БӦРДӦМ

Коркӧ важӧн нин удал вӧралысь,
Паськыд пармасӧ вундысь-шӧралысь,
Пыжӧ пуксис да, катіс-катіс да,
Воис таланьӧ — Эжва катыдӧ.

Изъя берегӧ пыжсӧ кымыньтіс,
Джуджыд нӧрысӧ керка зымнитіс.
Ветліс муӧдыс, ветліс райӧдыс,
Муса гӧтырӧс кыськӧ вайӧдіс.

Овны лӧсьыда гозъя кужисны,
Мича кагаяс налӧн чужисны.
Пӧлать юрйылӧдз мыйӧн воисны,
Асьныс ыджыдӧсь найӧ лоисны.

Кыпыд керкаяс ягын лыбисны,
Быттьӧ теремъяс мойдысь кыбисны.
Гажа свадьбаяс гора кылісны,
Усьмӧн йӧктісны, мудзмӧн сьылісны.

Муслун сьӧлӧмын видзны кужисны,
Регыд асланыс челядь чужисны.
Шудсӧ лэптісны, шогсӧ дзебисны,
Нэмъяс колисны, вояс лэбисны...

Коркӧ-й вӧрӧгкӧд тышӧ петісны,
Юрсӧ пуктісны, ловсӧ сетісны.
Сёӧн мунісны, дасӧн воисны,
Вужъяс лэдзысьӧн гортын лоисны.

Джуджыд нӧрысын пыр на олӧны,
Эмӧсь повтӧмъяс, эмӧсь — полӧны.
Кодкӧ коми на, кызыс рочасьӧ,
Оз нин помнитны найӧ воддзасӧ,

Кыдзи важӧн нин коми вӧралысь,
Паськыд пармасӧ вундысь-шӧралысь,
Изъя берегӧ пыжсӧ кымыньтіс,
Джуджыд нӧрысӧ керка зымнитіс.

Эжва ляпкалӧ, йиръяс тырӧны,
Сись кодь пожӧма ягъяс бырӧны.
Коми йӧзыслысь синсӧ пӧртӧны,
Курыд синваӧн найӧ бӧрдӧны.

Вылӧ катсьӧма, улӧ кывтсьӧма,
Кыдзи овсьӧма, сідзи-й кывсьӧма.