* * *

Овтӧм керканым кыр йывсянь
Кӧсйӧ лэбны енэж йирас.
Сылань видзӧдӧ и пывсян,
Пышъян дум жӧ кӧдзыд вирас.

Шлывгас керка Семӧ Васьлӧн,
Сӧмын йӧткыштчыны колӧ.
Васьлӧн лолыс кӧмӧкасьліс,
Таладорӧ оз нин волы.

Ӧсип Ӧльӧш шойна вылысь
Оз жӧ лок да керсӧ домав.
Сылӧн ӧкмыс пиысь-нылысь
Некод абу керка помас.

Степан Иван керка-стынас
Оз жӧ кутчысь лэбан здукас:
Олан дзугсьыс томӧн мыніс,
Енмыс этша сылы юкис.

Вӧрзяс керка Матвей Васьлӧн,
Петыр Гришаяслӧн вӧрзяс.
Сэсся, лэбны кодъяс дасьӧсь,
Кыпӧдчаласны на бӧрся.

Качас бура ыджыд кельӧб
Кодарӧкӧ лэбан нырӧн.
И сэк лэчыд уклад тэльӧб
Менам сьӧлӧм шӧрӧ пырӧ.