ВЕЖӦРТӦМ ОТСӦГЫСЬ БУР ОЗ ОВЛЫ

Отсӧг эськӧ быдӧнлы лӧсялӧ да, сӧмын кужны колӧ отсасьныс. Кужтӧг бур пыдди унаысь лёк овлывлӧ.

Коркӧ важӧн ылын вӧрын оліс бобыль. Вӧрын ӧткӧн олӧм, дерт, абу гажа. Ӧткӧн, некодкӧд сёрниттӧг, овны он вермы. Дырнад мустӧммас ставыс: вӧрыд, лудыд, шорыд, веж туруныд. Гажтӧм босьтіс бобыльӧс вӧрын. Мӧдӧдчис йӧзӧс корсьны. Тӧдӧмысь, вӧрын кӧин-ош кындзи некод абу. Бобыльлы паныдасис зэв ыджыд ош. Бобыль повзьӧмысла босьтіс шапкасӧ да копрасьӧ ошлы. Ош сылы чургӧдіс лапасӧ. Сідзи найӧ тӧдмасисны, сэсся тшӧтш овмӧдчисны. Лун-лун ӧтлаынӧсь, оз янсӧдчывны. Мый йылысь найӧ сёрнитлісны, ог тӧд, сӧмын некоднаныс эз зэв варовӧсь вӧвны. Ёна мӧда-мӧднысӧ радейтісны. Бобыльлы нимкодь вӧлі ошлӧн отсасьӧмыс.

Ӧтчыд зэв жар лунӧ кык ёрт мунісны гуляйтны. Ветлӧдлісны быдлаті зэв дыр. Мортыд ош дорсьыд вынтӧмджык да регыдджык мудзис. Зэв гажа шор дорӧ водісны шойччыны. Бобыль мудзӧм бӧрад регыд чӧскыда унмовсис. Ош сы дінын куйлӧ, думнас видзӧ ёртсӧ. Недыр мысти бобыльлы ныр вылас пуксис гут. Ош шеныштіс лапанас. Гут пыркнитчис, бергӧдчис да чужӧм вылас лэбзис. Ош скӧрмис, кӧсйӧ ёртӧс гутысь мездыны, быдӧн мурзӧ. Мӧдысь шеныштіс, тайкӧ чужӧмсӧ гыжйыштас. Яндысьтӧм гут мӧдіс вильшасьны. Чужӧм вывсьыд плешкад пуксис. Ошлӧн скӧрмӧмла быдӧн вирыс пузис, кӧсйӧ гутӧс вины, — ӧддзӧдчӧмӧн бара лапанас швачнитіс плешкас ёртыслы. Со ӧд вежӧрттӧгыд отсасьӧмыд.