* * *

Вӧралысьлӧн керкатор
Визув бокын олӧ.
Сӧмын нар да сӧмын гор,
А ӧд радлӧ лолыд.

Небыдика гургӧ пач,
Йиджӧ керйӧ пӧсьыс.
Парма шӧрас овны тадз
Медся на тай лӧсьыд.

Сьӧлӧмыдлы колӧ мый,
Ставыс татысь сюрӧ.
Кӧсъян — юсьыс чери кый,
Кӧсъян — ветлы нюрӧ.

Кӧсъян — суслысь кольсӧ лэдз,
Кӧсъян — сідзи олышт.
Кӧсъян — сьыланкывъяс тэч,
Сьӧлӧм пӧсьнад лолышт.

Кӧсъян — быдмав кыа вӧнь,
Мыйӧн эштас войыс.
Шудыс ылькйӧ. Гӧгӧр лӧнь,
Абу вишкан дойыс.

Вӧралысьлӧн керкатор
Визув бокын олӧ.
Меным сьӧкыд лолӧ кор,
Векджык сэтчӧ вола.