ПОВЗИСНЫ

Пӧчӧ мӧс коллигас воштӧма вӧр дорӧ нинкӧм пӧвсӧ. Ветлысь-мунысьяс чужъялӧмаӧсь сійӧс туй вывсьыд бокӧ. Ог тӧд, дыр-ӧ нинкӧм куйліс сэні, быдӧн нин тай доръясыс удитӧма киссьыны-а.

Янсалӧма чой-воксьыс шырпи, тірӧдӧ вӧр дорті. Буретш нинкӧм дінад воис, лэптіс ныр, сьӧд моль синъяснас дзоргӧ. Пырны полӧ — гашкӧ пӧ кодкӧ эм да. Сэсся вӧсни гӧлӧснас чукӧстчис:

— Нинкӧмӧ, нинкӧмӧ, коді тэ пытшкын ӧлӧ?

Некод эз шыӧдчы. Овмӧдчис нинкӧм пытшкӧ шырпи. Коркӧ сэті шлёп-шлёп чеччалӧ лягуша. Аддзис нинкӧмӧс, юалӧ:

— Нинкӧмӧ, нинкӧмӧ, коді тэ пытшкын олӧ?

— Ме, шырильӧй-чойильӧй. Тэ нӧ коді ачыд?

— Ме лягуша — вадорса олысь.

— Лок пыр, олам тшӧтш!

Овмӧдчисны кыкӧн.

Стукйӧ-локтӧ кузь пеля кӧч нинкӧм дорӧ:

— Нинкӧмӧ, нинкӧмӧ, коді тэ пытшкын олӧ?

— Ми, шырильӧй-чойильӧй да лягуша — вадорса олысь! Тэ нӧ коді лоан?

— Ме кӧчӧ-чойӧ, — шуӧ кӧч.

— Лок тшӧтш миянкӧд олам!

Овмӧдчисны куимӧн.

Каньзьӧдӧ на дінӧ наян руч:

— Нинкӧмӧ, нинкӧмӧ, коді тэ пытшкын ӧлӧ?

— Шырильӧй-чойильӧй, да лягуша — вадорса олысь да кузь пеля кӧч. Тэ коді лоан эськӧ?

— Ме ручильӧй-бӧжильӧй.

— Лок миянкӧд тшӧтш олам!

Овмӧдчисны нёльӧн.

Недыр мысти довгӧ кузь пиня кӧин:

— Нинкӧмӧ, нинкӧмӧ, коді тэ ордын олӧ?

— Шырӧ-чойӧ, лягуша — вадорса олысь, кузь пеля кӧчӧ, ручильӧй-бӧжильӧй! Тэ нӧ эськӧ коді лоан?

— Ме кузь пиня кӧин.

— Лок пыр, миянкӧд тшӧтш олам!

Овмӧдчисны витӧн нин. Гажа, лӧсьыд вӧлі налы овны сэн.

Коркӧ на дінӧ локтӧ, котшсьӧдӧ баксігтырйи ыджыд сюра, кузь тошка кӧза.

— Беэ — беэ-бе... нинкӧмӧ, нинкӧмӧ, коді тэ пытшкын олӧ?

— Шырӧ-чойӧ, лягуша — вадорса олысь, кузь пеля кӧч, кузь пиня кӧин, ручильӧй-бӧжильӧй. Тэ нӧ эськӧ коді лоан?

— Ме тіянӧс сёйысь, сюръяс йылӧ лэпталысь.

Юрнас пыркӧдӧ, тошсӧ легӧдӧ, сюръяс лӧсьӧдӧма люкавны. Нинкӧмын олысьяс садьтӧг повзясны ставныс; нинкӧмысь чепӧсъясны, ӧтарӧ-мӧдарӧ сюв-сяв пышъясны.