ПӦСЬ КОДЗУВ


Алексей Тимушевлӧн югыд паметьлы

Уна велӧдысь олӧмын вӧлі,
Ӧти велӧдысь некор оз вун.
Кыла сылысь ме небыдик гӧлӧс,
Аддза шондіӧн ойдӧдӧм лун.

Школа йӧрын гӧрд сикӧтша пелысь,
Потшӧс мӧдарын баситчӧм рас.
Сэтчӧ вежӧрнам важӧн нин келі,
Сэн жӧ келалӧ, кӧнкӧ, и класс.

Кутшӧм ывлаыс гажа да мича,
Гижны велӧдӧ верстьӧджык ёрт:
«Корсьӧй кывъяс да пукталӧй сідзи,
Медым чуймаліс лыддигас морт».

Тайӧ кывъяссӧ нэм чӧжым кыла,
Кӧдзыд вежӧрӧн некор ог ов.
Ывла югыдӧ петӧмӧн сьыла,
Мыйӧн сьӧлӧмлы вашмунас лов.

Сідзи-й вӧлӧма: майбырыс — гортын,
Кӧть и керкаад лабич да джек.
Аттьӧ тэныд, пӧсь кодзула мортӧй,
Тэнӧ аддза ме енэжсьыс век.