КУИМ ВОК
Овлісны-вывлісны куим вок. Налӧн вӧлі пӧрысь бать. Батьыслӧн вӧлі му да куим ӧш. Батьыс кулігас мусӧ юкис ставыслы ӧтмындаӧн, сэсся быдӧнлы сетіс ӧти ӧшкӧн. Коймӧд вок вӧлі йӧйкодь. Сійӧ ӧшсӧ эз дыр видз. Ӧти асывводз чеччис, кышасис (пасьтасис), петіс картаӧ, домаліс ӧшсӧ, кӧсйӧ нуны карӧ вузавны. Заворӧдыс петкӧдіс, мӧдіс нуны сикт кузя. Лунтыр нуис ӧшкӧс, рытъя вылын пырис вӧлӧкӧ, мудзис да пуксис шойччыны. Ӧшкӧс лэдзис йирсьыны. Недыр мысти ӧш сэсся вартӧдіс (пышйис) гезйӧн и быдӧн вӧрӧ. Йӧй вок чеччис, мӧдӧдчис гортӧ, воис да шуӧ вокъяслы:
— Ме талун ӧш вузалі.
Вокъяс юалӧны:
— Донысь-ӧ?
Йӧй шуӧ:
— Ӧкмысдас шайтысь.
Шӧркост вок шуӧ:
— Тэ менсьым аски ну жӧ.
Йӧй кӧсйысис. Мӧдіс аски нуны. Лунтыр нуис сикт кузя, рытнас вӧлӧкӧ пырис, пуксис шойччыны. Ӧш сэк кості вартӧдіс. Йӧй вок гортӧ воис. Шӧркост вок юалӧ:
— Но мый, вузалін?
— Вузалі.
— Донысь-ӧ?
— Ӧкмысдас шайтысь. Уджӧн сеті, сьӧмысла корисны Петыр лунӧ.
Медыджыд вокыс тшӧктіс жӧ нуны ӧшсӧ вузавны сійӧ жӧ донысь. Йӧй вок бара жӧ нуис сійӧ жӧ местаӧдз вӧлӧкӧ, пуксис шойччыны. Ӧш сэккості вартӧдіс кытчӧ кӧ гезйӧн. Йӧй гортӧ воис. Ыджыд вок юалӧ:
— Вузалін?
— Вузалі.
— Донысь-ӧ?
— Ӧкмысдас шайтысь, сьӧмысла Петыр лунӧ корисны.
Оласны-выласны да, воас Петыр лун. Йӧй вокӧс ыстӧны ыджыд вокъяс сьӧмла. Йӧй вок мунас. Мунас вӧлӧкӧдз, пуксяс. Мӧдар туй боксьыс казялас ыджыд пожӧм мыр. Йӧй босьтас кузь ньӧр, мунас мыр дінӧ, сувтас да шуӧ:
— Сьӧмла корин Петыр лунӧ, вай мынтысь куим ӧшкысь!
Мыр нем оз шыав. Йӧй шуӧ:
— Мый ещӧ нем он шыав, — пондіс кузь ньӧрйӧн кульны мырйӧс. Куляс, куляс да мырсьыс усьӧ кырсь тор. Сэсся йӧй вок шуӧ:
— Буракӧ пӧсявны жӧ кутін, чӧвлы ещӧ кульсям (пӧртчысям) да.
Кульсяс да ещӧ кульны мӧдас. Мыр пӧрас, мыр улын уна сьӧм. Йӧй вок зеп тыр сюялас, мӧдӧдчас гортӧ.
Ыджыд вокъяс юалӧны:
— Босьтін эн сьӧмтӧ?
— Босьті, ещӧ уна на коли вӧлӧкас мыр улӧ.
— Кытчӧ? — ыджыд вокъяс юалӧны.
— Эстчӧ, вӧлӧкас.
— Ну миянӧс сэтчӧ, — шуӧны вӧкъяс.
Вӧв доддяласны, мунасны мыр дінӧ да збыль аддзасны уна сьӧм. Телегаӧ сӧвтасны, нуасны гортӧ.
