ТӦРГӦВЕЧ

Картупельторнад колхозникыдлы вузасьыштны, дерт, колӧ. Тайӧс ме, кыдзи председатель, бура гӧгӧрвоа. И вузасьыштны ветлӧмысь некодӧс ог кут: воштас колхозникыд тӧлысьнас лун либӧ кыкӧс — сійӧ нинӧм. Дерт, мунлывлӧны и юасьтӧг, да мый нӧ вӧчан, лоӧ терпитны. Ачым ме эг на пробуйтлы вузасьнысӧ, сідзи и тӧргӧвля восьтывтӧг, колӧ чайтны, и кулі эськӧ, эз кӧ вӧв менам тӧлка гӧтырӧй.

Ӧтчыд, шуӧ, ачыд ветлы вузасьнысӧ. Картупель, шуӧ, сідзжӧ рушмас, вузав, шуӧ, мешӧк-мӧд.

Ме эськӧ и пыкси жӧ: мися, абу мича председательыдлы мешӧкъясӧн кыскасьны. Но гӧтырыдкӧд этша вензян: тэн жӧ, шуӧ, зэв лоӧ пӧлезнӧ ветлынысӧ, тӧдны кутан, кыдзи-мый ми ветлам-вузасям.

Бӧрд кӧть сьыв, а ковмис ӧд мӧдӧдчыны!

Вӧскресенньӧ лунӧ чеччи водз и лэччӧді вадорӧ ведра йӧв да кык мешӧк картупель.

Пароход менам абу, сы вӧсна грузиті неыджыд пыжӧ да йӧткыси катыдлань.

Ассьым тӧргӧвӧй судноӧс ме сувтӧді пристань горулӧ да куритчигмоз куті виччысьны, кодъяскӧ оз-ӧ чепӧсйыны ведраясӧн да мешӧкъясӧн менам пыж дорӧ. Пачка джын папирос куритны вевъялі, а некод эз и матыстчыв. Оз ли мый ли тӧдны, мый колхозса председатель Чипляков ёрт ачыс локтіс тӧргуйтны!

«Ладнӧ, — думайта, — пырала кутшӧмкӧ катер вылӧ». Пыралі. Ньӧбисны ведра картупель да кык кружка йӧв. Сьӧлӧм вылын долыдджык лои. Ме кӧсъя нин вӧлі кавшасьлыны мӧд катер вылӧ, но пристаньын друг гораа тутӧстіс еджыд пароход.

«Картупель, тыдалӧ, корӧны», — радпырысь думышті ме да куті шенасьны шапкаӧн.

— Локта, дзик пыр локта!..

Ме лэпті кыкнан мешӧкӧс да упкигтырйи мӧдӧдчи пароходлань. И збыльысь, пароходвывса еджыд фартукъяса нывъяс мешӧк картупель менсьым ньӧбисны.

«Йӧвтӧ кӧ вая, — тайӧ бур нывъясыс ведранас и ставнас ньӧбасны», — югнитіс юрын долыд мӧвп.

Ме тэрмасьӧмӧн бӧр котӧртлі пыж дорӧ.

— Йӧ-ӧ-ӧв! — гажаа горӧдіс пароход, сэсся кыкысь вӧсньыдика чипӧстіс: — Йӧв! Йӧв!

Ме кватиті ведраӧс да писькӧдчи пароход вылӧ. Фартука нывъясӧс ме корси дыркодь. Медбӧрын аддзи. Пароход мыйкӧ бара тутсіс, но ме зіля тӧргуйті, лыдди сьӧм, и тутсӧмыд мен вӧлі дзик веськодь.

Тӧргуйтыштӧм бӧрын пӧсьӧс чышкалігтырйи пыри буфетӧ шойччыштны-закуситыштны. «Мӧд мешӧк картупель ещӧ вузала, и сьылігтырйи кывта гортӧ», — пӧсь шыд панялігмоз думайті ме.

Закуситыштӧм бӧрын сувті да папироска ӧзтігмоз видзӧдлі ӧшиньӧ. Но сюра лешакӧ! Мый нӧ тайӧ? Мыйкӧ тай нӧ гӧгӧр ва?

Ог-ӧ нин мунӧ? Кватиті кепкаӧс да уськӧдчи петанінлань:

— Эй, нӧрӧвитлӧй! Кытчӧ нӧ ті? Ме жӧ эг на пет!

Пассажиръяс гажаа серӧктісны.

— Косӧдлы! — килькъяліс кодкӧ.

Ме котӧрӧн лэбовті капитан дінӧ.

Капитан шевкнитіс кияснас:

— Зэв жаль, но ми вӧрзим час джын сайын, косны некыдз ог вермӧй.

Мый сэсся вӧчан?! Пукси картупель мешӧк вылӧ да муртса эг бӧрддзы. И йӧзсьыс тшӧтш яндзим, кӧть мешӧкад пыр. Быдса час пукалі да сьӧкыда ышлолалі.

Медбӧрын пароход сувтіс. Петігӧн менсьым заводитлісны жӧ эськӧ корны билет, но ме сэтшӧм шум кыпӧді, палуба вывсянь капитаныс нюмъялігтырйи ӧвтыштіс кинас:

— Лэдзӧй тӧргӧвӧй мортсӧ!

Петі да думайта: кытчӧ воштыны картупель мешӧкӧс? Бӧр гортӧ ог жӧ ну! Ачым кӧ воа дзоньвидзаӧн, сійӧ нин зэв бур. Коли ме картупель мешӧктӧ берегас. Чӧрт сыкӧд, думайта, и картупельыскӧд. Быгыльті берегысь куим кер, топыда кӧрталі найӧс сутугаӧн. И со нин шома йӧв юигмоз кывта. Вои асланым сикт весьтӧдз, кокньыдика ышловзи да зіля йӧткыси береглань. Пур тювгысис водзӧ, а зіб сибдіс. Вот, ерӧмаканьыд! Мый вынсьым нетшышті сійӧс да зібнас и ставнас шнёпкыси пур вылӧ. Ведра да ботинки пӧв тёльскысисны ваӧ. Но и чӧрт накӧд! Ботинкиыс эськӧ коркӧ киссис, а ведраыс сімны жӧ нин вӧлі лӧсьӧдчӧ.

Шондіыс вылынкодь нин вӧлі, кор став тӧргӧвӧй делӧяс лючки-ладнӧ помалӧм бӧрын ме пыри гортӧ.

Гӧтыр и шуӧ:

— Видлін, кутшӧмджык миян тӧргуйтӧмыс? Важӧн колӧ вӧлі тэнӧ ыстывны...

Вузасьны ветлӧм йылысь ме доложиті правлениелы. Гӧгӧрвоисны менӧ. Индісны специальнӧй мортӧс, коді став лишаланторсӧ колхозникъяслысь ӧні нуалӧ базар вылӧ.