* * *

Югыд шондіӧй, зарни гӧгыльӧй,
Чужтысь-быдтысьӧй, мамӧй-гӧгиньӧй,
Кытчӧ воштысин, кытчӧ саялін? —
Пемыд кымӧръяс тӧлыс ваяліс.

Вай жӧ югзьӧдлы войвыв эрдъясӧс,
Гажа ягъясӧс, визув бердъясӧс.
Вай жӧ быгльӧдлы шоныд гыястӧ,
Кояв лышкыда мелі шыястӧ.

Тэтӧг кӧдзалӧ олӧм-вылӧмыс,
Дугдӧ юргыны мича сьылӧмыс.
Тэтӧг чорзьӧны небыд кывъясыс,
Тэтӧг вошӧны мича нывъясыс.

Вай жӧ югзьӧдлы войвыв эрдъясӧс,
Гажа ягъясӧс, визув бердъясӧс,
Сэки шоналас олӧм-вылӧмыс,
Сэки паськалас гажа сьылӧмыс.