ЖИЛА ВАНЬ
Жила Вань вӧв доддявны ни лэдзавны оз куж. Дай абу дивӧ: нэмсӧ пукалӧма канцелярияын и дзик неважӧн воис колхозӧ. Сократитӧмаӧсь ли мый ли, шуӧны.
— Тэ ноптӧ босьт да пыр, — шуи ме сылы, — тшӧкты самӧвар пуктыны, а вӧвнас ме ачым нин...
Километр нелямын кырссим лёкиник туйӧд, дай кык сы мында лоӧ на районнӧй центрӧдзыд, и вӧвтӧ, дерт, шойччӧдтӧг оз позь. Тшӧтш и аслыным оз мешайт мыйкӧ вомӧ сюйыштны. Кынӧм сюмалӧ, быттьӧ вежон сёйлытӧмӧсь, кӧть эськӧ асывнас на зэв топыда тэчлім.
Ме лэдзалі вӧлӧс да сеті сылы турун, сэсся бура дыр малалі корадодь пыдӧс, корси сёян тыра сумкаӧс. Гӧтыр сэтчӧ мыйкӧ унатор пукталіс. Пуӧм яй пуктіс вӧв юр кодь кусӧк. Кузь туяд пӧ ставыс изсяс.
Но кӧні нӧ всё-таки сумкаӧй? Гашкӧ, инӧ, ёртӧй пыртіс? Ме тэрмасьӧмӧн пыри.
— Сумка? Кутшӧм сумка? — гӧгрӧстіс югыдруд синъяссӧ Жила Вань.
— Вот тэныд и на! — ме муртса эг ёрччышт. Кынӧм сюмавны кутіс тӧдчымӧн ёнджыка. «Ладнӧ, — думайта, — Жила Ваньлӧн нопйыс тырмымӧн сьӧкыд, позьӧ и отсыштны кокньӧднысӧ».
Пуксим чай юны. Жила Вань кыскис нӧк тыра банка, калбас да пыж кодь черинянь. «О, да сёйтӧг тай ог на кольӧй», — радпырысь думышті ме да, черинянь вылӧ видзӧдлігмоз, шензьышті ас вылӧ: «Быдсяма дивӧыд овлӧ жӧ. Сёян тыра сумкаыд вунӧ!»
Жила Вань хмыкнитіс, шӧраліс калбас, мавтіс чунь кызта нянь шӧрӧм, нюлыштіс чуньсӧ да, черинянь вундігмоз, сьӧкыда ышловзис:
— Да-а, сёянтӧгыд туяд лёк...
Ме радлышті: вот, мися, прамӧй мортыд тай гӧгӧрвоӧ, сетас, колӧ чайтны, чериняньсӧ ставнас!
Весиг нюжӧдлі нин киӧс, но Жила Вань кызӧктіс да кыскис чериняньсӧ асланьыс.
«О-о!» — чуймӧмла паськӧді вомӧс да куті видзӧдны, кыдзи Жила Ваньлӧн заводитісны вӧрны пельясыс. Вот тайӧ да! Ышловзи, кисьті аслым чай. «Ладнӧ, — думайта, — Жила мешӧк. Коркӧ, удайтчас кӧ, тадзи жӧ тэнӧ гӧститӧда, а то и бурджыка».
Ме аттьӧалі кӧзяйкаӧс да сувті. Весиг эг видлы пызан вылӧ вайӧм сола тшаксӧ.
— А бура ӧд и сёйсьӧ ывла вылад ветлӧм бӧрын, — ыджыда горддзӧдіс Жила Вань да малыштіс гӧгрӧстчӧм кынӧмсӧ. — А чайтӧ вот ме ог любит. Мый сэсь васьыд пӧльзаыс?
Ме чӧв олі...
Час-мӧд мысти мӧдӧдчим водзӧ.
— Пуксьы водзас да вӧтлы вӧвсӧ, — буркниті Жила Ваньлы. — Тэнад кынӧмыд пӧт.
Жила Вань броткыштіс да дышпырысь кутчысис вӧжжиӧ.
Недыр мунӧм мысти ывлаын дзикӧдз пемдіс, весиг вӧв бӧжыс слаба тыдаліс. Додь дзуртӧм шы улӧ бура дыр вугралі. Кынӧмӧй важ мозыс гажтӧма гургис. Ышловзи да лэпті синъясӧс енэжлань. Пемыд енэжсянь кодзувъяс мый йылысь кӧ зіля мигайтісны меным.
«Мый эськӧ сэтшӧмсӧ вӧчны Жила Ваньлы? — мӧвпалі ме. — Кыдзи сійӧс велӧдыштны?» — Недыр мысти кыпӧдчышті да тӧждысьӧмӧн шуи:
— Мыйкӧ тай мегырыс зэв улын? Лэптыштны колӧ...
— Тпру-у...
Сувтім. Сулалім...
— А тэ чеччыв, Иван Митрич, нинӧм ӧд он ло, кӧть и зэлӧдыштан чересседельниксӧ.
Жила Вань мыйкӧ нурбыльтіс да довгис вӧв ныр дорӧ.
Ме турун улысь кыски сылысь нопсӧ да чӧвті додь бӧрӧ, а кӧвсӧ кӧртышті корадодь мышкӧ кресталӧм сутугаӧ да сэсся скӧра шыаси:
— Но мый нӧ сэсся сы дыра маласян? Окасян али мый вӧлыскӧд?
— А кӧні нӧ чересседельникыс? Кодӧс зэлӧднысӧ? — кыліс шӧйӧвошӧм гӧлӧс.
— Чересседельникыс? Коді бӧж увтіыс мунӧ — сійӧ... Малышт да сюрас ки улад. — Ме вак-вакӧн серӧкті да тшӧкті: — Пуксьы вай... Кытысь нин тэныд!..
Сувтлі да ноксьышті вӧв дорын. Час нёль мысти прӧйдитім Краснобор. Позис, дерт, шойччыштны тані, но километр-мӧд сайын вӧлі Діюр, кытчӧ ме век сувтлывла Ижмаӧ кайигӧн.
Діюр тыдовтчӧм бӧрын бергӧдчи ёртлань:
— Вот тані ми бара шойччам, чай юам да мый да. А тэ ноптӧ эн-ӧ вунӧд?
— Эг жӧ кӧ-а, — нюжӧдчис водзлань Жила Вань да сюйис кисӧ турун пытшкӧ. Кышкис-кышкис, сэсся повзьӧм гӧлӧсӧн шыасис: — Кӧн нӧ, збыльысь тай абу, Микулай Степанович?
Ме очсышті:
— Пуктылін кӧ — некытчӧ лонысӧ. Вӧлыс ӧд чериняньтӧ оз сёй.
Діюрӧ сувттӧдз Жила Вань вевъяліс вӧчны турунсӧ ёг кодь посниӧдз, сэтчӧдз корсис. Сэсся ёрччиг да сьӧласигтыр пырис. Зэв-ӧ долыд вӧлі сылӧн чужӧмыс — пемыд вӧснаыс эз тыдав, но, думайта, эз вӧв вывті долыд.
Кӧзяиныс, ыджыд тошка Ичӧт Вась, паныдаліс миянӧс зэв бура. Буретш сійӧ вӧлі ужнайтӧ.
— Вай пуксьӧй, пуксьӧй, туй выв йӧз, нуръясьыштӧй...
Ме, кыдзи тӧдса морт, пыр жӧ пукси пызан сайӧ, а Жила Вань мыйкӧ нюжмасис, виччысис, буракӧ, мӧдысь корӧм.
— Вай пуксьы, пуксьы, — лэптіс ыджыд тошсӧ Ичӧт Вась.
Жила Вань кыпӧдчыштліс, но ме висьталі:
— Митрич дзик на ӧні сёйис, да, гашкӧ, оз и мӧд пуксьыны да...
— Кӧні сёйис?
— Красноборӧ сувтлім...
— А-а...
— Сійӧ жӧ мыйкӧ кынӧмнас мучитчӧ, да тэ, Василь Петрович, зэвсӧ сійӧс эн и невӧлит...
Дерт, висьталӧны кӧ, мый тэ дзик на ӧні сёйӧмыд, сэк пызан сайӧ пуксьыны абу лӧсьыд.
Жила Вань видзӧдліс ме вылӧ гӧгрӧстчӧм синъяснас да шытӧг паськӧдіс вомсӧ, буракӧ, мыйкӧ кӧсйис шуны, но ми Ичӧт Васькӧд сёрнитім нин поводдя йылысь.
Ме лукавиттӧг сёйи-юи мыйта тӧрис, сэсся сьӧкыда лолалігтырйи пукси Жила Ванькӧд орччӧн да, чигарка гаровтігмоз, ыджыда горзьӧді:
— А бура ӧд и сёйсьӧ, Митрич, ывла вылад олӧм бӧрын...
Митрич лӧга югнитіс синъяснас. Вӧв дорӧ петалігӧн нопсӧ дзеби бӧр важ местаас, сэсся пыри да нюжӧдчи диван вылӧ:
— Но, Митрич, кынӧмъясным пӧтӧсь, позяс и узьыштны асылӧдзыс... Мед вӧлыс шойччас бурджыка.
Унмовсим. Миян садьмигкежлӧ кӧзяева пуктӧмаӧсь нин самӧвар. Пызан вылын гӧрдвидзис вундалӧм сьӧмга. Ме син бӧжӧн видзӧдлывлі ёрт вылӧ, а сійӧ меліа видзӧдліс сьӧмга вылӧ да ньылышталіс дульсӧ.
Жила Вань вывті ёна радейтӧ чери, а сьӧмга вылӧ видзӧдігӧн весиг синваыс петӧ. Ме нюжӧдлі киӧс сьӧмгала да зэв збыльысь шуи:
— Чӧскыд жӧ сьӧмгаыд... А вот Митрич миян сӧвсем оз радейт...
— Но-о? — шензьыштіс кӧзяин.
— Оз... Ме вот окотапырысь сёя, а сійӧ сьӧмга вылас видзӧднысӧ оз вермы. Ме ог тӧд мыйла...
— Хм, — ошкытӧг видзӧдліс векыштчӧм чужӧма Жила Вань вылӧ Ичӧт Вась.
— А вот чайтӧ сійӧ любитӧ, — нюмъёвті ме. — Кӧть сизим стӧкан юас. Ме, шуӧ, чайтӧгыд овны ог вермы...
Яра югъялысь синъяснас улӧ видзӧдӧмӧн Жила Вань рудзӧг няньӧн юис чай. Чужӧмыс сылӧн вежласис быдсяма ногыс.
Ме весиг повзи, мед ёна расстроитчӧм вӧсна сылӧн збыльысь эз висьмы кынӧмыс...
Районын ми задержитчим. Ёртлӧн нопса чӧскыдторъясысь колины сӧмын казьтылӧмъяс, деньгаыс эз ло, и бӧр лэччигӧн ме быд сувтліг зіля гӧститӧді сійӧс ньӧбӧм запасъясысь.
Гортӧ воӧм бӧрын сійӧ мӧвпалӧмӧн видзӧдліс ме вылӧ, кӧсйис мыйкӧ шуны, неуна гӧрдӧдыштіс, сэсся ышловзис, топӧдліс менсьым киӧс, лэдзис синъяссӧ да пырис гортас.
