунысӧ? Гачӧ артмӧма кулак тӧрмӧн розь, а тайӧн ошйысьны пӧрнӧй мортлы кыдзкӧ абу лӧсьыд.

Гачӧс сотӧм бӧрын гӧгӧрвои: гусьӧн куритны он вермы. Эрдын куритны бара жӧ оз позь: кыв сеті. Ог кӧ ло аслам кыв вылын кӧзяин — мый кутас думайтны ме йылысь пиӧй? Кутшӧм сэки лоӧ менам авторитет?

И кутчыси. Мучитчи тӧлысь, ветлӧдлі зумыш, скӧр, но эг кув. Велалі, ёртъяс, куритчытӧг овны!

Сэсянь коли сизим во. Пи менам помаліс средньӧй школа, ӧні уджалӧ колхозын трактористӧн. Оз курит. Ме ог жӧ. И верма ошйысьыштны: асывводзьясын ӧні ог «керась», дай лолавны лои кокни. Он веритӧй?

А ті видлӧй асьныд — сэки веританныд.