МЫЙ ПОНДА ӦНІ ВӦЧӦНЫ ПЕРЕПИСЬЯС

Успенньӧ лунсянь став Россия кузя кутасны пасъявны (гижавны), уна-ӧ Россияын эм йӧз. Пасъяласны быдӧнӧс семья пытшкысь: батьтӧ и мамтӧ, челядьтӧ и уджалысьтӧ. Юаласны, кытӧн коді чужи, кымын арӧс, кужӧ оз лыддьыны-гижны, мый кужӧ уджавны-вӧчны-керны.

Йӧзӧс пасъялӧм бӧрын кутасны пасъявны овмӧс, кӧдзас-пуктас да скӧт. Сы бӧрын гижаласны школаяс.

Коми морт! Гижалӧмъясыс нинӧм повны. Татшӧм гижалӧмъяс мукӧд государствоясын зэв частӧ овлӧны. Толькӧ ӧти бур лоӧ. Миян Россияын татшӧм переписьыс вӧлі 1897 воын.

Татшӧм переписьтӧг некутшӧм государство оз вермы овны. Мӧд ногӧн оз позь! Кор тэ кӧсъян керка стрӧитны да олӧм бурджыка лӧсьӧдны, арталан, уна-ӧ тэнад эм уджалысьяс, мый тэнад эм, мый оз судзсьы. Сійӧ кӧ он тӧд, он вермы некутшӧм олӧм лӧсьӧдны, паськӧдны.

Сідз жӧ государствоын. Сӧветскӧй власьт кӧсйӧ миянлысь овмӧснымӧс бурджыка лӧсьӧдны. Сы понда колӧ сылы тӧдны, мый эм государствоын, мый оз судзсьы, мый бырӧма-киссьӧма, уна-ӧ йӧз Россияын.

Сы кузя гижалӧмысь оз ков повны. Тайӧ гижалӧм — абу нянь гижалӧм. Тайӧ гижалӧм бӧрын некодлысь нинӧм оз корны, оз босьтны, оз мырддьыны. Мый пасъясны, сійӧ кутас тӧдны толькӧ государство. Став гижӧдыс ыстысяс Мӧскуаӧ, кӧні гижалӧм кузя кутасны артавны, кыдз вӧчны крестьянинлы да рабочӧйлы бура-лӧсьыд олӧм.

Коми йӧз! Сы понда, кор кутасны гижалысьяс юасьны да пасъявны, висьталӧй веськыда. Коді пӧръялас, сійӧ аслыс лёк вӧчас, сылы бур оз ков.

Губернское Статистическое Бюро.