* * *

Шондіӧй дай меным петысьӧй,
Мамукӧй дай олӧм сетысьӧй,
Ордымӧй дай вайысь-нуысьӧй,
Бипурӧй дай шонтысь-пуысьӧй,

Ёна жӧ ті меным донаӧсь,
Ёна жӧ ті меным мусаӧсь.
Тіян помысь ӧд и олӧмыс,
Таладорын менам колӧмыс.

Визлачӧй дай ӧдйӧ олысьӧй,
Пелысьӧй дай ловлы колысьӧй,
Сьыланӧй дай лысва вылысьӧй,
Сьӧлӧмӧй дай ставлы кылысьӧй,

Кытыськӧ тай ставныд лоӧмныд,
Менам енъюгыдӧ воӧмныд.
Нимкодьӧйла тадзи шуала,
Содтыны мый — йӧзлысь юала.