ТОМ СЬӦЛӦМЪЯС
Повесть
1
— Чеччы, пиӧй, — шыасис, кылӧ, мам. — Педӧр другыд важӧн агсасьӧ.
Ме дӧзмӧмӧн ымӧсті, сюйи юрӧс пӧдушка улӧ.
— Чеччы, самӧвар пузьӧма... — бара шыасис мам.
Нинӧм он вӧч. Сьӧкыда ышловзи да восьті синъясӧс.
Тӧрыт ныр вылӧ усьтӧдз ворсім мачӧн, гортӧ пырим шонді петӧм бӧрын. «Узьыштнытӧ оз сетны, — ӧні думышті ачым. — Эг на вевъяв прамӧя унмовсьны, бара нин колӧ чеччыны».
Трусик кежысь петі кильчӧ вылӧ. Яръюгыд шонді эз лэдз восьтыны синъясӧс, но век жӧ аддзи: Васьӧ вок ноксьӧ автомашина моторӧн, чой вайӧ ведраясӧн ва.
— Унмыд локтӧ? — юаліс Таня.
— Локтӧ, дерт, — очсышті ме.
— Пальӧдыштам...
И друг ыркмуні менам сьӧлӧмӧй: чой бузнитіс юр вылам кӧштыр йиа ва. Лёк горшӧн горӧді да шыбитчи бокӧ. Кӧсйи чойӧс асьсӧ буриника пожйыштны, но сійӧ пышйис керкаӧ.
Кӧдзыд ва здукӧн пальӧдіс унмӧс. Лои ыркыд. Тушаӧс, кажитчӧ, зэвтісны кутшӧмкӧ пружинаяс. Чой мыччис ӧшиньӧд еджыдруд кудриа юрсӧ:
— Лӧсьыд?
Ме петкӧдлі сылы кулакӧс.
Чай юигӧн пырис Володя — шӧркодь тушаа, мугӧм чужӧма, пемыдруд гажа синъяса том морт.
Ме йӧжгыльтчи: «Бара агсасьны ыстас!»
Володя — миян бригадир дай колхознӧй комсомольскӧй организацияса секретарь. Ме полыштікодь сыысь. Комсомолӧ ме пыри тулыснас на и ӧні учёт вылын сулала колхознӧй организацияын.
— Антоновна! — Володя шыасис мам дінӧ. — Мунігмозыд пилорама дорысь гӧрбыльяс тракторнад нуан. Степан дядь кутас силос гу цементируйтны. Колӧ формасӧ лӧсьӧдны...
Мам довкнитіс юрнас.
— А тэ, Танюша, картупель пуктыны... Но, а Питиримлы агсасьны ковмас. Бур?
— Рытсяньыс нин лӧсьӧдчӧ, — серӧктіс Таня.
Ме букыштчылі сы вылӧ, но нинӧм эг шу, кӧть эськӧ шондіа луныс гажтӧмӧн кутіс кажитчыны. Бара агсасьны! Куим лун сайын на помассисны экзаменъяс, и мӧд лун нин агсасьны! Мортыс помаліс сизимӧд класс да, гашкӧ, кӧсйӧ кӧть ӧти лун шойччыны. А, гашкӧ, оз во сьӧлӧм вылас тайӧ уджыс?! Мам со эжа кульӧ быд лун, вок — шофёр. Таня — картупель пуктӧ, а менӧ мыйла сюйӧны быдлаӧ? Колхозыс метӧг оз вермы овны ни ӧти лун ли мый?
Мам сьӧкыда ышловзис:
— Ог тӧд, мыйла тэ, Питирим, сэтшӧм дыш! Ӧти лун на агсасин, а...
— Дыш? — чуйми ме. — Мый тэ, мамӧ? Ме рад... кӧть лун и вой агсася.
Таня вильыша видзӧдліс ме вылӧ руд синъяснас.
— Питирим — абу дыш, — петігмозыс шуис Володя. — Тӧрыт зэв бура агсасис...
Ӧдзӧсӧ бритӧм юрсӧ сюйис ичӧтик тушаа, сю мешӧк кодь кыз Степан дядь, мамлӧн вокыс, вӧрӧдыштіс еджгов уснас:
— Он на доддяв вӧвтӧ, Галя?
— Пырав, Степан! Аттӧ тайӧ морт! Век тэрмасьӧ... некор оз эшты.
Степан дядь пырис.
— Вайышт, сідзкӧ, ырӧштӧ, Танюш. — Сійӧ чышкыштіс дон плеш вывсьыс пӧсьсӧ. — Сола чери сёйи, да горш косьмӧ...
Кӧдзыд ырӧш юӧм бӧрын Степан дядь мӧдӧдчис ӧдзӧслань.
— Мунам, чойӧй, мунам. Кадыс оз виччысь...
Мам петіс сы бӧрся.
Пель чунӧдмӧн гораа сярӧбтіс тракторлӧн «пускач». Вынӧн заводитіс ургыны моторыс. Мам нюмъёвтӧмӧн ӧвтыштіс миянлы кинас, и трактор муніс. Степан дядьлӧн бритӧм юрыс тыдаліс трактор додь вылысь.
Степан дядьӧс ме радейта да частӧ ветлывла сы ордӧ. Бать менам абу: кык во сайын кулі. Мам шуӧ: война дырся ранаясыс пӧ сюйисны батьнымӧс гуӧ.
Сёйыштӧм бӧрын ме ветлі конюшняӧ, босьті ассьым Каркоӧс, мӧдӧдчи Ыджыд шор сайӧ.
Правление дорті мунігӧн сувтовкери. Правление кильчӧ вылын тыдаліс седлӧ: зэв мичаник, кокньыдик. Дерт, тайӧ либӧ Сергей Ивановичлӧн, председательлӧн, либӧ Володялӧн. Но мыйла кильчӧ вылын?
Ме синбӧжнам видзӧдлі первой седлӧ вылӧ, сэсся правлениелӧн восьса ӧшинь вылӧ, зіли гӧгӧрвоны: кодлы лӧсьӧдӧма тайӧ седлӧсӧ?
— Алло, аэропорт? — кыліс восьса ӧшиньсянь. — Тайӧ «Югыд туй» колхозса председатель Попов. Вот мый, тӧварыш: вай ыстылӧй талун самолёт. Да, да, ваыс ямис, став баддьыс эрд вылын. А? Да, да, вежӧдӧны. Буретш кад пызйыны... Да, пӧжалуйста... Но, вот и бур...
«Кутшӧм самолёт? — эг гӧгӧрво ме. — Кутшӧм бадь?» Ышловзи: йӧзыс со самолётъясӧн лэбалӧны, а ми вокыслы весиг прӧстӧй седлӧыс абу.
Кӧсъя нин вӧлі лэччывны Карко вылысь да видзӧдлыны седлӧсӧ матысяньджык, но ӧшиньӧд мыччысис Сергей Ивановичлӧн стрӧг чужӧмыс:
— Питирим! Здукӧн лэбовтлы вокыд дорӧ. Висьтав сылы: ме сійӧс виччыся...
— Седлӧтӧг ог вермы, Сергей Иванович...
Председатель нюмъёвтӧмӧн видзӧдліс ме вылӧ лӧз синъяснас:
— Ок, и сюсь тэ! Седлӧыс тайӧ, тӧварыш, Володялӧн. Ассьыс юав.
Видзӧдлі ӧтарӧ-мӧдарӧ: Володя некӧн оз тыдав. Ме скӧрысь кучки вӧвлы, рӧдті горт дорӧ. Вок буретш ноксис машина дінас.
Ме шуи сылы:
— Сергей Иванович тшӧктіс висьтавны: лэбовтлы пӧ Илля Вась дорӧ да висьтав сылы, гӧрд нырлы, мый ме сійӧс кык час виччыся. Оз кӧ пӧ лок пырысьтӧм-пыр — юрсӧ орӧда.
Вок чышкис рузумӧн маслӧӧсь кисӧ.
— Ылӧдчан, вокӧ. Сергей Иванович тадзи оз сёрнитлыв. Да и виччысьӧ менӧ сӧмын на минута кызь.
Автомашина пуркнитіс лӧз тшынӧн да муніс. Ме чӧскыдпырысь апышті бензин дуксӧ да рӧдті Ыджыд шорлань. Но пилорама дорӧ бара на ковмис сувтлыны. Тані тэрмасьтӧг уджаліс мамлӧн тракторыс, а Степан дядь да нӧшта морт-мӧд сӧвтісны трактор доддьӧ гӧрбыльяс. Тані жӧ тыдаліс и Володя.
— Вжик-вжик-вжик! — дугдывтӧг кыліс пилорама дорсянь. Пилитісны выль скӧтнӧй дворлы балкаяс, плакаяс, тьӧс. Ме любӧпырысь видзӧді пилорама вылӧ. Кутшӧм мудзлытӧм! Лунтыр кылан: вжик-вжик-вжик!
Видзӧдны вӧлі интереснӧ. Дерт, тані позис сулавны дырджык, но аддзи Володялысь кӧсӧякодь видзӧдлӧмсӧ да лоис мунны.
Батьыс кодь жӧ ичӧтик да кызіник Педӧр, Степан дядьлӧн пиыс, агсасис нин. Орчча му вылын тыдалісны йӧз, вӧвъяс: сэні пуктісны картупель. Здоровайтчи нюмъялысь Педӧркӧд да тэрмасьтӧг доддяси, заводиті агсасьны.
Луныс кутіс лоны жар. Менӧ заводитіс вугрӧдлыны, сійӧ и видзӧд — вӧв вывсьыд усян.
— Тпру! — горӧді Карколы.
Вӧв окотапырысь сувтіс. Ме нюжгӧдчи эжа вылӧ. Веськыда кӧ висьтавны, дышӧдны сэсся кутіс агсасьнытӧ. Педӧрлы лӧсьыд: вӧлыслӧн мышкыс гӧн вольпась кодь небыд, а менам Карколӧн — тьпу! — сёрнитнысӧ дыш. Пуксьылан веськыда и бокӧн, бӧрӧн и водзӧн, весиг водлан мыш вылад, но быдног неладнӧ. Ме думайта, мый ёсьтӧм майӧг выльда пукавны унапӧв лӧсьыдджык. Дерт, агсасьны кӧ нӧшта лун-мӧд, сэсся велалан да лӧсьыд лоӧ, но менам некутшӧм окота эз вӧв агсасьны гожӧмбыд.
— Бара нин водін? — гажаа нюммуніс Педӧр.
— Бара, — чукыртчи ме. — Лӧсьыд тэныд! Менам кытсюрӧ прамӧя нин чӧсӧдӧ...
Педӧр, юрсӧ чатӧртӧмӧн, гораа серӧктіс:
— Чӧсӧдан местасӧ колӧ жар пывсянын солӧн зыртны, сэки прӧйдитас!
— Асьтӧ эськӧ колӧ совнас зыртыштны, мед он тількъяв, — зумыша шуи ме.
Педӧр лэччис вӧв вылысь, котӧртліс турунла, сетіс сійӧс вӧвъяслы. Сэсся водіс жӧ.
— Тэ, Педӧр, менӧ тӧвбыд пӧръявлін: вот воссяс пӧ ва, кутам вуграсьны да кыснанасьны, Чукля вискысь пӧ став сиръяссӧ лэпталам. А мый артмис?
— Ветлам на! — збодера шыасис Педӧр.
Ме ышловзьӧмӧн видзӧдлі мӧдлапӧлӧ, кӧні югыдлӧз рӧмӧн дзирдаліс Чукля вис. Сыкӧд орччӧн югъяліс ыджыдысь-ыджыд да кузьысь-кузь Сьӧд ты, лӧзов рӧмпӧштан кодь. Тайӧ тысӧ важӧн нин кӧсйысьӧны лэдзны Эжваӧ, но век на мыйкӧ нюжӧдчӧны. Ме бергӧдчи мыш вылӧ. Дивӧ кодь сӧдз енэж вӧлі югыд, сӧстӧм да вывті мича.
— Самолёт! — гораа юӧртіс Педӧр.
Неылын, Вылыс йӧрын, шумитіс мамлӧн тракторыс, сы вӧсна самолётлӧн мотор шыыс эз кыв. Ме корси самолётсӧ синъясӧн и, збыльысь, аддзи. Самолёт лэбис кытчӧкӧ кывтыд. Ме колльӧдышті сійӧс синъяснам.
— Бергӧдчӧ! — шензьӧмӧн кыпӧдчис Педӧр.
— Лётчикыс табаксӧ вунӧдӧма, — шмонитышті ме.
— Лэччӧ увлань!
Вӧлі интереснӧ: оз-ӧ пуксьыны кӧсйы? Круг вӧчигмоз самолёт лэччис нӧшта улӧ. Со нин сійӧ уліті лэбӧ, мӧдлапӧвса видзьяс весьтӧд.
— А-а! — радпырысь горӧді ме. — Тайӧ самолётсӧ Сергей Иванович корис.
— Мыйла? — эз гӧгӧрво Педӧр.
Самолёт визьнитіс-лэбис видзьяс весьтті, кутіс матыстчыны ыджыд ді дорӧ, коді пӧшти ставнас тырӧма бадь кустъясӧн.
— Видзӧд! — ме горӧді Педӧрлы.
Самолёт улын друг мыччысис да кузяа нюжаліс еджыдруд бӧж, паськалӧмӧн лэччис муӧдзыс. Татшӧм бӧжӧн самолёт лэбис ді помӧдз, сэсся бергӧдчис да мыйӧнкӧ бара пызйис бадь кустъяссӧ.
— Яд киськалӧ, — гӧгӧрвоис Педӧр. — Тӧвнас нин та йылысь сёрнитлісны. Бадьсӧ вуж вылас косьтӧны.
— А сэсся?
— А сэсся весаласны да видз лоӧ либӧ пӧскӧтина...
Меным дум вылӧ усины жӧ татшӧмсяма сёрнияс: колӧ пӧ паськӧдны пӧскӧтинаяс, бурмӧдны видзьяс, лэптыны эжа. Сьӧд ты косьтӧм йылысь казьтылісны и...
— Шойччанныд? — кыліс Володялӧн гӧлӧс.
Ме бергӧдчи. Бригадир локтӧма верзьӧмӧн, видзӧдӧ ми вылӧ скӧр синъясӧн. Ме любуйтчышті седлӧнас, код вылын пукаліс бригадир, юалі:
— Седлӧ вылас небыд?
— Небыд, — нюммуніс Володя.
— Миянлы эськӧ эз жӧ мешайт седлӧыс, — ышловзи ме.
Менам кывъяслы тӧдчанлун сеттӧг бригадир индіс кинас:
— Мусӧ агсалӧм бӧрын агасъяссӧ нуанныд эсійӧ гӧртӧм му дорас.
— Седлӧтӧ миянлы он сет? — гӧрдӧдӧмӧн юалі ме.
Володя бергӧдчис, видзӧдыштіс ми вылӧ, сэсся ышловзис да лэччис вӧв вывсьыс: — Нинӧм он вӧч... Ковмас, буракӧ, сетны...
Ми радлім: седлӧ вылад лӧсьыд лоӧ пукавны!
Бара заводитім агсасьны.
Луншӧр кад матыстчигӧн кутіс прамӧя сюмавны кынӧм. Ме унаысь видзӧдлывлі то картупель пуктысьяс вылӧ, то шонді вылӧ, коді сувтіс енэж шӧрас да, кажитчӧ, дзикӧдз вунӧдчис водзӧ мунӧм йылысь. Дырӧн менам терпеньеӧй быри, сувтӧді Каркоӧс. Педӧр лэччис жӧ вӧв вылысь. Картупель пуктысьяс тожӧ сувтісны. Кодсюрӧ лэдзалісны вӧвъяснысӧ. Ми лэдзалім жӧ вӧвъяснымӧс да рӧдтім Вылыс йӧрӧ, кӧні уджалісны Педӧрлӧн батьыс да менам мамӧ.
Вылыс йӧрын коркӧ вӧлӧма му, но сэсся сійӧс эновтлӧмаӧсь, и со муыс эжсялӧма, тырӧма посни кыдзьясӧн, козъясӧн, бадь кустъясӧн. Ӧні мам тракторӧн кульӧ эжасӧ. Со мургигтырйи локтӧ вына машинаыс. Ми весьтӧ воӧм бӧрын трактор сувтіс. Мам нюмъялігтырйи видзӧдліс миланьӧ, мыйкӧ горӧдіс. Ми домыштім вӧвъяснымӧс пуӧ, кайим кабинаӧ. Чужӧмӧ ӧвтыштіс маслӧ да карасин дука пӧсь сынӧд.
— Он на мун ӧбедайтнытӧ, мамӧ? Мам видзӧдліс ме вылӧ мудзӧм синъяснас, чышкыштіс гожъялӧм чужӧм вывсьыс пӧсьсӧ, содтыштіс газсӧ.
— Мунам силос гу дорӧдзыс... Трактор нетшыштчис водзлань.
— Вайлы гӧрышта! — горӧді мамлы пеляс.
Мам, кыв шутӧг, вешйыштіс. Ме пукті киясӧс рычагъяс вылӧ и пыр жӧ став тушанам куті кывны тракторлысь ыджыд вынсӧ. Ичӧтик коз пуяс да посньыдик коръяса кыдзьяс тэрыба локтісны паныд, швачкысялісны тракторӧ, тіралігтырйи водалісны гусеницаяс улӧ, а ыджыд лемех чашйис-косяліс эжа, век кежлӧ гуаліс найӧс. Ме сюся видзӧді, мед тракторлӧн гусеницапӧлыс оз кеж бӧрӧздаысь, и аслым кажитчи ыджыдӧн да вынаӧн. Силоснӧй гу дорӧ воӧм бӧрын сувтӧді тракторсӧ. «Вот эськӧ та вылын уджавны!» — думышті да ышловзьӧмӧн лэччи трактор вылысь.
Силос гу дорын сулаліс автомашина. Сергей Иванович да менам вок лэдзалісны машина вылысь цемент тыра бумажнӧй мешӧкъяс.
Сергей Ивановичлӧн бледов чужӧмыс гӧрдӧдыштӧма.
— Тырмас сэсся, — кепкаӧн векньыдик чужӧмас ӧвтігмоз заводитіс пӧлясьны Сергей Иванович.
Силос гуысь мыччысис Степан дядьлӧн бритӧм юрыс. Миянӧс аддзис, да стрӧгакодь вӧрӧдыштіс еджыд уснас:
— Ті мый гуляйтанныд?
— Кынӧм сюмаліс, Степан дядь! — шуи ме.
Сергей Иванович юаланаа видзӧдліс лӧз синъяснас:
— Но, кыдзи, тӧварышъяс, кажитчӧ вӧв вылын?
— Зэв лӧсьыд, — шомаа нюммуні ме.
Педӧр гораа серӧктіс.
Мам ичӧтӧс моз малыштіс менӧ юрӧд.
— Оз тай, тыдалӧ, ёна мудзны: тӧрыт шонді петтӧдз мачӧн ворсӧмаӧсь.
Сергей Иванович ошкӧмӧн шуис:
— Абу дышӧсь миян челядь, ёна отсасьӧны. Агсасьӧны со, картупель пуктӧны. А гырысьджыкъясыс талун вуджисны мӧдлапӧлӧ видзьяс весавны.
— Сідзи и колӧ, — лӧсасигмоз шуис Степан дядь. — Колхозын удж уна — быдӧнлы тырмас.
— Уджыд, майбыр, эм, — мӧвпалӧмӧн шуис Сергей Иванович. — Сьӧд тысайса пӧскӧтинасӧ паськӧдны колӧ. Гырысь пуяс сэні абу нин, а сэтшӧм-татшӧмсӧ бульдозерӧн весавны позьӧ. Бара тэныд удж, Антоновна...
Мам нюммуніс.
— Сэсся Сьӧд ты колӧ лэдзны. Ты вӧсна джын видзным некытчӧ туйтӧм. Ӧнтай правлениеын Матвей Дарья шуӧ: зэв пӧ тай эськӧ бур, еропланъяс кораланныд, но тэ пӧ, председатель, эн жӧ вунӧд Сьӧд тысӧ лэдзны. Ачыд кӧ пӧ эн кевлы сэтчӧ — мамыдлысь юав: сійӧ турун пуктігад уна гожӧм уяліс Сьӧд тыдорса вутшъяс костас, тӧдӧ, кутшӧмджык сэні...
— Тӧдам, тӧдам, — пӧв тувъялігмоз шуис Степан дядь. — Уджавлім.
Лэдзны колӧ тысӧ. Кадыс нюжмасьнысӧ абу: он и казявлы, турун пуктӧмыд талялас...
Ми кывзім сёрнисӧ да виччысим, кор мӧдӧдчасны гортӧ.
Коркӧ и Сергей Иванович пуксис кабинаӧ, корис:
— Пуксялӧй, тӧварышъяс! Мунамӧй тшӧтш...
Степан дядь тувъяліс медбӧръя кӧрт тув да кайис гуысь.
— Эштіс, — шуис сійӧ. — Ӧбед бӧрас цементируйтам бокъяссӧ — и гӧтов, сӧмын силосуйт.
— Кутам надейтчыны, мый тані миян лоӧ медся чӧскыд силос, — шыасис Сергей Иванович. — И аттьӧсӧ ковмас висьтавны Антоновналы. Видзӧдлӧй, кутшӧм пласт кыпӧдіс!
Сергей Иванович лӧз синъяснас меліа видзӧдліс менам мам вылӧ, содтіс:
— Гӧран нӧшта мӧдпӧв, и кӧдзам татчӧ анькытш сора зӧр. — Председатель чӧв олыштіс, ышловзискодь: — Да, да... Америкатӧ суӧдны, тӧварышъяс, уна бур кӧрым ковмас дасьтыны...
Степан дядь аслас ёртъяскӧд кайис машина кузовӧ. Мам сэтчӧ жӧ пуксис. Миянлы эськӧ окота жӧ вӧлі тӧвзьыны машинаӧн, но вӧвъястӧ кузолас он кат! Машина гӧгыльтчис сиктлань, а ми косім вӧвъясла.
И друг ылісянь на аддзим: миян вӧвъяс вылӧ пуксьӧмаӧсь нывъяс да сералігтыр локтӧны паныд.
— Кут! — Педӧрлы горӧді ме да, сывъяс паськӧдӧмӧн, потшим верзьӧмаяслы туйсӧ.
Оля, сьӧд синъяса да коскӧдзыс сьӧд кӧсаяса збой нывка, кодкӧд ми таво ӧтлаын помалім сизимӧд класс да ӧтлаын пырим комсомолӧ, серамсорӧн юаліс:
— Мый тіянлы колӧ, детинкаяс?
Ме ку пиӧ эг кут тӧрны.
— Лэччӧй вӧвъяс вывсьыс!
— Питирим! — шыасис Таня, коді пукаліс Педӧр вӧв вылын. — Ті лунтыр нин вӧв вылын пукалінныд, а ми бӧрӧздаӧд подӧн ветлӧдлім, картупель пуктім.
— Ок, лоӧма жӧ удж — картупель пуктӧм! Вот тэ агсасьны видлы, сэки казялан!
— Ёна тай! — сьӧд синъяснас дзирдыштіс Оля. — Пукав вӧв вылын да сьыв!
— Вай лэччӧй вӧв вывсьыс да сьылӧй, мыйта колӧ, — зумыштчи ме.
— А ті пуксьӧй тшӧтш, — мыччыліс еджыд пиньяссӧ Оля. — Вӧв вылас тӧрам.
Ми Педӧркӧд шӧйӧвошӧмӧн видзӧдлім ёрта ёрт вылӧ: ещӧ пӧ мый он думыштӧй!
Педӧр нюммуніс:
— Вай тадзи вӧчамӧй: тэ, Таня, пуксьы Оля дорӧ, а ми Питиримкӧд Карко вылӧ сӧлам.
— Полӧны, — серӧктіс Оля.
— Ми полам?! — турыштчи ме.
Татшӧм сёрни кылӧм бӧрын эг нин вермы терпитны, чеччышті аслам Карко вылӧ да Оля мыш сайсянь босьті дом поводсӧ. Медым оз казявны гӧрдӧдӧмӧс, зіли не видзӧдны Олялӧн кыз кӧсаяс вылӧ, кодъяс инмалісны менам морӧсӧ. Веськыда кӧ висьтавны, пукалі вӧв вылын сідз, быттьӧ менӧ гӧгӧрбок кӧртавлӧмаӧсь.
Ӧбед бӧрын бара агсасим. Рытнас, удж помасьӧм бӧрын, мунім картупель пуктысьяс дінӧ. Найӧ дугдӧмаӧсь жӧ уджавны.
Володя мерайтіс мусӧ.
— Тіян эштіс? — миянӧс аддзис да юаліс сійӧ. — Зэв бур, шойччӧй сэсся.
— Аски бара агсасьны? — мудз гӧлӧсӧн юалі ме.
— Дышӧдіс? — нюммуніс Володя. — Аски шойччӧй: агсасян уджыс сэсся абу на...
Ме кыпыда мигниті Педӧрлы. Шонді петігӧн шуим вуджны Чукля вис дорӧ.
2
Ок, и збойӧсь сиръясыд Чукля вискын! Да ӧд гырысьӧсь! Пӧжалан кӧ татшӧм сирсьыд чериняньтӧ — мыйкӧ и чепӧльтыштны позьӧ.
Но быдӧнлы сирыд ачыс нопъяд оз на кай: кыйнытӧ колӧ кужны. Ме со шонді петӧмсяньыс нин лэбала берег пӧлӧныс ӧтарӧ-мӧдарӧ, а юква вылӧ век на нинӧм абу. Ӧвтча-ӧвтча кыснанӧн, сэсся горӧбтӧмӧн шыбита мыйвынысь и, видзӧда да, кыснаныд крукасьӧма аслым гачӧ либӧ лэбзьӧма кытчӧкӧ бадь йылӧ. Медбӧрын ме сьӧлышті, шыбиті дзугсьӧм кыснанӧс, воді берегӧ.
Недыр мысти воис Педӧр, сюйліс шонді кодь гӧгрӧс чужӧмсӧ менам ведраӧ, юаліс:
— Питирим! Тэ гортсьыд треска эн вай?
— Трес-ска?! Мыйла?
— Пунытӧ ӧд мыйкӧ ковмас!
Ме сьӧкыда ышловзи.
— Нинӧм, — бурӧдіс менӧ Педӧр. — Кыснанӧн кӧ он куж, ме тэнӧ велӧда куш кинад тшакӧс моз ӧктыны сиръяссӧ.
Ме, дерт, эг эскы.
— Мунам Сьӧд ты дорӧ, сэні петкӧдла, — ошйысис Педӧр.
Мӧдӧдчим. Ичӧтик да кызіник Педӧр мач моз гӧгыльтчис водзын, ме — сы бӧрся.
Со и Сьӧд ты: кузь, помыс ӧдва тыдалӧ. Веркӧсыс тылӧн дзирдалӧ.
— Вай петкӧдлы, кыдзи тэ сиръяссӧ тшакӧс моз ӧктан, — шуи ме.
— Мӧдар помас колӧ мунны, — юрнас гогнитіс Педӧр.
Ты ӧтар-мӧдарыс вутшкӧсь, няйт. Меным эз вӧв окота кыссьыны ты мӧдар помӧдзыс и кыпӧді шум:
— Таладорас нӧ сиръясыс посньыдджыкӧсь?
— Сэні эм ичӧтик ты, коді быд во косьмывлӧ. Сэтчӧ колӧ мунны.
Вутшъяс дзӧрисны да вежнясисны быдсяманогыс. Ми, кизьӧр няйтас гоз-мӧдысь шнёпкысьлӧм бӧрын, мӧдӧдчим чеччавны вутшкысь-вутшкӧ. Ты помас воим да кос места некоднаннымлӧн эз вӧв. Весиг кепкаяснымӧс ковмис пыдзравны. Гачьяс йывсьыд сёрнитны нинӧм: няйт сорнас сибдӧмаӧсь кок берданым.
— Коді миянӧс кыскалӧ татшӧм местаястіыс? — видчи ме.
— Тысӧ лэдзасны да кос лоӧ, — шуис Педӧр да заводитіс пӧрччысьны: — Пожъялам дӧрӧм-гачнымӧс, ӧшлам косьтыны, и кутам шыблавны берегӧ сиръястӧ. Мешӧкыд эм?
Сьӧлӧм бурмытӧдз пожъясим да пыдзрасим. Сэсся Педӧр уськӧдчис ичӧтик тыӧ. Ме вӧтчи сы бӧрся.
Ты пыдӧсса няйтас сибдалігтырйи, тэрмасьтӧг, мунім тысӧ кузяла и вомӧн. Ваыс гудыртчис: ты пыдӧсысь кайис няйтыс.
Медся джуджыдінас ваыс вӧлі пидзӧсӧдз кымын. Заводитім горзігтырйи келавны, бузӧдчыны, чеччавны быдногыс: зілим ёнджыка гудыртны васӧ.
Сэсся сувтім да пошкигтырйи кутім виччысьны, кор сиръяс мыччасны юрнысӧ ва веркӧсӧ.
— Со, со! — шӧпнитіс Педӧр. — Кватит!
Ме видзӧдлі. Дзик берег дорас ӧти сирпи мыччӧма юрсӧ да видзӧдӧ ми вылӧ. Вот, думайтӧ, кӧнкӧ, пеж ловъясыд мый вӧчисны!
Ме гусьӧник нюжӧді киӧс да акнитӧмӧн кватиті, но сирпи тюльскысис-пырис ваӧ. Ме шамырті сӧмын гудыр васӧ.
— Эк, и кияс тэнад! — юрсӧ довкйӧдлӧмӧн дивитіс Педӧр. — Кокӧс кӧ нюжӧдлі — бурджыка эськӧ куті.
— А тэ кут, кут! — дӧзми ме. — Со тай кокъяс костад нин пырӧма!
Педӧр тэрыба копыртчис, и — тшап! — долыдпырысь горӧбтӧмӧн кыпӧдіс неыджыд сирпи, но нильӧг чериыд песовтчис, быттьӧ макнитіс бӧжнас, да уси ваӧ.
— Но и кияс тэнад! — серӧкті ме. — Вомнад, вомнад видлы! Гашкӧ, унджык кыян.
Посни сирпияслӧн юръяс тыдалісны сэні и тані, но кутавны эг вермӧй: китӧ нюжӧдны на заводитан, а найӧ сунгысьӧны нин ва пытшкӧ. Мыйӧн найӧс аддзан гудыр васьыс?
— Вай нӧшта гудыртышт васӧ, — шуис Педӧр, — мед сукджык лоӧ, а ме сак лӧсьӧда: нопйӧ важ тыв кусӧк пуктылі.
Сакнад делӧыс кутіс мунны бура: Педӧр гумлаліс сирпиянӧс, а ме пукалі берегын да видзӧді.
Кило мында чери ӧктӧм бӧрын ми пасьтасим да бӧр мӧдӧдчим Чукля вис дорӧ. Бара ковмис кевны вутшъяс костті, но ӧні сьӧлӧм вылын вӧлі долыд. Окота лои весиг сьылыштны.
Сьӧд ты помын вӧлі неыджыд мыльк, коді торйӧдіс тысӧ Чукля вискысь. Тані, кос да лӧсьыд местаас, ми шуим пуны чӧскыд юква.
Пӧрт миян эз вӧв, сы вӧсна юквасӧ ковмис пуны ведраӧн. Педӧр гумовтіс ведраджын ва, лэдзаліс сэтчӧ сирпиянсӧ, шырис картупель да ӧшӧдіс бипур весьтӧ.
Недыр мысти юква пузис. Босьтім би вылысь ведрасӧ, пуксим ӧтар-мӧдарас.
— Вот тайӧ бур! — мыш сайсянь друг кыліс радпырысь горӧдӧм.
Бипур дорӧ матыстчис спортивнӧй костюма Володя. Синъяссӧ чӧвтліс ведраӧ, кипыдӧсъяссӧ ниртігтырйи, долыда шуаліс:
— Вот ӧні ми сёйыштам!
— Коді сёяс, а коді и видзӧдас, — серӧкті ме.
— Тэ ӧмӧй он кут сёйны? — шензьыштіс Володя, сэсся, кузя нюжмасьтӧг, пуксис, матыстіс ас дорас юква тыра ведранымӧс, кыскис питшӧгсьыс тупӧсь нянь да босьтіс менсьым паньӧс:
— А нолтӧ, кутшӧмджык? Кымыныськӧ тэрыба паньыштіс, юрнас довкйӧдлӧмӧн ошкис:
— Бур, сӧмын дубджык неуна... И заводитіс зіля панясьны. Ми, вомнымӧс паськӧдӧмӧн, видзӧдім сы вылӧ.
— Сергей Иванович! — ведра дорысь здук кежлӧ торйӧдчылӧмӧн горӧдіс Володя. — Лок юква сёям да вӧлись нин мерайтчам!
Кустъяс сайысь петіс Сергей Иванович, веськӧдчис миянлань. Менам кӧдзалі мышкӧй: «Паньыштны оз сюрлы!»
— Да ті сёйӧй, сёйӧй, челядь, эн яндысьӧй, — пемыд руд синъяснас гажаа мигнитіс миянлы Володя. — Юкваыс зэв чӧскыд.
Педӧр видзӧдліс ме вылӧ, юрсӧ чатӧртӧмӧн гораа серӧктіс да заводитіс панясьны.
«Нинӧм оз коль!» — повзи ме да тэрыба ырсниті юквасӧ, но пыр жӧ, вомӧ кутчысьӧмӧн, ымӧсті: юкваыс вӧлӧма вывті пӧсь.
— Тэ мый, Володя, челядьсӧ ӧбижайтан? Тадзи оз позь...
— Найӧ асьныс корисны. Вывті пӧ уна пуим юквасӧ да ог тӧдӧй, кытчӧ воштыны, — нюмъялігтыр висьталіс Володя и бара гажаа мигнитіс миянлы: — Сідз ӧд, пиян?
— Сідз, — дышпырысь сӧгласитчи ме.
Сергей Иванович кыскис сумкасьыс лук, шырис юкваӧ. Сэсся заводитіс тэрмасьтӧг панясьны.
Сёйим ставӧн зэв азыма — ведраджын юквасьыд каньлы нюлыштмӧн эз коль. Тырмис ставнымлы. Менам полӧмӧй лоис весь.
— А черисӧ? — индіс газета вылӧ лэпталӧм сиръяслань Володя. — Ракаяслы?
Ракаясӧс вердӧм вылӧ ме эг вермы сӧгласитчыны. Ковмис бара на матыстчывны сиръяс дорад, кӧть эськӧ кынӧмӧй и доймӧ нин вӧлі.
Сёйӧм бӧрын Педӧр лэччис вис дорӧ мыськавны ведра да паньяс, гырысьяс ӧзтісны папироскаяс.
— Но, мый кутам вӧчны, Володя? — Сьӧд ты вылӧ видзӧдігмоз тӧждысьӧмӧн юаліс Сергей Иванович.
«Сьӧд ты лэдзны кӧсйӧны», — гӧгӧрвои ме.
Володя ышловзис:
— Ог тӧд. Машинаясӧн татчӧ он сибав.
— Но лэдзны тысӧ кӧть кыдзи да ковмас! — тапнитіс муас Сергей Иванович. — Тадзи кольны оз позь.
— Турун пуктігӧн йӧзыс коскӧдз ваын уялӧны, — сӧгласитчис Володя. — Турун юръяс кыскалігад унаысь уёвтласны вутшъяс костас. Мучитчӧм, а абу удж.
— Да. Лэдзны колӧ тысӧ, бырӧдны вутшъяс, керавны кустъяс. Вӧчны настӧящӧй видз, мед машинаясӧн позис уджавны.
— Но, а йӧзсӧ кытысь босьтан, Сергей Иванович?
— Думыштлыны колӧ. Гашкӧ, ковмас морт-мӧдӧс босьтны скӧтнӧй двор стрӧитанінысь да силоснӧй гуяс кодъянінысь.
Володя думыштчис.
Ме лэччи Педӧр дорӧ.
— Прӧщайтчы аслад тыкӧд: лэдзны кӧсйӧны.
Педӧр видзӧдліс ме вылӧ:
— Тысӧ лэдзигӧн нин прӧщайтчам.
— Он-ӧ нин тэ кодйысьны думайт? — шензьӧмӧн юалі ме.
— А мый?
— Сідз тэнӧ и лэдзасны!
— Лэдзасны! — увереннӧя нюммуніс Педӧр. — Метӧг тані нинӧм оз артмы.
Ме видзӧдлі Педӧрлӧн ичӧтик, кызіник туша вылӧ, ышловзи:
— Оз босьтны миянӧс, коньӧрӧй. Кодлы ми колам?
Педӧр эз ӧбидитчы:
— Оз кӧ босьтны, ачым локта, сувта да кута кодйысьны.
Ме паськӧді вомӧс, некыдз эг гӧгӧрво Педӧрӧс: ме эськӧ эг кут кодйысьнытӧ.
Кайим мыльк вылӧ.
— Кык метр, — кыскис ваысь зіб да шуис Сергей Иванович. — Джуджыдджык местаяс эмӧсь?
— Эмӧсь, дерт. Но тысӧ кӧ лэдзан, найӧ асьныс косьмасны.
— Мый нӧ! Сідзкӧ, аски заводит кодйысьны, — видзӧдліс Володя вылӧ Сергей Иванович.
Володя здук кежлӧ шӧйӧвошліс:
— Аски? А йӧзыс?
— Аддзан! Думыштлы бурджыка да аддзан.
Местасӧ видлалігмоз Сергей Иванович лэччис вис дорӧ. Володя зумыштчис. Ми чӧв олім.
— Йӧзыс гӧрӧны-кӧдзӧны, стрӧитчӧны, — скӧра видзӧдліс миян вылӧ Володя. — Кытысь ме босьта йӧзсӧ?
— А ми ог вермӧй кодйыны рӧвсӧ? — друг юаліс Педӧр.
Володя видзӧдліс сы вылӧ:
— Ті?!
— А мый? — лэптіс юрсӧ Педӧр.
Володя юрсяньыс кок улӧдзыс синнас мерайтіс Педӧрӧс, сэсся пуктіс кисӧ Педӧрлы сьылі вылас, личкыштіс увлань да Педӧрысь кокньыдика вӧчис мегыр.
— Паньтӧ кутны на он вермӧй, гашкӧ, мамныд паньӧдӧ, а — кодйысьны, — серӧктіс Володя, но сэсся мыйкӧ друг думыштіс. — А збыльысь? Гашкӧ, ті, чӧртпиян, тысӧ лэдзанныд?
— Коді нӧ сэсся? — долыда дзирдыштісны Педӧрлӧн руд синъясыс.
Ме нинӧм эг шу. Мыйла сюйсьыны?
Володя гыжйыштіс юрбӧрсӧ да лэччис председатель дорӧ. Найӧ сёрнитігтырйи мунісны вис пӧлӧн.
3
Бригадир да председатель мунӧм бӧрын ми дыркодь на кыйим чери. Меным пӧшти нинӧм эз шед, косясьлӧм сапӧгпӧв кындзи, кодӧс ме крукышті берег дорсьыс.
Ковмис юкны Педӧрлысь черисӧ. Менам пай вылӧ воис килоджынъя сир. Ме, дерт, босьті: абу мича ӧткажитчыны дай Педӧрлы кокньыдджык лоӧ гортас муннысӧ.
Шондіыс улын нин вӧлі, кор ми воим сиктӧ.
Керка дорӧ воигӧн паныдасис Володя да висьталіс: ӧкмыс чассянь лоӧ комсомольскӧй собрание. Сёрни лоас Сьӧд ты лэдзӧм йылысь.
Ме чукыртчи: «Чӧртыс кыскис кывйӧдыс Педӧрӧс. Ӧні, дыш кӧть абу, ковмас мунны кодйысьны. Эк!..»
Пыри гортӧ. Таня котӧртіс меным паныд:
— Питирим, аски Сьӧд ты лэдзны!
Руд синъясыс чойлӧн дзирдалӧны, а гӧгрӧсіник, неуна гожъялыштӧм чужӧмыс алӧймӧма.
— Мый вылӧ тэ радлан? — дӧзмӧмӧн юалі ме.
— Кыдзи нӧ! Сэтшӧм ыджыд удж кутам вӧчны!
— Тэ вуджны жӧ кӧсъян? — чой вылӧ эскытӧг видзӧдлі ме.
— Дерт, вуджа, — тшапа пыркнитчис Таня. — Ог али мый вермӧй кодйысьнысӧ.
— Паньӧн тасьтіысь кодъянныд, — нурбыльті ме.
— Эн ышнясь, — дӧзмис чой. — Сёян пуны ковмас, и йӧрманныд.
Ме синкым увті букыша видзӧді Таня вылӧ. Сійӧ пыркнитіс кудриа юрсинас:
— Миянӧс Володя индіс нин бадь кыскавны.
— Ещӧ мый оз думыштлыны, — век на дузъялі ме.
Чой эз ӧвсьы:
— Оля тшӧтш вуджӧ и Юра вокыс тожӧ, — водзӧ висьталіс Таня.
— Но и мый?
— Нинӧм, — нырсӧ кӧрліс чой. — Гашкӧ, Юраӧс бригадирӧн индасны. Сійӧ сэтшӧм тӧлка да шань и ті дорысь ыджыдджык.
— Но и вудж аслад Юраыдкӧд, да носӧвикъяс унджык босьт, — чой вылӧ дӧзми ме.
— Мыйла? — чуймис Таня.
— Синватӧ чышкавны: му кодйӧмыд ӧд абу картупель пуктӧм.
Таня лап-лапкерис синъяснас да рама шуис:
— Эн ышнясь!
— Эк, Педӧр! Педӧр! — ышлолалі ме собрание вылын, Педӧркӧд орччӧн пукалігӧн. — Сиралін тэ ставнымлысь юрнымӧс.
— Радлыны колӧ, а не бӧрдны, — гораа шӧпкис Педӧр. Аслас чужӧмыс долыд, быттьӧ пыралӧма гӧбӧчас да мамсьыс гусьӧн кашникысь нӧк чунялӧма.
Ми водзвылын пукалысь Юра бергӧдіс мелань векньыдик чужӧмсӧ югнитіс сьӧд синъяснас:
— Тэныд сэтшӧм дыш?
Ме нинӧм эг шу. Юракӧд весьшӧрӧ вензьыны: сійӧ меысь ыджыдджык тушаӧн и арлыдӧн. Помаліс ӧкмысӧд класс и зэв серьёзнӧй: нюмъёвтлывлӧ сӧмын гырысь праздникъясӧ. Та вӧсна ме пола сыысь.
— Удж лоӧ сьӧкыд, шонді кутас пӧжны, жар лоӧ, юрныд висьны кутас, но тайӧ, ёртъяс, бур: закалитчанныд, — висьтавлӧ Володя, миян комсомольскӧй секретарным. — Сэсся, косныд кутас висьны, киясаныд гадьяс песанныд, но тайӧ, ёртъяс, зэв бур: он кутӧй повны некутшӧм уджысь. Дерт, делӧыс добровольнӧй: коді кӧсйӧ — мунӧ, кодлы дыш — олас гортас.
Володялысь сёрнисӧ сюся кывзісны.
— Коді кӧсйӧ сёрнитны?
Медся первой кыпӧдчис Юра.
— Меным кажитчӧ: уна сёрнитны нинӧм. Быд комсомолец тӧждысьӧ рӧднӧй колхоз вӧсна. Ме ногӧн, колӧ ӧні жӧ вӧчны список Сьӧд ты дорӧ мунны окотитысьяслысь.
— Правильнӧ!
— Гижалӧй!
Володя мыччис Юралы бумага лист да карандаш:
— Гижав. Медводз асьтӧ и гиж.
Юра гижис да кыпӧдіс юрсӧ:
— Коді нӧшта?
Ме тэрмасьӧмӧн малышті ачымӧс ӧтилаті, мӧдлаті. Кывзысьышті: оз-ӧ кыткӧ юкав либӧ ёнты. Кӧсъя нин вӧлі горӧдны нор гӧлӧсӧн: мися, кынӧмӧс коймӧд лун орлалӧ, но видзӧдлі гӧгӧр да тшӧкмуні.
Пызан дорӧ гӧгыльтчис Педӧр:
— Гиж менӧ.
— Тэнӧ? — синъяссӧ лэптіс Юра. — Мый тэ сэні кутан вӧчны? Мешайтчыны?
Юра бергӧдчис Володялань:
— Меным кажитчӧ, Педӧрӧс нинӧмла гижны: зэв нин ичӧтик.
Ме скӧрми да горӧді:
— Гашкӧ, Педӧрыс тэысь унджык пӧльзасӧ ваяс! Он ӧд тӧд.
— Тэнӧ оз юавны, — топӧдіс вӧсньыдик паръяссӧ Юра.
Володя нюмъёвтіс, мигнитіс Педӧрлы.
— Мый тэ, Юра! Педӧртӧг делӧ оз артмы. Гиж, гиж...
Пызан дорӧ тэрмасьтӧг матыстчис ыджыд тушаа Ваня, кыз гӧлӧснас букӧстіс:
— Гиж...
Ваня том на, таво мекӧд ӧтлаын помаліс сизимӧд класс, но выныс сылӧн — ой-ой-ой! Кӧть мый киас оз босьт — пыдзыртас да ва петӧ.
— Гиж, Юрик, менӧ! — места вывсяньыс горӧдіс Оля.
Юра кӧдзыда видзӧдліс чойыс вылӧ:
— Нывкаяслы сэні нинӧм вӧчны...
— Зон жӧ лоӧма! Гиж!
— Менӧ тшӧтш гижӧй, — шыасис Таня да ачыс гӧрдӧдіс. Окотитісны вуджны мӧдлапӧлӧ нӧшта вит-квайт ныв. На пиысь сӧмын Оля да Таня вӧліны комсомолкаяс.
Юра зумыштчыліс, но гижаліс и нывкаясӧс. Ме думышті: «Мый морла нывкаяссӧ чукӧртӧны? Кутасны няргыны: то жар, то кӧдзыд. То юрныс висьӧ, то мудзӧмаӧсь...»
Чукӧрмис комын морт. Гижисны, дерт, и менӧ, кӧть ме и эг сюйсьы.
— Бур. Зэв бур. Вывті бур, — ниртіс кияссӧ Володя. — Сэсся колӧ бӧрйыны бригадирӧс.
— Юраӧс бригадирнас!
— Ваняӧс!
— Юралӧн арлыдыс ыджыдджык!
Бригадирӧн бӧрйим Юраӧс. Веськыда кӧ шуны, выль бригадир меным эз ёна кажитчы: зэв нин стрӧга да кӧдзыда видзӧдӧ сьӧд синъяснас, быттьӧ кокыштны кыйӧдӧ. Но йӧзыслы кӧ кажитчӧ, ме, дерт, ӧтнам ог кут кайны стенӧ. Меным нӧ мый? Ветла йӧзыскӧд, видзӧдла, кыдзи мый, да, гашкӧ, и бӧр локта гортӧ.
Мӧд лун асывнас комын морта бригада ызгис правление дорын. Быдӧн босьтӧмаӧсь кӧрт зыр, сёянтор: коді чышъянӧ гаровтӧма, коді сумкаӧ сюйӧма, коді зептас, а Педӧр нопйӧ сюялӧма. Ме видзӧді, видзӧді Педӧр вылӧ да гораа серӧкті:
— Тэ, Педӧр, талун дзик черань кодь: ачыд ичӧтик, а нопйыд турун нӧб ыджда.
Педӧр нюммуніс:
— А ме ӧд муна да сэсся ог и волы, кытчӧдз рӧвыс оз кодйыссьы. Сійӧн и запассӧ уна босьті.
— О-о! Оз дышӧд?
— Оз!
Правление дорӧ тэрмасьӧмӧн локтіс Степан дядь, скӧрысь мыччис Педӧрлы чер:
— Чертӧг мӧдӧдчӧмыд, уджалысь! Кӧрт зыр пуыд кӧ чегӧ?
Володя сувтӧдіс миянӧс радӧн-радӧн, сэсся мӧдӧдчим вадорӧ.
Ваня паськӧдіс гудӧк. Сынӧдын юрӧбтіс гажа сьыланкыв:
Кыпыд гожся лунӧ
Ми походӧ мунам.
Сьыланкывным миян
Лун тӧв кодь жӧ чож.
Вуджим Эжва. Воим Сьӧд ты дорӧ.
Володя бура висьталіс да петкӧдліс, кыдзи-мый кодйыны. Весиг кытчӧсюрӧ тувъявліс ёсьтӧм бедьяс, сэсся бӧр вуджис сиктӧ.
Ме видзӧдлі ты вылӧ. Кузь да паськыд веркӧсыс сылӧн вӧлі лӧнь. Эз веритсьы, мый та ыджда тыысь некымын лун мысти кольӧ сӧмын ыджыд няйт гуран.
— Нда-а, — качайтышті ме юрнам. — Эстшӧм тысӧ лэдзнытӧ — ой-ой-ой, кывтӧ нюжӧдтӧдз ковмас кодйысьны!
Юра бергӧдчис;
— А тэ эн няргы! Меным, кажитчӧ, ми эг няргыны локтӧй татчӧ.
Ме гӧгрӧсті синъясӧс:
— Но-о? А ме думайті, мися, няргыны локтім...
— Тэнад, Питирим, кывйыд, меным кажитчӧ, вывті кузь!
— Но-о? А ме думайті, мися, дженьыдджык на неуна...
Челядь сералісны. Юра топӧдіс вӧсни паръяссӧ — скӧрмис. А Педӧр бергӧдіс мелань гажа чужӧмсӧ:
— Да мый тэ, Питирим! Этайӧ тысӧ лэдзны кывйыд нюжалас? Да ме кӧ эськӧ томдырйи...
— Видзӧдлам, удж вылас кутшӧмджык лоан, — кӧдзыда орӧдіс Юра да гораа шыасис челядь дінӧ: — Босьталӧй кӧрт зыръяснытӧ. Петкӧдлам асланым колхозлы, кыдзи ми вермам уджавны!
Ми сувталім рӧв местаӧ да заводитім кульны эжа.
Водзті ме кодйывлі мутӧ сӧмын картупель босьтігӧн, дай сӧмын сэк, кор мам гоз-мӧдысь тапнитлывліс мышкам, и, веськыда кӧ висьтавны, эжа кульӧмыд меным эз ёна во сьӧлӧм вылӧ. Тувкӧдан, тувкӧдан кӧрт зырнад, пӧсьыд киссьӧ, а эжа пластыд оз и думайт шедны. Видзӧдлі ёртъяс вылӧ — ставыс орйӧдлӧны эжасӧ, оз кольччы йӧзсьыс и Оля, дай чойӧй менам пӧсялӧма нин...
Зэв сьӧлӧмсяньыс заводитліс кодйысьны и Юра, но босьтчис вывті крута да чегис кӧрт зыр пусӧ. Ӧні сійӧ со довъялӧ ӧтарӧ-мӧдарӧ, сеталӧ миянлы индӧдъяс да трачкӧдчӧ «Любительӧн».
Кӧрт зыр пуыс ратшмунлі и Ванялӧн, но сійӧ пыр жӧ шедӧдіс пусӧ, ёсьтіс да бӧр сюйис.
Шонді ньӧжйӧник кавшасис енэж шӧрлань. Сідз нин вӧлі шоныд, а ӧні лои сэтшӧм жар, мый чужӧмыд дась потны.
Кӧрт зырйӧн вӧдитчӧмысь кипыдӧсъяс гӧрдӧдісны да кутісны сотчыны, быттьӧ кодкӧ жалиттӧг ниртіс найӧс дзимбырӧн.
Ме сатшки кӧрт зырйӧс, пӧлялышті доналӧм кипыдӧсъясӧ, чышкышті чужӧм вылысь да сьыліысь пӧсьсӧ, горӧді:
— «Куритчӧй», челядь!
Юра кӧсӧйтчис:
— Меным кажитчӧ, тані эм бригадир!
— Позьӧ шойччыштны, бригадир?
— Позьӧ, — кыз гӧлӧснас нюжӧдіс Ваня да муӧ сатшкис кӧрт зырсӧ. Майкаыс сылӧн вӧлі ставнас ва.
Шойччӧм пыдди ми тэрмасьӧмӧн шыблалім дӧрӧм-гач да бузгысим вискӧ. Дыр эськӧ на, гашкӧ, солькӧдчим ми ваад, да бригадирным эз узь. Сійӧ первойӧн петіс берег вылӧ да заводитіс пасьтасьны.
— Меным кажитчӧ, тырмас бултыкасьны, — ставлы кывмӧн шуис сійӧ. — Он и казявлы — луныс прӧйдитас, а миян пӧшти нинӧм на абу вӧчӧма.
Челядь бара заводитісны кодйысьны. Сӧмын ме сулалі киясӧс гач зепъясӧ сюялӧмӧн да синпӧлӧс читкыртӧмӧн видзӧді Юра вылӧ, коді ветлӧдліс ӧти дінсянь мӧд дінӧ да велӧдіс.
«Мыйла ачыс оз уджав? — думайті ме. — Мыйла оз выльысь пуав кӧрт зырсӧ?»
Юралӧн гӧлӧсыс кыліс то сэні, то тані.
— Кинытӧ, кинытӧ, челядь, эн дуллялӧй: гадьяс песанныд! — кылӧ, шуаліс сійӧ кодъяслыкӧ, а сэсся локтіс да сувтіс Педӧр дінӧ:
— Тэ, Педӧр, ылӧджык шыблав мутӧ. Джуджыда ӧд ковмас кодйыны. Матӧ шыблалан — бӧр кутас киссьыны.
Ме букыша видзӧдлі Юра вылӧ, бергӧдчи сылань мышкӧн.
— Тэ нӧ мый он уджав? — ме дінӧ воис Юра.
— Виччыся, кор тэ заводитан, — синпӧлӧс читкырті ме.
— Менам жӧ кӧрт зыр пуыс чеги! — пельпомъяссӧ лэптыштліс Юра.
— Менсьым босьтлы, — тшӧтяси ме.
— А тэ? — шензяна синъясӧн ме вылӧ видзӧдіс Юра.
— Видзӧдны кута, — наяна нюммуні ме.
Юра ӧти здук чӧв олыштіс, сэсся скӧрысь крапкис:
— Дыш кӧ тэныд — сідзи и висьтав.
— А тэныд кӧ окота, мыйла он кодйысь?
Челядь кутісны видзӧдлывлыны ми вылӧ, кодсюрӧ весиг дугдісны кодйысьны.
— А мыйла, збыльысь, оз уджав Юраыс? — шыасис кодкӧ.
Юра лӧглунӧн тырӧм синъяссӧ сувтӧдіс ме вылӧ да кыдзкӧ торъя тӧдчӧдӧмӧн шуис:
— Меным кажитчӧ, бурджык лоӧ, бурӧн кӧ тэ весасян татысь.
— Меным и тані зэв шоныд, — зырйӧс мыччи сылы да шутьлялігтырйи муні Ваня дорӧ.
Пӧсялӧм да гӧрдӧдӧм Ваня веськӧдчис, морӧснас пыксис кӧрт зыр вороп помӧ да пыдісянь лолыштіс:
— Мый нӧ?
— Вайлы чертӧ, — шуи ме.
— Би дорас, — юрнас гогнитіс Ваня.
— Юралӧн кӧрт зыр пуыс чегӧма да лӧсьӧдны кӧсъя, — нарошнӧ гораа висьталі ме.
Ваня мӧвпалӧмӧн видзӧдліс карӧй синъяснас Юра вылӧ, коді мыйк стрӧга висьталіс нюмъялысь Педӧрлы, сэсся бара зіля заводитіс шыблавны мусӧ. А ме шедӧді Юра кӧрт зырйысь чегӧм пусӧ, лӧсышті, бӧр сюйи, тувъялі да зырсӧ мыччи Юралы.
— Вот и бур. Аттьӧ, — кӧдзыда нурбыльтіс Юра, копыртчыштіс да некымынысь кодйыштіс, но друг пуыс бара ратшмуні.
— Но и вын Юралӧн! — шензьышті ме.
— Пуыс сісь, — некод вылӧ видзӧдтӧг шуис Юра.
Оля зэв серьёзнӧя, нюмъявтӧг видзӧдіс вокыс вылӧ, а Юра шыбитіс кӧрт зырсӧ да бергӧдчис сылань мышкӧн. Синъяснас лапйӧдлігтыр сы вылӧ дыр видзӧдіс Таня, буракӧ, зілис гӧгӧрвоны: нарошнӧ чегъялӧ кӧрт зыр пуяссӧ али зыр пуыс збыльысь сісь? Сэсся чой юалан синъясӧн видзӧдліс ме вылӧ, но ме сӧмын корлі нырӧс: «Ачыд гӧгӧрво!»
4
Рыт кежлӧ рӧвсӧ кодйим пӧшти метр судта. Ставным мудзим, эг мунӧй весиг гортаным. Вуджисны сӧмын квайтӧн.
Ужнайтӧм бӧрын Педӧр лэччис вис дорӧ. Ме вӧтчи сы бӧрся. Бригадир миян шӧйтіс берег дорын ӧбедсяньыс нин: бригадалы пӧ чери кыйышта.
— Мыйкӧ дэбӧдӧ оз? — юалім ми.
— Омӧлика, — ышловзис Юра.
Педӧр сюйліс нырсӧ Юралӧн ведраӧ да нюммуніс: ведра пыдӧсын куйліс дзик ӧти йӧрш.
Педӧр нюмъялігтырйи чӧвтіс вугырсӧ да здук-мӧд мысти лэптіс кепысьпӧв ыджда ёкыш.
— Юрий, эй, Юрий! — нӧрыс сайын кыліс чуксасьӧм. — Вайлы нидзувъястӧ: тані пес плакаяс кодь сынъяс шедалӧны.
Педӧр эскытӧг нюммуніс, а Юра босьтіс нидзув банкасӧ да саялі кустъяс сайӧ.
Меным окота жӧ лои лэптавны пес плакаяс кодь сывъястӧ, и мӧдӧдчи Юра бӧрся. Но Юра дорӧдз эг во: аддзи мичакодь места, кӧні, ме чайтӧм серти, сулалісны да виччысисны менӧ гырысь сынъяс.
— Пуксьы вай, — кыліс куст сайсянь. — Уджаланныд, э?
Ме гӧлӧс сертиыс тӧді Семёнӧс, коді унджык кадсӧ кыйис чери, тӧргуйтіс сійӧн да юис.
— Уджалам, — вочавидзис Юра.
— Тысӧ кӧсъянныд лэдзны, э?
— Кӧсъям...
— Чериа тыыс, — висьталіс Семён. — Коркӧ, турун ытшкигӧн, ме локті ва юны. Воді берег дорас, ӧшӧдчи морӧснам кутшӧмкӧ нитшсялӧм кер вылӧ да и юа. Сэсся друг кыла: керйыд вешйыны кутіс. Ме звирк чеччи: мый нӧ, думайта, эстшӧмыс? Видзӧда — керйыд ньӧжйӧник бергӧдчис да кутіс кывтны шӧрлань. И ме муртса садьтӧг эг усь: сир ӧд вӧлӧма! Но, лешакӧ! Мышкыс нитшсялӧма — кер, кер и эм.
— А мыйла нӧ некод оз кыйсьы?
— Лӧптӧн тырӧма — зіб некытчӧ сюйны. Да сэсся этшаӧн и тӧдӧны, мый тані сы мында чери. Гычьяс эмӧсь — пач пӧдан пасьтаӧсь...
Чӧв олыштісны.
Сэсся Семён бара шыасис:
— А тэнад нӧ бокад кутшӧм банка бовъялӧ?
— Фотоаппарат...
— О-о, а ме думайті — нидзув банка...
Ме муртса куті серамӧс.
Семён сьӧкыда ышловзис:
— Эк, Юрий, Юрий, татшӧм ӧмӧй фотоаппаратыс?
— А мый?
— Шыбит тэ сійӧс. Ньӧб настӧящӧйӧс, мед любӧ вӧлі видзӧдлынысӧ. Ньӧб увеличитель. Во!
Юра ышловзис да, колӧ чайтны, ньылыштіс дульсӧ.
— Да, эськӧ...
— А мый сайын нӧ делӧыс, э?
— Сьӧмтӧгыд он ньӧб!
— Хм, — думыштчис Семён, — сьӧмыд, дерт, колӧ...
Бара недыр кежлӧ ланьтлісны.
— Но нинӧм, — гажаа шуис Семён. — Ме тэныд отсала. Кывзы...
Семён кутіс шӧпкӧдны. Ме шензьӧмӧйла ыдждӧді синъясӧс, кыпӧдчи да видзӧдлі куст сайсянь.
Семён, синъяснас ӧтарӧ-мӧдарӧ кодзлӧдлігтыр, мыйкӧ тэрыба шӧпкӧдіс, кадысь-кадӧ мигнитлывліс, а Юралӧн синъясыс вочасӧн кайисны кымӧсас, вомыс пыр паськалі да паськалі. Медбӧрын, сійӧ вӧр моз видзӧдліс тыланьӧ да полӧмӧн шуис:
— Да мый тэ, кыдзи нӧ позьӧ?!
— Э, Юра, муса друг, сӧмын оз позь юр пырыд гачасьны, а сэсся ставсӧ позьӧ.
Юра мӧвпалӧмӧн йирис парсӧ, а Семён ӧзтіс папироска да заводитіс веськодьпырысь пуркйӧдлыны тшынсӧ, виччысис. Юра довкнитіс юрнас:
— Думыштла...
Семён заводитіс вуграсьны. Юра тожӧ чӧвтіс вугырсӧ.
Ме дыркодь пукалі аслам мича местаын, но нинӧм эз шед. Дӧзми да бӧр муні Педӧр дінӧ.
Педӧр, кор кыліс нитшсялӧм мышка сир йылысь менсьым висьттӧ, гораа серӧктіс.
— Ме унаысь шыбитлі тайӧ пеж тыас кыснанӧс, но сісь колодаяс кындзи дзик немтор эз шедлы.
Ты дорӧ лэччис Таня.
— Ужин гӧтов.
Чой кутчысис сойӧ да ме вылӧ видзӧдліс мелі синъяснас.
— Мудзин, Питирим, да? И кынӧмыд, кӧнкӧ, сюмалӧ?
Ме ньылышті дулльӧс: кынӧм, збыльысь, прамӧя нин сюмалӧма.
— И ме мудзи, — ышловзис Таня да мыжапырысь нюммуніс.
Ме малышті сылысь небыдик кудриа юрсисӧ да збодера шуи:
— Нинӧм, Танюш...
Ужнайтім. Тасьті-пань мыськалігмоз Таня заводитіс сьывны. Ваня босьтіс гудӧксӧ, любӧпырысь кывзыштіс чойлысь мича гӧлӧссӧ, сэсся кутіс ньӧжйӧник ворсны. Оля видзӧдліс Таня вылӧ, и кык гӧлӧс юргисны рытъя чӧв-лӧняс. Ми кымыньӧн куйлім кӧдзавны удиттӧм эжа вылын да кывзім. Ме сьӧлӧмсянь шензи, кутшӧм лӧсьыд, вӧлӧмкӧ, шойччыны удж помалӧм бӧрын вӧльнӧй воздух вылын войвывса шоныд тувсов рытын, кор уліад юр кольмӧдмӧн чӧскыд дукӧн пӧлясьӧны том петасъяс, а выліын оз на гожся моз дӧзмӧдчыны дзизгысь номъяс.
5
Шонді лэччӧм бӧрын ми водалім коз лапъясысь вӧчӧм вольпась вылӧ. Мудзӧм бӧрад регыд и унмовсим.
Войнас кӧдзыд вӧснаыс ме палялі да восьті синъясӧс. Югыд енэжсянь слабиника мигайтісны разнӧй рӧма кодзувъяс. Бипур кусӧма, сӧмын ӧти гӧлӧвня дышиника тшыналӧ.
Ме чеччи, йӧжгылясигтырйи лӧсьӧдышті гӧлӧвняяс да заводиті зіля пӧлясьны. Недыр мысти песъяс костысь быйкнитісны югыд би кывъяс да кутісны йӧктыны. Ме содті кос увъяс, и би тӧдчымӧн лои гажаджык. Гӧрд рӧмӧн югнитіс Сьӧд гылӧн кӧдзыд да лӧнь веркӧсыс. Ты берегдорса сьӧд козъяс да копыртчӧм бадьяс видзӧдчисны лӧнь тыӧ да, кажитчӧ, шога ышлолалісны. Налы, буракӧ, жаль вӧлі тыыс. Ӧд некымын лун мысти Сьӧд ты увгигтырйи уськӧдчас канал кузя и регыд косьмас. Пуяслы некытчӧ лоӧ видзӧдчыны мича асывъясӧ. Оз кут эзысьӧн пуны тылӧн югыд веркӧсыс кокни тӧвруясысь, оз кутны шыавны уткаяс. Лӧнь лоӧ, гажтӧм...
Ме очсышті. Окота нӧшта узьыштны, но биыс вывті гажаа трачкӧдчис да печласис ӧгыръясӧн, и полі, мед югыд чирк оз чеччышт кодлыкӧ воротник костас, либӧ мед оз кыскы кодкӧ ломзьысь ӧгырсӧ ныр розяс.
Ёртъяс узисны чӧскыда. Нырнас шкоркнитлывлӧ Ваня. Со Оля кусыньтчӧма кӧлачӧн Таня дорӧ, сюйӧма кияссӧ пидзӧсъяс костас. Алӧй паръяс костіыс еджвидзӧны посни пиньяс. Нывкаяс узисны ӧтлаын. Оля водӧма медся дорас.
«Лунтыр микӧд тшӧтш уджаліс, эз норась, кӧть и нывка», — думышті ме.
Оля вӧрзьыштіс: кынмӧ, тыдалӧ. Ме пӧрччи фуфайкаӧс да видзчысьӧмӧн шебралі нывкаӧс. Оля восьтыліс сьӧд синъяссӧ, нюммуныштіс да бӧр унмовсис. Ме мыйлакӧ гӧрдӧдышті да тэрыба видзӧдлі ёртъяс вылӧ: эз-ӧ кодікӧ аддзыв менсьым шебралӧмсӧ? Серавны ещӧ кутасны. Эз, ставныс узьӧны. Сӧмын вот Педӧр, кажитчӧ, нюмъялӧ. Весиг узигас нюмъялӧ, дивӧ кодь мортыд. Али олӧ, чӧртпиыд? Ме кокньыдика тувки сылы кынӧмас: — Тэ олан?
Педӧр мыйкӧ нурбыльтіс ун йывсьыс, сэсся, синъяссӧ восьтывтӧг, грӧзитыштіс:
— Нидзув банкасӧ кӧ пӧрӧдан, виччысь, мый ме сэки тэнӧ вӧча!
Ме видзӧдлі гӧгӧр, но некутшӧм банка эг аддзы.
Би кутіс ӧзйыны лӧньджыка. Ме синва петтӧдз очсышті да нюжӧдчи Ваня бердӧ.
Садьми гораа броткӧмысь.
— Мый нӧ сэні шонді петігас петукъяс моз горзан? — скӧрми ме.
Вочакыв пыдди Педӧр ӧшӧдіс менам ныр весьтӧ мыйкӧ нидзув сямаӧс да юаліс:
— Нидзувъяссӧ тэ жаритін?
— Кодӧс?!
— Нидзувъяссӧ! Меным вуграсьны колӧ мунны, а тэ кань моз чеччӧмыд войын, би пестӧмыд да жаритчан!
— Коді жаритчӧ? Тэ мый, вӧтасян али мый?
Ме гӧгӧрвои, мый, пемыднад песъясӧн вӧрӧшитчигад, пӧрӧдсьӧма нидзув банкасӧ да юалі:
— А жаритӧм нидзувъяссӧ чериыд оз сёй?
Педӧр серӧктіс да лэччис ва дорӧ. Ме бара унмовси. Садьми гораа гудӧкасьӧмысь да сьылӧмысь. Вӧлӧмкӧ, Оля да Таня чеччӧмаӧсь водз, пестӧмаӧсь бипур да пузьӧдӧмаӧсь чайникъяс. Сэсся пальӧдӧмаӧсь Ваняӧс да сюйыштӧмаӧсь киас гудӧк. Унзіль Ваня первойсӧ дыр абу гӧгӧрвоӧма, мыйын делӧыс, а сэсся гӧгӧрвоӧма да чажӧбтӧма збодер сьыланкыв:
Петушок, погромче пой,
Разбуди меня с зарей!
Тайӧ гажа сьылӧм-ворсӧм улас ми нюмъялігтырйи кыпӧдалім юръяснымӧс. Медым ӧдйӧджык вӧтлыны унзільсӧ, бузгысялім вискӧ, мыйӧн вывті ёна скӧрмӧдім Педӧрӧс: вӧлӧмкӧ, дэбӧдӧ кутшӧмкӧ вӧвлытӧм ыджыд сын. Шонді петӧмсянь Педӧр абу весьшӧрӧ воштӧма кадсӧ: кыйӧма ведраджын сын да ёкыш. Черисӧ сійӧ сетіс нывъяслы: пуӧй пӧ бӧрти кежлӧ. Унаӧн яналӧмӧн гыжъялісны юрбӧръяснысӧ: позис жӧ эськӧ вуграсьыштны, да узьсьӧма тай, ерӧмаканьыд!
Чай юигӧн воис Володя. Сиктӧ ветлысь ёртъяс вайисны комын литр тӧран бидонӧн йӧв, мешӧкджын нянь, чай да сакар: Сергей Иванович тшӧктӧм серти пӧ.
Володя видзӧдліс миянсьыным уджнымӧс да некымын мортӧс ыстіс керавны майӧгъяс.
— А ті, нывъяс, ваялӧй майӧгъяссӧ: ӧні жӧ колӧ крепитны рӧв бокъяссӧ... Видзӧдлӧй, мый артмӧ!
Ми видзӧдлім. Збыльысь, дедӧыс эз вӧв мича: сійӧ местаӧд, коді тысянь вӧлі медся матын, рӧв бокъясысь сӧдзтысис няйт сора ва. Кизьӧрмӧм няйтыс веськыда визувтіс. Таті, дерт, кодйы кӧть эн кодйы, дзик ӧткодь: рӧв бокыс дугдывтӧг кутас исковтны-буждыны.
Кад воштытӧг босьтчим уджӧ: ӧтияс кодйысисны, мӧдъяс кералісны бадь, коймӧдъяс кыскалісны сійӧс, а Володя ёсьталіс майӧгъяс.
Ваня лӧсаліс кыдз пуысь ыджыд нӧш да заводитіс упкыны-тувъявлыны майӧгъяссӧ рӧв бокъясас.
Час мында уджалӧм бӧрын Володя пуктіс черсӧ, чышкыштіс чужӧм вывсьыс пӧсьсӧ да шуис:
— Бур. Талун, ме чайта, тіян эштас кодйысян уджыс. Ӧбед бӧрас заводитӧй керавны майӧг да бадь, мед рытланьыс, кодйысян удж помалӧм бӧрын, заводитны эжны рӧв бокъяссӧ баддьӧн, а то буждыны вермас.
— Крепитім тай нин, — шуи ме.
Володя кӧсӧйтчис мелань, нюммуніс:
— Крепитім кык метр кузьта, а рӧвныд тіян со кытчӧдз нюжалӧма! Джуджыд лоӧ, да любӧй местаӧд вермас буждыны...
Володя велӧдіс миянӧс, кыдзи потшны рӧв бокъяссӧ плетеньӧн.
— А тысӧ кыдзи кутам лэдзны? — юалі ме. — Эсійӧ кык метр кузьта перемычкасӧ, коді торйӧдӧ тысӧ рӧвсьыс, бара ковмас кодйыны?
— Оз ковмы кодйыны. Ме кори бакенщиклысь взрывчатка. Сійӧ кӧсйысис сетны: кольӧм во перекатсӧ взрывайтӧм бӧрын речникъяс кольлӧмаӧсь кило-мӧд-коймӧд.
— Вот тайӧ да! — вомдоръяссӧ нюлыштіс Педӧр. — Ми том дырйи тадзи жӧ вӧчлывлім.
Володя муніс: овмӧсыд пӧ ыджыд, быдлаӧ колӧ волыны. Сійӧ кӧсйысис рытнас нӧшта ӧтчыд вуджавны.
Ми заводитім кодйысьны. Час мында кодйысьӧм бӧрын ме куті каитчыны, мыйла тӧрыт эг мун гортӧ. Пӧсялӧм кияс кӧрт зыр пуӧ сідз зыртчисны, мый чуньясӧс веськӧдны эг кут вермыны. Ки пыдӧсын да пев костын артмисны зэв ыджыд ва больяс, кодъяс недыр мысти потласисны, и киӧй чӧсӧдіс терпитны позьтӧма.
Лун шӧр кад матыстчигӧн лои сэтшӧм жар, мый лолавны эг кут вермыны. Некутшӧм тӧвру абу, кыті оз вӧрзьышт, весиг сынӧдыс абу сӧстӧм, а кизьӧриник тшын кодь, гӧлубӧй, тіралӧ му весьтын.
Тушаын места эз вӧв, кытысь эськӧ эз пет пӧсь. Кажитчӧ, коклябӧръясысь и то шоръяс визувтісны. Юрси пратьмис да сибдаліс кымӧсӧ.
«Чӧртыс вайӧдіс менӧ татчӧ!» — скӧра думышті ме да веськӧдчи, и синъясӧн паныдаси Танякӧд. Нывъяслы, дерт, вӧлі кокньыдджык: найӧ ноксисны бипурӧн, лӧсьӧдісны сёян-юан, сэсся бадь новлісны, и эз нин ми мында кодйысьны.
Таня мелі синъяснас гӧгӧрвоана видзӧдліс ме вылӧ, сэсся гажаа мигнитіс, кайис рӧвысь, босьтіс гудӧк да матыстчис Ваня дорӧ:
— Ворсышт, Ваня...
Ваня шензьӧмӧн видзӧдліс Таня вылӧ, сэсся нюммуніс, копыртыштліс юрсӧ да босьтіс гудӧксӧ. И друг сэтшӧм гажа шыяс ойдӧдісны ывлавывсӧ, мый менам ыркмуніс сьӧлӧмӧй. Педӧр лэптіс юрсӧ да долыдпырысь серӧктіс. Кодйысьысьяслӧн мудз чужӧмъяс выланыс мыччысис нюм, синъяс дзирдыштісны гажаджыка. Ставным кайим рӧвысь.
Оля шыбитіс кӧрт зырсӧ да кутіс йӧктыны. Гожъялӧм кокъясыс сылӧн вӧрисны тэрыба-тэрыба, а сьӧд кӧсаясыс пыркалісны морӧс вылас. Педӧр видзӧдіс-видзӧдіс, сэсся эз вермы терпитны, шлапкис кепкасӧ муӧ, вылӧ-вылӧ чеччыштліс да заводитіс бергавны-йӧктыны Оля гӧгӧр.
Нывъяс нюмъёвтісны ёрта-ёртыслы, и юрӧбтіс гажа сьыланкыв. А Ваня, гырысь карӧй синъяссӧ кытчӧкӧ ты помӧ веськӧдӧмӧн, сӧмын кисьтіс-ворсіс. Ми любӧпырысь видзӧдім тайӧ концертсӧ. Весиг мудзным кытчӧкӧ воши.
Но век ӧд он сьыв да ворс: колӧ уджавны. Юра со зумыштчӧма нин, кӧть эськӧ ачыс и эз на пӧсявлы.
Бара босьтім кӧрт зыръяс. Ме зывӧка видзӧдлі енэж шӧрӧ ӧшйӧм шонді вылӧ, коді талун немжалиттӧг пӧжис да сотіс миянӧс, да заводиті кодйысьны, недыр мысти бара лои сьӧкыд. Быд копыртчылігӧн юрӧй сідз польдліс вирӧн, мый гудыртчылісны синъяс да заводитлісны доймыны кӧсичаяс, кымӧс, юр бӧр. Сійӧ и видзӧд, нырсьыд и пельсьыд ылькнитас вир.
Медбӧрын, вои сэтчӧдз, мый мусӧ быд кыкысь шыбитӧм бӧрын ковмыліс мыджсьывны кӧрт зыр пу вылӧ да шойччыны. Видзӧдлі ёртъяс вылӧ: некутшӧм чужӧм вылын эз тыдав нюм, не кӧ, дерт, артавны Педӧрӧс. Оз али мый сійӧ мудз? Паныдасян синъяснад, и сэтшӧм гажаа нюмъёвтас, быттьӧ оз му кодйы, а нӧк панялӧ. Сідз жӧ, мудз тӧдтӧг, кодйысис и Ваня: некод вылӧ оз видзӧд, оз веськӧдчыв, шыблалӧ и шыблалӧ сёй ёкмыльяссӧ. Мудз чужӧмаӧсь, норасьтӧг кодйысьӧны Оля да Таня. Найӧ кыкнанныс зэв частӧ шойччӧны.
А менам вын сэсся быри, шыбиті кӧрт зырйӧс да пукси:
— Сэсся ог кодйысь...
— Кыдзи он кодйысь? — пыр жӧ скӧра шыасис Юра. — Няргыны заводитін?
— Юра! — воксӧ кӧритіс Оля. — Кыдзи тэныд абу яндзим?
«Мӧд лун уджалам, да эз на шыбит китыр му, — думышті ме. — Чойсӧ кӧть эськӧ мед вежліс, дзикӧдз жӧ со мудзӧма. Сьӧлӧмтӧм порсь! А ӧд командуйтӧ со!»
Ме зывӧктӧмӧн да лӧга видзӧдлі Юра вылӧ:
— Ачыд сэсся кодйысь ме пыдди, мисьтӧм рожа! Ичӧтджык чойсьыд кӧть мыйла он яндысь?
Юра чеччыштіс ме дінӧ, но веськӧдчис ыджыд тушаа Ваня да горӧдіс:
— Кытчӧ?!
— Тэ Питиримлысь кияссӧ видзӧдлы да вӧлись чеччав, — шыасис Педӧр.
— Ставнымлӧн сэтшӧм! — шызисны челядь. — Ачыд мыйла тшӧтш он уджав?
Юра шӧйӧвошӧмӧн бергӧдліс юрсӧ ӧтарӧ-мӧдарӧ, синъясыс ыдждісны, весиг стрӧглуныс воши:
— Да мый ті ме вылӧ уськӧдчинныд? Меным кажитчӧ, эг ме вайӧд татчӧ тіянӧс уджавнысӧ!
— Абу сыын делӧыс! — ӧтпырйӧ горӧдісны некымынӧн. — Уджыс добровольнӧй, асьным локтім. А вот тэ мыйла он уджав?
— Мыйсяма барин?!
— Бригадир тожӧ!
— Чӧрту татшӧм бригадиртӧ!
— Бӧръям Ваняӧс!
— Правильнӧ, коді Ваня вӧсна — лэптӧй киястӧ.
Ӧттшӧтш лыбис кызь ӧкмыс ки. Вок вылас синкым увсянь видзӧдігтыр лэптіс кисӧ и Оля.
— А тэ, кузь туша, либӧ уджав, либӧ весась татысь!
Юра курччис парсӧ да вешйис бокӧ.
Таня стрӧга да дивитӧмӧн видзӧдіс сы бӧрся, сэсся бергӧдчис Ванялань:
— Ваня, вай бригадирав. Мудзим!
Ваня лапйӧдлыштіс синъяснас,
мӧвпыштчӧмӧн видзӧдыштіс ми вылӧ, ышловзис, сэсся макнитіс кинас:
— Ладнӧ, шабаш! Ӧбед!
Ми радпырысь горӧдім да уськӧдчим вискӧ. Купайтчим дыр, сьӧлӧм бурмытӧдз, ворсім да суналім быдсяманогыс. Торйӧн нин старайтчи ме. Весиг порсь моз ружті: сэтшӧм нин ваас вӧлі лӧсьыд.
Сэсся кайим мыльк вылӧ да водалім. Бипур весьтын ӧшалысь ведраяс да чайникъяс вылӧ радейтана синъясӧн видзӧдлывлігмоз кыскалім нянь, тасьтіяс, паньяс. Таня кисьталіс юква. А кутшӧм юкваыс! Гежӧда удайтчывлӧ паньыштны татшӧм юквасӧ. Сэсся кутчысим чериӧ.
— Челядь, ті видзӧдлӧй вӧвлӧм бригадир вылас, — сын юр вильӧдігӧн нюмъёвті ме.
Челядь бергӧдчисны.
— Мый нӧ? — чужӧм вывсьыс пӧсьсӧ чышкигмоз скӧра юаліс Юра.
— Уджалігад эз пӧсявлы, а сёйигад, видзӧдлӧй, сулик ва!..
Ставӧн гажаа серӧктісны.
Юра гӧрдӧдіс, тэрыба сувтіс, но аддзис Ванялысь зумыштчӧм чужӧмсӧ да бӧр пуксис.
— Меным кажитчӧ, тэнад кывйыд вывті кузь да вермас коркӧ курччыссьыны. Локтін кӧ уджавны...
Ме лэпті юрӧс, но вӧвлӧм бригадир эз помав: тыдалӧ, аслас кывйыс курччыссис.
— Правильнӧ, Юра! — шуи ме. — Локтін кӧ уджавны — уджав. А коді оз уджав — сійӧ оз сёй. Дзик весьшӧрӧ ми тэнӧ вердім черинас. Бӧр вай!
Челядь серӧктісны, а Юра зятнитіс пиньяснас да, паръяссӧ курччӧмӧн, лӧгпырысь видзӧдліс ме вылӧ, но дзик нинӧм эз вермы шуны. Ӧбед бӧрын сійӧ зумыша малыштіс кӧрт зырлысь чегӧм пусӧ, сэсся босьтіс Ванялысь черсӧ да саялі тыдорса вӧрӧ, буракӧ, муніс корсьны выль кӧрт зыр пу.
— Эг думайт, мый Юра сэтшӧм дыш, — ышловзис Таня. — Ме сідз сійӧс уважайті, весиг полі...
— Менам вок кӧсйӧ лоны музыкантӧн, — гажтӧма нюммуніс Оля. — Меным пӧ дзик нинӧмла вӧчны сьӧкыд удж, мырсьыны, кисьтны пӧсь, менам пӧ эм талант...
— Ладнӧ, — шуис Ваня да босьтіс гудӧксӧ.
Ми куйлім мыльк вылын да, синъяснымӧс куньӧмӧн, сьӧлӧмсянь кывзім гудӧклысь мелі шыяссӧ. Ваня веськӧдӧма карӧй синъяссӧ кытчӧкӧ ылӧ-ылӧ, копыртыштӧма пемыдруд юрсиа юрсӧ да, кажитчӧ, ворсӧ оз гудӧкӧн, а миян сьӧлӧмъясӧн. Мый вылӧ норасьӧ гудӧкыс? Кывзан, кывзан ышлолалігтырйи, да сьӧлӧмыд небзяс, весиг бӧрддзыны окота лоӧ...
Шойччыштӧм бӧрын Таня, Оля да нӧшта кымынкӧ нывка лэччисны вис дорӧ мыськавны дозмук.
Ваня сувтіс, мӧвпалӧмӧн ниртыштіс нырсӧ, сэсся лыддис черъяс. Вӧлі нёль чер, витӧдыс Юра ордын. Торъя уна сёрниттӧг выль бригадир бӧрйис нёль мортӧс, сеталіс налы черъяс да индіс бадь кустъяслань:
— Керасьны...
Татшӧм ногӧн жӧ бригадир торйӧдіс нывъясӧс да дженьыдика шуис:
— Бадьла... — А мукӧдыслы нюмъёвтіс діа кинас ӧвтыштіс: — Кодйысьны.
Коли час дай мӧд, ми мудзтӧдз нин уджалім, а Юралан дукыс абу. Ваня частӧ видзӧдлывліс вӧрлань: колӧ заводитны эжны рӧв стойкаяссӧ, ёсьтыны майӧгъяс, а черыс сэсся абу.
— Сибдіс кытчӧкӧ, — тӧждысис Педӧр.
— Ого-го! — горӧдім ставӧн ӧттшӧтш.
Недыр мысти Юра мыччысис. Киас эз вӧв ни чер, ни кӧрт зыр пу, но зато кепкаас тыдалісны утка колькъяс.
Педӧр матыстчис Юра дорӧ, сюйліс нырсӧ утка колькъяс тыра кепкаӧ:
— Кытысь нӧ тэныд утка колькъясыс?
— А черыд? — юаліс Ваня.
Юра пуктіс кольк тыра кепкасӧ вутш вылӧ да ышловзис:
— Вошті...
— Воштін? — синъяссӧ сувтӧдіс Ваня.
— Пыри вӧрас, мунышті, и друг кокъяс улысь утка чепӧсйис, но эз лэбзьы. Меным кажитчис — ранитчӧма. Суӧда — сійӧ котӧртӧ вутшъяс косттіыс. Сэсся гӧгӧрвои: поз сылӧн кӧнкӧ тані. Корси, корси и аддзи. А вот черсӧ кытчӧ пукті — ог тӧд. Некытысь эз сюр.
— Ладнӧ, — чӧв олыштӧм бӧрын ышловзис Ваня, босьтіс кӧрт зырсӧ да чеччыштіс рӧвйӧ.
— А мыйӧн Ваня майӧгъяссӧ кутас ёсьтыны? — скӧра юалі ме. — Утка колькъяснад?
Челядь, Юра вылӧ кӧсӧйтчылӧм бӧрын, зумыша лэччалісны рӧв пыдӧсӧ. Ваня тшӧктіс Танялы вайны керасьысьяслысь ӧти чер.
Би дорӧ колим куимӧн: Юра, Педӧр да ме. Юра ляпкӧдчис би дорӧ, ӧзтіс папироска.
Педӧр пуксис Юралы паныд да нюлыштіс вомдоръяссӧ:
— Ок, и радейта ме утка колькъястӧ! Том дырйи гӧтыр пуас вӧлі чугунӧн...
— Ме и ачым кужа сёйны колькъяссӧ, — орӧдіс Юра.
— Ни ӧтиӧс он сет?
— Меным кажитчӧ, ме эг тэныд вай!
— А тэ пӧж, пӧж, пуксьы да! — скӧра горӧдіс Оля.
«Тайӧ кодкӧдкӧ юксяс! Юраыд абу Педӧр! — думышті ме. — Велӧдыштны эськӧ татшӧмсӧ...»
Син улӧ уси кольк тыра кепкаыс. Очсалігтырйи ме муні Юра мыш сайӧ да, дыр мӧвпавтӧг, сюйышті кепкасӧ лажыньтчӧмӧн пукалысь Юралы уліас.
«Гашкӧ, думайта, пуксяс. А оз кӧ пуксьы, позьӧ пельпомӧдыс личкыштны, и сэки пуксяс».
Юра, збыльысь, мудзис лажыньтчӧмнад куткырвидзны, ышловзис да пуксис колькъяс выляд. Колькъяс вадзмуніны. Юра звирк чеччис да гӧгӧрвотӧг видзӧдліс уліас. Гачсьыс мичаника ӧшӧдчисны виж везъяс. Педӧр юрсӧ чатӧртӧмӧн вомтырнас серӧктіс, а ме горӧді:
— Ёртъяс, Юраыд яичница нин вӧчис!
Лякӧссьӧм гача Юра, пиньяссӧ векыштӧмӧн, уськӧдчис ме вылӧ, но ме, гажаа сералігтыр, котӧрті ёртъяс дінӧ. Челядь сералісны синва петтӧдзныс. Сьӧлӧмсяньыс сераліс и Оля.
— Сідз тэныд и колӧ!.. — куснясис сійӧ.
6
Шонді ньӧжйӧник катовтчис увлань. Но и рӧв кутіс кодйыссьыны. Комын мортыд — комын морт и эм: видзӧдлан да повзян — сы мында му шыблалісны.
Мыльк весьтті рӧвыс лои нин кык метр судта. Сэні уджалісны Ваня кодь жӧ ён зонъяс. Но миянлы эз жӧ вӧв кокни: воис сёй, кокъяс улын болскӧдчис няйт сора ва. Сапӧгъяс сибдалісны, лоисны свинеч кодь сьӧкыдӧсь, а кӧрт зыр йылысь он нин и сёрнит — пуд сьӧкта. Но медся лёк вӧлі сійӧ, мый пӧшти нинӧм он вермы шыбитны вывлань. Ӧвтыштчан мыйвынсьыд, а сёй комӧкыс оз и торъяв кӧрт зырсьыд — бӧр лэччӧ. Гусьӧник ёрччигтыр скӧрысь сетыштан кӧрт зырнад рӧв бокӧ, сэсся весалан сибдӧм сёйсӧ чагторйӧн да бара заводитан кодйысьны.
Но уджлӧн тыдаліс нин помыс, и ми зілим. А Юра лэччыліс кытчӧкӧ вис пӧлӧн увлань, сэсся муніс корсьны воштӧм черсӧ.
Миян удж кутіс эштыны. Медбӧрын Ваня прӧйдитіс рӧв кузя, дыр видзӧдіс ӧтарсянь и мӧдарсянь, сэсся долыда лолыштіс:
— Гӧтов!
— Ура-а! — кӧрт зыръяснымӧс вылӧ кыпӧдӧмӧн мӧдлапӧвтырнас горӧдім ми. Йӧлӧгаыс шыасис весиг мӧдар берегсянь. Горзігтырйи кайим мыльк вылӧ. Нимкодьысла Педӧр весиг йӧктыштіс.
— Шойччыны! — нюммуніс Ваня да водіс кынӧм вылас.
— Ме сэтшӧма мудзи! — ышловзьӧмӧн Оляӧс кутыштліс Таня.
Ме видзӧдлі чойлӧн вӧсньыдик гӧрдӧдӧм сойяс вылӧ, и топавліс сьӧлӧмӧй.
— Ме мудзи жӧ, Танюш, — шуис Оля.
Воис Юра. Гажтӧма видзӧдліс Ваня вылӧ, шевкнитіс кияссӧ да ышловзьӧмӧн пуксис. Ваня зумыштчис. Мыльк весьтті канал зэв джуджыд, бокъяссьыс сӧдзтысьӧ ва, эмӧсь лыа местаяс, сійӧс и видзӧд — буждыны вермас. Сэтчӧ жӧ лунтыр вӧлі жар, уль руа, пӧжис, енэжыс рытыввывсянь заводитіс лӧзӧдны, и оз кӧ рытнас, то войнас ёна зэрмас. Сэки рӧв вылӧ макнит кинад: буждас. Шойччыштӧм бӧрын колӧ заводитны эжны баддьӧн рӧв бокъяссӧ, а черъяс оз тырмыны. Ӧд, бадь кералӧм кындзи, колӧ керавны и майӧгъяс, ёсьтыны найӧс дай тувъявлыны.
— Ок, кутшӧм тэ, Юрка! — лӧг синъясӧн видзӧдліс вокыс вылӧ Оля. — Черъясыс сідз нин оз тырмыны-а...
— Ветламӧй черъясла, — шуи ме. — Взрывчаткасӧ колӧ жӧ вайны...
Недыр вензьыштӧм бӧрын шуим кывтлыны Митрей дядь дорӧ взрывчаткала да сэсянь кайны гортӧ, а аски черъясӧн локны бӧр. Дерт, потшсьыны колӧ талун, но кузь лун чӧж уджалӧм бӧрын ми ставным жуялім, и гортысь бӧр вуджӧм йылысь сёрни эз и кыптыв. Кодъяс окотитӧны потшсьыны талун, мед потшӧны, мыйта вермасны, а коляссӧ помалам аски.
— Ладнӧ, — шуис Ваня, — ветлӧй.
— А ми эжам рӧв бокъяссӧ мыйтакӧ, — содтісны кольччысь ёртъяс. — Регыд локтас Володя, сыкӧд делӧыс бурджыка артмас.
Мӧдӧдчим. Микӧд тшӧтш мӧдӧдчис и Педӧр, но Митрей дядь дорӧ вуджалӧм бӧрын сійӧ кӧсйис бергӧдчыны бӧр.
Кык ыджыд пыжӧн кывтім бакенщик будка дорӧдз.
Бакенщик берег дорын кӧнӧпатитіс пыж.
— Митрей дядь, ми взрывчаткала воим, — шуис Педӧр. — Кодйысян уджыс миян эштіс.
Митрей дядь, гӧрд тош увсӧ гыжъялігтыр, видзӧдліс ми вылӧ:
— Кодйыссис, шуанныд? Но, но, зэв бур. А взрывчаткатӧ, пиян, ме тіянлы ог сет.
Ми чуймим. Весиг Педӧр дугдіс нюмъявны, а вот Юра мыйлакӧ гусьӧник нюмдыштіс.
— Мыйла, Митрей дядь? Кӧсйысьлінныд жӧ! — шуи ме.
Педӧр пуктіс кияссӧ морӧс вылас да копыртчыліс:
— Митрей дядь, но, пӧжалуйста...
— Оз позь, пиянӧй, — стрӧга видзӧдліс Митрей дядь. — Взрывчатка — абу шутка. Сювнытӧ лэдзанныд, а меным кывкутны?
— Да мый тэ, Митрей дядь! — горӧбтім ми. — Ми жӧ ӧкуратнӧя!
— Ог! — орӧдіс бакенщик. — Мунӧй. — Аски асывнас вола да ачым взорвита. А балуйтны взрывчаткаӧн тіянлы ог сет.
Шогсигтырйи ми довгим берег дорӧ, пуксялім пыжъясӧ да йӧткыштчим. Эг вевъялӧй сыныштны, кыдзи будкаысь чепӧсйис Митрей дядь да, кулакъяснас ӧвтчигтырйи, ёрччӧмӧн чеччаліс береглань.
— Эй ті, сэтшӧм-татшӧмъяс, нолтӧ, сувтлӧй!
Ми вомнымӧс паськӧдӧмӧн видзӧдім ярмӧм бакенщик вылӧ.
— Ме тіянӧс, сэтшӧм-татшӧмъясӧс, велӧда! Шутка тіян? Ас кинаныд взрывчатка босьтінныд? Да ме тіянӧс!..
Час мында сынӧм бӧрын ми воим асланым сикт весьтӧдз. Тасянь Педӧр ӧтнас вуджис мӧдлапӧлӧ, а ми кайим гортъясӧ.
Ужнайтӧм бӧрын ме петі кильчӧ вылӧ да видзӧдлі енэжӧ. Рытыввывсянь тэрмасьтӧг уйисны пемыдлӧз кымӧръяс, горизонт бердыс ставнас сьӧдасьӧма. Недыр мысти кымӧръяс ньылыштісны шондісӧ. Лои рӧмыд. Ылын-ылын муртса мургыштлывліс гым.
«Ок, и ёна жӧ зэрмас! — думышті ме. — Бур, мый гортӧ воим».
Пукышті. Гоз-мӧдысь очсышті. «А Педӧр бӧр вуджис, — дум вылӧ уси меным. — Ӧні, кӧнкӧ, найӧ зіля и уджалӧны, тэрмасьӧны, мед зэрмытӧдзыс вевъяласны эжны канава стенъяссӧ».
Рӧв стенъяс буждыны вермӧм йылысь думыштӧм бӧрад менам сьӧлӧмӧй кутіс висьны: кодйим, кодйим, сы мында гадь киясӧ песім, сойяс доймӧны, мыш ёнтӧ и кынӧм мыль кодь, а буждас кӧ, — зэв ӧбиднӧ лоӧ. Ӧні мӧдлапӧлын витӧн, а витнад воджын ковмас эжны. Гашкӧ, вуджны да отсалыштны?
Ышлолалі, гыжъялі то ӧтилаті, то мӧдлаті. Мый вӧчны? Гашкӧ, котӧртлыны ёртъяс дінӧ?
Мӧдӧдчи, а меным паныд Оля локтӧ. Сійӧ пасьталӧма сьӧд юбка да еджыд ковта и петӧма, буракӧ, ыркӧдчыштны. Оля матыстчис, юаланаа видзӧдліс ме вылӧ:
— Питирим, тэ мӧдлапӧлӧ он думайт вуджны?
— Думайта! — радпырысь шыаси ме. — Тэ тожӧ?
— Юра водіс узьны, а менам оз узьсьы, — лапнитіс синъяснас Оля. — Вуджамӧй вай.
Ме любӧпырысь видзӧдлі Оля синъясӧ, думышті:
«Кутшӧм мича, шань тайӧ Оляыс!»
Сьӧлӧм кутіс тіпкыны гораа-гораа. Босьті нывкаӧс киӧдыс. Оля шензьӧмӧн видзӧдліс ме вылӧ.
— Кутшӧм тэ, Оля...
— Кутшӧм? — нывлӧн вӧсньыдик сьӧд синкымъясыс лыбисны вывлань.
— Бур да... мича, — гӧрдӧдӧмӧн шуи ме. Би моз ыпнитіс Олялӧн чужӧмыс. Ныв лэдзис синъяссӧ да шӧйӧвошӧмӧн нюммуніс алӧй паръяснас.
Ми видзӧдлім ёрта-ёрт вылӧ шудаа да неуна яндысигтыр.
— Кора Таняӧс, ми ми вуджам, Оля, — шуи ме, топӧдлі нывлысь кисӧ да радпырысь лэбовті керкаӧ. Видзӧда, а Таня пуксьӧма пызан сайӧ, лэдзӧма юрсӧ кияс вылас да чӧскыда узьӧ. Меным жаль лои садьмӧдны чойӧс.
Пырис мам, аддзис узьысь Таняӧс да меліа нюммуніс:
— Дона Танюшӧй менам, кыдзи мудзӧма...
Мам ичӧтикӧс моз босьтіс сійӧс моздорас да нуис крӧвать вылӧ. Таня весиг эз и палявлы. Но и мед узьыштас. Ме кок чуньяс йылын мӧдӧдчи ӧдзӧслань.
— А тэ, пиӧй, кытчӧ?
— Вуджны колӧ мӧдлапӧлӧ, — тӧждысян чужӧм вӧчӧмӧн шуи ме. — Рӧв бокъяссӧ ӧд эжтӧг он коль!
— И абу дыш?
— Дыш кӧть абу, а колӧ вӧчны, — кыз гӧлӧсӧн зэв збыльысь висьталі ме.
— И эн мудз? — бурпырысь нюмъёвтіс мам.
Ме лэптыштлі пельпомъясӧс:
— Лоӧма жӧ удж! Ми рӧвсӧ ворсігмоз и кодйыштім...
Ме кутчыси ӧдзӧс вугйӧ.
— Да сёянторсӧ кӧть босьт! — тэрыба сувтіс мам да кутіс сюявны сумкаӧ нянь, пуӧм яй таръяс. Пуктіс тшӧтш и бутылка йӧв.
Ме босьті сёянтор тыра сумкасӧ, чер да петі ывлаӧ. Миянсьыным мунӧмсӧ аддзисны да локтісны нӧшта нёль морт. Мӧдлапӧлӧ вуджим квайтӧн.
Ёртъяс паныдалісны миянӧс радпырысь, и меным лои вывті нимкодь, мый вуджи.
Зіля кутчысим уджӧ. Володя, коді вӧлі тані нин, индаліс миянлы, кыдзи-мый вӧчны.
Рӧвлӧн ӧтар бокыс кутіс эжсьыны, кор кымӧръяс улысь ыджыд, шумӧн, виччысьтӧг чепӧсйис вына тӧвныр, исковтіс пемыд ты вывті, пузьӧдіс васӧ да кутіс скӧрысь куснявны кустъяс да пуяс, кодъяс повзьӧмпырысь шувнитісны. Сьӧкыда ружӧктіс пӧрысь коз.
Дзирдыштіс югыдлӧз чардби, сэсся йиркмуні-поті енэжыс да сэсянь, кажитчӧ, ыджыд барабан вылӧ путкыльтісны из тыра мешӧк.
Та бӧрын друг лӧнис. Бадьяс веськӧдчисны да тіралігтырйи кышкисны корнаныс. Помся югъяліс чардби да йиркакыліс-гымаліс. Шуштӧма югнитавліс тылӧн пемыдлӧз веркӧсыс. Ылынкодь тыдаліс енэжсянь муӧдз нюжалӧм еджыдруд стена — зэр.
Ваня видзӧдліс стена вылӧ да, кияссӧ рупор моз вӧчӧмӧн, горӧдіс мӧдлапӧв пасьтанас:
— Ша-ба-аш!!
— Ставӧн пыж улӧ! — содтіс Володя.
Педӧр мыччыліс кулаксӧ енэжлань:
— Со! Ме тэныд аски петкӧдла гаж!
— А ме ветла на бадьла! — ышмӧмӧн пыркнитіс сьӧд кӧсаяснас Оля да тэрыба-тэрыба котӧртіс бадь чукӧр дорӧ. Володя катлӧдлыштіс юрсӧ:
— Со кыдзи гымалӧ, а оз ӧд и пов...
— Оля! — горӧді ме. — Ӧдйӧджык!
Ми котӧртім пыж дорӧ, кыскыштім сійӧс, пӧрӧдім да пырим пыж улас.
Ты веркӧс, кылӧ, пузис, кутіс сяльгыны пыр гораджыка и гораджыка. Ёна шумитігтырйи котӧрӧн локтіс гырысь войтъяса зэр.
Ме мыччылі юрӧс. Оля тэрмасьӧмӧн кыскис бадь куст.
— Шыбит! — горӧді сылы. — Пыр ӧдйӧджык!..
Ныв уськӧдчис пыжлань, но пель чунӧдмӧн пыж пыдӧсӧ сяркӧдысь зэрыс буриника удитіс сизьдыны Олялы мышкас.
Ныв чирзігтырйи дзебсис пыж улӧ.
— Ставныд танӧсь? — кыліс Володялӧн гӧлӧсыс.
— Ставным! — шуим ми.
— Бур, — кылӧ, ниртыштіс ки пыдӧсъяссӧ Володя. — Шойччыштамӧй, сідзкӧ...
Чӧв олыштім. Кывзім зэрлысь шумсӧ. Ме нюжӧдчи Ваня бокӧ. Мудзӧм зон узис нин.
Зэрлӧн ӧтмоза сяргӧм шы улын кутіс вугрӧдлыны и менӧ, но друг казялі, мый Оля тіралӧ-кынмӧ.
— Пӧрччы кӧтасьӧм ковтатӧ да пасьтав менсьым пинжакӧс, — шӧпниті ме.
— Ачыд кынман...
— Босьт!
Оля кывзысис.
Ме тшӧкті сылы вешйыны Ваня дінӧ, а ачым воді дорас. Ванялӧн да менам мышъяс костын нывка ӧдйӧ шоналіс да дугдіс тіравны. Но сы пыдди куті кынмыны ме. Вӧсньыдик дӧрӧмыд эз видз кӧдзыдсьыс да уль руа тӧвсьыс, коді пӧльтіс пыж улӧ. Менам пиньяс кутісны таркакывны.
— Кынман? — мелань бергӧдчӧмӧн шӧпкӧдіс Оля. — Бергӧдчы татчӧ...
Ме бергӧдчи. Оля зэв прӧстӧя, вокӧс моз, сывйыштіс менӧ да ышловзис.
Менам чужӧмӧй ыпмуні-ӧзйис, а сьӧлӧмӧй сідзи кутіс пессьыны, мый дась вӧлі чеччыштны морӧс кудйысь.
— Кынминныд? — миянсьыным бергалӧмсӧ казяліс Володя. — На, шебрасьӧй..
Ми вылӧ уси небыд, шоныд фуфайка. Ме инмӧдчи нырӧн Олялӧн шоныд морӧсӧ, куни синъясӧс да пыр жӧ унмовси чӧскыда-чӧскыда.
7
Асъя шонді сявкнитіс зарни югӧрсӧ меным чужӧмӧ. Садьми. Оля узис менӧ сывйыштӧмӧн да шоныда лолаліс банбокӧ. Ме дыр куйлі вӧрзьытӧг, сэсся ньӧжйӧник лэпті Олялысь кисӧ, вешті ас вылысь да кыпӧдчышті. Ёртъяс чӧскыда узисны. Сӧмын Педӧр эз нин тыдав.
Любуйтчигтырйи дыр видзӧді Олялӧн мичаник чужӧм вылӧ, сэсся шебралі нывкаӧс фуфайкаӧн да петі пыж улысь.
Асылыс вӧлі лӧнь да гажа. Кодзувъяс моз югыда дзирдалісны лысва войтъяс. Мыссьӧм кустъяс, пуяс, турун вӧліны сӧстӧмӧсь, вежӧсь. Ывлавылыс быттьӧ ставнас нюмъяліс.
Лэччи вис дорӧ мыссьыны. Педӧр ноксис нин кыснанӧн.
— Оз жӧ тэнад узьсьы, — шензи ме.
Кодлӧн нӧ узьсяс татшӧм мича асылӧ? — гажаа нюммуніс сійӧ.
Ме кыски зептысь ассьым кыснанӧс.
— Куръяӧ ветлы, — шуис Педӧр. — Татысь мыйлакӧ талун сирыс оз кутчысь...
Ме босьті Володялысь ичӧтик пыжсӧ да вис кузя кывті увлань. Куті нин воны куръя вомӧ, кор месянь неылын друг вывлань кайис ва столб да йиркнитіс взрыв.
«Ого! — думышті ме. — Кодкӧ чери глушитӧ!»
Тэрмасьӧмӧн курасьышті, петі вискысь куръяӧ да видзӧдлі ӧтарӧ-мӧдарӧ. Ва вылын бергаліс пыж, а сэні пукаліс Семён да сакӧн куталіс чери. Менӧ аддзӧм бӧрын сійӧ дрӧгнитіскодь:
— Тэ мый тані вӧчан, а?
— Ми узим тані, — раминика вочавидзи ме.
— Кодъяс «ми»?
— Ме да Педӧр... Мукӧдъяс тӧрыт вуджисны гортӧ, а ми Педӧркӧд кольччим кыснанасьны, — пӧръялі ме, и сэк жӧ юрӧ воис дум: «Кытысь сылы взрывчаткаыс? Эз-ӧ нин кодлыськӧ гусяв?» И друг гӧгӧрвои: «Дерт жӧ, гусяліс! Ме жӧ ачым аддзылі сылысь, вӧрлысь, рыжӧй юрсӧ Митрей дядь будка дорысь!» Вот сійӧ кутшӧм. Судзӧдны, кӧть кыдзи, а колӧ судзӧдны взрывчаткасӧ! Но кыдзи? Корны весьшӧрӧ: Семён сӧмын мыччылас виис пиньяссӧ. Мырддьыны он вермы, гусявны бара жӧ некыдз. Мый вӧчны?
Ме кыски берегӧ пыжӧс да видзӧдлі Сьӧд тылань: надейтчи, мый Педӧр кыліс взрывайтӧмсӧ да кыпӧдас шум, и татчӧ воасны менам ёртъяс. Но ӧд Семён вермас и мунны татысь. Юрбӧрӧс гыжъялігтырйи думайтышті, сэсся чукӧсті:
— Семён дядь! Эй, Семён дядь!..
— Мый нӧ? — зумыш чужӧмсӧ бергӧдіс Семён.
— Босьтлы менӧ пыжад, — нор гӧлӧсӧн кори ме. — Отсала черитӧ кутавны, да сы пыдди меным тшӧтш лов-мӧд сет...
Семён нинӧм эз шу, бара кутіс бергавны пыжнас.
— Босьтлы, Семён дядь, — нярги ме. — Меным эськӧ ӧти сирпи кӧ и...
Семён чӧв оліс.
— Семён дя-а-адь! — нарошнӧ гораа шуи ме, гашкӧ, мися, кыласны ёртъяс да локтасны отсӧг вылӧ.
— Но, лок, — Семён веськӧдчис береглань. — Лешакыс тіянӧс кыскалӧ, кыті оз ков!..
Ме радпырысь пукси пыжӧ.
Дерт, Семён босьтіс менӧ пыжӧ эз сы вӧсна, мый жальыс петіс. Черитӧ кутавны кыкнад ӧд зэв лӧсьыд.
Семён сувтіс пыж шӧрӧ да сакӧн гумлаліс черисӧ, а ме мыйвынысь кураси то ӧтарӧ, то бергалі места вылын. Пӧсь киссис ме вылысь шорӧн, а аттьӧалӧм пыдди Семён, кыдзи вермис, матькис ме вылӧ.
Быгзьытӧдз бергалім куръя вомын, лэпталім сиръяс да ёдіяс, а посни чери вылӧ, коді лыдтӧм-тшӧттӧм кыптӧма ва веркӧсӧ вывлань кынӧмӧн, весиг эг и видзӧдлӧй.
— Чериняньтӧ радейтан сёйны, э?
— Радейта, — меліа нюмъёвті ме, а ачым гусьӧник корсьыся синъясӧн взрывчатка тыра сулеяяссӧ.
— Берегӧ сэсся сын, нурбыльтіс Семён. — Пусьыны колӧ: рытсяньыс нянь крӧшки вомӧ эг на сюйлы...
Менам сьӧлӧмӧй радпырысь йӧктіс: гашкӧ, берегас удайтчас гусявны взрывчаткасӧ, либӧ, воасны кӧ ёртъяс, мырддям.
Пыж ныр зутшкысис берегӧ. Семён шыбитіс лыа вылӧ чер, петкӧдіс ноп, сэсся пырис пыжӧ, ляпкӧдчис да заводитіс лӧдны ведраӧ чери.
— Пай виччысян, э? — бергӧдчыліс мелань.
— Пай, — юрӧс гыжйышті ме.
— На! — шуис сійӧ, и кок улӧ уси сирпи.
— Аттьӧ, — шуи ме, лэпті сирписӧ и сэки син улӧ уси нопйыс, кытысь чурвидзис взрывчатка тыра литрӧвӧй сулея. Тэрыба видзӧдлі мышкӧн куткырвидзысь Семён вылӧ, кыптыштӧм пыж ныр вылӧ, сэсся бергӧдчылі Сьӧд тылань, оз-ӧ локны ёртъяс. Сьӧлӧм кутіс ёна пессьыны морӧс пытшкын.
Нюжмасьны эз позь. Ме звирк чеччышті да мыйвынсьым йӧткышті пыжсӧ. Семён эз виччысь татшӧм делӧсӧ, шнёпкысис пыж пыдӧсӧ да ыджыда ёрччыштіс, но пыр жӧ кыпӧдчис да лёкысь равӧстіс:
— Скӧтина тэ!..
Ме сэк кості кватиті нопсьыс кык сулея да уськӧдчи пышйыны вис пӧлӧн. Но и Семён эз вуграв, чеччыштіс пыжысь. Ваыс вӧлі морӧсӧдзыс, та вӧсна сылы дыркодь тырмис курасьны берегӧдзыс. Ме котӧрті ӧдйӧ, но лыа вывті пышйынытӧ вӧлі зэв сьӧкыд, та вӧсна кутіс тырны лолӧй.
— Ӧшла на ме тэнсьыд, пеж ловлысь, сювтӧ бадь вылӧ! — кылі бӧрвылысь.
Котӧртігмоз ме видзӧдлі и аддзи: Семён пӧрччӧма сапӧгъяссӧ да тӧвзьӧ воськов кызь-комын сайын.
«Суӧдас кӧ, виас!» — юрын визьнитіс дум.
— Ваня, Педӧр, Во-ло-дя! — мыйвынысь горӧді ме.
Мыйта верми, содтышті ӧд, но лолӧй тырис век ёнджыка и вом пытшкӧсӧй нин мӧдіс косьмыны.
«Суӧдны кӧ кутас — шыбита сулеяяссӧ», — думайті ме, а ачым видзӧдлывлі матысмысь бадь кустъяс вылӧ, оз-ӧ сэтысь чепӧсйыны ёртъясӧй.
Семёнлӧн кокшыясыс кылісны дзик нин матын.
Друг бадьяс сайысь тӧвныр моз мыччысисны менам ёртъяс. Ме радпырысь горӧді, сувті да бергӧдчи.
Семён, кокъяссӧ тажгӧдӧмӧн, сулаліс лыа вылын да сьӧкыда лолаліс: тыдалӧ, эз лысьт пырны косьӧ даслы паныд. Дай сулалӧ-ӧ взрывчаткаыс сы дон, мед тышкасьны сы вӧсна? Сійӧ сьӧлыштіс да ӧвтыштіс кинас, а кор аддзис челядь бӧрся гырыся восьлалысь Володяӧс, зілис регыдджык усйысьны аслас пыж дорӧ.
— Мый нӧ сэтшӧм дыр эн локтӧй? — пошкигтырйи ёртъяс дінӧ шыаси ме.
— Да ӧд пальӧднысӧ найӧс пушкатӧгыд сьӧкыд, — ёртъяс вылас зумыша видзӧдліс Педӧр. — Сэсся ун йывсьыд некыдз оз гӧгӧрвоны, кытчӧ да мыйла колӧ котӧртны: думайтісны, ме шмонита...
Взрывчатка судзӧдӧм вӧсна ёртъяс лоины вывті радӧсь. Педӧр весиг кутыштліс менӧ да окыштіс. Меліа дзирдыштісны синъясыс и Олялӧн.
Кайим Сьӧд ты дорӧ.
— А рӧвыд кытсюрӧ буждӧма, — висьталіс Педӧр. Тэрмасьӧмӧн мунім рӧв дорӧ. Ӧтар бокыс, збыльысь, вӧлі кыклаті буждӧма.
— Нинӧм, — шуис Володя, — ставыс лоӧ бур. Воасны йӧзыс, да ӧтвылысь ӧдйӧ кодйыштам...
Юра кындзи тӧрытъя уджалысьяс воисны ставӧн. На лыдын вӧлі тшӧтш Таня. Сійӧ мыжапырысь нюмъёвтіс, сэсся матыстчис ме дорӧ да тувкнитіс бокӧ:
— Ок тэ, Питирим! Мыйла тӧрыт менӧ эн садьмӧд?
— Гӧлӧс быртӧдз горзі, да эн садьмы, — сералі ме.
Час-мӧд ми зэв зіля кодйысим — весалім буждӧм мусӧ. Сэсся бура эжим каналлысь мӧдар боксӧ. Лун шӧр кад кежлӧ удж помассис. Шойччыштӧм бӧрын перемычка улӧ, рӧв пыдӧсас, кодйим розь.
— Но, вай, Питирим, сулеяястӧ, — корис Володя.
Сійӧ ӧткузьтаа вундіс кыкнан шнурсӧ, сюйис капсульяс да бутылкаяссӧ йӧткис кодйӧм розьӧ. Медбӧрын, ставыс лои дась.
— Ню, челядь, — кыпыда шуис Володя, — ӧні взорвитам и мынам сэсся тайӧ тысьыс. Вайӧ ставныд дзебсьӧй эсійӧ нырд саяс.
— А коді ӧзтас? — полӧмпырысь юалі ме да ньылышті дулльӧс.
Володя видзӧдліс ме вылӧ да нюммуніс:
— Тэ и взорвитан, Питирим.
Гажаа варовитігтырйи миян ёртъяс мунісны нырд сайӧ да сэсянь кутісны мыччавны юръяснысӧ. Володя сетіс меным истӧг кӧрӧбка:
— Действуйт...
Ме нимкодьпырысь чеччышті канал пыдӧсӧ, неуна тіралысь киясӧн босьті шнур помъяссӧ, ӧтлаӧді найӧс да чиркниті-ӧзті истӧг. Шнур помъясысь пызйыштіс би да кутіс шумӧн пырны шнуръяс пытшкӧ.
— Зэв бур, — шуис Володя. — Вай китӧ. — Володя, киӧд кутӧмӧн, лэптыштіс менӧ гу пыдӧсысь, и ми котӧртім ёртъяс дорӧ.
Ме виччыси — вот-вот йиркнитас взрыв, но со нин ми воим ёртъяс дінӧ, водім, а взрыв век абу.
Менам кӧдзалі мышкуӧй: взрывчаткаыс кӧ васӧд да оз взорвитчы?
Но друг сыркмуні муыс, и сійӧ жӧ здукас вывлань кайис сьӧд столб да зэв чорыда йиркнитіс. Ва да няйт пытшкысь муыс гырысь комӧкъясӧн лэбис увлань. Ты помыс ставнас пузис.
«Ура» горзігтыр ми чеччалім да уськӧдчим канал дорӧ. Медся водзын пызйис Педӧр.
Ты помсӧ взрывыс ставнас чашнитӧма, буждӧдыштӧма и рӧвнымӧс.
Ва увгигтырйи уськӧдчӧма петны, резсьӧ быгйӧн.
Менам морӧсӧй тыри радлунӧн, вылӧ-вылӧ чеччыштлі да звиркниті канал вомӧн. Тайӧ быдӧнлы зэв ёна кажитчис, и ме бӧрся ставӧн кутісны чеччавны. Володя сералігтырйи ниртіс ки пыдӧсъяссӧ. Гоз-мӧдысь лэбовтіс канал вомӧн и Педӧр, но сэсся друг вольскӧбтіс да бузгысис ваас. Ми горӧдны эг удитӧ, а кияснас шенасьысь Педӧрӧс ваыслӧн вына визулыс тӧвнырӧн моз лэбӧдіс вис дорӧдз да лясмис мӧдар берегас.
Педӧр кавшасис луд вылӧ, вылісьыс пыркнитіс васӧ, сэсся вомтырнас серӧктіс:
— Навигациясӧ ачым восьті! Ура!
— Ура-а! — вывлань шыбитім ми шапкаяснымӧс.
А тыыс увгис и увгис.
Ӧні ме эг жалит, мый гаддьӧссисны кияс, уна киссис пӧсь да пӧттӧдз сюрлі мудзӧм. Меным окота вӧлі кутлыны ассьым ёртъясӧс.
Ваня вазнитіс гудӧкнас. Ми эг вермӧ кутчысьны, коді кыдзи кужим, йӧктім.
— Вот и помасис миян уджным, — пӧсявтӧдз йӧктӧм бӧрын ышловзи ме. — А мӧд ты лэдзны оз ков сэсся?
— Оз, — сераліс Володя. — Ӧні вуджамӧй гортӧ, шойччыштанныд...
Чукӧртім кӧлуйнымӧс да сӧвтім пыжсӧ. Ваня паськӧдіс гудӧксӧ. Рӧв кодйысьяс сьылігтырйи кывтісны вис кузя Эжвалань, а ми Педӧркӧд кольччим чери кыйны. Ме эськӧ и окотиті жӧ мунны, да Педӧр шуис: «Час-мӧд кыснанасям». Кыснанасигтырйи ми кайим вис кузя вывлань.
— Питирим, канал дорад кодъяскӧ воисны, — ньӧжйӧник шуис Педӧр.
Ме бергӧдчи. Збыльысь, ты дорӧ виссянь кодкӧ кыскӧ пыж, а мӧд морт пукалӧ ты помын. Мый налы сэтысь колӧ?
— Ветлам да видзӧдлам, — шуис Педӧр.
Мӧдӧдчим кустъяс пӧлӧн. Кутісны кывны гӧлӧсъяс. Педӧр лэптіс чуньсӧ. Сувтім.
— Но, Юрий, ӧні позьӧ и чери кыйны, — кыліс Семёнлӧн гӧлӧсыс. — Мый нӧ чӧв олан, э? Али фотоаппарат вылад сьӧмыд оз нин ков?
— Мекӧд, Семён дядь, весиг чойӧй оз сёрнит, — жугыля шуис Юра.
— Сьӧлышт! Вай вӧйталам кулӧмъяссӧ...
— Вӧйтлам, колӧкӧ, — ышловзис Юрий. — Гусясьӧм жӧ эськӧ лоӧ да...
Тӧдчис, мый Юралы ньӧти абу окота вӧйтавны кулӧмъяс.
— Йӧй! — нускыштіс Семён. — Кутшӧм нӧ тайӧ гусясьӧм? Чериыс жӧ дзик весьшӧрӧ петас Эжваӧ. Видзӧд, кутшӧм сиръяс тыдовтчылӧны! Вузалам кӧ, — мыйта сьӧм!
Ми Педӧркӧд видзӧдлім ёрта-ёрт вылӧ да петім кустъясысь, но сувтім Семёнсянь ылӧкодь: ме полі, мый Семён ӧнтая делӧсьыд оз яндысь и чужйыны.
Юра падмӧмӧн видзӧдліс ми вылӧ, курччис парсӧ, гӧрдӧдіс, сэсся бергӧдчис да, кыв ни джын шутӧг, мӧдӧдчис вис пӧлӧн увлань.
— Юрий, бергӧдчы, э! Тэ нӧ мый? — горзіс Семён.
Юра эз шыась, а сӧмын тэрыбджыка кутіс восьлавны. Семён дӧзмӧмӧн сьӧлыштіс, бергӧдчис милань чужӧмӧн да лёкысь равӧстіс:
— А тіянлы мый татысь колӧ, э?
— А тэныд мый татысь колӧ? — синъясӧс сувтӧді ме. — Тэ кодйин рӧвсӧ?
Педӧр пуджис сосъяссӧ да зэв збыльысь матыстчыліс Семён дорӧ:
— Весась татысь!
— Ныр увтӧ весав, — сӧдзӧдіс Семён, сэсся грӧзитчис: — Ӧні жӧ весасьӧй, кытчӧдз кыкнаннытӧ эг сюй ваас.
Мый вӧчны? Верстьӧ морткӧд тышкасьны ми, дерт, ог вермӧй, но и черисӧ сетны оз жӧ позь: чериыс ставнымлӧн ӧтувъя.
Ми Педӧркӧд вешйим бокӧ, шӧпкӧдчыштім, сэсся лэччим вис дорӧ, сӧлім пыжӧ да тэрмасьӧмӧн вуджим гортӧ.
Кык час мысти локтім бӧр, но эг кыкӧн, а матӧ кызь морт. Вайӧдім и Володяӧс. Семён, миянӧс аддзис да, сӧмын паськӧдіс вомсӧ.
Ми гажа шумӧн кыским ассьыным ӧти пыж тыӧ, кыпӧдім Семёнлысь кулӧмсӧ, коді вӧлі ёна сьӧктӧма шедӧм черинас, а сы пыдди вӧйталім ассьыным кулӧмъяс.
— Пыжас эм жӧ нин пуд-мӧд, — висьталі ме.
— Конфискуйтны! — стрӧга шуис Володя.
Семён уськӧдчис пыж дорӧ, но Ваня, ме да нӧшта морт куим-ӧ-нёль кутчысим сылы дӧрӧмас:
— Тпру!
Ми сералігтырйи бокӧ йӧткыштім Семёнӧс да ректім черисӧ асланым пыжӧ.
— Чериыс колхознӧй, а абу тэнад, — букыштчӧм Семёнлы шуис Володя. — Гӧгӧрвоана?
— Босьт ассьыд пайтӧ, — нюмъёвті ме да шыбиті Семёнлы неыджыд ёкыш. Сійӧ чужйис черисӧ, сьӧласигтырйи кыскис ассьыс пыжсӧ вискӧ да лӧсьӧдчис кывтны.
— Нӧрӧвитлы! — лэптіс кисӧ Володя. — Талун сизим чассянь лоӧ правлениеса членъяслӧн заседание, и тэныд ковмас сэтчӧ волыны.
Семён, кыв шутӧг, пуксис пыжӧ.
— Эн вунӧд, — содтіс Володя, — а то каитчыны кутан...
Тайӧ рытсяньыс ми, то ӧтияс, то мӧдъяс лун и вой вӧйтавлім да лэпталім кулӧмъяс. Пыж вылӧ пыж новлім чери да сдайтім кладовщиклы, а сійӧ юкліс колхозникъяслы. Пуд чери нуим и Митрей дядьлы. А некымын лун мысти, кор тыыс дзикӧдз визувтіс, пыдӧсас, неыджыд гӧпъясын, чериыс кутіс пуӧмӧн пуны. Тані нӧйтчисны гырысь сиръяс, чеччалісны ёкышъяс, бок вылысь бок вылӧ бергалісны госа гычьяс.
Ковмис вайны бӧчкаяс. Володя ниртіс ки пыдӧсъяссӧ!
— Бур. Зэв бур. Думыштлыны эг кужлы. Вай ме тіянӧс кутыштла...
А ми сӧмын нюмъялім.
Гортын мам сюся да кыдзкӧ выльногӧн видзӧдліс ме вылӧ. Шуны нинӧм оз шу, но, меным кажитчӧ, синъясас тӧдчис менӧ ошкыштӧм. А мамлысь ошкыштӧмтӧ, веськыда кӧ висьтавны, ме гежӧда кывлывла. Пыр ӧтитор дольліс: «Ог тӧд, Питирим, мыйла тэ сэтшӧм дыш?..» А ме нӧ мыйӧн тӧда, мыйла ме сэтшӧм дыш?
* * *
...Ми пукалам колхознӧй собрание вылын. Сёрнитӧ Сергей Иванович.
— Миян челядь вӧчисны зэв колана удж — лэдзисны Сьӧд ты. Таысь налы ыджыд аттьӧ. Ӧні тыдорса виддзыс косьмис. А ты пыдӧссӧ ми весалам да кӧдзам сэтчӧ кутшӧмкӧ бур турун. Сэсся паськыдджыка рӧвняйтам вутшъяссӧ, и мӧдлапӧв ставнас лоӧ машиннӧй видз. Ты лэдзӧмлӧн пӧльзаыс, тӧварышъяс, нӧшта и сыын, мый оз лоны берег дорас ядӧвитӧй быдмӧгъяс, оз кут сибдавны скӧт. Став колхозникъяс нимсянь ме ещӧ ӧтчыд сьӧлӧмсянь аттьӧала том труженикъясӧс.
— Няньӧн позьӧ нин вердны, — гораа шуис Степан дядь.
Колхозникъяс пӧся клопӧдісны кияснаныс. Ми нимкодьпырысь да неуна яндысигтырйи нюмъялім.
— Но удж, тӧварышъяс, водзын уна на, — водзӧ сёрнитіс Сергей Иванович. — Сьӧд ты лэдзим — сійӧ зэв бур, но делӧыс тайӧн эз помась. Колӧ бурмӧдны да паськӧдны видзьяс, мед вермим лӧсьӧдны уна бур кӧрым, колӧ ыдждӧдны пӧскӧтинаяс, некымын лун сайын карлім самолёт, сійӧ дівывсӧ киськаліс ядӧн. Кор бадь кустъяс косьмасны, найӧс ковмас идравны. Сэсся со аски мӧдлапӧлӧ вуджӧдам бульдозёр, кутам паськӧдны Сьӧд тысайса пӧскӧтинасӧ. Бульдозёр дорӧ бара жӧ колӧны йӧз, мед чукӧртны посни пуяс-бадьяс да сотны. Тайӧ делӧсӧ колӧ эштӧдны турун пуктыны заводиттӧдз. Ми надейтчам, тӧварышъяс, мый миян колхозса том комсомолец-труженикъяс отсаласны миянлы, верстьӧ йӧзлы, вӧчны тайӧ уджсӧ...
— Вӧчам! — кылісны том гӧлӧсъяс.
— Вӧчасны, дерт, мыйла оз вӧчны? — шуис Степан дядь, — Крестьянскӧй челядь...
Сэсся сёрнитіс Володя.
— Ме рад тані висьтавны, мый челядь уджалісны зіля, сьӧлӧмсяньыс. Торйӧн колӧ пасйыны бур уджысь Ваня Поповӧс, Федя Пестеровӧс, Питирим Зильгановӧс, Оля Косныреваӧс, Таня Зильгановаӧс...
Видзӧдлім Олякӧд ёрта-ёрт вылӧ. Ме гӧрдӧді. Олялӧн мичаник чужӧмыс алӧймис жӧ. Ми шудаа нюммунім.
— Колӧ пасйыштны уджсӧ и Юрий Косныревлысь, — сёрнитіс Володя. — Сылы ми лӧсьӧдім весиг неыджыд премия...
Ми шензьӧмӧн ыдждӧдім синъяснымӧс. Юра дрӧгнитіс да повзьӧмӧн лэптіс юрсӧ. Зал лӧнис. Юра сувтіс да, юрсӧ лэдзӧмӧн, тэрыба мӧдӧдчис ӧдзӧслань.
— Кытчӧ, тэнӧ жӧ премируйтны кӧсйӧны! — шызисны челядь да кокньыдика йӧткыштісны Юраӧс пызан дорӧ.
— Юра полӧ уджысь, полӧ гаддьӧсьтны кияссӧ. Та вӧсна ме правление нимсянь торжественнӧя сета сылы скромнӧй пӧдарок — брезентӧвӧй кепысь, — заллӧн серам шы улӧ шуаліс Володя.
— А вот тайӧ, Юрий, и абу мича, — шыасис Степан дядь. — Меным, пӧрысь мортлы, яндзим тэ вӧсна, яндзим! Срам!
Пӧсялӧм Юра уськӧдчис ӧдзӧслань.
Собрание вылысь петӧм бӧрын ми, нывъяс да зонъяс, мунім Эжва дорса кыркӧтш вылӧ.
— Сьӧд тыным тыдалӧ, — индіс Таня.
Ми видзӧдлім: ылын-ылын тыдаліс кузь да векни пемыд визь.
«Вот ӧд мый вӧчим, а!» — думышті ме.
— Ваня, вай ворсышт мыйкӧ, — корис Таня, — сьывны окота...
Оля пыркнитіс сьӧд кӧсаяснас да гажаа видзӧдліс ме вылӧ:
— А мисьтӧм Сьӧд ты местаад коркӧ петасны дзоридзьяс!
— Да, петасны мича дзоридзьяс, — меліа видзӧдлі Оля вылӧ да босьті сійӧс киӧдыс. Педӧр кӧсӧйтчис ме вылӧ, наяна мигнитіс читкыртӧм синнас.
А Ваня пыр ворсіс. Сьӧлӧмтӧ вӧрзьӧдысь мелодияыс лӧнь сынӧдті кывтіс ылӧ-ылӧ, быттьӧ кытчӧкӧ чуксаліс.
