ГОРТӦДЗНЫС ВАЙӦНЫ
Райпотребсоюзса председатель Федул Федулович Рушкушманов корис ас дорас экспедитор Сергей Асныровӧс.
— Пуксьы, сёрнитыштны колӧ. Вот мый, Сергей. Ми и водзті, ачыд тӧдан, кыдзи вермим, отсасим войнавывса ветеранъяслы: вичмӧдлім калбас-тушёнка, чӧскыд консервъяс, слӧна чай, треска. Мукӧддырйи весиг аслыным нинӧм эз кольлы...
— Хм?!
Рушкушманов чорыда видзӧдліс Асныров вылӧ да сёрнитіс водзӧ:
— Водзті ветеранъяс асьныс волывлісны магазинӧдз чӧскыд вӧлӧгаысла. Но ӧні, ачыд тӧдан, колӧ выль ног уджавны. Со ми и сёрнитім районса руководствокӧд да шуим войнавывса ветеранъяслы новлыны калбас-тушёнкасӧ веськыда гортӧдзныс. Ӧд уналы на пиысь сьӧкыд нин волыны магазинӧдз.
— Тайӧ збыльысь зэв бур делӧ! — рад лои Сергей.
— Вот, вот! А продуктасӧ босьтан Петровна складысь. Сэні торйӧн лӧсьӧдӧма нӧшта некымын кӧрӧбка. Петровна висьталас, кодлы кутшӧмӧс пыртны патераас. Сьӧм оз ков босьтны: мынтӧма нин. На списокъяссӧ, пуксьы машинаӧ да тӧвзьы — аски, ачыд тӧдан, праздник...
Тані Рушкушманов лэптіс водз чуньсӧ:
— Медводз пыралан Сан Иваныч патераӧ. Том гӧтырыс сылӧн, Мильчигрия Ивановна, этійӧ... гӧгрӧсмыны заводитӧма. Свежӧй чери пӧ корӧ. Миян йӧз тӧждысьыштісны: кыйӧмны стерлядь, ёдіяс. Ловъяяснас на сюйим холодильникӧ. Сыласны да, дерт жӧ, кутасны тірзьыны бӧжнаныс, чеччавны, а тайӧ, тӧдӧмысь, кыпӧдас ловсӧ ставӧн пыдди пуктана Мильчигрия Ивановналысь...
— Сан Иванычыс да Мильчигрия Ивановнаыс нӧ войнавывса ветеранъяс жӧ? Война бӧрас, гашкӧ, дас во мысти чужисны-а. Ветеранъяслы кындзи, ме некодлы ог пырт некутшӧм кӧрӧбка!
— Тэ, Асныров, эн ёнасӧ аснырав! — кыпӧдіс гӧлӧссӧ Рушкушманов. — Районнӧй руководство! Гӧгӧрвоны колӧ! И тэнсьыд эз юавны, кор налы колӧ вӧлі чужнысӧ!
Чӧв олыштӧм бӧрын председатель лӧньджыка нин шуис:
— Тэнӧ эг жӧ вунӧдӧй, кӧть и абу на ветеран: сьӧкыд кодь кӧрӧбка дасьтім, армянскӧй коньяк пуктім и. И ставыс — дон босьттӧг: менам премиальнӧй фондыс эз на косьмы.
Асныров бурасис, но век жӧ броткыштіс:
— Сан Иваныч, Мильчигрия Ивановна... Пелагея тьӧтыд, пӧрысь колхознича, аслад рӧдвуж, олӧ со ылі сиктын. Магазиныс некымын во нин пӧдса. Бокӧвӧй йӧз няньсӧ вайӧны райцентрысь. Сылы мыйла кӧрӧбкасӧ он ысты?
Рушкушманов бара скӧрмис:
— Мый нӧ ме, пӧрысь бабсӧ армянскӧй коньякӧн кута юктавны?
Но здук мысти век жӧ небзис.
— Ладнӧ, ну сылы мешӧк пызь да сов пачка, мед пӧжасьӧ праздник кежлас. Сьӧмсӧ эн вунӧд босьтны. Но, мӧдӧдчы сэсся, шоферыд важӧн нин виччысьӧ. Менам патераӧ пыртан жӧ мыйсюрӧ, Петровна висьталас.
Асныров кывзысис. Стӧча гӧгӧртіс став адресъяс серти, пыртліс кӧрӧбкаяс да ёкмыльяс. Но кытсюрӧ век жӧ асныраліс. Сан Иваныч патераӧ пыртіс кӧрӧбка, кодӧс вӧлі индӧма Рушкушмановлы. Мильчигрия Ивановна, дерт, эз тӧд, мый кӧрӧбкасӧ вежисны, да пӧся аттьӧаліс Сергейӧс.
Асныров торйӧн любӧпырысь ветліс Пелагея тьӧт дорӧ.
— Со тэныд рӧдвужыд, Федул Федулович, гӧснеч ыстӧма, свежӧй черитор, праздник кежлӧ пӧ...
Пӧчӧ ёна шензьӧмӧн да радлӧмӧн клопнитіс кияснас бокъясас:
— Со ӧд, абу на вунӧдӧма, Федулушко, пӧрысьӧс! Сё пасибӧ жӧ нин муса племешлы!
Пелагея тьӧтлӧн синваыс петіс. Сійӧ восьтіс кӧшельсӧ.
— Оз ков, Пелагея тьӧт. Донсӧ мынтӧма нин, ветеранъяслӧн фондысь.
Пӧчӧ эз гӧгӧрво, мыйсяма фондысь мынтӧма, но эскис.
...Федул Рушкушманов вомгорулас сьылігтырйи локтіс гортас. Восьтіс кильчӧ ӧдзӧссӧ да вомыс сылӧн паськаліс: патера ӧдзӧс дорын сулаліс пызь мешӧк, а сы вылын куйліс сов пачка...
