БАРА НА СЫ ЙЫЛЫСЬ

Ӧтчыд муна Зеленеч кузя, аддза: мунӧны кык нывбаба, мичакодь паськӧмаӧсь, зэв лючки сёрнитӧны ас костас: «Оз позь норасьны, матушка, бурӧсь миян йӧзыс: пыралі ме вит керкаӧ, а туисӧй нӧкйӧн тыри».

Муна водзӧ, видзӧда: мӧд кык нывбаба мунӧны, кианыс кузь туисъяс, мышканыс мешӧкъяс, ӧдва «коньӧръяс» кыскӧны, кашкӧны, ловныс тырӧма.

— Аски Парчӧгад лоӧ вӧлӧн ветлыны: со ӧд погостад сеталісны, лои кольны чӧлӧй туис, а Парчӧгад йӧзыд ёна бурӧсь, то вӧд батюшкоыд кымын додь ругатӧ сэсь вайис...

Тадзи нёль баба: попаддя, дякӧнича, саломщича да прӧскурня ветлӧдлӧны вӧлӧсьт кузя быд видз дырйи: арся видз, ыджыд видз, Петыр видз — ӧктӧны нӧк, вый, вурун да кудель. Крестьяна эськӧ-й дӧзмӧмаӧськодь, да сеттӧгыд оз позь... Кыдзи нӧ? Висьӧм кӧ босьтас — попыд даритӧ оз сет. Да и кыдзи нӧ он дӧзмы? Ӧктысьысьяслӧн кык мӧскӧн, сетысьлӧн сизим кӧкъямыс мортлы — ӧтик мӧстор. Тайӧ ӧд мый на! Колӧ ӧд и кулӧмтӧ казьтыштны, панапида вӧчыштны и сэтчӧ сет пуд джын сю либӧ кык пунт вый, кулан кӧ — мӧстӧ ну.

Висьӧмысь, кулӧмысь, гӧль морт, видзчысь! Оз кӧ судзсьы поп-дяклы сетны, збыльысь «адӧ» воан.

Ас морт