«ТӦЛКТӦМ» НЫВ

Квайт во сайын ті пӧшти ставныд вӧлінныд менам воклӧн кӧлысь вылын и, дерт, кӧнкӧ, кывлінныд: ӧні том гозъялӧн, Митрейлӧн да Марьялӧн, эм нёль арӧса ныв — Таня. Тӧданныд? Тӧдтӧг он олӧ: ӧд ті бара жӧ ставныд вӧлінныд нывка нимлун вылын, кӧть, веськыда кӧ висьтавны, ми эг ставныдтӧ корлӧй. Но ладнӧ, та йылысь ог кутӧй сёрнитны.

Дона гӧтырыскӧд вок думыштіс велӧдны нывныссӧ лыддьысьны, гижны дай артасьны тшӧтш.

— Велӧдысьыс пасибӧ висьталас, — шуис Марья.

— Сідз, дерт, — кыпыд сьӧлӧмӧн сӧгласитчис Митрей. — Мукӧд челядьыс «А» ни «Б» оз тӧдны, а миян нывным лыддьысьӧ збоя и гижӧ мичаа, дай артасьӧ шӧркоддьӧм бухгалтер моз. Танялы долыд лоӧ — куш «пятёркаяс» кутас ӧктыны. Миян любӧ, дай велӧдысьыслы оз ков ноксьыны...

— А мыйысь нӧ сійӧ удждонсӧ кутас босьтны? — гӧгрӧсмисны синъясыс Марьялӧн. — Ми велӧдам, а сійӧ деньга босьтас?

— Да ӧд, дона Марьяӧй, миян Таня кындзи, ме думайта, классас нӧшта кодкӧ лоӧ, — такӧдіс гӧтырсӧ Митрей. — Сэсся ӧд, ми эгӧ на велӧдӧй нывнымӧс...

— Нолтӧ, Таня, волы татчӧ! — сойяссӧ пуджис Марья.

«Виччысь, Таня!» — думышті ме.

Таня эновтіс аканьсӧ, локтіс да мамыс вылӧ видзӧдліс гажа сьӧд синъяснас.

Марья тувкис чуньсӧ пызан вылын куйлысь газетӧ:

— Тайӧ «А». Гӧгӧрвоин?

— А-а, — шуис Таня да сюйис чуньсӧ вомас.

— Вот аддзан? — долыдпырысь нюмъёвтіс Марья. — Кутшӧм ӧдйӧ гӧгӧрвоис! А тайӧ, Танечка, «мы»...

— Мы-ы, — нюжӧдіс Таня.

— Сэсся «ӧ»...

— Сэсся «ӧ», — веськодьпырысь шуис Таня да бергӧдчис меланьӧ. — Сергей дядь, а талун тшакла ветлам?

— Кутшӧм нин талун тшак! — серӧкті ме.

— Тэ эн бергав! — горӧдіс Марья. — Татчӧ видзӧд! Тайӧ «сы»...

— Сы, — нораа шыасис ныв. — А мый сійӧ сэтшӧмыс?

— А этійӧ — небзьӧдан знак, — тшапа помаліс Марья да видзӧдліс ми вылӧ: велӧдчӧй пӧ, кыдзи колӧ велӧднысӧ!

Ме муртса верми кутны серамӧс.

— Мый лои? — нывкалысь юаліс мамыс.

«Дзуж лои», — думышті ме, но нинӧм эг шу. Таня шензьӧмӧн видзӧдліс мамыс вылӧ:

— Нинӧм эз ло!

— Кыдзи «нинӧм»? — скӧрмис мам. — Тэ видзӧд: а-мы-ӧ-сы — небзьӧдан знак. Мый лои?

— Нинӧм эз ло, — чукыртіс вом дорсӧ Таня.

— А-мы-ӧ-сы... — эз на вошты терпеньесӧ мам. — А-мы-ӧ-сьы... Шу!

— Ачымӧс, — гажтӧма лапнитіс синъяснас Таня.

— Ачыд тэ мӧс! — пузис мам.

— Ме абу мӧс, — чукыртчис Таня, вот-вот бӧрддзас.

— Абу, Танюш, абу, — малышті ме нывкаӧс юрӧдыс да думсьым содті: «Эм кӧ кодкӧ тані мӧскыс, то сійӧ, дерт жӧ нин, мамыд».

— Амӧсь татчӧ гижӧма, амӧсь! — горӧдіс Марья. — Ой, мӧскӧ! Мун да велӧд татшӧмсӧ. Батьыс кодь жӧ...

Ме гораа серӧкті. Батьыс ӧбидитчис:

— Меным кажитчӧ: Таня дзик мамыс кодь. Мамыс сизим воӧн ӧдва-ӧдва вермис помавны нёль класс, а ме сётаки бухгалтерӧдз велӧдчи...

— Велӧдчин кӧ — велӧд! — скӧрмис Марья да петіс орчча комнатаӧ.

Тайӧн помасис медводдза урок.

— Мунам, Танюш, тшакла, — ышловзи ме. — Тшактӧ вотны некутшӧм амӧсь оз ков.

Мӧд луннас Танялӧн бать-мам ньӧбисны букварь, тетрадьяс, ручкаяс — ставсӧ, мый колӧ и оз ков. Митрей, кыдзи бухгалтер, заводитіс велӧдны нывсӧ артасьны. Босьтіс тшӧті да вештіс ӧти лы:

— Вот, Таня, ме ньӧби тэныд ӧти кампет, сэсся нӧшта ӧтикӧс. Кымын лои?

— А кӧні нӧ кампетыд?

Митрей шӧйӧвошӧмӧн видзӧдліс ныв вылас. Сэсся гӧгӧрвоис босьтны кык сакар тор.

— Вот тэныд ӧти сакар тор, сэсся нӧшта ӧти. Кымын лои?

— Куим.

Бать паськӧдіс вомсӧ:

— Тэ нӧ мый? Тэ жӧ зэв бура кужан лыддьыны дасӧдз! Абу, абу куим.

— Сизим! Нёль! — радпырысь горзіс Таня.

Митрей кутіс дӧзмыны. Пызан дорын пукалысь Марья, улыс вом дорсӧ нюжӧдӧмӧн, зывӧкакодь видзӧдіс на вылӧ. Бать ышловзис. Сэсся чургӧдіс водз чуньсӧ:

— Тайӧ мый?

— Чунь!

— Кымын чунь?

— Ӧти.

Митрей веськӧдіс нӧшта кык чунь.

— Ӧні кымын?

— Уна! — серӧктіс Таня.

— «Уна!» — скӧрмис бать. — Тэ лыддьы!

— Ӧтик, кык, куим, — лыддис чуньяссӧ Таня.

— Молодеч! Кымын лои?

— Кык!

Марья гораа серӧктіс. Верӧсыс скӧра видзӧдліс сы вылӧ да тшӧктіс нылыслы:

— Выльысь лыддьы...

— Ӧтик, кык, куим...

— Кымын лои?

Таня мӧвпыштіс да висьталіс:

— Ӧтик, кык, куим!

— Правильнӧ! — радліс бать. — Содтыны велӧдчим, ӧні чинтыны видлам. Вот тэныд задача. Кань кутіс вит шыр, кыкӧс сёйис, а мукӧдсӧ колис ужын кежлӧ. Кымын шыр колис?

— Шыръяссӧ миян Мурка кутіс, да?

— Сійӧ. Но тэ артав, кымын шыр коли?

— Ме ог тӧд, — шензьӧмӧн чатӧртіс юрсӧ Таня. — Ме жӧ эг аддзыв шыръяссӧ!

— Тэ артав, Таня, лыддьы. Вит шыр кутіс, кыкӧс сёйис, мукӧдсӧ колис ужнайтны. Кымынӧс колис ужнайтны?

— Кытчӧ колис? — гажаа дзирдыштісны синъясыс Танялӧн.

— Тьпу, кутшӧм тэ тӧлктӧм! Бӧчкаӧ солаліс! Кымынӧс солаліс?

Таня чуймӧмӧн видзӧдліс батьыс вылӧ:

— Тэ пӧръясян: каньыс оз солав шырсӧ, гӧннас и сёйӧ...

— А мый тэкӧд сёрнитан! — ӧвтыштіс кинас Митрей да босьтіс газет. Арифметика кузя урок помасис.

— Бухгалтер! — вежыньтліс вомсӧ Марья. — Велӧдысь! Шыръяс солавны сӧмын и кужан. Лок, Танюш, ме велӧда тэнӧ гижны.

Марья восьтіс тетрадь, сетіс Танялы ручка да индіс «А» буква вылӧ:

— Гиж со этійӧ буквасӧ.

— Кыдзи? — видзӧдліс мамыс вылӧ Таня.

— Видзӧдлы букварь вылас! Аддзан: гижӧма. Сідзи и гиж!

— Ме ог куж...

«Абу дивӧ, — думышті ме. — Мамыд, ме чайта, правильнӧ гижнысӧ ачыс оз куж».

Марья ышловзис, босьтіс ручка:

— Видзӧд, кыдзи ме гижа...

Сійӧ сьӧкыдапырысь гижис буква, коді, сё збыльысь, лои пӧшти «А» кодь.

— Вот тадзи и гиж. На!

Кыв помсӧ мыччӧмӧн Таня гижтіс кык чукыль-мукыль.

— Буквасӧ гиж, буквасӧ! Ок, эськӧ...

— Ог куж, — нораа шуис Таня.

— Мӧс! Со, видзӧд нӧшта ӧтчыд... На, гиж сэсся ачыд.

Таня визьйӧдліс бумагасӧ, но некутшӧм буква, дерт, эз артмы.

— Да тэ визь кузяыс нуӧд, визь кузяыс! — горзіс Марья. — Кытчӧ, кытчӧ бара мунін? Ок, ыж синмӧй! Выльысь гиж!

Кор перӧыс бара муніс кытчӧкӧ бокӧ, Марья тувкнитіс нылыслы юрбӧрас: — Кутшӧм тэ тӧлктӧм! Ыж — ыж и эм. Пӧсявтӧдз велӧді нёль арӧса кӧбылаӧс гижны да сідз эз и велав. Ог тӧд, код рӧдӧ тэ мунӧмыд.

Сійӧ ещӧ ӧтчыд зургис нылыслы юрбӧрас. Ручка помысь тёпкысис чернила войт. Марья пузис:

— Сувт пызан сайсьыс! Весась, ыж син!

Таня гораа бӧрддзис да заводитіс ниртны синъяссӧ чернилаӧсь кияснас. Здук-мӧд мысти став чужӧмыс лои лӧз. Тайӧ дзикӧдз петкӧдіс терпеньеысь мамсӧ. Сійӧ кватитіс нывкаӧс сой пӧлӧдыс да буриника тапкӧдіс мышкас.

— Асьныдтӧ эськӧ оз мешайт буриника вурлыны! — скӧрми ме.

— Тэ, Сергей, эн сюйсьы, — шыӧдчис Митрей. — Ми кӧсъям, мед школаӧ пыртӧдз нылыс кужис лыддьысьны и гижны.

— «Велӧдысьяс!» — пузи ме. — Нывкаыслӧн велӧдчӧм дорас сӧмын зывӧклун чужас тіян велӧдӧм помысь. Пель пытшкӧссӧ да сьылісӧ мыськыны велӧдӧй — уна пӧв бурджык лоӧ. А грамотаыд кӧ ковмас, бур йӧз тітӧг велӧдасны!

Но гозъя дыр на эз эновтчыны нывнысӧ «велӧдӧмысь»: менсьым ӧлӧдӧмӧс пыдди эз кӧсйыны пуктыны. Тӧлысь мучитчӧм бӧрын Митрей норасис:

— Миян Таня, коньӧр, тӧлктӧм, слаб. Тӧлысь чӧжӧн эз велав лыддьыны ни гижны, артасьӧм йылысь эськӧ он нин и шу да. Мыйта кӧть эг шлёпӧдӧ небыдінас да нетшкӧ пельӧдыс — нинӧм эз отсав.

— Да, да! — скӧра шуи ме. — Мыйсюрӧӧ велӧдінныд: матыстчан кӧ нывкаыс дорӧ букварӧн — пыр и бӧрддзас, перӧ-ручкаысь биысь моз полӧ дай тшӧті вылӧ видзӧдны оз вермы. Сэтчӧ жӧ, лоис капризнӧй, омӧля кутіс сёйны, войясын частӧ палялӧ, бӧрдӧ-горзӧ, тіралӧ...

— Нинӧм! — век на нинӧм эз гӧгӧрво Митрей. — Ми гӧтыркӧд век жӧ велӧдам нывнымӧс лыддьысьны да гижны.

— Велӧдам! — попугай моз шыасис Марья.

Кыдзи татшӧмъясыскӧд сёрнитан. Нёль арӧса кагаӧс лыддьӧны тӧлктӧмӧн, а асланыс вежӧрыс кӧні? Вензьыны вӧлі нинӧмла, аслым шуи ветлыны том учительница дорӧ, мед сійӧ сёрнитыштас тайӧ гозъяыскӧд, кытчӧдз найӧ дзикӧдз эз тшыкӧдны тӧлка шань нывсӧ.