«ЧУДЕСА-ДИВӦ»

(Збыль)

Дереваннӧйын олӧ-вылӧ ӧтик морт — Чувьюров. Олӧ, дерт, воддза дорысь омӧльджыка.

А кыдзкӧ колӧ лэптыштчыны вылӧджык. Дыр мысти (нёль во мӧвпаліс) и аддзис туй.

Ӧтчыд быттьӧ (ачыс тӧдӧ) сійӧ аддзӧ татшӧм вӧт: керкаӧ пырис кутшӧмкӧ странник, вӧзйысьӧ узьны. Чувьюров шуӧ: «Узь пӧ эськӧ да, керкаӧй менам дзескыд». Странник шуӧ сэтчӧ: «Меным пӧ эськӧ прӧстджыкин колӧ, дыр нин пӧ зэв ветла-муна да ёна мудзи, колӧ прамӧя шойччыны». Чувьюров сэсся странниктӧ нуас узьны кӧбрӧгас. Пырасны сэтчӧ да друг зэв югыд лоӧ — быттьӧ шонді югӧр странниксянь кутас петны. «Тэ нӧ пӧ коді?» — юалӧ Чувьюров.

— Ме пӧ Святӧй Ласей, мӧс спаситель! — шуӧ странникыд. — Локті пӧ Дереваннӧйӧ мӧсъясӧс быд приччаысь видзны...

Ладнӧ.

Мӧд луннас — самӧй, сы шӧрӧ-водзӧ, праздник вӧлӧма — Чувьюров мунас вичкоӧ да сэні и висьталас ассьыс вӧтсӧ. Вичкоын вӧчасны собранньӧ да и шуасны вӧчны Чувьюров кӧбрӧг местаӧ часовня Святӧй Ласейлы.

Неважӧн часовнясӧ вежӧдӧмаӧсь нин. Вичкосьыс сэтчӧ петкӧдӧмаӧсь ӧбраз Святӧй Ласейлысь. Йӧз вӧлӧма зэв уна: Аныбысь, Ручысь, Кулӧмдінысь и мукӧдлаысь.

Вайӧмаӧсь быдсяма эмбурсӧ: нянь, вый, яй, дӧра, вурун и мукӧдтор.

Бӧрвылас Чувьюров и шуӧ: «Но сэсся вайӧ жӧ юксямӧ бур йӧз вайӧмторнас. Меным вӧтӧн Святӧй Ласейыд сідзи шуліс: “Ставсӧ пӧ юкны тайӧ часовняысь эмбурсӧ колӧ нёль пельӧ: куим пай поп-дяклы, а нёльӧдсӧ — меным!...”»

Со ӧд чудеса-дивӧыд кӧні!..

Ок, ок, ок, пемыд коми войтыръяс! Дыр-ӧ нӧ ті онӧ юр вемнытӧ югдӧдӧй, синъяснытӧ онӧ восьтӧй?

Горш-мудер йӧзлы да поп-дяклы оз нин ков сетчыны! Некутшӧм чудеса-дивӧ абу. Велӧдчӧй да вежӧра мывкыдӧн олӧй, сійӧ медбур!

Гӧль морт.