АТТЬӦ СУДЬЯЛЫ
Ті эн думайтӧй, мый ме ог тӧд Маланьялысь характерсӧ. Ми сыкӧд ичӧтсянь тӧдсаӧсь. Ӧтлаын быдмим да велӧдчим. Сылӧн да менам керкаясным орччаӧсь. Гожся рытъяснад восьса ӧшинь пыр варовитлім. А гӧтраси ме сы вылӧ, веськыда кӧ шуны, тэрмасьыштӧмӧн: зэв нин унаӧн лыйлісны Маланья бӧрся. Мырддьыны на вермисны...
Оз позь шуны, мый менам Маланья вывті мича: юрсиыс рыжӧйкодь, а ныр дорас сьӧд пудпас. И характерыс сьӧкыд. Некор он угӧдит. Но удж вылад зіль! Та вӧсна, гашкӧ, и куті радейтнысӧ. Гӧтрасьӧм водзвылын другъяс казьтыштлісны, но кытчӧ сэн!
— Перевоспитайта, — шулі быдӧнлы.
Ӧтлаасим. Кык во со олам, а век жӧ Маланьялӧн характерыс эз вежсьы. Ме эськӧ сыкӧд пыр бурӧн сёрнита, вашъялігтыр. Маланьюшкаӧн ыдждӧдла. Корсюрӧ, весиг, Малечкоӧн нимтывла. Но сылы век абу честь. Чужан лун кежлас пӧдарки ньӧби. Бара эг угӧдит.
— Кытчӧ оз ков деньгатӧ шыблалан! — пыркӧдӧ пельпомнас гӧтыр. — Эн ӧмӧй тӧд: ме кодь юрсиа нывъясыслы оз лӧсяв татшӧм платьеыс...
— Ланьт, — шуа, — тэныд быттьӧ и вурӧма...
А сійӧ пыр ассьыс дольӧ, вом восьтыны оз сет.
Татшӧмторйыс быд лун пӧшти овлӧ. Ме велалі Маланьялӧн характер дінӧ да весиг гажтӧмча, кор ставыс шыльыда мунӧ. А менам Маланья, вӧлӧма, быд шум помнитӧ, и ӧти рытӧ бара меным казьтыштіс. Лоис тайӧ со кыдз.
Бригадир Таня Васькинакӧд дыр ми ноксим жугалӧм трактор дінын да сёрӧнкодь нин кутім лэччыны сиктӧ.
А ныв сійӧ шутлив да варов. Босьтіс менӧ сой пӧлӧд да шуӧ:
— Мый талун клубад кутам сьывны? Вай сьылыштам...
Сьылігтырйи да кутчысьӧмӧн и воим гортӧдз. Друг кыла гӧтырлысь гӧлӧссӧ:
— Со кыдз тэ репетируйтчан! Со кутшӧм тэнад драмкружокыд.
Гортӧдз кыв шуны эз сет. Гортын гажаджыка на видчыны кутіс. Шнёпкис ныр улӧ гижсьӧм йылысь свидетельство, шуӧ:
— Аддзан, коді ме тэныд лоа?
— Эн увтчы, — вочавидза. — Трактор ремонтируйтім, а ӧні клубӧ мунам сьывны...
Сцена вылын ме нёльысь зэв топыда кутлі Тоняӧс. Васькиналӧн жӧникыс кыв эз шу, тӧдӧ, мый ми ог збыльысь кутчысьлӧй, а менам Маланья дзикӧдз пузис:
— Абу гӧтыр ме тэныд! — горӧдіс меным да пышйис мам ордас.
— Ветлы, — думайта, — дурыд прӧйдитас да бӧр локтан.
Локтӧм пыдди Маланья сетіс менӧ судӧ: юксям пӧ. Ме, дерт, повзи, янӧдасны, думайта. Коді тӧдӧ, кыдзи делӧыс бергӧдчас. Гашкӧ, Маланья сӧрас мыйкӧ, бӧрдны кутас, и веритасны. «Прӧщай, — думайта, — мусаӧй, донаӧй. Эз удайтчы, буракӧ, быдтыны тэкӧд ӧтлаын челядьӧс...»
Мӧд луннас збыльысь газетаысь нин тӧдмалі: Маланья юксьӧм йылысь делӧ панӧма.
И со локта суд вылӧ. Сьӧлӧмӧй тіралӧ. Видзӧда: гӧтырӧй пукалӧ. Пукси орччӧн да шуа:
— Олӧмлӧн спутник тэ менам... Он жӧ ӧд юксьы?
А сійӧ семечки йирӧ. Ме быттьӧ сылы и свет вылас абу. Медбӧръя надеяӧс сэки вошті. «Судьялы мый, — абу сьӧкыд юкнытӧ, веритас кӧ Маланьялысь ставсӧ,» — думайта ме.
Сідз и лои, кыдзи думайті: кывсӧ медводз сетісны Маланьлы.
— Характеръясӧн эг лӧсялӧй. Гуляйтӧ... — лыддьӧдлӧ Маланья. — Кыдз татшӧм мортыскӧд олан?
— Эн пӧръясь, — шуа, — Федуловна.
А сійӧ бара пурӧ:
— Васькинакӧд колльӧдчин? Колльӧдчин. Сцена вылын кутлысим? Кутлысим.
Ме чӧв ола. Ог нин дорйысь, тӧда, мый ставыс весьшӧрӧ. Но, аддза судья кыпӧдчӧ.
— Маланья Федуловна, — шуӧ сійӧ, — ті вывті гордӧйӧсь. Иван Петрович радейтӧ тіянӧс... Со кыдзи сійӧ тіян вылӧ видзӧдӧ-дзоргӧ...
Аддза, Малукӧй небзьыштіс, а судья оз лэдзчысь:
— Тіянлы ӧд муса жӧ сійӧ?
Менам Маланья дзикӧдз сыліс:
— Ме кӧть эськӧ эг жӧ торйӧдчы да... — вочавидзӧ судьялы.
Тайӧ кывъяс бӧрын ме пуля моз чеччышті места вылысь да заводиті кутлыны кияссӧ. Судья видзӧдӧ да сералӧ. Сералӧны и мукӧдъяс.
Ӧні Малочкакӧд зэв бура олам. Аттьӧ судьялы. Кужӧ тай, майбыр, медся чорыд сьӧлӧмсӧ небзьӧдны.
