ПОП «МАВТЧӦ»

«Нинӧм кӧ пӧ гижныд — збыльысь,
Гиж пӧ, Виттор, попъяс йылысь», — 
Тадзи шуліс ӧти морт
(Ним ог висьтав: скӧрмас ёрт).
Но ті, попъяс, энӧ ёрччӧй — 
Ме ог кывзы сӧвет ёртлысь,
Да ӧд мырдӧн асьныд ті
Луддзӧданныд менсьым ки.
Со вот, Кӧрткерӧсса «батькӧ»
Пыр пӧ картіӧн и шлачкӧ,
Дерт ӧд, карті сідз оз пес — 
«Очко» ворсны дзугӧ бес!..
Пӧра сэки ӧдйӧ мунӧ,
Сэки-й «требаясыд» вунӧ
(Вунӧ весиг пернапас!) — 
Дум вылад сэк «туз» да «дас».
А кор «бантсьыд» этша воӧ,
«Перебор» кӧ аслад лоӧ — 
Йӧзлысь карті малыштан,
Мыйта верман «мавтыштан».
Дерт, сідз шуны, ворсӧм — нинӧм
(Быть ӧд кыдзкӧ пӧткӧд кынӧм!),
Гашкӧ-й кӧсйӧ воны мӧс,
Да ӧд эмӧсь кулысь йӧз.
Миян йӧз ӧд олӧ няйтын,
«Мӧдаръюгыд» век на чайтӧ:
Матыстчас кор кулан кад — 
Быдӧн тӧдӧ «рай» да «ад».
«Дари ни пӧ пӧкаянньӧ
Оз позь кувны весиг званньӧ»,
А кор кутас «петны лов» — 
Мукӧд мавтчытӧг оз ов.
Сідз жӧ-й Кӧрткерӧсын вӧлӧм
Кӧсйӧ кусны ӧтик «олӧм»,
Корас мавтны асьсӧ сэк — 
А поп картіасьӧ век!..
Мед нӧ сідзи, мавттӧг кулас — 
Шой и сытӧг гуад куйлас,
Сӧмын кывзы, «батькӧ-друг»,
Ворсныд мукӧдӧс эн дзуг! — 
Мед «делопроизводитель»
Исполкомын лун «сидитӧ»,
Картіасьны эм на-й вой,
Лунсӧ «служаклысь» эн сёй!