* * *

«Кытчӧ нӧ тэ вошин, менам зарни шудӧй?
Сӧстӧм муяс вылас кӧдзисны ли мый?
Рытыввывсянь некор шонділы не петны,
Кольӧм кадсӧ некор бӧжӧдыс он кый».

Тайӧ сьыланкывсӧ кыськӧ коркӧ кывлі,
Шудтӧм али шуда, ачым ме ог тӧд.
Ковмыліс кӧ — бӧрдлі, ковмыліс кӧ — сьывлі,
Ӧти олӧм эштас, да оз вичмы мӧд.

Мыйлакӧ тай чужлан, мыйлакӧ тай лолан,
Быттьӧ сідзи-й колӧ, мырсян лун да вой.
Кодлыкӧ на-й шогман, кодлыкӧ на-й колан,
Кодлыськӧ на-й босьтан сьӧлӧм виан дой.

Кытчӧ нӧ тэ вошин, менам зарни шудӧй?
Сӧстӧм муяс вылас кӧдзисны ли мый?
Рытыввывсянь некор шонділы не петны,
Кольӧм кадсӧ некор бӧжӧдыс он кый.