БУРА УЗЬСЬӦ
Садьми дас ӧтикӧд вылын. Сутки джын узьсьӧма, сідзкӧ. Но мед, талун субӧта.
Нюжмасьышті шоныд да небыд вольпасьын, сэсся чеччи: лунтыр ӧд он узь. Но очсӧдлӧ на со. Оо-ээ-о-хой! Со ӧд кутшӧм чӧскыда очсӧдіс, муртса вом каличӧй эз вежыньтчы. Бӧр кӧ нин водны-а?
Сёйышті да бӧр воді: некытчӧ тэрмасьнысӧ, аски бара на шойччан лун.
Куйла, думайта, мися, ме юрӧн уджалысь морт. Учёнӧйяс шуӧны: татшӧм йӧзыслы колӧ пӧ узьны суткинас кӧкъямыс часысь не этшаджык. Быд суткиысь коймӧд юкӧныс, сідзкӧ, узьсьӧ, а ми вокыслӧн унджык на. Меным комын арӧс. Сідзкӧ, дас восӧ быть нин узи. Но лешакӧ! Быдсӧн йирмӧг босьтіс. Звирк чеччи. Но ме жӧ абу дыш кань, уджалысь! Овлӧ, дерт, чӧскыда ӧбедайтӧм бӧрын и удж вылас вугрӧдлӧ. Но унзільыс эновтчӧ рытланьыс, кор кутас матыстчыны гортӧ мунан кадыс.
Лоӧ петавны сусед дорӧ. Пронькӧд ми ӧтлаын мырсям-уджалам да ёрта-ёртысь ог полӧй, веськыда сёрнитам.
Торкӧдча — некод оз шыась. Мӧдысь торкӧді. Кыліс суседлӧн броткӧм, сэсся воссис ӧдзӧс да мыччысис унзіль чужӧма Пронь. Дыр узьӧмысла чужӧмыс пыктӧма, синъясыс ӧдва тыдалӧны.
— Вӧлись на вольпась вылысь? — шензьӧмӧн юалі ме. — Луи шӧрӧдз стынитны верман? — Ачым рад лои: абу ӧтнам, сідзкӧ, дыр узьны радейтысьыс.
— Завидь кӧ босьтіс — вод да узь кӧть рытӧдзыс, — очсыштіс Пронь. — Дӧзмӧдчан сэні. Кутшӧм чӧскыд вӧт вӧлі вӧтала. Эк! Нолтӧ, мышкӧс гыжйышт.
— Пывсьыны ветлы, корӧсясь зільджыка, — мышсӧ гыжъялігмоз велӧдышті сійӧс.
— Аски водз чечча да ветла. Ӧні йӧзыс уна.
— Бара ӧд узьсяс.
— Гӧтыр пальӧдас.
Пронь мыссис да ӧзтіс папирос. Ме бара велӧдышті:
— Куритчытӧдзыд завтракайтны колӧ.
— Кынӧм оз на сюмав да. А тэ век велӧдан йӧзсӧ, кыдзи колӧ овны. Ачыд весиг гӧтрасьнытӧ он куж-а. Завтракайттӧдзыд, кӧнкӧ, куим-нёльысь шпуткин жӧ. А узян ме серти на дырджык. Удж вылад вугралан и. Ме думайта, сёйигад сӧмын прамӧясӧ и палявлам, век унзіль.
— Но, лешакӧ, — скӧрми ме. — Локті, кыдзи прамӧй ёрт дорӧ, а сійӧ видчӧ. Унтӧ торки да сійӧн, кӧнкӧ?
— Сійӧн, дерт, Кутшӧм мича нылӧс вӧлі кутлала...
— Гӧтырыдлы висьтала вот...
— Висьталан кӧ — быд вой кута стенад камӧдны.
— Гӧтырыд мед асьтӧ оз камӧд.
— Тэ веськыда висьтав, Опонасей, дӧзмӧдчыны локтін, али мыйкӧ могӧн?
— Могӧн, Проша, — нюмъявтӧг шуи ме. — Юавны кӧсъя, дыр-ӧ тэ суткинас узян?
— Дыр-ӧ узьсьӧ, сы дыра и узя. Тэ эн скӧрмы, Опонасей, но сётаки ветлы врач дінӧ. Тэнад мыйкӧ... этійӧ... Абу ставыс ладнӧ юрад: кыткӧ вӧрзьыштӧма.
— Эн пов, некыті абу вӧрзьӧма. Талун со артышті да йирмӧг босьтіс: комын арӧсӧдз олі да, вӧлӧмкӧ, дас восӧ узьсьӧма, абу кӧ унджык.
— Но и мый? Тэ уджалан!
— Уджала эськӧ да...
— Удждонсӧ мынтӧны?
— Шуан жӧ...
— Патераыд эм?
— Хы! Коз улын ӧд ог ов! Зэв бур патера, тэкӧд, бур суседкӧд орччӧн. Пес ни ва оз ков вайны. Электричество, газ, телефон, телевизор...
— Гашкӧ, инӧ кӧмавны-пасьтавнытӧ нинӧм?
Хы! Шуан жӧ! Тэнӧ на, колӧкӧ, пасьтӧда.
— Холодильникыд, гашкӧ, тыртӧм?
— Тӧрыт на ветымын кольк да куим курӧг ньӧби.
— Мый нӧ сэсся тэныд колӧ? Пет гортад, пу ӧти курӧг, сёй да вод узьны, шкоргы. А эн нинӧм абусӧ сёрнит да дӧзмӧдчы. Мен колӧ бритчыны, завтракайтны да мунны кино вылӧ. Гӧтыр кӧсйис магазинъясті гӧгӧртігмоз билетъяс ньӧбны.
— Лун шӧр лунӧ кино вылӧ?
— Войнас ме узьны радейта.
— Вӧчнысӧ нинӧм, вот и узьсьӧ! — очсышті ме. — Сёйышта да водла жӧ на.
