ЭНОВТІС

Удждон босьтӧм бӧрын Агафья Сопроновна лэччыліс магазинӧ. Ньӧбис аслыс платтьӧ, туфли да мукӧдпӧлӧс мичаторъяс. Кӧсйӧ вӧлі ньӧбны верӧсыслы выль дӧрӧм, но думайтыштіс да макнитіс кинас: «Олас! Важ дӧрӧмъясыс дзик на вылькодьӧсь». Ньӧбасьӧм бӧрын Агафья кайис гортас, пасьталіс выль платтьӧ да сьӧлӧм бурмытӧдзыс бергаліс рӧмпӧштан водзын. Талун концерт, воӧмаӧсь Сыктывкарса артистъяс и, дерт, кыдзсюрӧ пасьтасьӧмӧн клубӧ мунны оз позь. Агафья Сопроновна гаровтіс сьыліас янтарнӧй сикӧтш, ӧшліс пельясас исергаяс, сэсся мавтыштіс вомдоръяссӧ гӧрдӧн. Та бӧрын наяна видзӧдліс рӧмпӧштанӧ, лэптыштліс пельпомъяссӧ да думыштіс: «Кӧть и чужӧмӧй вижов, и нырӧй пӧлӧс, но быдӧнлы шыбитча синмас!»

Дум вылас уси верӧсыс да кезовтіс: абу интереснӧй, кукань кодь рам, дай прӧстӧй колхозник. Эк, петіс ӧмӧй эськӧ Агаша сы сайӧ, эз кӧ вӧв сылӧн, кыдзи йӧз костын шуӧны, чурка! Куим арӧса ныв олӧ бабыс дорын, да тані, верӧсыс кындзи, весиг некод оз тӧд ныв йылысь.

Посводзын триньгысис чер, сэсся керкаӧ пырис мудз чужӧма Семён.

— Мыйкӧ тай талун зэв дыр! — кӧрсис вижов чужӧмыс Агафья Сопроновналӧн. — Пес абу ни ва абу, ужын гӧтӧвиттӧм...

Семён сьӧкыда лэччысис улӧс вылӧ да мыжапырысь видзӧдліс раминик руд синъяснас: — Ме талун зэв ёна мудзи, Агаша... Лунтыр керъяс дорын...

Агафья Сопроновналӧн югнитісны гырысь карӧй синъясыс:

— Дона Сенюкӧй, сідзкӧ, васӧ катлыны меным ковмас? Гашкӧ, и пес поткӧдлыны на тшӧктан да? А он думыштлы:гашкӧ, ме, школаас уджалігӧн, ёнджыка на мудзи? Ӧд нёль урок сеті — эг весь ов!

Семён ышловзис, сувтіс да петіс ывлаӧ. Агафья Сопроновна, вомгорулас сьылігтырйи, заводитіс видзӧдчыны рӧмпӧштан водзын.

Комнатаӧ бобув моз лэбзис-пырис том учительница Анна Николаевна да чужӧмнас топӧдчис Агафья Сопроновна морӧс бердӧ.

— Ак, Агафья Сопроновна! Тэ он тӧд, кутшӧм ме шуда!..

— Мый нӧ, мый? — ӧзйисны синъясыс Агафьялӧн.

Анна здук кежлӧ кыпӧдліс косіник чужӧмсӧ, яндысигтыр видзӧдліс лӧзов синъяснас.

— Коля менӧ сэтшӧма радейтӧ, сэтшӧма радейтӧ!.. Шонді лэччӧмсянь шонді петтӧдз окаліс менӧ. Вомдоръясӧй ставнас пыктісны!..

Анна нюлыштіс паръяссӧ, кодъяс, збыльысь, кажитчӧ, кызджыкӧсь лоӧмаӧсь, да долыда серӧктіс.

Агафья Сопроновналӧн синъясыс дзирдыштісны, быттьӧ эз Аннаӧс, а сійӧс окалісны шонді петтӧдзыс.

Анна нинӧм эз дзеб Агафья Сопроновнаысь, бурсӧ и лёксӧ висьтавлӧ мамлы моз, и сійӧ велӧдӧ том нылӧс, кыдзи овны кыз му вылас.

Агафья Сопроновна пуксьӧдіс Аннаӧс улӧс вылӧ да мыйкӧ дыр шӧпкӧдіс пеляс. Ныв лапйӧдліс синъяснас, сьӧлӧмсяньыс кывзіс. Сэсся ышловзис:

— Дерт, сійӧ прӧстӧй колхозник...

— Зато мича! — куньліс синъяссӧ Агафья Сопроновна. — Абу эстшӧм... — Сопроновна довкнитіс юрнас пес моздорӧн пырысь верӧслань да пӧся содтіс: — Мун, мун сы сайӧ!

— А оз кӧ босьт? — зумыша видзӧдліс Анна, но пыр жӧ нюммуніс: тӧдіс, буракӧ, мый босьтас.

— Корасис кӧ нин — босьтас, — эскӧдіс Агафья Сопроновна. — Сӧмын висьтав, уна-ӧ тӧлысьнас нажӧвитан. Дерт, аслас сылӧн нажӧткаыс ичӧтик, но нинӧм! Ме тай со... верда и пасьтӧда жӧ.

Пачӧ пес сюялысь Семён раминика шыасис:

— Тэ, Агаша, вывтіджык жӧ... Куш аванссӧ ме тӧлысьнас шайт нёльсё босьтлывла, сэсся...

— Тьпу! — сьӧлыштіс Агафья Сопроновна. — Тэнад рубаясыд, али менам кык тысячаыс деньга? Ок, йӧй Семёнӧй, йӧй Семёнӧй... На, гладитышт менсьым платтьӧӧс, бурджык лоӧ!

Семён видзӧдліс нюмъялысь Анна вылӧ, гӧрдӧдіс.

— Вывті тай мыйкӧ ышмӧмыд талун! — орчча комнатаӧ петігмоз нин чӧвтіс гӧтырыслы.

Семён пуксис лабичӧ, ӧшӧдіс юрсӧ. «Платтьӧ гладит, ужын гӧтӧвит, — сьӧкыда ышловзис сійӧ. — Аслам небыдлунӧн да рамлунӧн пӧвадиті, со и лэпталӧ нырсӧ...»

Пытшкӧс комнатаысь петіс гӧтырыс, шыбитіс пызан вылӧ платтьӧ:

— Гладит! Да ассьыд лӧз дӧрӧмтӧ тшӧтш... Талун концерт. Али он ветлы?

Семён зумыша видзӧдліс сы вылӧ:

«Эк, Агаша, Агаша... Эн петкӧд терпеньеысь!»

Гӧтыр шензьӧмӧн видзӧдыштіс чӧв олысь верӧс вылӧ, бӧр пырис. Семён зумыша куритчис. Колӧ вӧлі весавны картупель, мыськавны чери, но уджыс эз пыр киӧ.

Недыр мысти Агафья Сопроновна мыччис юрсӧ ӧдзӧс костӧд:

— Гладитін платтьӧсӧ?

Семён кыліс, кыдзи мыйкӧ зэлаліс морӧс пытшкас, но кутіс асьсӧ, веськодьпырысь лэдзис тшын кольча:

— Ме гач новла...

— Тэ... йӧймин, Семён, — скӧрысла тшӧкъяліс Агафья Сопроновна.

— Гашкӧ, — вомсӧ вежыньтліс верӧсыс.

Сопроновна крапкис ӧдзӧссӧ. Семён гажтӧма нюммуніс: «Ӧні вежон кутас дузъявны... Но и чӧрт сыкӧд!»

Агафья Сопроновналы талун аслыс ковмис гладитны платтьӧсӧ.

Найӧ Аннакӧд тӧвзисны клубӧ. Семён кокньыдика лолыштіс, тэрмасьтӧг пусис, ужнайтіс. Сэсся дыр пукаліс восьса ӧшинь дорын, думайтіс. Сьӧлӧмыс гудрасис. «Гашкӧ, лэччыла клубас пальӧдчыштны?» — думыштіс сійӧ.

Мудз ки-кок личалыштӧм бӧрын плӧтник бритчис, корсис лӧз дӧрӧмсӧ, код йылысь гараліс гӧтырыс. Пеславтӧм паськӧм чукӧрысь сюри лӧз дӧрӧмыс, но сійӧ вӧлі дзик няйт.

Семён скӧра сьӧлыштіс, пасьталіс уджалан дӧрӧм вылас важиник пинжаксӧ (выльыс ньӧбтӧм на вӧлі) да лэччыліс магазинӧ.

Недыр мысти, гажмыштӧма пырис клубӧ. Концерт вӧлі помассьӧма нин, и том йӧз йӧктісны. Семён пуксис пельӧсӧ да кутіс зумыша видзӧдны йӧктысьяс вылӧ.

«Быдӧнлы, меысь кындзи, гажа, нюмъялӧны», — курыда думайтіс плӧтник. Синъяс улас уси гӧтырыс. Агафья Сопроновна йӧктіс лысӧй юра, кыз вомдоръяса тӧдтӧм мужиккӧд да меліа нюмъяліс сылы. Семён видзӧдіс гӧтырыс вылӧ, и кык во чӧжӧн медводдзаысь морӧс пытшкыс ойдіс дойӧн, скӧрлунӧн. Сійӧ сьӧлыштіс да вештіс синъяссӧ. Со Анна Николаевна бергалӧ Колякӧд. Руд юрсиа, сьӧд синъяса Коля мыйкӧ шӧпкӧдӧ Анналы пеляс, а ныв долыда шпыннялӧ. Семён ышловзис, чеччис да кӧсйис нин петны, но друг воссис клуб ӧдзӧс, гажаа сералігтыр пырисны том нывъяс. Клубын ӧвтыштіс дона духияслӧн аромат. Семён аслас тӧдлытӧг бӧр пуксис. Здук кежлӧ тшӧкмунлысь гудӧк бӧр шыасис. Том зонъяс матыстчисны том нывъяс дінӧ, корисны найӧс. Мича сера платтьӧяс вуджрасисны син водзын, быттьӧ зал пасьта шывъялісны уна рӧма бобувъяс.

Семён шыльӧдыштіс юрсисӧ, нюмъялігтырйи матыстчис Наташа дінӧ:

— Йӧктыштам, бур ныв?

Том доярка нюммуніс, чеччис.

Семён видзчысьӧмӧн кутыштіс сійӧс коскӧдыс да заводитіс бергавны кыпыд шыяс улын. Аддзис гӧтырыслысь шензьысь синъяссӧ да мигнитіс.

Здук-мӧд мысти нывъяс ставныс йӧктісны. Агафья Сопроновна пукаліс скамья вылын, дась вӧлі потны скӧрысла: весиг сылӧн лысӧй кавалерыс йӧктіс кутшӧмкӧ том колхозницакӧд, кодлӧн платтьӧыс вӧлі дзик жӧ Агафья Сопроновналӧн кодь. Сійӧ ӧнӧдз чайтліс, мый сылӧн кодь мича платтьӧыс тані некодлӧн абу, а со!.. Кутшӧмкӧ доярка лысьтӧма пасьтавны Агафья Сопроновналӧн кодь платтьӧ. Вот яндысьтӧм синмыд!

Бергалігтыр прӧйдитіс Семён да бара наяна мигнитіс. Агафья Сопроновналы кажитчис, мый верӧсыс сералӧ сы вылын, та вӧсна дзикӧдз пузис.

— Ук, кутшӧма куйӧд дукӧн ӧвтӧ! — нарошнӧ гораа шуис сійӧ да чуньяснас тупкис нырсӧ. Орччӧн пукалысь Анна шензяна синъясӧн видзӧдліс сы вылӧ. Нывлӧн сьӧлӧмыс эз жӧ вӧв местаын: Коля муніс йӧктыны да сы вылӧ оз и видзӧдлыв. И мыйысь скӧрмис Коляыс? Йӧктігӧн сійӧ юаліс Анналысь, кутшӧмаджык талун мунісны урокъяс, медводдза вотӧ пӧ, кӧнкӧ, сьӧкыд? «Нинӧм, — шуис Анна, сэсся дум вылас уси Агафья Сопроновналӧн сёрниыс да, ачыс оз тӧд мыйла, содтіс: — Удждон босьта тысячаӧн тӧлысь!..» Коля, тыдалӧ, тайӧс гӧгӧрвоис кыдзи ышнясьӧм, рытбыд эз матыстчыв том учительница дорӧ. Анна дась вӧлі бӧрддзыны, курччаліс паръяссӧ, дӧзмӧмӧн думайтіс Агафья Сопроновна йылысь. Некор эз волы Анналӧн том юрӧ, мый шуд корсигӧн колӧ думайтны тшӧтш сьӧм йылысь. А вот сылӧн пӧрысьджык ёртыс дольлывліс: «Главнӧйыс — сьӧм. Сьӧмнад и верӧстӧ кӧртвомавны кокньыдджык!»

— Терпитны ог вермы куйӧд лойысьястӧ! — чеччис Агафья Сопроновна да, нырсӧ тупкӧмӧн, петіс ывлаӧ. Гӧтырыслысь кывъяссӧ кылӧм бӧрын Семён пель йылӧдзыс гӧрдӧдіс. Биӧн ыпнитіс тшӧтш Наташалӧн мичаник чужӧмыс. Ныв дугдіс йӧктыны, котӧрӧн петіс клубысь. Кельдӧдӧм Семён тэрыба кепкаасис да, некод вылӧ видзӧдлытӧг, усйысис. Сылы вӧлі сэтшӧм яндзим, быттьӧ ачыс шыбитіс уджалысь йӧзлы чужӧмас мисьтӧм кывъяс. Сійӧс кӧ эськӧ ӧбидитіс гӧтырыс, гашкӧ, бара на позис терпитны, но тайӧс терпитны Семён эз вермы. Поті терпеньеыс!

Гортӧ Семён эз мун. Тӧдіс: каяс кӧ гортас — ӧні жӧ кватитас Агашаӧс сойпӧлӧдыс да, небыд местаас чужйӧмӧн, вӧтлас керкасьыс. Ӧні сійӧ гажакодь, а татшӧм делӧ гажа юрӧн вӧчны оз позь.

Семён асылӧдзыс шӧйтіс ю дорын. Кор алӧймыштіс енэж, плӧтник пуксис правление кильчӧ вылӧ. Пукаліс дыр, куритчис, думайтіс. Да, эз артмы сылӧн семейнӧй олӧм. Нинӧм думайттӧг, мортсӧ бура тӧдтӧг гӧтрасис. Мый сэсся ӧні вӧчны?

«Ме радейта тэнӧ, Коля, — друг кыліс берег дорын пӧся шӧпкӧдӧм. — Тэ прӧстит менӧ ӧнтаясьыд. Яндзим...» «Но, мый тэ! — серӧктіс, кылӧ, зон. — Ме тӧда: тэнӧ Агафья Сопроновна велӧдіс».

Семён бергӧдчис. Берег дорын сулалісны кыкӧн. «Анна да Коля», — тӧдіс Семён да кутіс видзӧдны. Коля топӧдіс нылӧс ас бердас да шуис: «Тэ бур сьӧлӧма...» Анна сывйыштіс зонмӧс, пӧся окыштіс.

«Менӧ Агафья ӧтчыд эз окыштлы», — думыштіс Семён.

«Сӧмын, Аннуш, Агафья Сопроновнакӧд эн дружит, — кылӧ, шуаліс Коля. — Кык вонад ми сійӧс тӧдмалім нин. Нырыс век вылын. Гожӧмнас миян став велӧдысьяс пыр окотапырысь отсасьӧны колхозлы, а сійӧ сӧмын йӧз вылас сералӧ. Бурӧ сійӧ тэнӧ оз велӧд. Семёнӧс, коньӧрӧс, кывтӧм пемӧсӧ пӧртіс».

Шуда пара муніс берег пӧлӧн. Семён сьӧкыда ышлолаліс.

Асывнас Семён локтіс председатель дорӧ, вӧзйысис гожӧмбыд кежлӧ чери кыянінӧ. Чери кыян бригадаын йӧзыс эз тырмыны. Председатель сӧгласитчис. Семён мӧдӧдчис гортас.

Агафья Сопроновна талун садьмис водз. Кор казяліс, мый Семён абу на волӧма, ёна чуймис. Асывводзьясын верӧсыс ломтыліс пач, пуліс сёянтор, а талун нӧ кыдзи? Сёйтӧг мунны али мый? А коді ветлас колхознӧй фермаӧ йӧвла?» — скӧраліс Агафья Сопроновна.

Кадыс эз виччысь. Агафья Сопроновна гӧгӧрвоис: кутас кӧ жуйявны, тшыгйӧн ковмас мунны школаӧ. «Ветла кӧть йӧлысла, — шуис сійӧ. — Фермаас эг жӧ на вӧвлы-а».

Агафья Сопроновна локтіс скӧтнӧй дворъяс дорӧ, пырис йӧв примитанінӧ. «Джоджыс кутшӧм сӧстӧм!» — шензис сійӧ да нюмъёвтіс еджыд халата дояркаяслы, кодъяс помалӧмаӧсь нин лысьтысьӧмсӧ да ӧні сёрнитісны асланыс делӧяс йылысь.

— Агафья Сопроновна, йӧвла? — юаліс кодкӧ.

— Кыдзи аддзанныд, — тыртӧм бидончикнас легвӧчис Сопроновна.

— Мый нӧ Семёнтӧ эн ыстыв? — шыасис кодкӧ мӧд.

Наташа, коді мыськаліс молокомер, лӧг синъясӧн видзӧдліс воысь вылӧ:

— Йӧлыс миян куйӧд дука!

Агафья Сопроновна первой бледӧдліс, сэсся гӧрдӧдіс, чужӧм вылас чепӧсйисны посньыдик пӧсь войтъяс. Немӧй моз сулалыштӧм бӧрын сійӧ петіс да, тыртӧм дознас ӧвтчигтыр, довгис керкаяс сайті.

Семён вӧлі гортын нин, лӧсьӧдіс ноп. Пызан вылын куйліс ружье. Агафья Сопроновна ырыштчис, кӧсйис лэдзны верӧсыс вылӧ став скӧрсӧ да ӧбидасӧ, но Семён веськӧдчис да видзӧдласнас быттьӧ тувъяліс сійӧс места вылас. Плӧтник волысаліс нопсӧ, матыстчис гӧтыр дінас:

— Вот мый, Агафья Сопроновна. Ме тэкӧд сэсся овны ог вермы дай ог кӧсйы. Тырмас, пӧті! Мыйла — ачыд тӧдан, а он кӧ тӧд, думыштлы, кыдзи тэ олін верӧссайӧ петӧм бӧрад, сэки тӧдмалан...

Агафья Сопроновна чӧв оліс... Кытчӧ и вошӧма пыркадся кывворыс!

— Ӧні ме гожӧмбыд кежлӧ муна колхозлы чери кыйны, — содтіс Семён. — Воа йи сувтігӧн. Сэк кежлӧ менам керкаын мед некод эз вӧв...

Семён шапкаасис, босьтіс ружьесӧ, крукыльтӧм чуньнас лэптыштіс щӧкаӧдыс весьӧпӧрӧм гӧтырыслысь юрсӧ:

— Гӧгӧрвоин? Ме локтігкежлӧ керкаын мед некод эз вӧв! Тэ менӧ морт пыдди он пукты, — ӧдзӧс вугйӧ кутчысьӧмӧн нин пӧдӧм гӧлӧсӧн шуис Семён. — Лэптӧмыд ныртӧ да ышнясян, бур йӧз водзас менӧ янӧдан. Мун менам керкаысь и ов ӧтнад, кыдз гажыд...

Семён петіс. Агафья Сопроновна кутчысис юрас да, синъяссӧ куньӧмӧн, дыр сулаліс джодж шӧрын, зілис гӧгӧрвоны, мый лои сы олӧмын. Сэсся пуксис пызан дорӧ да шытӧг бӧрддзис.