ДЖЕНЬЫД ВЕЖОН

Тювгунов Педӧр талун бара асывсяньыс зэв зіля уджаліс. Звӧнитчаліс ӧтилаӧ-мӧдлаӧ, варовитіс, кодкӧд колӧ и оз ков. Сэсся чай юис.

Та бӧрын дыркодь шаракыліс бумагаясӧн. Ӧтилаӧ мыйкӧ пасъяліс, кымынӧскӧ вурис папкаӧ, мукӧдсӧ шыблаліс кӧрзинаӧ.

Кад мунӧ, удж — тожӧ. Дыр да чӧскыда пажнайтӧм бӧрын, дерт, вугрӧдлӧ. Но кӧні нӧ узьыштас уджалан кабинетас? Весиг водыштлынысӧ некытчӧ.

Тювгунов бара чай пузьӧдіс. Юис чашка куим-нёль. Унзільыс воши. Босьтіс кроссворд. Но тайӧ пӧрйӧ сьӧкыд веськаліс: кымынкӧ кыв сӧмын и тӧдмаліс. Педӧр шыбитіс сійӧс да видзӧдліс часі вылӧ. О-о, мый дыра на колӧ уджавны! Кытчӧ эськӧ воштыны кадсӧ?

Син улас уси календарь. Тювгунов дзоргыштіс сы вылӧ, сэсся босьтіс ручка. Сідз, вежоннас сійӧ уджалӧ вит лун, кыксӧ шойччӧ. А кымын лун шойччӧ во чӧжнас? Вӧлӧмкӧ — сё нёльӧс. Абу уна. Дерт, шойччан лунъяс кындзи эмӧсь на праздникъяс. Содтам отпуск — кызь нёль лун.

Педӧр ӧзйис да зіля артасис водзӧ. Артмис сьӧлӧм бурмӧдана лыдпас: вонас сійӧ шойччӧ нёль тӧлысь да джын!

Тайӧ, дерт, абу этша. Но ӧд позьӧ вӧчны бурджыка! Мыйла нӧ эськӧ не лӧсьӧдны, шуам, вежоннас кык уджалан лун? Кык лун мырсян, а витсӧ шойччан. Удждонсӧ, дерт, важсӧ кольны. Сійӧс колӧ весиг содтыштны: ӧд вит лун шойччигад сьӧмыд унджык ковмас!

Пырис отделӧн веськӧдлысь Вертепов.

— Век уджалан?

— Мудзи талун, — ышловзис Тювгунов.

— Нинӧм. Ӧні шойччам тӧлысь кымын...

Тювгуновлӧн калькаліс вомыс.

— Отделнымӧс бырӧдӧны: перестройка! — ышловзис начальник. — Весьшӧрӧ пӧ нянь сёянныд. Тэа-меалы удж колӧ корсьны...