ПОН ДА СИЗЬ

Пӧрысь гозъялӧн вӧлі пон. Лӧсьыд вӧлі овны налы: пон вердіс, удіс, дӧзьӧритіс. Эз ковлы аслыныс нинӧм йылысь тӧждысьны. Коркӧ сэсся понйыд пӧрысьмис. Эз кут вермыны пӧрысь гозъяӧс вердны, юктавны. Весиг ачыс тшыг нисьӧ пӧт оліс.

Пӧчӧ кутіс шуны:

— Пӧльӧ, кытчӧкӧ вошты понтӧ. Мый сэсся таысь миянлы.

Пӧль катӧдіс понйӧс вӧрӧ дай эновтіс. Ветлӧдлӧ-шӧйтӧ пон вӧрын. Пу вылын тотшкӧдчӧ сизь. Аддзис понйӧс дай юалӧ:

— Кытчӧ нин понйыс мӧдӧма?

— Ачым ог тӧд. Кытчӧ синмӧй да кокӧй нуасны. Том дырйи пӧрысь гозъяӧс верді-юкталі. Мыйӧн тай пӧрысьми — вӧтлісны.

— Лок ме ордӧ челядьӧс видзны, — шуӧ сизь. — Ме тэнӧ верда-юктала.

Муніс пон сизь бӧрся. Воисны зэв кыз гыркса пу дінӧ. Гыркӧсас сизь поз.

— Пуксьы пу дорас да некодӧс эн сибӧд, — шуӧ сизь. — Ме ветла сёянторла.

Пон кольччис сизь пиянӧс видзны. Сизь вель дыр кӧнкӧ-мыйкӧ ветлӧдліс. Воис дай шуӧ понлы:

— Лок жӧ ветлам, понйӧ, грездӧ пир вылӧ. Талун свадьба сэні.

Воисны грездӧ пируйтанінӧ. Сизь бара жбыркнитіс ӧшиньӧд да пир пызан вылад котралӧ. Гӧсьтъяс чуймисны. Сэсся кутісны лыйлыны сизьӧс. Кушӧдз пызан вывсьыд шыблалісны джоджӧ. Горзӧны, котралӧны. Пон йӧз ноксигкості да сизьӧс вӧтлігкості пызан улас пӧттӧдз сёйис.

— Пӧтін-ӧ? — юалӧ сизь.

— Пӧтныд эськӧ пӧті да, горшӧй тай косьмӧ.

— Часлы ме тэнӧ юктала. Со тані дядьӧ сур сысъялӧ.

Жбыр лэбзис ӧшиньӧд сизь. Пуксис сур бӧчка вылӧ дай зэбгыны-кокавны кутіс пыдӧстӧ. Дядьӧ уськӧдчис сизь вылӧ. Лыйис тувнас. Тув воши, сизьлы эз веськав. Тувтӧ корсигкості став сурыс петіс джоджӧ. Пон пырис, горш веськавтӧдзыс юис суртӧ.

— Горшыд веськаліс-ӧ?, — юалӧ сизь.

— Горшыд эськӧ веськаліс да. Ӧні сэсся сералыштны кӧ!

— Серав, серав.

Буретш мунӧ вӧлі туй кузя вӧла доддя гырнич вузалысь. Сизь пуксис гырнич вылӧ да сизьдӧ мый вынсьыс. Гырнич вузалысь уськӧдчис беддьӧн. Сизьӧс кучкас эськӧ да — веськалі гырничӧ. Гырнич сявмуні. Скӧрмис дядьӧ, ёнджыка кутіс кучкавны. Ӧтчыд эз веськав сизьлы, пыр гырничӧ инмӧ. Сидзи став гырничсӧ жуллис. Пон туплясьӧмӧн сералӧ дядьӧӧс да сизьӧс.