«ДАСӦН ВЕРДӦНЫ ӦТИКӦС»
Коми нывбабаяс! Кывлінныд энӧ ті тайӧ кывъяссӧ? Тӧданныд онӧ, мый сійӧ лоӧ? Дерт, кӧнкӧ кывлінныд ыджыд шог йылысь — став роч мувывса йӧз шог йывсьыс — Волгадорса олысьяс тшыгъялӧм йылысь. Кывлінныд кӧнкӧ — уна нин сы йылысь гижлісны и висьтавлісны — тшыгъялӧны сэні зэв уна йӧз; веритад, оз прӧста висьтавны, збыльысь — тшыгъялӧны комын миллион морт, сы костын дас миллионыс челядь. Оз нин тшыг нисьӧ пӧт овны, а дзик тшыгӧн. Сёйӧны мый сюрӧ ки улас.
Висьӧны быдсяма висьӧмнас. Оз кӧ лок кыськӧ отсӧг — кулалӧны-кусӧны тшыгысла. Ёна мучитчӧны гырысь йӧз, ещӧ ёна — челядь. Потӧ сьӧлӧмъясыс мамъяслӧн шогысла, оз вермыны видзӧдны, кыдзи челядьныс нюжйӧдлӧны кинысӧ няньла — а сетнытӧ нинӧм, — оз вермыны кывзыны налысь горзӧм-бӧрдӧмсӧ. Сэтчӧдз воӧмаӧсь — эновтӧны челядьнысӧ — мед эськӧ не аддзыны налысь мучитчӧмсӧ, шыблалӧны Волга юӧ.
Коми нывбабаяс! Видзӧдлӧй асланыд челядь вылӧ, посни чой-вок вылад, думыштӧй, быттьӧ найӧ дугдӧмаӧсь серавны-ворсны, тэрыб ки-кокыс косьмӧмаӧсь, плеть моз, вынтӧг, эбӧстӧг ӧшйӧмаӧсь, мича чужӧмъясыс пӧрысь стариклӧн моз вижӧдӧма, чукырӧссьӧма, — думыштӧй сідзи дай энӧ нин вунӧдӧй: сэні ӧд мучитчӧны-кулӧны миян кодь жӧ уджалысь йӧз, кулӧны сӧстӧм посни челядьяс. Ыджыд сьӧлӧма коми нывбабаяс, энӧ лэдзӧ найӧс кулавны, мездӧй кулӧмысь! Ті верманныд сійӧ вӧчны. Ӧні арталӧма нин: видзны кулӧмысь Волгадорса олысьясӧс роч мувывса уджалысь йӧз вермасны, дасӧн кӧ пондасны вердны ӧти мортӧс выль няньӧдз. «Дасӧн вердӧны ӧтикӧс» — тайӧ кывъяс сертиыс вӧчӧны уна йӧз нин роч му вылын. Ӧтувтчӧны дас мортӧн дай ыстӧны ӧти морт норма мында Волга дорӧ.
Миян Коми муын заводитӧны сідзжӧ босьтчыны вердны тшыгъялысьясӧс выль няньӧдз. Толькӧ этша на, зэв этша. А ӧд быд дас мортлы колӧ вердны ӧтикӧс. Эн вунӧдӧй, коми нывбабаяс, мучитчӧмсӧ посни челядьлысь, мамъясыслысь. Асланыд кӧть уна лишкаыс абу, пыр нин верманныд неунатӧ торйӧдны тшыгъялысьяслы. Ӧтувтчӧй дас мортӧн, босьтӧй вердны ӧти тшыгъялысьӧс. Эн вунӧдӧй: видзны кӧ кулӧмысь ассьыным Волгадорса чой-вокӧс, быд дас мортлы колӧ вердны ӧтикӧс выль няньӧдз.
